Yohanese 14
14
O Yesusu walaru ona iwitobaniikika
1De o Yesusu wahingahu ona iwitobaniikika wato, “Ngini naa ufa nia hininga ihuha. Abe hoka Ma Jouika niwingaku, Ngohioo kiani nihingaku. 2Daku ahi Baba ai tau o Horogaka naga o ngi ma ngoe angamoi nako ko iwa hokogea tanu ka tinihingahuoka. Ho naa toikohi ahi Baba ai tauiye la tinihidiai ti ngini homoi-homoiika nia ngi. 3De gea toiki de tinihidiai ti ngini nia ngi ibooto de ahao toboali de tiniao la tinihigogere Ngohioka la ngini naga de de Ngohi genangoka. 4De ngini naa nihiorikoka ma ngekomo abe genangika toiki.”
O ngekomo o Babaiye gea o Yesusu dika
5De o Tomasa wileha o Yesusika wato, “Masara gea, mia Baluhu, ngomi naa ko mihiorikua o kiaika noiki ho done sarakia hiadono nato ngomi ma ngekomo gea mihiorikoka?”
6De o Yesusu womahingahu onangika wato, “Ngohi naa ma ngekomo Ma Jouika, de Ngohioka ma titi ma gou-goungu, de Ngohioo o wowango ma ngango ma titi. Ho ko moiua yoboa ahi Babaiye nako ko Ngohinoua yoboa. 7Nako ngini duru nihihiorikoka Ngohi naa, gea ahi Babaoo niwihiorikoka. Gea ho hiadono Ngohi tato ma oraha naa niwihiorikoka de niwimakeoka.”
8De o Filipusu wogahoko o Yesusika wato, “Mia Baluhu, nako Ma Jou o Baba nomihimatoko ngomino, gea de ahao imiwedono de ka idadi mia hininga isanangioka.”
9De o Yesusu wipaluhu unangika wato, “Filipusu, naa ma dekanino homakokiniiki de mode ko nohihiorikuahi? Angamoi onagona dika ihimakeoka Ngohi, gea ahi Babaoo iwimakeokau. Ho adodoa ho nogahoko Ngohino hokogea nato, ‘Nomihimatoko Ma Jou o Baba’? 10Ho abe ma titi Ngohi de ahi Baba, Una wogogere Ngohioka de Ngohi naga ahi Babaka. Marai gea ngona ko nangakuahi e? Ma gea ahi demo ma titi ufa niafikiri to Ngohi dika ahi hiningaka de aino de tinihingahu. Masara mangale o Baba naga Ngohioka ho gea to Una ai karajaanga mata-mata todiai Ngohi. 11Ngini kiani ahi demo niangaku abe hoka totemoka tato, ‘Ngohi togogere ahi Babaka de ahi Baba wogogere Ngohioka.’ Abe ngini naa ma dekanino nihinii-niiki ho ahi dodunguu o Babaino todiai niamakeoka. Ho ngaro ahi demo ko niangakua ma nginioo nihimake abe o heheranga todiaioka de gea to Unangoo ai dodunguu niamakeoka. 12De naa duru tagou-goungu tinihingahu nginika, onagona dika ihingaku Ngohino, onangoo ka idadi yodiai hoka Ngohioli todiai. De igoungu gea yodiai hoka Ngohioli todiai ma utuohi yodiai irahai idogo angamoi Ma Jou o Womaha wahidogo nako Ngohi toliokahi ahi Babaiye. 13De angamoi Ngohi naga nginioka ho tinihibehehongo nginika tato o kia dika nimagahoko, abe ahi hininga nianiiki hiadono ahi romanga niapake, gea duru tosanangi todiai. De gea toigo todiai la gea Ngohi Ma Jou o Ngofaka tohiboa ahi Babaiye o higiriiri. 14Gea ho o kia dika nimagahoko la todiai de niapake to Ngohi ahi kuaha angamoi nihiniiki Ngohi, de gea Ngohi tosanangi todiai.”
O Yesusu wahibehehongo wato ahao Ma Jou o Womaha woboa
15De o Yesusu ka wotemohi ona iwitobaniikika wato, “Ho ngini nako nihidora Ngohi maraioka duru nihihigihene ahi behehongo nginika ngaro o kia dika tinihibehehongoka. 16De ahao tinigahoko ahi Babaika la winihidoaka o Duduhunu womatengoli, ho ahao Una woboa la wogogere nginioka ka hiado-adonika. 17De ti ngini nia Duduhunu gea o Womaha abe ahao winihimatoko Ma Jou ai hininga hiadono duru niwihioriki. De winihidumutu nginika abe hohiromanga ma gou-goungu. Masara ona abe manga hininga ma dumutu o duniaika dika abe ko ihiniikua, ona gea ko idadiua iwidafongo Una angamoi ko iwihiorikua de ona ko yamakeua gea abe Ma Jou o Womaha wokarajaanga. Masara ngini ahao ka niwihioriki mangale Una naga winidogogere ngini homoi-homoiika nia badanga ma goronaka. 18De abe ma oraha tininoa, Ngohi ko tininoaikaua hiadono niato nidadioka hoka o gohihi ho niato ka nginiokahi dika. De naga ma oraha ahao Ngohi toboali nginino. 19Ko itedekanokaua de o dunia ma nyawa ko ihimakeokaua, ma ngini ahao nihimakeokali angamoi Ngohi ahao towangoli. De angamoi to Ngohi ahi wowango ko iwa ma bobaha ho nginioo ahao niamake o wowango ma ngango ma gou-goungu. 20Ho o wange gea Ngohi towangokali de ahao ngini duru nihioriki Ngohi naga ahi Babaka, de ngini naga Ngohioka, de Ngohi naga nginiokaoo. 21De o nyawa onagona dika abe ahi behehongo yodafongo de hiadono yohingounu enangika, gea ona abe ihidora igou-goungu. De ahao ahi Babaoo wadora onangika, de Ngohioo tadora de tomahimatoko onangika hiadono ona ka idadi ihimao abe Ngohi igoungu naga onangoka.” Hokogea o Yesusu womahingahu onangika.
22De ahao abe ona iwitobanii-niikino womatengo ai romanga o Yudasa, masara ko o Yudasa Isikariotua, una wotemo wato, “Masara ahi Baluhu ko tomangaratiiua adodoa ho nomahimatoko ngomino dika masara abe o dunia ma nyawa mata-mataika ko nomahimatokua onangika?”
23De o Yesusu wopaluhu unangika wato, “Onagona dika ihidora Ngohino gea ahi behehongoo ihingounu. Ho ona gea ahi Baba duru wadora de Una de Ngohi ahao miboa onangika de mimahidogogere onangoka homoi-homoioka. 24Angamoi ona abe ko ihidoraua gea ahi demo ko ihigihenua. De ahi demo ko to Ngohiua dika masara gea ahi Baba abe wohihidingoto Ngohi naa, gea to Una ai demoino tapake.”
25“De ahi demo mata-mata naa tinihingahu ma oraha naa abe Ngohi nagahi de de ngini. 26Masara ahao o Duduhunu naga winiduhunu, gea Ma Jou o Womaha abe o Baba wihidingoto nginiuku. Gea wihidingoto angamoi ngini nidadioka to Ngohi ahi nyawa. Ho Ma Jou o Womaha winiduhunu abe winihihohininga ka ihikaika mata-mata abe tinihingahuoka de winidotoko utuohi Ma Jou ai gou-goungino abe kiani nihioriki.”
27“De naa ahi hidoaka nginika gea o dame, gea to Ngohi ahi dora ma dame tinihidoaka nginika. Ahi hidoaka gea ko imakadaenua abe hoka niamake o duniaka. Ho ngaro ufa nimahigunoa nia hininga ma dumutu o huhaika, de abe ahao niaohana ngaro ufa niomodongo genangika.”
28“Ho ufa niawohanga gea kangano tinihingahuoka, abe tato ngaro naa etoiki ma ahao toboali nginino. Ma, naa ko nisanangiua ho marai ko nihidoraua angamoi nako nihidora tanu duru nisanangi abe Ngohi naa toiki ahi Babaiye. Una ma hirete wohigorakiye de ka idadi Unangika tinigahoko utuohi ma rorahai angamoi nako Ngohi de o Baba, ka Unangohi wokurutiye. 29Naa mata-mata ko idadiuahi de tinihingahuokau la ma oraha idadi de nimahihohininga ahi demo naa abe tinihingahuoka. Ho ngini kiani niangaku genangika abe ahao idadi la nia ngongaku ko ikelu-kelua. 30Ho naa Ngohi ko itedekanokaua de ko tinihitararonokaua abe hokonaa tinihitararono angamoi ena gea abe o dunia yapareta itigioka iboa nginika, ma ena gea ko idadiua ihipareta Ngohino. 31Angamoi Ngohi naa ka taniiki dika to ahi Baba ai behehongo Ngohino. Ho gea ahi datoro duru imakiniiki de abe o Baba wohibehehongoka la ka idadi o nyawa o duniaka naa ihioriki abe Ngohi duru o Baba tidora Unangika. De naa adonoka ma oraha, ho ngone hosoboka.”
Currently Selected:
Yohanese 14: MJDD
Highlight
Share
Copy
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman
