Hidingoto 5
5
O Ananiasa de o ngo Safira manga ngeluku ma ade-ade
1De ma oraha gea naga womatengoli manga doomuoka abe ai romanga o Ananiasa. De una de ngoi fekata o ngo Safira onangoo yafukunu manga tonaka. 2De ona yahinooto yaregu ma tiwi la ma regu moi yagogono manga tauoka, de ma regu moioli gea o Ananiasa waoino de wahidoaka o hidingoto ma nyawaika. De ngoi fekata munangoo duru mohioriki abe ma tiwi gea ka ma hononga dika angamoi yomaketehiningamoi ma titi manga tiwi gea. Ho ma rokata waoino ma tiwi ma hononga de wahidoaka o hidingoto ma nyawaika de wato, “Naa mia tonaka ma ija ma tiwi mata-mata tinihidoaka nginika.”
3De ahao o Peturusu witaere unangika wato, “Ananiasa, adodoa ho ngona nomahigunoa la o Ibilihi ma haeke inihipareta ani hiningaka hiadono nieluku Ma Jou o Womahika? Angamoi ani tonaka ma tiwi ma hononga nomagogonoka la idadi to ngona dika ani tiwi. 4De ani tonaka ko nofukunuahi de gea duru to ngona dika ani kuahaka la nofukunu eko ko nofukunua, angamoi ko iwa abe iniribuutu. De ngaro abe nofukunoka masara gea ani tiwi ka idadi nohipake abe hokokia dika ani hininga adaene. Ho done adodoa ho ani datoro ma dorou naa nodiaioka? Angamoi ko ngominoua dika nomieluku masara tanu Ma Jouikaoo nielukoka.”
5Ka de o Ananiasa woihene ma demo gea de ka itodokanino de wohidurubauku ho wohonengoka. De ona abe yoihene ma titi gea idadioka unangika, ona mata-mata duru yokokihawanoka. 6De ahao o goo-goduuru yamuruono naga yoboaino de iwidehoro de o ngoere, de ipaha iwiao ma hoanika la ai honenge yalungunu.
7De iwilungunu ibooto de ahao o takoro hange ipahaika de ngoi fekata munangoli moboaino, masara muna ko mohiorikuahi o kia idadi ami rokatika. 8Ho moboaino de o Peturusu womileha wato, “Sarakia, abe ngona de ani rokata nifukunu nia tonaka gea de igoungu hokonaa ma amoko ma tiwi abe ngini niamake genangino?”
De muna mato, “Iya, igoungu, hokogea ma tiwi abe miamake.”
9De o Peturusu womitemo wato, “Done sarakia ngini inihinooto nimahikagaro la niwitaili Ma Jou o Womahika? De naa tonihingahu dika abe ma ngorana gea ma poretoka de naga o goo-goduuru abe ahao kangano ani rokata iwingotaka ai honenge ai lungunika, ho naa bootino dika de ngonali iniaoika!”
10De ka itodokanino de munangoli ka mohidurubauku ho mohonengoka. De ma goo-goduuru yowohamino de imimake ami honenge daena ho imigoraka de imiao ma lungunu ma ngiika de imilungunu ami rokata ai honenge ai datekoka. 11De abe o Yesusu ai gareja ma nyawa mata-mata de ngaro o nyawa utuoli abe yoihene ma ade-ade gea masara ona mata-mataika duru yokokihawanoka.
O Hidingoto ma nyawa o heheranga ma ngoe yodiai
12De abe ma oraha gea o hidingoto ma nyawa ka ihikaika yotobadiai o heheranga de Ma Jou ai kuaha yahimatoko o nyawaika. De ona iwingaku-ngaku yomatoo-toomuino Ma Jou ai Tau ma loaka abe ma ngi ihiromanga ato o Saloomo ai punga. 13De o nyawa mata-mata duru yahoromati iwingaku-ngakuika, masara abe ma oraha gea de ona abe ko iwingakua ona yomahitiari ato ufa yomahisapuru onangika angamoi duru yomodongo Ma Jou ai kuahaika. 14De ka ihikaika yodogo-dogo yowoe abe iwingaku nanga Baluhu idodutuika, abe ngaro o nau-nauru de ngaro o ngo-ngofeka masara ko manga ngoe yomahidogo manga doomuika. 15De mangale ma titi o hidingoto ma nyawa manga datoro yotobadiai, ho o nyawa yopopanyakeoka manga dodiawo ka ihikaika yaoino de yakelenga o ngekomo ma datekoka, abe utu yao ka ma moi de manga ngingidu ma ngi de yakelengauku, de utuoli yao de manga nanao la yakelenga o ngekomo ma datekoka. De genangoka yakelenga la ato ma oraha o Peturusu woboaino de watilakuru de yonganono abe to una ai gurumini dika adaene yopopanyakeuku la genangino de yotogumu manga kangelaino. 16De nagali o nyawa ko manga ngoe abe o kapo-kapongoka de aino yoboa o Yerusaleeme ma kotaino, abe yaoino ona yopopanyakeoka de utuoli abe yakokitokata. De ona mata-mata yotogumoka manga kokangelaino.
O Hidingoto ma nyawa yataokino de yaurusu manga hihira manga hima-himangoka
17De ipahaino de o Isiraele manga hidemo ma nyawa Ma Jouika wokokurutiye una woihenino abe ma titi ma heheranga abe o hidingoto ma nyawa yotobadiai. Ho una de ai dodiawo, abe ona o Saduki manga doomuino ma nyawa, ona duru yalufungu de manga daleana. 18Ho o hidingoto ma nyawa yataokino de yahingohama o bui ma tauika. 19Masara ipaha yofutuku de nanga Baluhu idodutu ai malaekata womatengo naga woboaino de wafelengaika o bui ma tau ma ngorana de ahao wahihupu ona ma hoanika. Wahihupuoka de ahao ma malaekata wahuloko wato, 20“Ngini niloiki Ma Jou ai Tauika de abe ma nyawa genangoka ngini niahingahu onangika ma abari ma demo mata-mata abe genangino de ka idadi o wowango ma ngango yamake!” 21De ai demo gea yoihene de duru yaniiki, ho duru o ngoru-ngorumino de ka de Ma Jou ai Tau ma loaika yowohamika de yomulaengoka yadotoko o nyawaika ma abari gea.
De o hidingoto ma nyawa gea yodotoko manga gogiriakahi de doka o Isiraele ma nyawa manga hihira manga doomu ma ngioka de manga hidemo wokokurutiye de ai dodiawo yomatoomuino. De nagali yoboaino o Isiraele manga balu-baluhu. De yomatoomu ibooto de ahao yahuloko manga nyawa la yoiki yale o hidingoto ma nyawa o bui ma tauoka la yoboa de yahimanga onangika la ka idadi yatailako manga datoro de manga demo. 22Masara manga nyawa yoiki ma bui ma tauika de ko yamakeua o hidingoto ma nyawa angamoi ko yaiwaka. Ho ka yolio manga hihira ma doomuika de yahingahu ato, 23“Ngomi o bui ma tauika miaika de ihidukusiokahi de nagali ona yotobagoa-goana yomaokoino yogoana ma ngoranoka, masara abe miafelenga ma ngorana de miwohama ma goronaika de ka ma homoa dika, o nyawa moioo de ko iwa!”
24De manga hingahu ma demo gea yoihene de una abe yotobagoa-goana Ma Jou ai Tau manga haeke de abe manga hidemo yokokurutiye ona mata-mata duru yolilifanga angamoi ko ihiorikokaua abe ma bahauku de hokokiali o hidingoto ma nyawa manga datoro ma hofoko. 25De duru ma oraha gea de naga womatengo woboaino de wahingahu onangika wato, “Ona gea abe ngini niabui-bui, ma oraha naa naga ona gea doka Ma Jou ai Tauoka yadotokoli o nyawaika!”
26De ahao abe yotobagoa-goana manga haeke una de ai nyawa yamuruono naga yoiki Ma Jou ai Tauika de ma moioli yataokino o hidingoto ma nyawa gea. Masara abe ma oraha yataokino de duru ihidodiai la ufa yapoha-poha onangika ma titi yamodongo ato done ahao o kokawaaha yangamo de yahohonenge de o hakaru. 27De yataoko ipahaino de yaoino manga doomu ma ngioka la ka idadi yatailako onangika. De ahao una abe o Isiraele manga hidemo ma nyawa wokokurutiye una wataere onangika wato, 28“Nengokadauino de duru minihuloko nginika la miato ibootohi niadotoko de to Una gea ai romanga! Ho naa done sarakia? Angamoi gea ko nimihigihenua masara o Yerusaleeme ma kotaka naa aomangoka de ti ngini nia dodotoko abe ma titi o Yesusu! De hongoli nia demo ma goronaka de nimitaeoka ngomi naa niato ngomi wiwihohonenge Unangika!”
29De o Peturusu de ai dodiawo o hidingoto ma nyawa utu yopaluhu ato, “Ngomi naa ko idadiua mioporete Ma Jou ai huhuloko ma demoika la ka o nyawali dika manga demo mianiiki, masara kiani Ma Jou ai demo dika miatobaniiki. 30De ngini naa abe niwihohonenge o Yesusu o gota isosalioaka, masara wohonenge ipahaino de to ngone nanga totofora manga Jou Una gea wihimomiki ai honengino. 31De wihimomiki ipaha de ahao Ma Jou wigorakiye de wihigogere ai nirakoka la o Yesusu Unangoo wahikoano ai nyawaika de ka idadi waduhunu manga howo-howonino. De hokogea Ma Jou wigorakiye o Yesusu la Unangino de o Isiraele ma nyawa ka idadi yotoba manga howonino la gea o Yesusu waofi manga howo-howono. 32De ngomi naa midadioka to Una ai hakihii ma nyawa abe miahingahu-ngahu o nyawaika gea mata-mata abe idadioka. De abe miahingahu-ngahu mia gogiriaka de Ma Jou o Womaha Unangoo womihitaana abe to ngomi mia demo de mia datoro gea mata-mata duru igoungu. De gea Una womihiakunu de to Una ai kuahaino. Abe Ma Jou wihidoaka ai Womaha onagonaika dika abe iwihingounu Unangika.”
33De manga demo gea ma hihira ma doomu yoihene de duru yongamo hiadono yomaputuhu ato kiani yahohonenge o hidingoto ma nyawaika. 34Masara naga ma hihira womatengo abe ai hiningaka de ko wohimotekua ai dodiawo manga putuhu gea. De una gea o Farisi ma doomuino de ai romanga o Gamaliele. De una wotobadotoko o nyawa o Musa ai Paretaino, de o nyawa mata-mata duru iwikokihoromati unangika. Ho una womaokoiye de wahuloko la o hidingoto ma nyawa yao ma hoanika jai-jai la ka ona dika ma hihira yomakoketemohi. 35De ona yohupuoka de ahao una wotemo ai dodiawoika wato, “Ahi gogianongoru o Isiraele ma nyawa. Naa ngohi tinihitiari la tato kiani duru nimahidodiai abe hokokia niao o nau-nauru gea. 36Angamoi ma dihiraino naga womatengoli abe o nyawa manga ngoe iwinii-niiki. Abe una gea ai romanga o Teudasa, de una womahikurutiye o nyawa manga himangoka la wato wodadi o kokawaaha manga hihira. De naga ai nyawa ngade-ngade yaratuhu iata abe iwitobanii-niiki unangika. Masara ipahaino de o Teudasa una gea iwitomaka, de abe iwinii-niiki ona mata-mata yomahikabarihoka, ho duru ko iwaka ai doomu gea. 37De ipahaino de naga womatengoli womahikurutiye abe ma oraha o Roma ma popareta inaetongo ngone mata-mata. De to una gea ai romanga o Yudasa abe o Galilea ma tonakino ma nyawa. Ho unangoo naga ai nyawa manga ngoe abe wahigaro la iwinii-niiki unangika la ona duru yalawana o Roma ma poparetaika. Masara ipahaino de unangoo iwitomaka ho ai nyawa duru yomahikabarihoka.”
38De o Gamaliele wogila-gila de ai higaro ma demo wato, “Ho ngohi naa tinihitiari la o nau-nauru naa ngini nianoaika dika de ufa niaruwae. Angamoi nako to ona manga dodotoko de manga datoro gea ihititi ka onangoka dika de aino ma hirete, gea ko itedekanuahi de enangoo ko iwa ma hofoko ho ka ihihanga dika. 39Masara nako to ona manga demo de manga datoro ihititi Ma Jouoka de aino, gea ko idadiua ngini niahikala onangika. De nako hokogea imaketero dika hoka ngini ahao nimakalawana ngini de Ma Jou!”
De o Gamaliele ai dodiawo iwigihene to una ai higaro ma demo. 40Ho ona yahokino o hidingoto ma nyawa de ahao yahuloko la yahipoha-poha onangika de o migi. De yapoha ibooto de yahibehehongoli onangika ato ko idadiokaua yahingahu-ngahuoli o nyawaika ma titi yao o Yesusu ai romanga. De gea yahuloko ipaha de yahigunoa la yoiki yolio manga ngiika.
41Ho o hidingoto ma nyawa yosobo ma hihira manga doomuoka de aino de manga hininga duru aomangoka de o garago, angamoi yomatemo ato, “Ngomi naa imihikangela ma titi o Yesusu ai romanga mianii-niiki, ho bote gea imipoha-poha ma titi Ma Jou duru womisanangi ngomino!” Hokogea manga garago ma titi abe manga hiningaka. 42De o wange-wangeiye abe Ma Jou ai Tauoka de to ona manga tau-tauokaoo de ona ka yadoto-dotokohi o nyawaika. Abe ona ka yahingahu-ngahuohi o Abari ma Rorahai gea abe ona ato, “Nanga koano abe ma dihiraino Ma Jou wonahibehehongoka de abe ngini niwidodamaa, Una gea o Yesusu!”
Currently Selected:
Hidingoto 5: MJDD
Highlight
Share
Copy
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman
