Luuk 1

Luukol kuuguudo akav Tiyafulosollomno sokwollapiyoka tovinokwono

1Guu a'mwo aguto Tiyafuloseku moro puukwollo sokwollagubwemo akav aro tovinokwono. Nemi akuuto toru yiuwi'nokai Gooti toolluro womdo nekulloduke tovino a'mwo judo'no judo'nodo tooro puukwollo yakwollo'mo yamju kwiyoganyajuporogano. Toro tooro puukwollo go'no go'nodo tonyu kuvinono me'no sakwollajuporogano. 2Toro sakwollajupo su tooro yiuwi'nokai nemi anekullumo'nugelabiyajupo tonyuno me'no amuugonallajuporogano. Aki toro tooro Gooti toolluro yogalo tokwe a'mwo womdokwe kwimo'nyajuporogano. Toro wimo'nodupu Gooti toolluro yogalo su tokwe amodomollajuporogano. Toro tooro yiuwi'nokai amuugonallajupo su togai'aro yogalo amodomollajupo togai'aro su ton nemoro ato tovi anekubweyoporogano.

3Toro to'busuko kubalno nuu kwonyu kuruv aro kuudo yau'dumdonyugono. Nuu yiuwi'nokai sumo'nugelabiyajupo tonyu po'dogalo kinomjumelabodumdonyugono. Toro kinomjumelabodumdo su tovino kuuguudo idopto'nodo tovi puukwollo neya yakwollumonyugono. Yau'dumdonyugono. Toro toonyu guu mi a'mwo aguto Tiyafulosekujomno pi'mwono yokwollagubwemo'mokwono. 4Toro sokwollagubwemi tovi guu mojagilo'bi kuudo noullo maullo nyau'mwalbiyo. Toro kweku kuruv kuuguudo idopto'nodo tovi mojagilo'bi aro kuudo yau'mwalbinekugono. Oo mi sodonubwasopo su tov nebal'nodo'mdeyo. Kuudo nokwo yau'mwalbinekugono.

Sekoraiya'wolluro kwolaiyo Joonol nyumo'nono tovinokwono

5Herootol Juudiya tomuu a'mwo aguto kig mido mollomwaloduke toga Abija iko tovasuda'ai pris pwolluno yovo tov Sekoraiya'wolekono. Gamoro abolo tovino yovo tov Elisabetoveyokwono. Abolo su tov Eroonolluro iko tovasuda'aiyokwono. 6Toro teyaul Gooti toolluro sumdo tovi sugudo to'no kwimo'nyajuleyaukono. Aki Aguto toolluro yiuwi'nokai loowo tonyu pi'mwono kuumjungovlaiyajuleyaukono. 7Toro kiyaul kuruv kwoloraiyo miyawosunyajuleyaukono. Su tov aro tovinokwono. Elisabetov kwollukokwono. Aki yiuwi'nokai teyaul yadaiyo me'no sumo'noleyaukono.

8Toruda'ai Sekoraiya'weke'aro gavuge iko avalo tovasuda'ai pris toorogai'aro tooro kemi pris womdo yo'moneyokwe toga abai'movokakwono. Toro bai'mo'mno sumaiyokwe iruko pullugwoji Sekoraiya'wol Gooti toolluro sumdollu toru pris womdo sokaikono. 9Pris su tooro aro sajunoporogano. Nevu i'bwo'nowa'ji nemida'ai pwol Aguto toollu ilomoropiyo'moneyokwe ago Jeruusalem wo'dowodo tovi wobeya sudo kuunyo'moneyokwe tov ala'mwol kuulluroudapiyono'mdukoneyokwe tovino yenyubworomallo'mo satuu sumwonyo puruv neya yano. Pris tooro kemida'ai pwollu jeso'mo tooro pasudo su tovi'aro uumjunodupu ajesajuporogano. Sumwonyo su tovi ino sumaveyokwe Sekoraiya'wollu senyubworomaroporogano. 10Toro te Sekoraiya'wol Gooti toollu ilomoropiyo'moneyokwe ago tovi anakuuto tomuu wobeya sudo kuunyo'moneyokwe tov kuulluroudapiyoduke toga a'mwo abolo kwolallo bwotonyago ton kwa'mgu tomuu mwalo'mno subusu'nyogalo adomwallajupogano.

11Toro domwalodopure toga Aguto toolluro ensel pwol wobeya sudo kuunyo'moneyokwe dukwagupto tovi anato tomgu abodavokaikono. 12Toro boda'mduke toollu Sekoraiya'wol wono'no morumoukuropino sumaiyokwe luko sokaikono. 13Toro yoduke kwollu kuruv ensel tool aro kuudokaikono. “Sekoraiya'woloo, guu luko mibinono. Gumoro subusu'nyogalo dodumdo tovi Gooti tool me'no guu'nodowodekono. Toro te gumoro abolo Elisabetov kwolaiyo pwol nyomaronokwono. Kwolaiyo somaro'ji su toolluno yovo tov Joonolo mullowa'binekono. 14Toro toolluno guu ilaiyo ibwosunbinekugono. Aki a'mwo abolo bwotonyago kun kuruv kwolaiyo somaro'ji su toolluno ilaiyo ipinogano. 15Kwolaiyo su tool Aguto toolluro sumdo tovi a'mwo yovokwe nyumo'nonekono. Toro toolluno tov wain wonyodeyo oo imo'wonyodeyo tonyuno kumako neya mwalonekono. Aki kwolaiyo su toollu yere miyoma'dowo'jure kugada'ai Gooti toolluro Kuullo tool aiyowomno noullo'mowopiyonekono.

16Toro tool Isuraiyolda'ai a'mwo abolo bwotonyago tonyu kemi Gooti Aguto toollomno aikomgu neya yodu'mwonyugobupureyokwe wiyo'mwojonekono. 17Aki Gooti tool aiyoga Ilaijallu kuubweyajuko to'busuko kubalno kwolaiyo su toollu gamoro Kuullo tooke'aro jurogudo tokwe'aro toval nuubweyonekono. Toro kuubweyo'ji tool Aguto toollu sumdomgu wanonekono. Toro wanowo'ji kuunumiyago tooravuro poowokalago tonyu duuguunyumwojonekono. Toro aduuguunyumwojo'ji tovida'ai kwoloraiyo ton kemi kuunumiyago tooravuro poowoguro'mwoga wimo'numwalpinorogano. Aki gumoro kwolaiyo sawosunbi su tool a'mwo abolo kisuvolo yodupudo tonyu duuguunyumwojonekono. Toro aduuguunyumwojo'ji tovida'ai a'mwo abolo su ton a'mwo idopto'nodo pworavuro pi'mwo kuudo tovino uubwenupinogano. Su tov Aguto tool abwo'ji toollo'mo a'mwo abolo ton neya yovrowosunpino'moneyokwe tovino'mokwono.”

18Ensel tool toro kuudoka tovi Sekoraiya'wol aro kuudoganokaikono. “Nuvu yadaiyo tekwonyugono. Aki moro abolo kuruv yadaiyo tobuukono. Toro teyonaulluno tov gumoro yogalo anyudumodo su tov, Oo nebalo'mdukoneyokwe, tovino nuvu adadomgu'aro kuudo nokwo youroma'monyudeyo?” Kuudoganokaikono. 19Toro kuudoganoka toollu ensel tool aro kuudokaikono. “Nuvu Gebriyolonyugono. Toro toonyu Gooti tooke mwalodumdonyugono. Gooti su tool kuuguudo sugudo akakwe gumi gujo'moneyokwe amonuwopiyamokanyugono. 20Toro te guu neya duu'nono. Guvu moro yogalo agudumo tovi kuudo muubwemodo tovino tov gumoro mago tov yogalo jo'moneyokwe mara'binekugono. Toro kweku kuruv yiuno moro yogalo agudumo su tov kuvinono me'no sumo'no'ji toga'no yogalo aiko te dubinekugono. Aki moro yogalo agudumo su ton nebal'no kuvinono nyumo'nupinogano.” Ensel tool toro kuudokaikono.

21Toruda'ai Sekoraiya'wol Gooti toollu ilomoropiyo'moneyokwe ago tovi anakuuto tomuuda'ai yere mabolokwoduke toolluno a'mwo abolo sogwollo kwinyajupo ton kuudo kwolallo sourukwapiyopogano. 22Toro yourukwapiyodopure toga Sekoraiya'wol ilomoropiyo'moneyokwe ago tovida'ai kwa'mgu tomuu abolokwokaikono. Toro abolokwoka kwol kuruv kuuguudo jo'moneyokwe gamoro mago tov ku'nono maravokaikono. Toro toollu a'mwo abolo ton wonyuno sumaveyokwe kuudo sauropogano. Oo su tool Gooti toollu ilomoropiyo'moneyokwe ago tovi anakuuto tomuu duuwallo puvi me'no kwonmokaldeyo, kuudo sauropogano. Toro te Sekoraiya'wol yogaimajo mujomwekovla'mdowodo toga yiuno gami ato tokwe to'no subwasajukekono.

23Toro tool gami pris womdo tov me'no yopino sumaiyokwe gami ago tomuuno avlavokaikono. 24Lukomgu gamoro abolo Elisabetov kwolaiyo sumwoluko sumo'nokakwono. Toro imo'nyuno sumaiyokwe yiuwi'nokai lobako atobuul tobuullu ago tovida'ai kwa'mgu tomuu mabillomollajukokwono. 25Toro tov aro adokakwono. “Oo Aguto tool gamoro yasuwa'wino sugumaluko tov mi anubwemoka tovida'ai kwolaiyo sumwoluko sumo'numono. Aki nuu a'mwo abolo tonyuno wogulo ibwosunodumdo tovi amanyudukwopimaiyoo.” Adokakwono.

Mariyav Jisasollu yomarono tovinokwono

26Toruda'ai Elisabetovuro kwolaiyo sumwoluko tov lobako atobuul ato pwol kuuwolo'nokakwono. Toro uuwolo'noduke toga Gooti tool ensel Gebriyolollu wagwolago puruv Nasaretovo dodupudo tomuuno amodapiyokaikono. Wagwolago su tov distrik Galili tomuu wo'dowodokwono. 27#Mt. 1:18Toro te ensel tool abolo puruv a'mwo pwolnodo kweke kuruv sumwonyo miyajuko toviyomno amodapiyokaikono. Abolo su tov a'mwo aguto kig Devitolluro iko tovasuda'ai a'mwo pwollo'moneyokwe ajudoubwengikokwono. A'mwo su toolluno yovo tov Joosepolekono. Toro toollo'moneyokwe abolo ajudoubwengiko tovino yovo tov Mariyaveyokwono.

28Toro te ensel tool Mariyaviyomno plaino sumaiyokwe aro abuudokaikono. “Ilaiyokwono. Aguto tool sugudo bwotonyo agubweyadopiko to'guuge amwallo.” Kuudokaikono. 29Ensel toolluro toro kuudoka tovi Mariyav wuu'nyuno sumaiyokwe buro'nyo kavlo tovino dukonyudadopiyokwe jul'nyo ibwosuno'no kuudo kwolallo sourukwapiyokakwono. 30Toro yourukwapiyoduke tovi ensel tool aro kuudokaikono. “Mariyavoo, guu luko mibinono. Gooti tool gumino ilaiyo bwotonyo amagujadopiyo. 31#Mt. 1:21Neya duu'nono. Guvu gumoro sumwoluko tovi kwolaiyo pwol sumo'no'ji toollu nyoma'bino'guugono. Kwolaiyo soma'bi su toolluno yovo tov Jisasolo yowa'binekono. 32#2Sam. 7:12,13,16; Ais. 9:7Aki Kwolaiyo su tool aguto imo'nonekono. Aki toro toolluno yovo puruv aro wuudupinekono, Gooti Yiuwi'nokai Tonyu Uuwolo'mdowodo toolluro Kwolaiyolo, dupinekono. Gooti Aguto tool Kwolaiyo su toollu gami jukweyago aguto kig Devitolluro mido mollomwalo tov nuubweyonekono. 33Toro tool yiuwi'nokai Jekoopolluro iko tovasuda'ai a'mwo abolo tonyu mido momjomwekovlawonekono. Aki aguto kig toolluro mido mollomwalo su tov maduuwiyopiyowo'ji yiunokuudo mujo'movla'mwalonokwono.” Ensel tool toro kuudokaikono.

34Toro kuudoka tovi Mariyav ensel toollu aro kuudokakwono. “Gumoro anyudumodo akav adadomgu'aro kuvinono imo'numo'midukono? Nuvu a'mwo pwolnodo kweke kuruv sumwonyo miyodumdo to'migono.” Kuudokakwono. 35Toro kuudoka tovi ensel tool aro kuudokaikono. “Gooti toolluro Kuullo tool nobagi'mowono'guugono. Toro bagi'mowo'ji Gooti Yiuwi'nokai Tonyu Uuwolo'mdowodo toolluro jurogudo tov gumi noborogurogumarono'guugono. Toro tovino tov kwolaiyo soma'bi tool Gooti toolluro kuunodo wimo'numwalonekono. Toro toolluno yovo puruv, Gooti toolluro Kwolaiyolo, dupinekono.

36Toro te neya duu'nono. Gumoro iko avalo tovasuda'ai Elisabetov yadaiyo kubuul kuruv sumwoluko kurukweyokwono. Aki su tovino, “Kwollukokwono,” dodupudo kuvi kuruv kwolaiyo pwol nyomaronokwono. Toro tov sumwolukokwe mwaloduke tov lobako atobuul ato pwol kuuwolo'nadopiyo. 37#Mdk. 18:14Toro te Gooti tool buro'nyo buro'nyodeyo pun yo'mo kuudo sauro'ji tov kuvino yonekono.” Kuudokaikono. 38Toro wuujuno sumaiyokwe Mariyav ensel toollu aro kuudokakwono. “Nuvu Aguto toolluro womdokwe to'migono. Toro te gumoro yogalo anyudumodo su tov nokwo anyumo'nono.” Kuudokakwono. Toro wuujuno sumaiyokwe ensel tool kuugollu'movokaikono.

Mariyav Elisabetovi iru'mato kwiyoka tovinokwono

39Su toro toga Mariyav plaiyo'moneyokwe sovrowosokakwono. Toro yovrowosunyuno sumaiyokwe wagwolago puruv muumuudo toorai tomuu wo'dowodo tovino yere avlavokakwono. Wagwolago su tov kwako Juuda tomuu wo'dowodokwono. 40Toro tovi ki'mo'mno sumaiyokwe Sekoraiya'wolluro ago tovi aulokakwono. Toro kuulno sumaiyokwe Elisabetovi wuuru'maro'no, “Ilaiyokwono,” kuudokakwono. 41Mariyav toro kuudoka tovi Elisabetov wuu'nyuno sumaiyokwe toga gamoro sumwoluko anakuuto tomuuda'ai kwolaiyo aulomnallajuko tool ilodukwopi sokaikono. Aki Gooti toolluro Kuullo tool Elisabetovuro poowokalago tovi aullo'mowopiyokaikono.

42Toro kuullo'mowopiyoduke tovino tov Elisabetov Mariyavi guureji aro kuudokakwono. “Gooti tool yiuwi'nokai abolo tonyuda'ai yiuno guu judo to'guujuno to'no sugudo bwotonyo akav agubwemwallo. Aki gumoro sumwoluko tovi anakuuto tomuuda'ai kwolaiyo nyoma'bino su to kwollu kuruv sugudo bwotonyo tov kuubwemwallo. 43Aki guu mi Aguto toolluro ganeyago'guugono. Toro to'guu nuu tobuunyu iru'mato anyadokuudo tov buro'nyo kavlo tovino'mdeyo? Nuu abolo yasuwa'nodo pubuunyugono. 44Neya duu'nono. Nuu gumoro yogaimaguurai nyudodore tovi mi kaduko tokwe muudu'no kuu'numo toga moro sumwoluko tovi anakuuto tomuuda'ai kwolaiyo muudoga tool ilaiyo bwotonyo yodowo ilodukwopi sumokaikono. 45Mariyavoo, Aguto tool ensel toolluro mago tovi'aro gumi yogalo agudumoka tov kuvinono nogujumo'nonokwono. Aki guu ensel toolluro yogalo agudumoka su tovino kuudo kuubwemwakudo tovino tov Aguto tool sugudo bwotonyo tov nogubwemwalonekono.” Elisabetov toro kuudokakwono.

Mariyavuro Gooti toolluno ilomoropiyo'mo dato adoka tovinokwono

46Aki su toro toga Mariyav aro adokakwono.

“Moro poowokalago tokwe mi Aguto toollu ilomoropiyodamdo'migono. 47Aki mi Nyo'mwojo'moneyokwe Gooti toolluno moro kuullutago tokwe ilaiyo bwotonyo sumwako'migono. 48Aro tovinokwono. Nuu gamoro womdokwe bwolomoropinodamdo tobuunyu yovo nonaguto ku'mi kuruv kuudo me'no sanuurokaikono. Kuudo pun jaullulo. Yiuwi'nokai a'mwo abolo lukomgu imo'nugelabupino ton mino aro dupinogano. “Oo abolo su tovi sugudo bwotonyo tov kuubweyoka'mdeyo,” mino yiunokuudo su toro dumwalpinogano.

49Su tov aro tovinokwono. Jurogudo kuunodokwe tool numiyo'moneyokwe womdo aguto sanubweyokaikono. Toro toolluno yovo tov yiuno sugumaluko to'no imo'nodowodokwono. 50Aki a'mwo abolo pun Jurogudo su toollu dolago tomuu aulomorumwallunpi tonyu Jurogudo su tool kalo mamwonyowo'ji kavo uubemwojumwalonekono. A'mwo abolo agasuro togai'aro lukomguda'ai sumo'nupi togai'aro yiuwi'nokai sumo'nugelabupi su tonyu kavo yiunokuudo uubemwojumovla'mwalonekono. 51Toro tool gamoro ato tokwe womdo bwotonyo tov me'no sokaikono.

Aki toro tool a'mwo pworo kemi poowokalago kuudo togai ilomoropunyu yodapudo toorai amojo'bworapiyoka tooro gomno gomno sounopiyoporogano. 52Aki toro tool a'mwo jurogudokwe pworo kemi sia kig tomuuda'ai abwolomorumwogapiyokaikono. Aki a'mwo yovo nonagutokwe pworaino'gwowi muunyu toru sulomorumwallokaikono. 53Aki toro tool a'mwo abolo mujuko yodopure tobuurai noonyumwonyu sugudo togai wiyoduke tovida'ai anyuto'nopogano. Aki a'mwo abolo kuto ivito nuugwiyo bwotonyagokwe tonyuno'gwowi noonyumwonyu pugai amorapiyokalmaiyo. Toro kwol kuruv yasuwa'no to'no amodapiyokaikono.

54-55 # Mdk. 17:7 Aki toro tool gavnokweyolluro subuu'yamju puruv aiyoga aro sajunokaikono. Oo yiuwi'nokai toga nuu Eburaiyameke'aro gamoro jukweyago kwoloraiyo nyumo'nupino togai'aro tonyuno kalo mamwonyo'mi kavo uubemwojumwalmonyugono. Gooti su tool nemi nellukweyago sumdomguda'ai tonyu subuu'yamju kwiyoka tovino aki aiko te kuudo yaullokwekono. Toro tovino tov gamoro a'mwo abolo womdokwe Isuraiyolda'ai tonyu wiyo'mwojumovla'mdowodekono.”

Mariyav toro adokakwono. 56Mariyav Elisabetokwe lobako pworapwolo'mno'juki mwalno sumaiyokwe gami ago tomuuno aikomgu avlavokakwono.

Elisabetov Wonyo Galuvollokwe Joonollu somaroka tovinokwono

57Elisabetov kwolaiyo yomallo'mo abai'movoka toga kwolaiyo pwollu somarokakwono. 58Toro somaroka tovino a'mwo abolo pun aro ajunopogano. “Oo Aguto tool Elisabetovi kalo amamwonyumaiyoo,” sajunopogano. Toro yajunodopure tovi a'mwo abolo pun Elisabetovuro ajumiyo avalo tovi mwalodupudo togai'aro aki gami avalo kuunodo togai'aro ton wuu'nyuno sumaveyokwe Elisabetokwe ilaiyo bwotonyo sopogano. 59Yo'mno aki 8-pela iruko tobuul abawoka toga kwolaiyo muudoga su toolluro lakulkulako tovi deyo'moneyokwe abi'bwo'nopogano. Toro bi'bwo'nyuno sumaveyokwe kwolaiyo muudoga toolluno yovo tov gami ganumiyago Sekoraiya'wolluno yovo tovi yowallo'mo kwinopogano. 60Toro kuvi kuruv kwolaiyo muudoga su toollu ganeyago tov aro kuudokakwono. “Awiyo, yovo su tovi miyowaranekono. Toro kuvi kuruv yovo, Joonolo, to'gwowi nyowaranekono.” 61Toro kuudoka tovi aro kuudopogano. “Yovo su tov gumi avalo tooraida'ai pwolnodo kwollu kuruv miyowa'dupudokwono.” 62Toro wuujuno sumaveyokwe kwolaiyo toollu ganumiyago toollu wuudoganyo'moneyokwe tov kemi ato tokwe ibwaso'mno yamuugojo aro kwiyopogano. “Kwolaiyo muudoga su toolluno yovo tov ala'mwolo yowaranoldeyo?” Kuudoganopogano. 63Toro kuudoganopo tovi Sekoraiya'wol puukwollo yakwollo'mo puruv anumokabopureyokwe subwasokaikono. Toro ibwasuno sumaiyokwe puukwollikwiyo puvi kwiyopekono. Toro kwiyopo tovi puukwollo aro sakwollokaikono. “Kwolaiyo su toolluno yovo tov Joonolekono.” Sakwollokaikono. Toro sakwolloka tovino a'mwo abolo su ton wono'mno mollolokurosi sopogano.

64Toro yourukwapiyodopure kuga'gwo kuuno gamoro mago tov aki aiko te ravo'no yogalo jo'moneyokwe gamoro kwavlolo tov aki aiko te kwaikwai sokakwono. Toro ino sumaiyokwe Sekoraiya'wol Gooti toolluno yovo tovi ilomoropiyo'moneyokwe yogalo pun adokaikono. 65Toro wimo'noduke tovino yiuwi'nokai a'mwo abolo gavuge ajumiyo avalo tovi mwalodupudo ton luko sopogano. Aki yiuwi'nokai kwimo'noka su tonyuno kuuguudo tov kwako Juudiyada'ai muumuudo toorai tomuu aiyowomno abomje'nugoulokakwono. Toro bomje'nugoulno sumaiyokwe yiuwi'nokai a'mwo abolo mwalodupudo su ton abomjodumoulapogano. 66A'mwo abolo su tonyuro kuuguudo bomomjodumoulodopure tovi a'mwo abolo gabovo pun wuu'nodupu aro sajunyajupogano. “Kwolaiyo muudoga su tool a'mwono sumo'no'ji toga adadomgu'aro imo'nonoldukono?” Sajunyajupogano. Aguto tool kwolaiyo muudoga su tooke mwaloduke tovino tov su toro sajunyajupogano. Toro yajunyuno sumaveyokwe aki kuuguudo kuu'nopo su tovino kemoro poowokalago kuunodo tonyu auluuwollokakwono.

Sekoraiya'wol proofet yogalo adoka tovinokwono

67Toruda'ai Gooti toolluro Kuullo tool Joonolluro ganumiyago Sekoraiya'wollu aullo'mowopiyokaikono. Toro kuullo'mowopiyoduke tool lukomgu imo'nyo'mo tonyuno proofet yogalo aro adokaikono.

68“Nevu Isuraiyol tonolluro Gooti Aguto toolluno ilomoropiyowano. Gooti su tool gamoro a'mwo abolo tonollu me'no bonekuru'ma'dowo ikomago tooraida'ai abomollurolovonekumokalokuumokaikono. 69Gooti su tool nemi bomollurolovonekumokalokwiyo'moneyokwe jurogudo pwollu me'no amonekwopiyabokaikono. Su tool Gooti toolluro womdokwe Devitolluro iko tovasuda'aiyekono. 70Gooti tool gamoro womdo yono tovino aiyoga kuunodo toga proofet sugudo pworai me'no kwiyajukekono. Toro wiyoduke tovida'ai proofet su tooro aro ajajupekono. 71“Nemi ikomago tooro nonekuromipiyokweyo'mo Gooti tool nonekullo'mwojonekono. Aki nemino surodo wuunodopure tooraida'ai nobomollurolovonekumokalokwonekono.” Ajajupekono.

72Su tov aro tovino'mokwono. Gooti tool nemi nellukweyago toorai kalo amamwonyajukekono. Toro amamwonyajuko tovino nemi kuu'maiyo nekuduuwallo'moneyokwe tov kuvinono bomollurolovonekumokalokwodowodekono. Aki Gooti tool gamoro subuu'yamju kwiyajuko puvino aki aiko te kuudo yau'dowodekono. 73Gooti toolluro subuu'yamju su tov nemi nellukweyago Eburaiyamollu aro kuudokaikono. 74“Kevu moro womdo tovi yo'moneyokwe tovino luko nyumwalpiyokwe tov kemi ikullo'mwojo'moneyokwe tool ikomago tooraida'ai bomollurolovekumokalokwonekono.” Kuudokaikono. 75Toro te nevu yiuwi'nokai aiyo somjomwekovlawa'ji toga Gooti toolluro sumdo tovi yiuno ilaiyo to'no neya yomjomwekovla'mwalanonogano. Aki gamoro pasudo ilaiyo winodowodo tollovaino to'no neya uumjungovla'mwalanonogano.

76Oo mi kwolaiyoloo, gumino aro gudumaupinekugono. “Gooti Yiuwi'nokai Tonyu Uuwolo'mdowodo toolluro proofetoloo,” gudumaupinekugono. Su tov aro tovinokwono. Guu Aguto toollu sumdomgu wanbinekugono. Toro wano'bi Aguto toolluro puuto bwono tovi yovo'dogalbwebinekugono. 77Aki guvu Gooti toolluro a'mwo abolo tonyu kuu'maiyo toru'no yodubwasubinekugono. Su toro yodubwasodo'bure tovida'ai a'mwo abolo ton aro tovi nyainyunpinogano. Oo Gooti tool nemoro ma'no ma'nodo tonyu modukwopiyowo'ji kirumwallo tovida'ai nomollurolovonekumaronoldeyo. Su toro tovino nyainyunpinogano.

78Gooti toolluro nemino kalo manekumwonyodowo'jure tovi'aro sulugumdo tomuuda'ai bako muuduko puruv nonekuuwonokwono. 79Toro anekuuwo'ji toga a'mwo abolo dugumdo tomuu mwalodupudo togai'aro bolnodo tomuu mwalodupudo togai'aro tonyu bako nuuwonokwono. Bako su tov toro pwopiyodowo'jure toga nevu kavo yomjomwekovlaiyo'moneyokwe puuto tovi nomollubworonekumokovlawonokwono.”

Sekoraiya'wol toro adokaikono.

80Toruda'ai Joonol aguto gulluno sumaiyokwe Gooti toolluro Kuullo tooke jurogudo sumo'nokaikono. Toro tool kwako a'mwomaiyo kuu'maiyo tomuu amwallajukekono. Su tomuu mwalno mwalno sumaiyokwe yiuno Isuraiyolda'ai a'mwo abolo tonyu kuuguudo tov kuu'maiyo toru'no abilomoruudomolloka toga'no kwonopekono.

Currently Selected:

Luuk 1: SMB

Highlight

Copy