Yohanese 17
17
O Yesusu womaniata
1Ka de o Yesusu ai behehongo gea wahingahu ona iwitobaniikika ibooto de ahao womamatagaiye o Horogaiye de womaniata wato, “Ahi Baba, ahi kangela ma oraha adonoka! Ho Ngohi ani Ngofaka naa ahi medebini ma dararono nahimatoko o nyawaika! Nodiai la gea ka idadi to Ngonali ani medebini ma dararono Ngohi ani Ngofaka tahimatoko onangika. 2De gea itiai nahimatoko ahi medebini ma dararono onangika mangale nohihidoakino Ngohino ani kuaha o nyawa mata-mataika, de ani kuahaino gea ka idadi tahiwango ona gea abe nohihidoakino Ngohino la ihiniiki Ngohi. De gea ma titi manga wowango ka hiado-adonika naga Ngoneoka abe ka idadi Ngohi tahidoaka. 3Angamoi o wowango ka hiado-adonika gea o wowango ma gou-goungu abe ona yamake mangale ma titi inihioriki Ngona dika Ma Jou ma gou-goungu. De ona ihihiorikoo Ngohi naa ani Mesia o Yesusu abe nohihidingoto onanguku.”
4“O Baba, Ngohi ani medebini ma dararono tohiboa Ngonaika ma titi tabootoka ahi karajaanga mata-mata abe nohihidoakino Ngohino la todiai o duniakahi naa. 5Ma dihira Ngona de Ngohi homahidogogerohi abe ngaro o dunia ko idadiuahi ma, ahi medebini ma dararono gea nagau. Ho naa Baba togahoko la nohigilio Ngohino ahi medebini ma dararono abe imaketero hoka ma dihirali.”
O Yesusu ona iwitobaniiki wagahoko
6“Ahi Baba, ona ihinii-niiki naa, ona to Ngona ani nyawa abe nohihidoakoka Ngohino hiadono o dunia ma biahaino nahikatingakoka. De onangika tadotoko la Ngona nodadi to onangoo manga Baba, de Ngohi ani mau enangoo tahimatoko onangika ka hiadono ma oraha naa manga hingounu naga ani demoika. 7Ho naa, Baba, ona ihiorikoka abe mata-mata yamake Ngohino gea igoungu Ngonaka dika de aino nohihidoaka. 8Ho abe ani demo nohihidoaka Ngohino gea tahidoakoli onangika. De gea yodafongo dika hiadono ona duru ihioriki Ngona dika nohihidingoto, abe Ngohioo Ngonaka de taino.”
9“Ho Baba ona abe tagahoko naa, gea ona abe ko yaniikokaua o dunia ma biaha. Ma oraha naa ko tagahokua o dunia ma nyawa mata-mataika. Masara Ngohi tagahoko ona gea abe yodadioka to Ngona ani nyawa mangale ma titi ona nohihidoakoka Ngohino. 10Angamoi o nyawa mata-mata Ngohioka ona gea to Ngona, de imakadaene ona mata-mata Ngonaka de hokogenangoo yodadi to Ngohioo ahi nyawa. De ahi medebini ma dararono ona yahimatoko o nyawa utuikali. De gea angamoi ona ihiniiki Ngohi ho hiadono de manga wowango ma datorino yahimatoko o nyawaika to Ngohi ahi buturungu.”
11“De Ngohi naa ko itedekanokaua de ko togogerokaua o duniaka angamoi tolio toboa Ngonaiye, masara ona kiani yogogerohi o duniaka, ho ahi Baba Notebi-tebini, ona naa tagahoko la nagoana. Abe ma titi Ngona napake ani kuahaino la nagoana onangika gea. De igoungu ani kuaha gea Ngona nohihidoakoka Ngohino. Ho ona gea tagahoko la nahidadi moi imaketero hoka Ngona de Ngohi ka ma dodihirainohi de hodadi moi. 12Naa ahi dekanino onangoka Ngohi ka ihikaika tagoana angamoi Ngohioo ahi kuaha imakadaene dika de to Ngonali ho ko kia-kiaua idadi onangika abe nohihidoakoka Ngohino. Masara naga womatengo dika, una gea iwihihanga abe ai romanga idadioka o Naraka ma ngofaka, de ani demo-demo ma dihirainohi itemokau hokogea womangiriki ho hiadono hokogea idadi unangika la ani demo-demo gea ingodumu.”
13“O Baba, naa ma oraha adonoka etolio Ngonaiye ho ahi gogahoko hokonaa tohiboa Ngonaiye ngaro Ngohi naga o dunia ma lokuokahi togogere. Abe ona naa tagahoko la manga garago ingodumu angamoi toigo la manga hiningaka yalufungoka de to Ngohi naa ahi garago. 14To Ngona ani demo-demo Baba tahidoakoka onangika, ho o dunia ma nyawa yadohata onangika angamoi imaketero hoka Ngohi ko o dunia ma nyawaua, ho onangoo yaniikokaua o dunia ma biaha. 15Baba, Ngohi naa ko tagahokua la ona nagoraka o duniaino masara ahi gogahoko la nadatoko o Ibilihino, gea ena duru itobatualonoholi, ho enangino gea kiani Ngona nagoana. 16Angamoi Baba ona ko aniikokaua o dunia ma biaha imaketero hoka Ngohioli ko taniikua o dunia ma biaha. 17Ho naa ona abe nomadingaka Ngonaino tagahoko la nahitebini de ani demo-demoino. Abe ma gou-goungu o duniaka gea to Ngona dika ani demo-demo. 18Angamoi abe hoka Ngona nohihidingoto o duniauku naa, imaketero hokogea onangoo naa Ngohi tahidingoto o dunia ma nyawaika. Abe imaketero hoka Ngona nohihikarajaanga ho onangoli naa ihigila-gila ani karajaanga gea. 19Ho Baba, ma titi ona hiadono Ngohi naa tomahidoaka la duru tomahitaana tomatingakoka Ngonaika. De hokogea Ngohi la onangoo yomahidoaka abe manga wowangoka yomahitaana yagou-goungu ani mau yaniiki.”
Abe iwingaku-ngaku ona mata-mataika o Yesusu wakokigahoko
20“De Baba, Ngohi togahoko naa ko ma titiua ona dika abe ihinii-niiki ma oraha naa masara onangoo tagahoko abe ahao Ngohino ihingaku. De gea ihingaku Ngohi mangale yoihenoka abe ihinii-niikino to ona manga demo-demoino. 21Ho Baba ona gea takokigahoko la duru yodadioka moi Ngoneoka imaketero hoka Ngona naga Ngohioka de Ngohi naga Ngonaka. Hokogea tagahoko la ahao o dunia ma nyawa yamake manga rimoi manga wowangoka de yangaku abe Ngona igoungu nohihidingoto Ngohi.”
22“De ahi medebini ma dararono tahidoakoka ihingaku-ngakuika abe duru imakadaene hoka nengokadau ani medebini ma dararono Ngona nohihidoakino Ngohino. Gea onangika tahidoaka la onangoo yodadi moi imaketero hoka Ngona de Ngohi ka ma dodihirainohi de hodadi moi. 23Ho Ngohi naga onangoka de Ngona naga Ngohioka. De toigo la manga rimoi duru itiai la gea o dunia ma nyawa mata-mataika ka idadi duru ihioriki gea Ngona Baba nohihidingotuku o duniauku naa. Iti ona ihiorikoo ani dora itagi ihingaku-ngakuika imaketero hoka itagi Ngohinoo.”
24“O Baba, ona gea nohihidoakoka Ngohino duru toigo la ngaro o kiaka dika Ngohi naga ma onangoo naga genangoka. De Ngohi duru toigo la ona ahao ihimake Ngohi de ahi medebini de ma dararonoka. Abe o dunia ko idadiuahi de duru nohidoraka hiadono nohihidoaka Ngohino ani medebini de ma daronoka gea.”
25“Ngona Baba duru nototiai! De ngaro o dunia ma nyawa ko inihiorikuahi ma Ngohi tonihioriki. De ona naa abe ihingaku Ngohino ona ihioriki gea Ngona nohihidingoto. 26De Baba Ngona tonihimatokoka onangika. De ahao ka ihikaika tohigali-gali to Ngona ani hininga tahimatoko onangika. Ngohi toigo la ihioriki abe duru nohidora Ngohino, de nagali toigo la ihioriki abe Ngohi ka ihikaika tadora onangika. De ahi dora abe ka ihikaika itagi onangika imaketero hoka ani dora abe itagi Ngohino. Gea ma titi ho ka ihikaika togogere onangoka.” Hokogea o Yesusu ai niniata ma demo ai Babaiye.
Currently Selected:
Yohanese 17: MJDD
Highlight
Share
Copy
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman
