Hidingoto 4
4
O Peturusu de o Yohanese yao o Isiraele manga hihira manga hima-himangoka
1De abe ma oraha o Peturusu de o Yohanese yotemo-temo manga gogiriakahi o nyawaika de naga yoboa onangino o Isiraele ma nyawa manga hihira yamuruono naga. Abe utu o hidemo ma nyawa Ma Jouiye de utu o Saduki ma nyawa manga doomuino, de nagali womatengo abe yotobagoa-goana Ma Jou ai Tau manga haeke. 2De ona gea duru manga hininga ko isanangiua angamoi o Peturusu de o Yohanese ona yadotoko o nyawaika ato, “Mangale ma titi o Yesusu womomiki ai honengino ho gea hohioriki abe ahao ngone o nyawa ngoneoo ka idadi homomiki nanga honengino.” 3Ho manga hihira gea yataokino ona yahinooto de yabuika. De ma oraha gea ihumuririhukuoka ho ona yomaidu o bui ma tauoka ma futu gea. 4Masara abe kanganoino manga demo o nyawa manga ngoe yoihene de yongaku enangika, ho nagali abe yomahidogo manga doomuika. De nako haetongo o nauru mata-mata abe ma oraha gea iwingaku-ngaku Unangika, naga yasana motoa abe iwingaku, de gea ko haetonguahi o ngo-ngofeka de o ngofa-ngofaka.
5De ma dawangeino de naga yomatoomuino o Yerusaleeme ma kotaka o Isiraele ma nyawa abe yatobauru-urusu o nyawa. De naga manga doomuoka manga hohihira yokokurutiye de manga balu-baluhu de ona abe yotobadotoko o Musa ai Paretaino. 6De nagali o Hanasa, abe ma oraha gea de una wodadi manga hidemo wokokurutiye Ma Jouiye, de nagali ai toroa o Kayafasa. De nagali o nauru utuoli abe o Hanasa ai dutu adaene, hoka ai dutu o Yohanese de o Alesandere de naga utuohi ai dutu. 7Ho ona yomatoomuinoka de ahao yaoino o Peturusu de o Yohanese manga himangoka de yaleha onangika ato, “O kiaino nia kuaha eko onagonaino manga romanga ngini niapake la kanugono nia datoro gea nidiai?”
8De ahao o Peturusu iwilufungu de Ma Jou o Womaha de wopaluhu onangika wato, “Ahi balu-baluhu de ngini abe nimihihira ngomi nia kokawaaha, naa moi tinileha. 9Sarakia, ngomi imihinooto naa nimitailako mangale ma titi mia datoro ma rorahai abe kanugono wolugu-lugu gea de wiwihitogumu unangika? De marai ngini nioigo nihioriki abe ma titi o kia hiadono wotogumoka? 10Ho naa tinihingahu de duru tinihitararono nginika de o Isiraele ma nyawa mata-mataikaoo tahingahu abe wolugu-lugu nia himangoka naa, una wotogumu ma titi o Yesusu Kristusu ai romanga de ai kuaha, abe o Yesusu Una gea o Nasaretoka ma nyawa. De Una gea abe ngini niwihohonengoka masara ipahaino de Ma Jou wihimomikoli ai honengino. 11Angamoi abe ma dihiraino de Ma Jou ai Demo-demoka itemo ato,
‘De naga moi o hakaru abe aolukoka o tau yotobadodiai, de masara ngaro ona yaolukoka, masara duru ma hakaru gea ahao idadioka o tau ma lifunu,’ #4:11 Higiriiri 118:22
de gea ma demoino de ihidumutu o Yesusika. 12Ho ka Una dika abe ka idadi waduhunu o nyawa manga howo-howonino! Angamoi o romanga utu duru ko iwa abe ngaro o dunia ma amokika holingiri masara ko hamakeua o romanga utu abe o nyawa ka idadi yomagahoko de yamake o duduhunu enangino!”
13De ahao manga hihira ma doomu gea ona duru yoheranga ma titi o Peturusu de o Yohanese manga domoroini abe manga demoino, angamoi yahioriki abe ona yahinooto ka o nyawa biaha dika abe ko yohakolaua. De ahao yongano-nganono abe ma titi ona yahinooto nengokadauino de ka ihikaika yomakiniiki de o Yesusu. 14De tanu ma hihira manga hininga la yoluku dika ona yahinooto manga demoika, masara una abe wotobalugu-lugu gea abe kanugonino de iwihitogumu, unangoo naga womaokoino manga hidogoronaka. Ho manga hiningaka ato done o kiali ka idadi yotemo onangika, ho yomarii-riidoka dika. 15De ahao ma hihira gea yahuloko o Peturusu de o Yohanese ato, “Ngini niminoaikahi jai-jai la ka ngomi dika mimakoketemo.” Ho ona yahinooto yohupuohi manga doomu ma ngioka de aino.
16De yohupuoka de ahao ma hihira ona yomakokeleha ato, “Done sarakia hodiai de ma nauru yahinootoika gea? Angamoi igoungu ona yodiaioka o heheranga nanga kota ma goronaka, de o Yerusaleemoka ma nyawa mata-mata yokokiihenoka ma titi manga heheranga gea, ho duru ko idadiua hoeluku hato ma heheranga ko yodiaiua. 17Masara marai ka idadi hataere la ufa manga dodotoko ihikokabarihi o nyawa yowoe-woeika. Ho koaho ngone hataere onangika hato ko idadiokaua ihiabari ma titi o Yesusu ai romanga o nyawaika.” 18De yomakoketemo ibooto de yahokinoli ona yahinooto la yowohamoli manga doomu ma ngiino. De yoboaka de ahao ma hihira yahibehehongo onangika ato, “Ibootohi niade-ade de niadoto-dotoko o nyawaika ma titi o Yesusu.”
19Masara o Peturusu de o Yohanese ona yopaluhu ato, “Abeika ngini ma hirete nimafikiri de nimaleha ma titi nia huhuloko ma demoino gea. Bote Ma Jou ai mau la ngomi naa mininiiki ti ngini nia demo ekola koaho wiwihigihene to Una dika ai demo ngomino? Nako ngini niataoko sarakia? 20Masara nako ngomi miato ko idadiua mimarii-riidoka dika de mianoaika abe miade-ade o nyawaika. Abe kiani miade-ade ma titi ma datoro ma hohailoa gea abe ngomi miamakeoka de ma dodotoko ma rorahai abe miihenoka. Kiani mihigila-gila dika miahiabari o nyawaika.”
21Ho o Isiraele ma nyawa manga hihira gea ka yataerohi ona yahinootoika de manga dodaere ma demo muruono naga, masara ma bahaika de yahigunoa la yoiki yolio dika, angamoi ko yamakeua ma ngekomo la yahohowono onangika, done o huruhara idadi o kokawaahaka. Angamoi ma kokawaaha mata-mataika duru iwihigiriiri Ma Jouika ma titi ma heheranga abe idadi genangoka. 22Abe ma dihiraino wolugu-lugu, una ai ngumuru ai taongo moruata ifoloioka, ho duru ai deka-dekanuku wotobalugu-lugu de ahao iwihitogumu ai kangelaino.
Ona iwingaku-ngaku yomagahoko o domoroini Ma Jouino
23Ka de o hihira manga doomu gea yahigunoa o Peturusu de o Yohanese la yohupu de ona yahinooto yoiki manga dodiawoika abe iwingaku-ngakuoka o Yesusika. De yoade-ade onangika mata-mata abe kanganoino manga hidemo ma nyawa yokokurutiye de manga hihira utu yotemoka onangika. 24De yoade-ade ipahaino de ona mata-mata duru yomaketehiningamoi abe yomaniata Ma Jouiye ato, “Mia Baluhu idodutu, abe Ngona notobatulaada o dunia naa de ma dihangoo de abe ma gahi de ma dunia ma dola utu mata-mataika. 25Ngomi miohininga to Ngona ani Demo-demo abe ma dodihiraka Ma Jou o Womaha wotemo mia toforaino. Abe mia tofora o Dautu una wodadi ani duduhunu. Ho Ma Jou o Womaha wotemo o Dautu ai uruino wato,
‘Adodoa ho o homoa ma nyawa duru yongamo hiadono inilawana Ngona Ma Jouika? Angamoi gea tanu ka parahaja dika!
De adodoa ho o Isiraele ma nyawa inihidee Ngonaika de manga hidee ma dorou? Angamoi enangoo ma ka parahaja dika manga hidee!
26 O homoa ma nyawa manga kokoano yomahidiaioka la yoparangi,
De to ngoneoli nanga balu-baluhu yomatoomuinoka la ato iwilawana nanga Baluhu idodutuika de to Una ai Mesiaikaoo abe Ma Jou ma dihiraino de wihibehehongoka.’” #4:26 Higiriiri 2:1-2
27De ona iwingaku-ngaku ihigila-gila manga niniata ma demo Ma Jouiye ato, “Hokogea itemo ma dodihiraka ani Demo-demoino de igoungu abe naa ma duru ani demo gea ingodumoka, angamoi ena gea mata-mata idadioka to ngone nanga kota ma goronaka naa! Angamoi naangoka nanga koano o Herodese de ma gubernuuru o Pontiusu Pilatusu, de nagali o homoa ma nyawa utu yamuruono naga, de to ngoneoo nanga gogianongoru o Isiraele ma nyawa, ona mata-mata yomatoomuino de yomaketehiningamoi abe iwikokilawana ani Huhuloko o Yesusika. De Una gea duru Wotebi-tebini de abe Ngona niirikoka la ahao wonahikoano ngone ani nyawa. 28Ho o tobalawana ma nyawa gea manga datoro abe yodiaioka nenangoka, gea mata-mata tanu aniiki dika to Ngona ani hidee ma mau. Abe ani mau gea ma dodihiraka de nomaputuhokau nato ahao kiani idadi hokonaa. De igoungu idadioka ma titi to Ngona ani kuahaino abe ihiaturu mata-mataika. 29De naa, mia Baluhu idodutu, mimagahoko la Ngona ufa nanoaika dika to ona manga dodaere ma demo abe imitaeroka ngomino. La ngaro hokokia dika imitaere masara ngomi naa abe midadioka ani duduhunu ka idadi mitomoroini dika la mihiabari de mia domoroinoka ma amoko o nyawaika. 30De mimagahokoo la nohidingoto to Ngona ani kuaha ngomiuku naa ma titi ani Huhuloko Wotebi-tebini o Yesusino. Angamoi ngomi miato ani kuaha gea miapake la ka idadi miahitogumu o nyawa manga popanyakeino, de nagali miato o heheranga de ani kuaha ma dodunguu ka idadi miahimatoko o nyawaika.” 31De yomaniata ibooto de ahao abe manga doomu ma tau gea ihigiwi-giwi, de ona mata-mata yalufungu de Ma Jou o Womaha. De ipahaino de ona ihiabari Ma Jou ai ade-ade duru de manga domoroinoka!
Ona iwingaku-ngaku yahikeregu manga kiahonanga
32De ma oraha gea de ona mata-mata iwingaku-ngakuoka o Yesusika duru yomaketehiningamoi. De ona homoi-homoi yamao abe manga kiahonanga gea ko to onangua dika masara to manga doomu manga kiahonanga, ho yahikeregu mata-mataika. 33De ona abe o hidingoto ma nyawa, ona ka ihikaika yoade-ade de duru yahigaro o nyawaika ma titi nanga Baluhu idodutu o Yesusu ai momomiki, de manga demo gea duru de ma buturungoka. De Ma Jou ai hiowa ma amoko imanoa onangoka mata-mata. 34De abe to ona manga hidogoronaka de ko moiua yohuha, angamoi onagona dika naga de manga tonakoka eko de manga tauoka, gea ma moi ma moi naga abe yofukunu. 35De yofukunu ipaha de ma tiwi genangino yao de yahidoaka o hidingoto ma nyawa manga giamika la onangoli ahao yahikodoku ma tiwi o nyawaika abe naga de manga kurangoka.
36De ma oraha gea naga womatengo manga gianongoru ai romanga o Yusupu, abe ai gogere o Sipurusu ma nuuhoka masara womahidutu o Lewi ma dutuika. De o hidingoto ma nyawa iwihiromangoli o Baranabasa abe ma romanga gea ma titi “una abe wahitobahohigaro o nyawaika.” 37De ma moiuku o Baranabasa gea ai tonaka wofukunu de ma tiwi waoino o hidingoto ma nyawaino de wahidoaka onangika, la ka idadi onangoli yahikodoku manga gogianongoru utuikali abe de manga pereluoka.
Currently Selected:
Hidingoto 4: MJDD
Highlight
Share
Copy
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman
