Yohanese 13

O Yesusu waihoro ona iwitobaniiki manga lou

1Ngade-ngade adonoka o Totilakuru ma rame-rame abe ma dawangeino de o Totilakuru ma inomo yolomo. De gea o Yesusu wohioriki ai gahe adonoka abe kiani o dunia wanoa la wolio ai Babaiye. De o nyawa o duniaka abe yodadioka to Una ai nyawa, ko iwa ma oraha la o Yesusu ko wadoraua. Masara naa de ahao wahimatoko to Una ai nyawaika abe ai dora ma gahumu onangika hiadono ngaro wohidohonenge masara duru ko itoakua ai dora gea.

2Ho ifufutuku de yolomo de naga Unangoka ona abe o Yesusu iwitobaniiki yangimoi de yahinooto. Masara hokokanganoinohi de o Ibilihi idiaiokau hiadono o Yudasa, abe ai baba o Simono de ai fam Isikarioto, una doka ai hiningaka womatemo wato, “Ngohi ka idadi o Yesusu tifukunu.” 3Masara o Yesusu wohioriki ai Baba o kuaha wihidoakoka Unangika la hiadono ko iwa moi abe ko idadiua wohipareta. De naa o Yesusu wohininga abe Una Ma Jouoka de waino de naa itigioka Una wolio Ma Jouika.

4Ho naa o Yesusu de iwitobaniiki manga gogiriaka yolomo de o Yesusu womaokoino de ai baju wahuputu de wakelengauku jai-jai de ahao o handoko womagorakino de womahipakitino ai goronaino. 5Gea ai handoko womahipakitoka ibooto de o akere waleino de wauhe o mokoluku de womulaenge waihoro ona iwitobaniiki manga lou de wohiehe de ai handoko abe womahipakitino gea.

6Ka de womahiadono o Simono Peturusu ai louoka de o Peturusu wileha o Yesusika wato, “Ahi Baluhu, done sarakia de hiadono nato to ngohi ahi lou naihoro?”

7De o Yesusu wopaluhu unangika wato, “Ngona ko nohiorikuahi ma titi naa todiai masara, ika-ika de ahao ma titi nohioriki.”

8De o Peturusu womademo wato, “Ko idadiua. Duru ko iwa ma oraha tonihigunoa to ngohi ahi lou naihoro.”

De o Yesusu wipaluhu o Peturusika wato, “Nako Ngohi ko toniihorua, ani gogao Ngohino ko iwa.”

9De ahao o Simono Peturusu wotemoli wato, “Nako hokogea ufa ahi lou dika ma kiani ahi pea de ahi giamoo naihoro!”

10De o Yesusu wihingahuoli o Peturusika wato, “Nako o nyawa yomaohikoka gea manga badanga itebinoka ho manga louokahi yoperelu aihoro la manga badanga ma gahumu itebinoka. De ngini naa nitebinoka ma ko ngini mata-mataua.” 11Hokogea o Yesusu wahingahu onangika angamoi Una wihiorikoka abe onaguna ahao wifukunu. Ho gea ma titi ai demo wato, “Ngini nitebinoka ma ko ngini mata-mataua.”

12Ho ka de ona iwitobaniiki manga lou waihoro ibooto de ahao o Yesusu ai baju wagoraka de womahinoali de wolio ai gogogerika o mejaka. De ahao walehali onangika wato, “Sarakia gea todiaioka nginika, gea ma titi nihioriki? 13Abeika, ngini naa nihihiromanga niato, ‘Mia Guru,’ eko ‘Mia Baluhu,’ de nako hokogea nitemo Ngohino gea nihihitaana igoungu. 14De angamoi Ngohi nia baluhu de nia guru, ho abe todiai ibooto naa, nia lou takokiihoroka, ho nginioo kiani nimakokiihoro ti ngini homoi-homoiika nia lou. 15Angamoi Ngohi todiai hokogea la ka idadi tinihimatoko nginika hokokia nginioo nimaketeleleani imaketero hoka Ngohi tinileleani nginika. 16Naa duru tagou-goungu tinihingahu, o nyawa abe yodadioka o huhuloko ko idadiua yotemo ato, ‘Nako ngohi de una gea wohihuloko, ka ngohiohi tokurutiye,’ ko idadiua hokogea yotemo. De hokogenangoli o nyawa yahuloko manga dodiawoika ato, ‘Noiki ahi demo nototaka la nahingahu onangika hoka tonihibehehongoka,’ ho una abe woiki wohingahu ko idadiua ahao womagoraka wato nako o demo ma dutu de una, ka unangohi wokurutiye. 17De naa ngini nihiorikokau ahi behehongo gea ho duru niamake ma owa ma gou-goungino nako nimaketeleleani abe hoka tinihimatokoka.” Hokogea o Yesusu wahitararono ona iwitobaniikika.

O Yesusu wahingahu ona iwitobaniikika ahao iwifukunu

Matiusu 26:21-25; Maruku 14:18-21; Lukasa 22:21-23

18De o Yesusu ka wahingahuohi ona iwitobaniikika wato, “De igoungu kangano ahi demo ma goronaka de tato ngini naa nitebinoka masara gea ma dumutu ko ngini mata-mataikaua. Angamoi o nyawa abe tairikoka Ngohi duru tahioriki ona gea. De ma titi nena tinihingahu la ahao idadi duru imaketero hoka ma dihira ihitulihukuoka, abe Ma Jou ai Demo-demoka itemo ato,

‘Womatengo abe miolomo mimahidodai moi, una gea wodadioka ahi musu.’” # 13:18 Higiriiri 41:9

19“Ho abe ihitulihukuoka gea, ngaro ko idadiuahi masara naa tinihingahuoka nginika la ka de ma oraha gea idadi de ahao Ngohino nihingaku. De gea nihihioriki abe tomahiromanga Ngohi Naga abe Ngohi Naga de gea ahi romanga gea duru ihihitaana. 20De nenangoli tagou-goungu tinihingahu, ona abe Ngohi tahidingoto o nyawaika, nako o nyawa yadafongo, ngaro onagona dika, ma gea Ngohioo ihidafongoka. De onagona dika ka de ihidafongo Ngohi naa de gea Unangoo iwidafongoka abe wohihidingotino Ngohi naa.”

21Gea o Yesusu wahingahu ona iwitobaniikika ibooto de ai hininga duru ihuha de wahingahuoli onangika wato, “Naa tagou-goungu tinihingahu, naga womatengo nginioka ahao wohihidoaka ahi musuika.”

22Ka de o Yesusu ai demo gea yoihene de ona iwitobaniiki duru yomaketedamaanoka de doka manga hiningaka yomatemo ato, “Onaguna ma titi hiadono hokogea ai demo?” 23De naga womatengo iwitobaniikino abe duru o Yesusu widora de una womahiiduiye hiadono womahitangonika o Yesusu ai aluoko. 24Ho o Simono Peturusu wigawi-gawi unangika gea la wihuloko unangika wato, “Abeika, nileha onaguna.”

25Ho una ai datekoka womatangonika o Yesusu ai aluoka wileha wato, “Ahi Baluhu, gea onaguna wonihidoaka ani musuika?”

26De o Yesusu wopaluhu wato, “Abe bootino o roti tihitabu de tihidoaka unangika, gea una.” Ho ka de hokogea wotemo de o Yesusu o roti ma belaka wagorakino de wihitabuoka o hudeuku de wihidoaka o Yudasika, abe to Simono ai ngofaka abe manga fam Isikarioto, unangika wihidoaka. 27Ho ka de o Yudasa ma roti gea wodafongo ibooto de o Ibilihi imahipootekoka unangika.

De o Yesusu wotemo unangika wato, “Gea abe nato nodiai, nomataiti nodiaiou.” 28Hokogea wotemo o Yesusu masara ona o meja ma datekoka gea ko moiua de ataoko itiai ma titi ai demo o Yudasika gea. 29De angamoi manga doomu ma tiwi naga o Yudasoka ho utu doka manga hiningaka yomatemo ato, “Marai nanga rame-rame ma inomo woiki wonaija,” de naga utu manga hiningaka imatemo ato, “Bote wihidingoto la o tiwi wahidoaka o huha ma nyawaika.” 30Ho ka de o Yudasa ma roti gea wodafongo ibooto de wosoboka. Gea o futu-futu de wohupu o tauino gea.

31Ho ka de o Yudasa woikoka de o Yesusu wahingahu ona iwitobaniikika wato, “Naa de ahao Ngohi o Nyawa ma Ngofaka duru ihigorakiye abe o nyawa ka idadi yamake ahi medebini ma dararono. De angamoi Ngohi Ma Jouoka ho tahimatoko to Unangoo ai medebini ma dararono ho hiadono Unangoo o nyawa iwigorakiye. 32De nako Ma Jou iwigorakiye, gea ma titi Ngohi Ma Jou o Ngofaka naga Unangoka. De itararonoka abe gea Ma Jou o Baba wohigorakiye Ngohi ai Ngofaka naa, de gea ka jai-jai dika de wohigorakiyeoka ahi Baba.”

33De o Yesusu wotemoli wato, “De naa ahi ngofa-ngofaka, kiani nihioriki ko itedekanokaua de Ngohi ko ihiwa nginioka. De ngini ahao nihilingiri masara hoka ma dihira tahingahuoka o Yahudi ma nyawa manga balu-baluhika, de naa ma titi gea nginikali tinihingahu, abe ko idadiuahi ngini nihiniiki abe genangika ahao Ngohi toiki.”

34“De naga o pareta ma hungi tinihidoaka nginika, kiani nimakodora. Duru imaketero hoka Ngohi tinidora, hokogenangoo kiani ngini nimakodora. 35Ho mangale nia dora gea ho hiadono o nyawa mata-mata ahao inihioriki ngini nidadioka to Ngohi ahi nyawa abe nihitobanii-niiki mangale nimakodora itiai.” Hokogea o Yesusu wahibehehongo onangika.

Matiusu 26:31-35; Maruku 14:27-31; Lukasa 22:31-34

36De o Simono Peturusu wileha o Yesusika wato, “Ahi Baluhu, o kiaika noiki?”

De o Yesusu wipaluhu wato, “Abe genangika naa toiki ngona ko napoauahi nohiniiki, masara naga ma oraha de ngonaoo ahao nohihidoduruino abe naa etoiki genangika.”

37De o Peturusu wilehali o Yesusika wato, “Ahi Baluhu, adodoa ho nato ko tapoauahi toniniiki ngohi naa? Ngaro kiani ahi wowango tomahidoaka la toniduhunu ma tosanangi dika.”

38De o Yesusu wipaluhu o Peturusika wato, “Sarakia gea nagoungu noigo nohonenge la nato nohiduhunu? Ngohi duru tagou-goungu tonihingahu, bootino abe o kuru-kuru ma nauru ko atailuahi de ngona naa o nyawa manga himangoka nohioluku ma hangeou!” Hokogea o Yesusu ai babaluhu o Peturusika.

Currently Selected:

Yohanese 13: MJDD

Highlight

Copy