Mak 16
16
Jisasol aiyo aiko te adukavoka tovinokwono
(Matyuu 28:1-8; Luuk 24:1-12; Joon 20:1-10)
1Sabat me'no abawoka toga Makdalada'ai Mariyakwe'aro Jemsollu ganeyago Mariyakwe'aro Saluumeyokwe'aro ton wobeya sudo kuunyokwe pun a'mwo bwiyo su toollu uubweyo'moneyokwe abiyomaropogano. 2-3Toruda'ai Sande lomwo sosaga toga abolo su ton a'mwo buuso sulpuuto toru'no abopogano. Toro bino sumaveyokwe toga puuto tomuu aro somjojungobopogano. “A'mwo buuso noullo tovi sulo allukurosungiko toollu gadooro mogunyugolowosupino'mdeyo?” Somjojungobopogano. Toro yomjojungobino sumaveyokwe kuujo tool aiyo bwoladoduke toga a'mwo buuso su toru abai'movopogano. 4Toro bai'movo'mno aro kwonopo tov sulo bwotonyo kuunodo kwollu kuruv me'no ausogunyugolowosungiko toollu kwonopogano. 5Toro ton a'mwo buuso sulpuuto tomuu kuula'mno ensel pwol a'mwo muugunyo pwolbusuko imo'no'no mwaloduke toollu kwonopogano. Toro tool youro kumi'yago kunaikwolujo tokwe yeso'no anato tomgu aulomwallajukekono. Toro kuulomwaloduke toollu abolo su ton wono'mno luko amollosopogano.
6Toro tonyu ensel kwonopo tool kuudokaikono. “Kevu luko mamollopipiyo. Kevu Nasaretda'ai Jisasollu i'noguropte tovi amovoromiyoguroptowosumwa'jupo toolluno sa'mgonadokwopo kwol kuruv me'no aduka'mokaikono. Akawai mwoso. Gamoro aboulomorosumwa'jupo su toru doonyulo.” 7#Mt. 26:32; Mk. 14:28Toro te aro kuudokaikono. “Kevu plavopi gamoro uumjunyokwe toorogai'aro Pitaike'aro toorai kuuguudo tov aro duujulo. “Jisasol Galili'no sumdomgu kwolda'ai wanodowo'jure toollu kumuu wonpinekono. Gamoro me'no aikudoka tovi kuvinono uumjunowo'ji wanodowo'jure toollu noonpinekono.” Toro duujulo.” Kuudokaikono.
8Toro kuu'nopo ton luko amorumoukuuropiyopo tovino bu'buto polno sumaveyokwe a'mwo buuso sulpuuto tovida'ai lukado abolokwopogano. Toro bolokwino sumaveyokwe luko amorumoukuuropiyopo tovino a'mwo pwolnodo kwol kuruv muudopogano.
Jisasol Makdalada'ai Mariyavi kwiyalo'noka tovinokwono
(Matyuu 28:9-10; Joon 20:11-18)
9Toruda'ai Sande lomwo iru'mago tovi Jisasol me'no dukaino sumaiyokwe gami uumjunyokwe toorai yere mwiyalo'no'no kwol kuruv sumdomgu Makdalada'ai Mariyavi kwiyalo'nokaikono. Abolo su tovi sumdomgu Jisasol kuullo ma'no ma'nodo atobuul ato pworal toorai me'no amodovomjapiyoka su tov kurukwono. 10Toro tov a'mwo Jisaseke amwallajupo toorai wuujo'moneyokwe avlavokakwono. Toro plaino sumaiyokwe a'mwo Jisaseke amwallajupo su tooro kanyu sa wo'dupu kumdato yodopure toorai abolo su tov kuuru'marokakwono. Toro wuuru'ma'no sumaiyokwe Jisasollu me'no kwonoka tovino kuudokakwono. 11Abolo su tov aro kuudokakwono. “Nuu Jisasol aiyo mwaloduke toollu me'no kwonmekono,” kuudokakwono. Toro kuudoka tovi a'mwo uumjunyokwe tooro wuu'no'mno kworo kuruv kuudo muubweyoporogano.
A'mwo uumjunyokwe pworal Jisasollu kwonyogalo tovinokwono
(Luuk 24:13-35)
12Toruda'ai lukomgu a'mwo su tooravuro pworal wagwolago tovida'ai bolokwino sumaleyokwe womnago tomuuno puuto tovi avlavolorakono. Toro plaino sumaleyokwe toga Jisasol judo pumgu'aro wiyalo'noduke toollu abuuru'marolorakono. 13Toro toollu wonyuno sumaleyokwe toga Jisasolluro uumjunyokwe gabovo toorai wuujo'moneyokwe aikomgu plaino sumaleyokwe Jisasollu me'no kwonolo tovino wuudodole kworo kuruv kuudo muubweyoporogano.
Jisasol gamoro uumjunyokwe toorai modomollo'moneyokwe womdo tovi aduuwiyoka tovinokwono
(Matyuu 28:16-20; Luuk 24:36-49; Joon 20:19-23)
14Toruda'ai a'mwo 11-pela tooro noulonomwalodopure toga Jisasol kemoro sumdollu toru abwiyalo'nokaikono. Jisasol gamoro adukavoka tovino a'mwo abolo kwonopo tonyuro dodolubweyodopure tovi kuudo muubweyajupo tovino yogalo amojurugolokaikono. “Kevu kemoro poowokalago ton lumdo kuulopiyodupudo toorekul mino kuudo manubweyodupudorekikono.” Amojurugolokaikono. 15#Mt. 28:19; Lk. 24:47-48; Krt. 1:8Toro wuujuno sumaiyokwe aki aro kuudokaikono. “Kevu yiuwi'nokai kwako tomuu plavopi mino kuuguudo sugudo tov yiuwi'nokai a'mwo abolo tonyu domoruudomollogaulo. 16Toro moruudomollodopure tovi a'mwo pwol mino kuudo nubweyowo'ji wonyo uuvollunonekono. Su toro so'ji toollu Gooti tool aiyo yiunokuudo mujomwekovlaiyo'moneyokwe tov nuuwiyo'mwojonekono. Toro kuvi kuruv a'mwo pwol mino kuuguudo sugudo tovi kuudo muubweyo'ji toolno'gwowi Gooti toolluro kirumwallo tov nomaronekono. 17Toro kuvi kuruv a'mwo kuudo anubwepi su tooro Gooti toolluro jurogudo kwiyo'ji tokwe duuwallo pun nokwo ipinorogano. Toro tooro mino yovo tovida'ai kuullo ma'no ma'nodo toorai nokwo modovomjapipinorogano. Aki yogaljo muuduko punyu nokwo dupinorogano. 18Aki toro tooro kemi ato tokwe gabakuto toorai nomworapinorogano. Toro amworapi toga tuko adopi kworo kuruv mabolpinorogano. Aki marasin pun a'mwo toorai romiyosodowodo tonyu anpi kworo kuruv mabolpinorogano. Aki a'mwo abolo nobollokwe tonyu kemoro ato tokwe uubogai'nodopure tovi'aro ikulnupinogano.” Jisasol toro kuudokaikono.
Jisasol muunyu i'muuno suloka tovinokwono
(Luuk 24:50-53; Kuurotokwe 1:9-11)
19 #
Krt. 1:9-11
Toro wuujuno sumaiyokwe Aguto Jisasol muunyu i'muuno sulokaikono. Toro ilno sumaiyokwe Gooti toolluro anato toru sulomwalokaikono. 20Toruda'ai gamoro uumjunyokwe tooro yiuwi'nokai tomuu plavo'mno kuuguudo tov amodomolloporogano. Toro modomollodopure toga Aguto Jisasol kworogai womdo yodowo kwiyo'mwojajukekono. Aki duuwallo jurogudo pugai kwiyo'mwojajukekono. Toro wiyo'mwojoduke tovida'ai kuuguudo modomollodopure su tovino jurogudo aduuwimwojajukekono.
Currently Selected:
Mak 16: SMB
Highlight
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida
