Hidingoto 6
6
O nauru yatumidi yagoraka la yodadi o Gareja ma duduhunu
1De ma oraha gea ka ihikaika o nyawa yodogo-dogo abe iwingaku o Yesusika. Masara nagali o nyawa manga gurubungu manga doomuoka. Angamoi manga biaha ma oraha gea la o wange-wangeiye yahikokodoku o inomo o ngo-ngofekaika abe yofao-faooka. De ona abe yotemo-temo de o Yunani ma demo, ona yamao abe manga gogianongoru yobao-bao ko yamakeua ma inomo la yahiwedono manga perelu. Ho ona yahigurubungu onangika abe yotemo-temo de o Ibarani ma demo mangale ona gea abe ihiaturu ma inomo. 2De manga gurubungu ma demo yoihenino ho o hidingoto ma nyawa yangimoi de yahinooto gea yahokino mata-mata abe iwingaku-ngakuoka la yomatoomuino onangoka. De yomatoomuinoka de yotemo onangika ato, “Ngomi naa o hidingoto ma nyawa naga mia tagongo abe Ma Jou ai Demo-demo miatobadotoko de miahingahu-ngahu o nyawaika, masara nagali ma inomo ma tagongo abe kiani o wange-wangeiye ihikodoku o ngo bao-baoika. Masara ngomi naa ko idadiua mialeleani ma titi o inomo done mia tagongo Ma Jou ai Demo-demoino mianoa, de gea duru mioluku mianoa. 3Ho naa ngomi minihuloko miato koaho nanga gogianongoru yatumidi niairiki de niagoraka abe nia doomuino naa. De gea kiani niairiki o nauru abe o nyawa utu manga horomati itagi onangika de abe yalufungoka de Ma Jou o Womaha de o sosawaro. De niairiki ipaha de ahao ngomi miahitagongo onangika la onangoli yaleleani de yahikodoku o inomo o nyawaika abe naga de manga pereluoka, ho gea ko ngomiokaua mia tagongo. 4De gea ngomi ka idadi mia hininga ma dumutu ka mia tagongo moiika dika, abe ka ihikaika mimaniata de miahingahu-ngahu Ma Jou ai Demo-demoino.”
5De ona mata-mata manga doomuoka gea duru yosanangi abe yangimoi de yahinooto manga demoika. De ipaha de ona yairiki o nauru yatumidi naa, abe o Setefanusu, una abe duru ai hininga aomanga de o ngongaku de Ma Jou o Womaha, de nagali o Filipusu, de o Prokorusu, de o Nikanoro, de o Timono, de o Paramenasa, de o Nikolausu abe o Antiokia ma tonakoka ma nyawa. De o Nikolausu una gea tanu ko o Yahudi ma nyawaua masara nengokadauino de womangali de waniikoli o Yahudioka manga agama, de ipahainoli de wingaku o Yesusika. 6De o nauru yatumidi naa yaoino o hidingoto ma nyawa manga himangoka. De ahao ona yaniata abe yafokumu de yagahoko ma owa Ma Jouino ma titi ona yatumidika la ka idadi manga tagongo gea yakunu yao irahai.
7De ma oraha gea Ma Jou ai Demo-demo ka ihikaika imahikabarihika de o nyawa manga ngoe yangaku enangika, ho ka ihikaika yodogo-dogo manga doomuika abe o Yerusaleemoka. De hongoli naga o Isiraele manga hidemo ma nyawa manga ngoe abe iwingaku o Yesusika, ho onangoo yomahidogo o ngongaku ma nyawaika.
Ma Jou ai Gareja imahihora o Yudea de o Samaria ma tona-tonakika
6:8—9:31
O Setefanusu iwitaokino
8De o Setefanusu una gea duru iwilufungoka de Ma Jou ai owa de ai kuaha, de una ka ihikaika o heheranga wodiai de Ma Jou ai kuaha wahimatoko o nyawa manga hima-himangoka. 9De ipaha o wange moiuku de naga yoboaino o nauru yamuruono naga abe ona yatobaniiki o Yahudi ma nyawa manga dodotoko ma tau moi. De ma dodotoko ma tau gea ihiromanga ato, “o Gogilaongo abe manga dutu yahiluasoka manga dodoomu.” De manga dodotoko ma tau ihiromanga hokogea angamoi ona mata-mata ma dihiraino de yodadi o nyawa manga gogilaongo masara ipahaino de yahiluasoka. De ona gea o Yahudi ma nyawa abe yomadionikino o Yerusaleemoka angamoi manga gogere ma dihiraino gea utu o Kirene ma tonakoka, de utu o Alesandaria ma tonakoka, de utuoli o Kilikia ma tonakino eko o Asia ma tonakino yoboa. Ho o nauru gea yoboaino de yomaketeribuutu ona de o Setefanusu ma titi ai demoino. 10De ngaro yomaketeribuutu masara moioo de ko iwa abe ka idadi iwihikala o Setefanusu ma titi ai demoino angamoi una iwihipareta de Ma Jou o Womaha ho duru wososawaro wotemo.
11De ko idadiua iwihikala ho ona gea yahigaro o nyawa utu la yoeluku ma titi o Setefanusu ai demo. De gea yadotoko la yotemo ato, “Ngomi naa miihene o Setefanusu ai demoino abe una duru wingelo nanga tofora o Musaika, de hongoli una wingelo Ma Jouika!” 12De o nyawa manga ngoe yoihene manga dadae ma demo abe iwitae o Setefanusika ho hiadono onangoo iwingamo unangika. De o Isiraele ma nyawa manga balu-baluhu de ona abe yotobadotoko o Musa ai Paretaino, onangoo manga ngamo duru itagi unangika. Ho iwitaokino de iwiao to ona mata-mata manga himangoka la iwitailako de iwiurusu. 13De ahao ona gea abe yoelu-eluku onangoo yaoino ho ihigalioli manga ngeluku ma demo abe ato, “O nyawa naa una ka ihikaika wongelo Ma Jou ai Tauika de o Musa ai Paretaika. 14De ngomi miihene ai demo abe una wahingahu ma titi o Yesusu abe o Nasaretoka ma nyawa una ahao wakilianga Ma Jou ai Tau. De nagali abe o Yesusu wato waturuuru nanga biaha mata-mata abe hamake o Musaka de aino ho igila-gila ngoneuku naa!” 15De ma oraha gea ona mata-mata manga hihira ma doomuoka ona iwikokidamaana o Setefanusika angamoi to una ai himanga idadi duru itararonoka ho imaketero dika abe hoka o malaekatoli ma himanga ma dararono.
Currently Selected:
Hidingoto 6: MJDD
Highlight
Share
Copy
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman
