Yohanese 16

1De o Yesusu wotemo-temohi ona iwitobaniikika wato, “Mata-mata naa tinihingahuoka la ma oraha gea idadi inihikangela de ufa nia ngongaku ikelu-kelu hiadono ngini ko nihiniikokaua Ngohi. 2Angamoi ahao naga o nyawa inihihupu nia dodotoko ma tauino de hiadono inioluku ma titi nia ngongaku Ngohino. De igoungu naga ma oraha ahao iboa de ngini o nyawa initoma, ato kiani hokogea la iwihisanangi Ma Jou. 3Hokogea yodiai angamoi ona gea o Baba ko iwihiorikua de Ngohioo ko ihihiorikua. 4Ahi demo naa tinihitihiraka la ma oraha mata-mata gea idadi de ka idadi nimahihohininga abe nia kangela gea Ngohi tinihingahuokau. Ma dihira ko tinihingahuahi angamoi Ngohi nagahi nginioka de manga dohata ma dumutu ka Ngohino dika.”

Ma Jou o Womaha ai karajaanga

5De o Yesusu wahingahuohi ona iwitobaniikika wato, “De naa Unangikali tolio, abe Una gea wohihidingotino, gea Unangika tolio. De koaho ahi hingahu gea inihigarago masara homoi-homoiika nia hininga akokilufungoka de nia huha. Tinimake ngini naa hoka ko nisanangiua homakoketemo ma titi abe Ngohi tolio ahi Babaika. 6Adodoa ho ko nihilehaua ma owa gea? Ngini hokogea mangale niamao itubuhoholi nia hininga ma huha ma titi o kangela gea tinihingahuoka abe ahao niamake. 7Masara naa tagou-goungu tinihingahu, ka de tininoa de gea tinihiowa abe ahao utuohi nia utumu angamoi nako Ngohi ko toikua Una tihiromanga o Duduhunu, Una gea Ma Jou o Womaha, ko woboaua nginiuku. Ma gea toiki la Unangoli ka idadi tihidingoto nginiuku.”

8“Gea Una naanguku woboaka de ahao o dunia ma nyawa manga hiningaka wahitararono duru itaana abe ma titi o howono, de ma titi o totiai ma gou-goungu, de ma titi o hohowono o bobinaahaika. 9Abe ma titi o howono, gea Ma Jou o Womaha wahitararono duru itaana abe mangale ma titi ona ko ihingakua Ngohino ho gea yahowonoka Ma Jouika. 10De abe ma titi o totiai ma gou-goungu enangoo kiani Ma Jou o Womaha wahitararono duru itaana. Angamoi Ngohi naa tagou-goungu tolio o Babaiye ho gea ihihitaana abe tatobagou-goungu ahi demoino de ko toelukua. 11De abe ma titi o hohowono o binaahaika enangoo Ma Jou o Womaha wahitararono duru itaana. Abe o Ibilihi Ma Jou wahohowonoka o binaahaika de angamoi o Ibilihi gea o dunia ma nyawa yapareta ho onangoo ahao wahohowono o bobinaahaika.”

12De o Yesusu wahingahuohi ona iwitobaniikika wato, “Naga ma ngoeohi toigo tinihingahu masara ma oraha naa ko niapoauahi. 13Masara ka de woboaka o Womaha abe wohimatoko ma gou-goungu Ma Jouino dika, de gea Una winihihira-hira ma gou-goungika gea. De ai hitararono gea ko ma titiua womahohiningaiye dika de wotemo, masara gea dika abe woihene Ma Jou o Babaino, gea ena dika winihingahu. De abe ika-ika ahao idadi o duniaka, ngaro ko idadiuahi, de ngaro ma titi gea o nyawa ko yoihenuahi, masara enangoo gea ahao Ma Jou o Womaha winihingahu nginika. 14De Una ahao wohiboa o higiriiri Ngohino. Abe to Ngohi ahi demo Una ahao wagoraka de winihihohininga nginika la ka idadi niataoko itiai. De genangino Ngohi ka idadi tamake o higiriiri.” 15De o Yesusu wotemoli wato, “Mata-mata abe ahi Baba wotemo, gea to Ngohioo ahi demo. De gea ma titi hiadono tato Ma Jou o Womaha ahao mata-mata abe wamake Ngohioka, gea ahao winihitararono nginikali.”

O huha ma titi ahao idadi o garago ma titi

16De o Yesusu wahigila-gilahi wahitararono de ma titi abe ahao idadi wato, “Ma, naa ko itedekanokaua de ngini ko nihimakeokaua, masara topahaika de ahao ko itedekanuahi de ngini nihimakeokali.” Hokogea o Yesusu wahingahu ona iwitobaniikika.

17De ahao ona utu gea yomakeleha ato, “Gea o kia ma titi ai demo wato, ‘Naa ko itedekanokaua de ngini ko nihimakeokaua?’ De ahao wato, ‘De gea topahaika ko itedekanua de nihimakeokali.’ Ho adodoa ho ai demo utu gea wato, ‘Angamoi naa tolio o Babaiye’? 18De o kia ma titi gea wato ‘ko itedekanokaua?’ Marai ai hingahu naa ma titi ngomi ko mimangaratiiua.”

19O Yesusu wahioriki abe hokokia itagi manga hiningaka abe yoigo iwileha ho Una wato, “Marai nioigo nihileha ma titi ahi demo gea tato, naa ko itedekanokaua de ngini ko nihimakeokaua de ahao topahaika ko itedekanua de nihimakeokali. Marai ahi demo gea ko nimangaratiiuahi ho hiadono nimakokeleha e? 20Naa duru tagou-goungu tinihingahu, ngini naa ahao nia hininga duru ihuha mangale gea abe ahao idadi Ngohino de hiadono duru niari ngaro o dunia ma nyawa yopoa-poaka de manga sanangi dika. Ma ngaro ngini naa igoungu duru nia hininga ihuha masara nia huha gea ahao aturuuru hiadono idadi nia garago. 21Abe hoka o ngofeka de ami badangoka, nako ami gahe adonoka ho ka de ami pokoro igoli de ami hininga ihuha. Masara ka de ami ngofaka imaboaka de ami huha gea mawohangoka angamoi aturuuruoka de ami garago ma titi naga o nyawa moioli yomaboaka o duniaka. 22De imaketero hokogea idadi nginioka abe naa ma oraha nginioo nia hininga duru ihuha masara ahao homakamakeokali de duru nia hininga akokilufungoka de o garago. De gea ko moiua ka idadi apoa iniora nia garago gea. 23-24Ho o wange gea homakamakeokali de nia leleha Ngohino ko iwaka angamoi nigaragokaholi. De gea nigarago angamoi ka idadiou ngini ma hirete nimagahoko o Babaiye abe de ahi romanga niapake. Ma dihira ko ma moiuahi nimagahoko de ahi romanga niapake ma naa ka idadi angamoi ngini nihingakuoka. De Ngohi naa duru tagou-goungu tinihingahu nginika ngaro o kia dika nimagahoko de to Ngohi ahi romanga niapake gea ahao ahi Baba winihidoaka la gea nia garago duru ingodumoka.”

25De o Yesusu womahingahuohi ona iwitobanii-niikika wato, “Ngaro Ngohi ma dihiraino ma ngoe o hiketero de o demo ma dulu tapake, ma itigioka ma oraha de o hiketero ko tapakeokaua la tinidotoko nginika. Ho ahao tinihingahu ma titi ahi Baba de tapake dika o demo abe duru igapanga niataoko ma titi. 26Ho ka de ma oraha gea iboa de ahao ngini nimagahoko de ahi romanga niapake. Gea ko ma titiua abe ahao Ngohi kiani tinigahoko o Babaika. 27Koua, naa nihingaku abe Ngohi Ma Jouoka de taino. Ho to Baba ai mau la naa ngini ma hirete nimagahoko angamoi Una duru winidora mangale ngini nihidora Ngohi. 28Abe Ngohi naa toboakau de gea duru Ma Jouoka de tauku o duniauku naa. Ho o dunia tanoa naa de tolio o Babaiye.” Hokogea o Yesusu wahingahu ona iwitobanii-niikika.

29De ahao ona yopaluhu ato, “Igoungu, naa de ahao miamake ani demo abe duru igapanga miataoko ma titi! De gea angamoi o hiketero ko napakeua. 30Ho naa duru itararono ngomino abe Ngona igoungu mata-mata duru nohioriki abe o nyawa ko inilehauahi de manga leleha gea Ngona nohiorikokau. Ho gea mingaku abe igoungu Ma Jouino noboa.”

31De o Yesusu wopaluhu onangika wato, “Naa ma dekanino de ahao ahi hingahu gea ningaku! 32Ma naa nitotoihene e? Ahao naga ma oraha, iya, igoungu ma oraha gea adonoka, abe ngini ahao nimahikabarihi hiadono nikokilio nia kokitauika. De Ngohi ahao nihinoaika hiadono duru tomatengoka. Masara gea igoungu, ko tomatengoua angamoi ka ihikaika ahi Baba naga Ngohioka.”

33“Ahi hingahu mata-mata naa tinihingahu nginika la ti nginioo nia hininga de ma miriidi angamoi nigogere Ngohioka. Ho nia miriidi gea naga ngaro nigogerohi o duniaka naa, de ngaro kiani o huha niamake. Ho ufa nia hininga aliko o huhaika gea! Kiani nikokisanangi dika! O dunia ma kangela naa Ngohi tohikalaka la nginioo ka idadi nilaku.”

Currently Selected:

Yohanese 16: MJDD

Highlight

Copy