Lukasa 17
17
O Yesusu wadotoko ma titi o hiatara, de o ngongaku, de o tagongo
Matiusu 18:6-9; Maruku 9:42-48
1De o Yesusu wadotoko iwitobanii-niikika wato, “O duniaka naa de ka ihikaika naga o hiatara la ato o nyawa yahowono. Masara nako o nyawa abe yahiata-atara o nyawa utuikali hiadono ona yorehene Ma Jouoka de aino, ona yahiata-atara gea ahao manga hohowono duru kohadubuho yamake. 2De abe ona inihiata-atara duru manga hohowono kohadubuho ho ngaro manga tomarino ihidilikoino de o hakaru kohaamoko de yahidotumo dai o gahi ma lukuku, masara ma hohowono gea ko kia-kiaua. Hongoli nako nihingaku-ngakuoka abe ngaro ngini ka nitipokouku dika nia wowango ma gogere, masara nako o nyawa inihiata-atara, duru ka to onangohi manga hohowono itubuho de ona gea abe yahidodotumo de o hakaru. 3Ho ahi demoino naa de tinihitiarioka la ufa niahirehene o nyawa Ma Jouoka de aino!”
“De nako nia gogianongoru yahowono, gea niataere onangika. De nako niataeroka de ona yomangaku manga howonino, kiani niapongoka. 4De ngaro o wange moi dika de ona yahowono ihigali-gali ma tumidi nginika, masara abe yahowono ma tumidi amomoiika ipaha de yoboa nginika ma tumidi de yomangaku, masara genangoo kiani niapongo onangika.”
5De ahao o Yesusu ai hidingoto ma nyawa iwitemo Unangika ato, “Mia Baluhu, duru migahoko la Ngona nohidogo mia ngongakuika la utuohi iputurungu!”
6De manga Baluhu wopaluhu wato, “Nako naga ti ngini nia ngongaku ngaro ahao ma eteteke hoka o sawi ma mui ma mengeteke, gea niakunu niahuloko o gota ma amoko naa ma roehika niato, ‘Nomarafuku de ani ngutu-ngutuku ka ma moi ho nomagoraka de ahao nomadatomoli o gahiuku!’ De gea niahuloko ibooto de inihingounu, iti naga de nia ngongakuokau!”
7De ahao ma titi moioli o Yesusu wadotoko onangika wato, “Abeika nimafikirohi naa moi. Abe nako naga ti ngini nia gilaongo womatengo de una wokarajaanga nia redioka eko nia domba wotobagoana. De ipahaino una ma hoanoka de waino wowohama nia tauino. Sarakia, ka de wowohamino de ngini niwiahoko niato, ‘Nainohi nogogeruku la nolomo’? Koua! Hokogenangua nia demo unangika! 8Masara gea wowohamino de niwihuloko niato, ‘Ahi inomo nohihakaiohi de nomaturuuru ani baju abe biaha notobapake ma oraha nohileleani. De gea nohileleani hiadono tolomo ibooto de ahao ngonali ka idadi nolomo.’ Hokogea nia demo nia gilaongika. 9De ai karajaanga wabootoka de ngini tanu ngaro ufa dika de niwitarimakase unangika, angamoi una gea ai tagongo dika wohingodumu. 10De hokogenangoo ngini naa, abe ngini nidadioka to Ngohi ahi gilaongo. Ho ma oraha nihihingounu ahi demoino de ufa nionganono la Ngohi totarimakase nginika. Hokogenangua, masara gea koaho niato, ‘Ngomi naa ka o gogilaongo dika, de abe midiaioka gea mihingodumu dika abe imihitagongoka ngomino.’” Hokogea o Yesusu ai dodotoko ma demo.
O Yesusu wahitogumu o nyawa yangimoi yapado-pado
11De o Yesusu ona yogila-gilali abe manga dodagi o Yerusaleeme ma kotaika, de naa yomahiadonoka o Galilea ma tonaka de o Samaria ma tonaka ma hiribatingino. 12De abe ma oraha wowohama o kapongo moi ma goronaika de wamake o nyawa yangimoi yapado-pado abe yomatingaka hatoli ma gurutika. 13De ona gea duru yopoa-poaka ato, “Mia Baluhu o Yesusu, mimagahoko la ani dora ma hiokoo itagi ngomino!”
14De o Yesusu womalega onangika de wato, “Ngini nikokiloiki de nimahimatoko nanga hidemo ma nyawa Ma Jouiye la ona atailako nia badanga!” Ho ona yokokisoboka de manga dodagi ma goronaka de ka itodokanino de yokokitogumoka.
15De abe yangimoiino gea naga womatengo ka de wohioriki abe wotogumoka de wigilio o Yesusika. De woboa o Yesusino de ai ilingi waamo-amokiye wihigiriiri Ma Jouika. 16De womamotumuku o Yesusu ai louoka de wotarimakase Unangika abe ma titi wihitogumoka. De una gea o Samaria ma tonakino ma nyawa.
17De ahao o Yesusu wotemo wato, “Kangano naga o nyawa yangimoi abe yotogumoka manga panyakeino. Ho abe yahiwo ona gea o kiaka? 18De adodoa ho naa una abe ko o Yahudi ma nyawaua de ka una dika woboaino de wihigiriiri Ma Jouika?” 19De o Yesusu witemo unangika abe ai louoka wato, “Naa ka idadi nomaokoiye de nogila-gila ani dumutika. De ngona notogumoka gea ma titi ani ngongakuino Ngohino.”
Muruonoka de ahao Ma Jou duru wahikoano ai nyawaika?
Matiusu 24:36-41; Maruku 13:32-37
20De o wange moiukuoli o Farisi manga doomuino ma nyawa yamuruono naga iwileha o Yesusika ato, “Muruonoka de ahao Ma Jou duru wahikoano ai nyawaika?”
De o Yesusu wopaluhu wato, “Abe ma oraha ai nyawaika wahikoano Ma Jou, gea ko idadiua hamake de nanga lako. 21Abe ko idadiua o nyawa ahao yotemo ato, ‘Nenangoka wahikoano ai nyawa!’ de ko idadiua ihidaere ato, ‘Abeika, genangoka ai nyawa wahikoano Ma Jou!’ Ho hokogenangua yotemo angamoi gea ti ngini nia hidogoronaka abe Ma Jou wahikoano ai nyawaika.”
22De ipahaino de wahitararono iwinii-niikika wato, “Ahao ngini duru nioigo la iti niadaene ma oraha abe Ngohi o Nyawa ma Ngofaka tinihikoano nginika. Masara gea ngini naa ko niadaenua angamoi ma oraha ko adonuahi. 23Ho ngaro naga o nyawa inihingahu nginika ato, ‘Nanga Koano woboaka, de Una naga naangoka!’ eko ‘Una naga genangoka!’ masara ngaro ma abari gea niihenino ma ufae dika niloiki nihilingiri. 24Angamoi nako ma oraha adonoka abe Ngohi o Nyawa ma Ngofaka toboali, gea ahao o nyawa mata-mataika o duniaka naa ka ma moi ihimake ahi boa. Abe imaketero hoka ma oraha o leletongo de o nyawa mata-mata ka idadi yamake ngaro ona dai eko dina, hokogenangoo ahao o dunia ma nyawa mata-mataika ahao ihikokimake ma oraha abe toboali. 25Masara abe ihira-hira Ngohi o Nyawa ma Ngofaka kiani o kokangela de o huha ma ngoe tohimangohi, de ma nyawa abe yowango ma oraha naa o duniaka, ona gea utu kiani ihioluku.”
26“De abe ma titi Ngohi o Nyawa ma Ngofaka toboali, gea ahao o nyawa yatodokana manga hininga abe imaketero hoka ma dodihiraino abe ma oraha o Nuhi nagahi o duniaka de o nyawa duru yatodokana ma oraha ma nguihi yadaene. 27Angamoi ma dodihiraino gea abe ma nguihi ko iboauahi de ma nyawa gea duru ko ihiorikua abe manga hohowono itigioka, ho ona manga wowango ma biaha ka yatobanii-niikohi. Abe hoka ona yatobaniikohi manga ngolo-ngolomo de manga rame-rame, de manga goo-gogilaka yodiai abe hoka manga biaha gea yotobadiai ka hiadono ma wange abe o Nuhi wowohamika ai kapa ma goronaika. De o Nuhi una wowohamoka de ahao ma nguihi idadi de yahikokihibinaaha o nyawa mata-mataika.”
28“De ma oraha abe toboali de gea imaketero hoka ma dodihiraino abe ma oraha o Loti ka wowangohi o duniaka. De ma oraha gea o nyawa manga wowango ma biaha yatobanii-niiki, abe yolomo de yokere biaha dika, de yomaijaino de yofuku-fukunu manga kiahonanga, de manga redi yodato-datomo, de manga tau ihitobahigoko. 29Masara de ahao idadi o wange moiuku abe o Loti wohupu o Sodomo ma kotaka de waino, de duru ma wange gea dika ka itodokanino de o uku de o uba itoka-tokara ipurarahuku o Horogaka de auku de yahibinaaha o Sodomo ma nyawa mata-mataika. 30De hokogenangoo o nyawa manga wowango ma biaha dika yanii-niiki ma oraha Ngohi o Nyawa ma Ngofaka tomahimatoko de toboali.”
31“De ma wange gea onagona dika naga manga tau ma poretoka de toboa, ngaro ufa yowohamohi manga tau ma goronaika de yato, ‘Ahi kiahonanga ma hohutulu toleohi jai-jai.’ Gea ufa, ma kiani yoaroka dika. De o nyawa abe naga manga redioka ma wange gea, ufa yolio manga kapongika ma kiani yoaroka dika. 32Angamoi ufa ngini niawohanga abe hokokia idadi o Loti ngoi fekatika!”
33“De onagona dika ko ihiniikua Ngohi angamoi ato manga wowango yomadatoko la ato ufa yohonenge, masara, ahao ona gea ka yohonenge dika. Masara onagona dika abe ihingakuoka de manga wowango yomahidoaka ma titi Ngohi ihiniiki, ona gea tanu manga badanga dika ihonenge, masara manga wowango ka nagahi.”
34“De naa tinihingahuohi abe ma futu gea toboali de Ma Jou waregu o nyawa mata-mataika, abe utu wagoraka o duniaino de utu wanoaika. Ho ngaro naga o nyawa yahinooto o ngingidu moioka yomaidu, de ka itodokanino de yomatengo Ma Jou waoka, masara manga dodiawo nagahi manga ngingiduoka. 35De ngaro nagali o ngofeka yahinooto yomakuduhunu yokarajaanga abe o pine yotuu-tutuku o luhungoka de ka itodokanino de momatengo Ma Jou womiaoka ho ka aiaho, masara ami dodiawo muna nagahi o luhungoka. [ 36De ngaro nagali o nyawa yahinooto yokarajaanga manga redioka de gea Ngohi toboa. De gea womatengo ka itodokanino de Ma Jou wiaoka ho ka aiaho, masara ai dodiawo ka nagahi ma redioka.]”
37De ahao iwinii-niiki iwileha ato, “Mia Baluhu, ahao ma wange gea noboali de o kiauku nouti?”
De Una wotemo wato, “Abe duru imaketero hoka nia demo ma dulu abe niato, ‘Nako daku ma hoanino de hamake o kawihi imatoomuino de yobobairi, gea hohiorikoka abe naga o kia naga ma honenge daena ma timiuku.’ De nia demo ma dulu gea igoungu, angamoi nako hamake o kawihi yobobairi, gea hohiorikoka naga o kia naga ma honenge angamoi ma dodunguu gea hohiorikokau. De hokogenangoo ahao ma oraha toboali de ahi boa ma ngi ko ihuhaua o nyawa yamake.” Hokogea o Yesusu wapaluhu onangika.
Currently Selected:
Lukasa 17: MJDD
Highlight
Share
Copy
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman
