Mak 10
10
Jisasol a'mwo kwolabolo tonyuro yeru'mdowapinodupudo tovino adoka tovinokwono
(Matyuu 19:1-12; Luuk 16:18)
1Jisasol su toro tomuu wuugollu'mo'mno sumaiyokwe Juudiya tomuuno avlavokaikono. Toro plaino sumaiyokwe wonyo Joodanovi igo'mguuno aga'mokailokaikono. Toro ki'mo'mduke toollu a'mwo abolo kwolallo ton aki aiko te abi'bwo'nopogano. Toro abi'bwo'nopo tonyu Jisasol yiuwi'nokai toga yodowodo kubalno aval'no sodubwasokaikono.
2Toro yodubwasoduke toga Farasi pworo bino sumaveyokwe Jisasollu abwolorawoneyokweyo'mo yamju abwiyoganoporogano. Toro tooro aro kuudoganoporogano. “A'mwo pwol gami abolo tovi ru'mdowapiyo'mo tov nokwo'mo'mdukono?” Kuudoganoporogano. 3Toro kuudoganopo toorai Jisasol samuugojokaikono. “Kevu neya uumjunmwalpino'moneyokwe Moosesol buro'nyovo ajakwollokaldeyo?” Samuugojokaikono. 4#Mt. 5:31Toro samuugojoka tovi Farasi tooro kuudoporogano. “A'mwo pwol gami abolo tovi ru'mdowapiyo'mo tool noru'mdowapiyo'moneyokwe puukwollukwiyo tovi me'no yakwollowo'ji toga aru'mdowapiyo'ji to'gwowi nokwo'mokwono. Moosesolluro ajakwolloka tovi toro nekudodowodokwono.” Kuudoporogano. 5Toro kuudopo toorai Jisasol aro kuudokaikono. “Kemoro poowokalago ton lumdo kuulopiyodupudo toorekulluno tov Moosesol toro sokwollaikubweyokakwono. 6#Mdk. 1:27, 5:2Toro kuvi kuruv muudu'nodo toga'no'gwowi Gooti tool yiuwi'nokai tonyu yakwollo'no yiuno a'mwo tookeno abolo tokweno sokwollosokaikono. 7#Mdk. 2:24Toro sakwollungiko tovino tov a'mwo pwol gami ganeyago tokwe ganumiyago tooke tovallu wuugollu'mowo'ji gami abolo tov amaro'ji toga guro'mwonyubullunovakono. 8Toro aguro'mwonyubullu toga go'no go'no mamjomwekovla'bullunovakono. Toro toval kulako yiuno puru'mono imo'nubullunovakono. 9Aki Gooti toolluro amoguro'mwojoso'ji su tovallu a'mwo pwol nomoru'mdowapiyo'jo.” Kuudokaikono.
10Toruda'ai Jisaseke'aro gamoro uumjunyokwe toorogai'aro tooro ago tovi aikomgu aulaporogano. Toro kuulno sumaveyokwe uumjunyokwe su tooro Farasi tooravuro sumdomguda'ai kuudoganopo tovino Jisasollu aki aiko te samuugojoporogano. 11Toro samuugojopo toorai Jisasol kuudokaikono. “A'mwo pwol gami abolo tovi ru'mdowapiyowo'ji abolo puvi amaro'ji tov gami abolo sumdomguda'ai tovi kaiya'no igolowo'ji kwonyalo imwalonekono. 12Aki abolo puruv gami kwolo toollu ru'mdowapiyowo'ji a'mwo pwollu kuuma'no'ji tov abolo su tov kwonyalo imwalonokwono.” Kuudokaikono.#Mt. 5:32; 1Krn. 7:10,11
Jisasol, “Kevu kwoloraiyo tobuuro miyomno bodopure su tobuurai nokwo wonyapino julo,” adoka tovinokwono
(Matyuu 19:13-15; Luuk 18:15-17)
13Toruda'ai a'mwo abolo pun kemi kwoloraiyo tonyu Jisasol ato uubogai'noneyokwe amokabopogano. Toro mokabodopure tonyu Jisasolluro uumjunyokwe tooro wono'mno yogalo amojurugoloporogano. 14Toro wuudodopure toga Jisasol gamoro uumjunyokwe toorai wono'no surodo'mo sokaikono. Toro toorai kuudokaikono. “Kwolaiyo taiyo numiyomno bodopure tonyu kevu uumjukuto mipinono. Nokwo wonyapino julo. Su tov aro tovino'mokwono. Aguto kig Gooti toolluro mido mollomwalodowodo tovi dolago tomuu kuulomwallo'mo tov a'mwo abolo ton yiuno kwoloraiyo akanbusuko sumo'nupi tono nokwo kuulomwalpinogano. 15#Mt. 18:3Nuvu nebal'no ikudumo'mokwono. Kwoloraiyo ton aguto kig Gooti toolluro mido mollomwalodowodo tovi ilaiyo molloma'dupudo kubalno kev kugaikul kuruv aval'no neya domollomarogaulo. Toro kuvi kuruv a'mwo pwol aguto kig Gooti toolluro mido mollomwalodowodo tovi kwoloraiyo tonbusuko ilaiyo mamollomaro'ji toolno'gwowi ku'nono maulomwalonekono.” Kuudokaikono. 16Toro wuujuno sumaiyokwe Jisasol kwoloraiyo amokabopo tonyu pwolda'ai pwolda'ai mogalausunyuno sumaiyokwe ato tokwe uubogai'no'no yogalo sugudo tov aro adubweyokaikono. “Gooti tool ilaiyo nyaikullugolmwalonekonoo.” Adubweyokaikono.
A'mwo kuto ivito bwotonyagokwe pwol Jisaseke kuuguudo adolo tovinokwono
(Matyuu 19:16-30; Luuk 18:18-30)
17Toruda'ai Jisasol puuto tovi kado'mo yoduke toga a'mwo pwol kano kano bino sumaiyokwe suduko binuguto'no'no aro kuudoganokaikono. “Ibwaso sugudo tookunoo. Nuu aiyo yiunokuudo mujomwekovlaiyo'moneyokwe tov adado yo'mi ma'monyudeyo?” Kuudoganokaikono. 18Toro kuudoganoka toollu Jisasol kuudokaikono. “Guu buro'nyo'mo mino, “Sugudoloo,” donyudadokuuno? Sugudo tool yiuno Gooti tookono. 19#Moll. 20:13; Moll. 20:14; Moll. 20:15; Moll. 20:16; Moll. 20:12Guvu loowo tovino kuudo nyau'mwakuno. Romiyosi mibinono. A'mwo pworavuro abolo tonyu kwonyalo mibinono. Kuuko mibinono. A'mwo pworaino kuunano mamollouruudubinono. Jokuuromato mibinono. Guu junumiyago juneyago tovallu kwako tomuu'aro duuwiyogawono.” Kuudokaikono. 20Toro wuujuno sumaiyokwe a'mwo tool kuudokaikono. “Ibwasokweyoloo, nuu kula'nyo togada'ai yiuwi'nokai su tonyu uumjungelabodumdonyugono.” Kuudokaikono. 21Jisasol toro toollu wonyuno sumaiyokwe kalo buuropino wino'no aro kuudokaikono. “Guu puvino supto kuuno sadokuuno. Mi neya donumjunono. Guu numjunyo'moneyokwe tooku aro ibinekugono. Guu a'mwo pworaiyomno plavo'bi gumoro yiuwi'nokai kuto ivito tonyu agubipuro. Toro agubipi tonyuda'ai nuugwiyo tov maro'bi a'mwo apoo'nyaiyo tekwojai wiyo'bi mi neya donumjunono. Toro subi tooku Gooti toolluro ago muunyu kai'muu mubiyo sugudo tollovo noma'binekugono.” Kuudokaikono. 22Toro tool kuto ivito bwotonyagokwe toolluno tov yogalo su tovi wuu'nyuno sumaiyokwe kumjujo kulako moropiyo'no jul'nyo ibwosuno'no Jisasollu kuugollu'mokavlavokaikono.
23Toro te Jisasol sumdo wonomollo'no gami uumjunyokwe toorai kuudokaikono. “Aguto kig Gooti toolluro mido mollomwalodowodo tovi dolago toru a'mwo kuto ivito bwotonyagokwe tekwojo kuulomwallo'mo tov kaveno mwimo'nupinekwojogano.” Kuudokaikono. 24Toro kuudoka tovino gamoro uumjunyokwe tooro kuudo bwotonyo sourukwapiyoporogano. Toro yourukwapiyodopure kworai kuruv Jisasol aki aiko te kuudokaikono. “Mi kwoloraiyoravoo. Aguto kig Gooti toolluro mido mollomwalo tovi dolago toru kuulomwallo'mo tov kaveno mimo'nodowodokwono. 25Sa'ai kemel pwol lodo tovi wuulo kuulopiyodapudo nodobuullo tovi'aro kuullo'mo tov kavenodo'maiyo. Su toro to'busuko kubalno a'mwo kuto ivito bwotonyagokwe tekwo aguto kig Gooti toolluro mido mollomwallo tovi kuullo'moneyokwe to'gwowi kaveno mwimo'nonekwogano.” Kuudokaikono.
26Gamoro uumjunyokwe tooro toro kuudoka tovino mollolokurosi bwotonyo yo'mno kuudoporogano. “Toro anekudumado tov aiyo yiunokuudo mujomwekovlaiyo'moneyokwe tovi ala'mworuvo nokwo mapino'mdeyo?” Kuudoporogano.
27Jisasol toro toorai moroono'no aro kuudokaikono. “Su tovi yo'mo tov a'mwo tooro ku'nono mipinokwono. Toro kuvi kuruv Gooti toolno'gwowi su tovi yo'mo tov nokwo'mekono. Su tov aro tovinokwono. Gooti tool yiuwi'nokai noonyumwonyu pun yo'mo kuudo sauro'ji kuruv kaveno yonekono.” Kuudokaikono.
28Toro wuudoduke toga Pital muudu'no aro kuudokaikono. “Dukonekwonadokuuno? Nevu nemi yiuwi'nokai tonyu yogallu'mowono gumi agumjunmwakuuwono.” Kuudokaikono. 29Pital toro wuujuno sumaiyokwe Jisasol kuudokaikono. “Nebal'no ikudumo'mokwono. Yiuwi'nokai a'mwo tooro mino tokwe'aro kuuguudo sugudo tokwe'aro tovalluno kuudo kuubwepi tooro kemi agodeyo kuugwai'yagorodeyo jo'mwodeyo kuuneyagodeyo kuunumiyagorodeyo kwoloraiyodeyo womdodeyo tonyu kuugollu'mopi tov 30a'mwo su tooro kwako akavi kuuno mwalopi toga yiuwi'nokai kuugollu'mopi ton aiko toru'no nomapinorogano. Noonyumwonyu kuto ivitodeyo agodeyo kuugwai'yagorodeyo jo'mwodeyo kuuneyagodeyo kwoloraiyodeyo womdodeyo ton muuduko pun mapinorogano. Me'no kuugollu'mopi su tooro muuduko punyu amapi toga Gooti tool 100-pela pugai'aro nuuwiyonekono. Toro amapi tooro tabunyuwuulo kun kuruv nomapinorogano. Tabunyuwuulo toro amapi kworo kuruv puga lukomgu abai'mowo'ji toga aiyo yiunokuudo mujomwekovlaiyo'moneyokwe tovi maropi yiunokuudo mujomwekovlapinorogano. 31#Mt. 20:16; Lk. 13:30Su toro toga, agasuro sumdomgu abillumo'numwolapo tooravuro bwotonyago tooro aiyowo'mo bwollumo'napinorogano. Aki agasuro aiyowo'mo abwollumo'numwolapo toorono'gwowi su toga sumdomgu nobillumo'napinorogano.” Jisasol toro kuudokaikono.
Jisasol gamoro nobollo'mo tokwe'aro nodukaiyo'mo tokwe'aro tovalluno aki aiko te kuudoka tovinokwono
(Matyuu 20:17-19; Luuk 18:31-34)
32Toruda'ai Jisaseke'aro gamoro uumjunyokwe toorogai'aro tooro puuto tovi'aro Jeruusalem'no avlavoporogano. Jisasol sumdomgu wano'no Jeruusalem ki'meyo'mo tovino luko miyoduke toollu gamoro uumjunyokwe tooro wono'mno kuudo bwotonyo sourukwapiyoporogano. Aki pworo lukomgu kuumjunopo kworo kuruv, Burowo'nyovo tov bai'mowono'mdukono, kuudo yauro'mno luko sumjunoporogano. Toro te Jisasol gami 12-pela toorai aki aiko te judo tomuu magulkuuro'no gami wimo'nyo'mo tonyuno kuudokaikono. 33Toro tool aro kuudokaikono. “Duu'nyuloo. Nevu Jeruusalem'no avla'mwakuuwono. Jeruusalem me'no ai'mowa'ji toga a'mwo pwol A'mwo Kwolaiyo Kuunodo toonyu galonumworarowo'ji pris mido mollomwalokwe toorogai'aro loowo tovino pi'mwo kuudokwe toorogai'aro toorai manubweyononyugono. Toro toonyu kooti yogalo danyopi nyudupinonyugono. “Neya abolono.” Toro dopi a'mwo Juu tooravuro miyawosunodupudo pworai manubwepinonyugono. 34Toro manbweyopi toga a'mwo bomwallo su tooro burolyogalo nyudopi ibupto nuupuropi wuulo tokwe gunyukuuronumollopi noromiyollusanubwepinonyugono. Toro aromiyollusanubwepi toga iruko pullapullu nuwolo'nowo'ji toga aki aiko te duka'monyugono.” Kuudokaikono.
Jemseke Jooneke todoral a'mwo aguto imo'nyo'mo kwinolo tovinokwono
(Matyuu 20:20-28)
35Toruda'ai Sebediyolluro muugunyo Jemseke Jooneke todoral bino sumaleyokwe Jisasollu aro kuudolorakono. “Ibwasokweyoloo, navu aro anakullunadopiyo. Namoro buro'nyo buro'nyodeyo tonyuno agudoganosi su tov guu neya ibinekugono.” Kuudolorakono. 36Toro kuudolo todorallu kuudoganokaikono. “Nuu kemi burowo'nyo ikullumo'mo dekullunadopiyo?” 37Toro kuudoganoka todoral kuudolorakono. “Guu gumoro jurogudo kuunodo tokwe a'mwo aguto kig mido mollomwalokwe sumo'nubi toga navu gumi wobo toru mwalowosi yogwapi yesunonakono. Toro imo'nowosi guuge yiuwi'nokai a'mwo abolo tonyu mido mollomwalanonogano. Toro toonalluro pwol gumoro anatomgu mwalonekono. Pwol gumoro kwonamomgu mwalonekono. Toro te aga guu toro imo'nyo'mo toonallu yowa'no jenakubwebinekudeyo?” Kuudolorakono.
38 #
Lk. 12:50
Toro kuudolo kworallu kuruv Jisasol kuudokaikono. “Kemoro anyudumalo tovino kuudo maiyo toorakikono. Toro toorakul nuvubusuko dado tov subwosunmi kubalno kev kworakul kuruv puga nokwo ibwosunbullunorakuldeyo? Aki nuvubusuko abolmi kubalno kev kworakul kuruv puga nokwo bolbullunorakuldeyo?” Kuudokaikono. 39Toro tooral kuudolorakono. “Tade, nokwo'monakono.”
Toro kuudolo toorallu Jisasol kuudokaikono. “Kuvinono ikullumo'nonorakikono. Toro te moro dado tov subwosunmi to'busuko kubalno puga kev kworakul kuruv ibwosunbullunorakikono. Aki moro nobollo'mo to'busuko kubalno puga kev kworakul kuruv bolbullunorakikono.” Kuudokaikono. 40“Toro kworakul kuruv moro kwonamo anato toru mwallo'mo tov moro jeso'moneyokweyo'maiyo. Toro kuvi kuruv kwonamo anato su toru mwallo'mo tov Gooti toolluro me'no sovo'dogalubweyongiko toorono mwallo'moneyokweyorukono.”
41Toro yajunodopure tovi gamoro uumjunyokwe atousal gabovo tooro wuu'no'mno Jemseke Jooneke todoralluno surodo'mo soporogano. 42#Lk. 22:25,26Jisasol yiuwi'nokai toorai doma'no sumaiyokwe kuudokaikono. “Kevu kuudo nyau'mwakovo. A'mwo Juu miyawosunodupudo pworaino, “Oo nemi mido mollonekumwallokwerodeyo,” dodupudorogano. A'mwo su tooro kevnokwero ilomoropunyo'moneyokwe a'mwo pworai womdo jurogudo ipureyokweyo'mo dumuurolo'mdupudorogano. Su toro duuwiyodupudo toorai bwolomorumwogapi yodapudorogano. 43#Mt. 23:11; Mk. 9:35; Lk. 22:26Toro yodupudo kuvi kuruv kevno'gwowi su toorobusuko mimo'nupinono. Kemoro tovida'ai pwol a'mwo aguto imo'nyo'mo kwino'ji tool kemi womdokwe pwolbusuko neya aikullumo'nono. 44Aki kemoro tovida'ai pwol sumdomgu ikullumo'nyo'mo kwino'ji tool yiuwi'nokai toorekulluro a'mwo ki'nato womdokwe pwekwobusuko neya aikullumo'nono.” 45Toro wuujuno sumaiyokwe kuudokaikono. “Nuu A'mwo Kwolaiyo Kuunodo kwonyu kuruv mino womdo anyupureyokweyo'mo abonyumaiyo. Toro kuvi kuruv nuu a'mwo abolo tonyu wiyo'mwojo'moneyokwe womdo yo'mo abonyugono. Toro toonyu a'mwo abolo bwotonyago tonyu mubiyo biyomallo'moneyokwe tovino bollo'mo abonyugono.” Kuudokaikono.
Jisasol a'mwo sumnowojokwe pwollu sukuloka tovinokwono
(Matyuu 20:29-34; Luuk 18:35-43)
46Toruda'ai Jisaseke'aro gamoro uumjunyokwe toorogai'aro tooro wagwolago Jerikoo toru abai'movoporogano. Toro bai'mo'mno sumaveyokwe lukomgu Jisasol wagwolago tovida'ai bolokwoduke toga gamoro uumjunyokwe toorogai'aro a'mwo bwotonyago pworogai'aro tooro kuumjunoporogano. Toro bolokwodopure toga a'mwo sumnowojokwe pwol puuto tovi wobo toru domdo ajugonyajukekono. Toro tool Timeyosolluro kwolaiyo Batimeyasolekono. 47Toro tool Nasaretda'ai Jisasol puuto te boduke toolluno wuu'no'no deko aro kuudokaikono. “Devitolluro kwolaiyo Jisasoloo, mino kalo neya agujunono.” Kuudokaikono. 48Deko toro wuudoduke toga bwotonyago tooro muudo'jokweyo'mo aduumjukuroporogano. Toro duumjuku'dopure kwol kuruv guureji wuujuno wuujuno sokaikono. “Devitolluro kwolaiyoloo, mino kalo agujunono.” 49Deko toro doduke toollu Jisasol wuu'no'no kuru kuuloda'mno sumaiyokwe a'mwo toorai kuudokaikono. “Domodopiyabilo.” Toro tooro a'mwo toollu kuudoporogano. “Jisasol gumino adoguma'mwallo. Toro tovino tov gumi poowokalago tov jurogudo nokwo imo'no'bi julodavono.” 50Toro kuudopo tool ilaiyo ino sumaiyokwe nobwaiyo tov amodosodukwopiyokaikono. Toro modosodukwopino sumaiyokwe yere ilovlovodavo'no Jisasollomno abokaikono. 51Toro aboka toollu Jisasol kuudokaikono. “Nuu gumi buro'nyo gujumo'mo dogujunadopiyo?” Toro kuudoka tool kuudokaikono. “Ibwasokweyoloo, Nuu sumdo kinumo'mo anyunadopiyo.” Kuudokaikono. 52Toro kuudoka toollu Jisasol kuudokaikono. “Guu kuudo anubwemwakudo tovino tov agujukulmono. Toro tooku nokwo wanbinekugono.” Toro kuudoka kuga'gwo kuuno a'mwo sumnowojokwe tool sumdo kino'no puuto tovi Jisasollu kuumjunokaikono.
Currently Selected:
Mak 10: SMB
Highlight
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida
