Lukasa 18

Abe ma titi kiani ka ihikaika homaniata

1De ma moiukuoli o Yesusu wadotoko iwinii-niikika de o hiketero ma ade-ade. Abe ai hiketero ma demoino de woigo wahigaro abe kiani ka ihikaika yomaniata de ko idadiua yomahipipidili o niniatino ma titi abe nako manga hininga ieteke. 2De wohiketero wato, “Naga womatengo wotobauru-urusu o kota moioka, de una gea ko wimodongua Ma Jouika, de o nyawaikaoo ma ko iwa ai horomati ngaro onagonaika dika. 3De ipahaino de naga momatengo o bao abe mogogere ma kotaka gea de o nyawa imihitobahikangela munangika. Ho muna migogilio una wotobauru-urusika de motobagahoko o duduhunu. Abe muna moigo la waurusu de woputuhu abe ona imihikokangela gea yahowono de wataere, la ibootohi imihikangela munangika. 4Masara wotobauru-urusu una gea ko womihigihenua ami gogahoko ma demoino. Ho muna ka ihikaika motobaboa ai himangino de momagahoko unangika la womiduhunu ami kangelaino. De ika-ika de ahao una ai hininga ngade-ngade itoaka. Angamoi muna ka ihikaika momatobagahoko ai duduhunu, ho womatemo doka ai hiningaka wato, ‘Ngohi naa ko timodongua Ma Jouika de ngaro o nyawaika ma ko iwa ahi horomati onangika. 5Masara o bao naa muna duru mohitobaruwae ngohino, ho koaho tomiduhunu dika la o totiai ma hiowa mamake ahi putuhu ma demoino, de o nyawa gea ibootohi imihikangela. De naa tomataiti tomiduhunu done ahi hininga itoaka ma titi motobaboa ahi himangino de ami gogahoko ma demo ko itoa-toakua.’ Hokogea ma bahauku de una wotobauru-urusu womiduhunu o baoika gea abe momatobagahoko o duduhunu unangino.”

6De ahao o Yesusu wotemo wato, “Abeika wotobauru-urusu una gea ai wowango duru ko itiaiua, masara nimafikirohi abe ma bahauku de to una ai demo sarakia. Abe ngaro una ai hininga ko itiaiua masara ma bahauku de womihigihene o bao gea ami gogahoko ma demoino. 7Ho hongoli Ma Jou ahao wahigihene to Una ai nyawa manga gogahoko ma demoino abe yomatobagahoko o futu de o wange Unangika! De abe ma oraha Una waduhunu onangika, ai putuhu gea duru itiai manga wowangoika. 8Ho naa tinihingahu abe nako ma oraha adonoka de Una womataiti waduhunu ai nyawaika, de gea to Una ai putuhu duru itaana.”

De ahao o Yesusu wohigila-gila ai demo wato, “Masara ahao dokengika abe Ngohi o Nyawa ma Ngofaka toboali la tatailako o nyawa manga wowango, ma oraha gea sarakia? Bote nagahi o nyawa o duniaka naa abe tamake ona ka yomatongohonohi manga ngongakuoka? Done o nyawa manga ngongaku iowahoka ma oraha toboali!”

Abe ma titi kiani homaniata de nanga hininga ma dodipokouku

9De ahao o Yesusu wodiai o hiketero ma ade-ade moioli abe wahidumutu ai ade-ade o nyawaika abe duru yomahinganono to ona ma hirete manga datorika la ato yototiaioka. Abe ona yomahiromanga yototiai Ma Jou ai himangoka masara nako o nyawa utuika gea hoka yangelo onangika ato ona ko kia-kiaua. De ai hiketero ma ade-ade hokonaa wato, 10“Naga o nyawa yahinooto yoboridoa daku Ma Jou ai Tauiye la ato yomaniata. Abe womatengo una o Farisi ma nyawa de womatengoli una gea wotobagaho-gahoko o pajaka ma tiwi o nyawaika de ma ngoe warusi-rusi onangika. 11De o Farisi ma nyawa una womaokoino de womaniata wato, ‘Jou, ngohi naa duru totarimakase abe ngohi de o nyawa utu mimakohowono. Abe ona utu yotobaora-ora o nyawa manga tiwi, de manga wowango yao ko itiaiua, de yomakitigi de abe ko manga fekatua eko manga rokatua. De hongoli womatengo ga doka abe wotobagaho-gahoko o pajaka ma tiwi o nyawaika. Duru totarimakase abe ngohi de ona mimakohowono! 12Abe ngohi naa o minggu moi ma hinooto topuaha, de o kia dika mata-mata tomamake de gea taregu ngimoi la ma regu moi tonihigilio Ngonaika.’ Hokogea o Farisi ma nyawa ai niniata ma demo.”

13“Masara una wotobagaho-gahoko o pajaka ma tiwi, to una ai hininga imakohowono. Abe una womatingaka hatoli ma gurutika de ma oraha womaniata de ko iwimoroinua womamatagaiye o Horogaiye ma titi womahioriki ai howono Ma Jouika. De una womapoha-poha ai aluoko la womahimatoko ai hininga ma huha de wotemo wato, ‘Ahi Jou, duru togahoko la ani dora ma hiokoo itagi ngohino naa, angamoi ngohi o tobahowo-howono ma nyawa!’ Hokogea una womaniata.”

14De o Yesusu wato, “De naa moi tinihingahu, abe ma oraha ona yahinooto yoborilio manga tauika de womatengo dika wototiaioka Ma Jou ai himangoka, de gea una wotobagaho-gahoko o pajaka ma tiwi o nyawaika. Masara nako womatengoli abe womagorakiye ai niniata ma demo ma goronaka, una gea Ma Jou ko wietongua wototiai. Angamoi onagona dika yomagorakiye ahao Ma Jou wahitipokouku, de onagona dika yomahitipokouku ahao Ma Jou wagorakiye.”

Abe ma titi nanga hininga kiani imaketero hoka o ngofa-ngofakoli manga hininga

Matiusu 19:13-15; Maruku 10:13-16

15De ipahainoli de ahao o nyawa manga ngofa-ngofaka yao o Yesusino la ato Una wafokumu de wagahoko ma owa Ma Jouiye ma titi ona. Masara o Yesusu iwinii-niiki ona yataere manga dimonika ato, “Ei, ko idadiua ma ngofa-ngofaka naa niaoika ma guruika, done iwiruwae!” 16Masara o Yesusu Una wahokino ma ngofa-ngofaka gea de wataere iwinii-niikika wato, “Nianoaika! La o ngofa-ngofaka gea yoboa Ngohino, de ufa niatumungu ona gea. Angamoi onagona dika manga hininga imaketero hoka o ngofa-ngofakoli naa manga hininga ma dodipokouku, de gea ona abe Ma Jou wadafongo de wahikoano ona. 17Abe Ngohi duru tagou-goungu tinihingahu nginika, onagona dika yoigo yodadi Ma Jou ai kawaaha abe ma oraha wahikoano o nyawa, ona gea kiani iwidafongo Ma Jou la Una wodadi manga koano abe imaketero hoka o ngofa-ngofakoli naa iwidafongo de manga hininga ma dodipokouku. Ho onagona dika yomaaduru abe hoka o ngofa-ngofakoli naa, ona gea ahao Ma Jou wadafongo. Masara abe nako ko yomahigunoaua Ma Jou wahikoano, ona gea ahao Ma Jou ko wadafongua.”

Womatengo wokaya-kaya woleha ma titi o wowango ma ngango

Matiusu 19:16-30; Maruku 10:17-31

18De ma moiukuoli de naga womatengo o Yahudi ma nyawa manga hidimono woboa o Yesusino de wileha Unangika wato, “Ahi Guru duru ma rorahai, naa moi tonileha Ngonaika. Sarakia, ahi wowangoino de o kia todiai la genangino de ka idadi o wowango ka hiado-adonika ngohi tamake?”

19De o Yesusu wipaluhu unangika wato, “Abeika ani demo gea nohihiromanga nato Ngohi duru torahai. Masara abe ani demo gea ma titi o kia? Angamoi ngaro o nyawa onagona dika, ma ko moiua yorahai, duga-duga ka Ma Jou dika worahai. 20Masara abe ma titi ani leleha gea, marai ngona nohiorikoka ma pareta Ma Jouino itemo ato,

‘Ngini ko idadiua nimakitigi de o nyawa ngaro onagona dika nako ko nia fekatua eko ko nia rokatua, ngini ko idadiua o nyawa niatoma, ngini ko idadiua nitohiki, ngini ko idadiua o nyawa niadofa-dofanga de niahiade-ade itorou, de ngini kiani naga nia horomati nia baba de nia memeika hiadono niahingounu de niao irahai onangika.’” # 18:20 Huhupu 20:12-16

21De ma hidimono gea womahingahuoli wato, “Ngohi naa ka ahi etetekinohi de o pareta gea mata-mata ngohi duru taniikoka.”

22De o Yesusu witemo unangika wato, “Bowahu moiokahi kiani nodogo la ani hingounu hatoli ingodumu. Kiani noiki nolio ani tauika, naika de ani kiahonanga nakokifukunoka mata-mata de naga ani tiwi ahao nahidoaka abe o nyawa yohu-huhaika. Gea nahidoaka onangika la ngona ahao nokaya o Horogaka. Ho ani kiahonanga nakokifukunoka de ahao nolioli Ngohino de ka idadi nohiniiki Ngohi.” 23Ho ka de gea woihene de una ai hininga duru ihuha angamoi to una ai kiahonanga duru kohangoe de ko woigoua gea wahidotodoaka o nyawaika.

24De o Yesusu womalega unangika de wotemo iwinii-niikika wato, “Ona abe de manga tiwi-tiwioka duru ihuha yodadi Ma Jou ai kokawaaha la ahao Una wahikoano onangika. 25De ahi demo gea ka idadi tinihitararonoli de o hiketero ma demo moioli. Abe nako o aewani o unta de o populaki ma lakoika iwohama la ato ma honongaika ihupu, enangohi gea hatoli igapanga. Masara nako ona yokaya-kaya ato yohapongo o Horogaika, onangohi duru ihuha yohapongo!”

26De ai demo gea yoihene de duru yokokiheranga hiadono yotemo ato, “Ou! Genangoka abe ma dodihirainohi de miataoko ihowono! Angamoi ngomi miato bote ona yokaya-kaya ka idadi yohapongo dakuiye angamoi duru ona gea abe Ma Jou wahiowa hiadono yokaya. Masara naa Ngona nomihingahu nato ngaro ona yokaya-kaya ma ko yohapongua. Ho nako o nyawa yokaya-kayaoo de ko yohapongua, gea done o nyawa ko moiua la yamake o wowango ka hiado-adonika.”

27De wopaluhu wato, “Duru niagoungu. Nako o nyawa dika, duru ko yakunua, masara Ma Jou hokogenangua. Nako de Ma Jou, ngaro o kia dika, ma ka wakunu mata-mataika.”

28De ahao o Peturusu wotemo o Yesusika wato, “Ho abeika ngomi naa angamoi ko mikayaua. Mata-mata mianoaka la mininii-niiki Ngona! Ho done to ngomi mia utumu ahao hokokia miamake?”

29De wipaluhu wato, “Naa duru tagou-goungu tinihingahu, abe onagona dika manga tau yanoaka, eko manga fekata yanoaika, eko manga roria-dodoto eko manga dimono eko manga ngofa-ngofaka yanoaika la ato manga wowango yomahidoaka. Ho onagona dika abe hokogea manga hininga la ato Ma Jou ka idadi wahikoano ai nyawaika, 30gea ona ahao yamake ma utumu Ma Jouino. Abe ma oraha ona ka o duniakahi yowango de manga utumu gea Ma Jou duru wohidogo onangika. Ho nako hafikiri abe gea mata-mata yanoaika ma dihira, ahao to ena ma duruuru Una wahidoaka hiadono ma hiowa duru ilamoko onangika. De hongoli ahao dokengino abe ma oraha ahao iboa, ona ahao gea yamake o wowango ka hiado-adonika.”

O Yesusu wahingahuoli yangimoi de yahinootoika abe ahao iwihohonenge

Matiusu 20:17-19; Maruku 10:32-34

31De ahao o Yesusu watoomuinoli iwinii-niiki yangimoi de yahinooto la ka ona dika de womahingahu onangika abe ahao idadi hokokia Unangika. De Una wato, “Naa hodoa o Yerusaleemiye, de abe homahiadoniyeoka de ahao kiani idadi o Nyawa ma Ngofakika abe imaketero hoka ma dodihiraino Ma Jou ai uru ma dodofanga inahingahuoka. Ho gea mata-mata manga demo ma titi o Nyawa ma Ngofaka ahao kiani ihingodumoka. 32Abe ahao iwihidoaka ona ko o Yahudi ma nyawaikaua la iwihohedu de duru iwihitipokouku, de iwiobi-obiri. 33De nagali abe iwihipoha-pohakahi de o hohonenge ma boboha, de ahao ma bahauku de iwihohonenge. De ngaro wohonengoka masara o wange hange dika ipahaika de womomikokali.”

34Hokogea o Yesusu womahingahu onangika, masara to Una ai demo moioo de ko yataokua ma titi genangino. Abe imaketero hoka ai demo ma titi agogonokahi onangino la ko idadiuahi yomangaratii.

Womatengo worafi-rafioka de o Yesusu wihitogumu

Matiusu 20:29-34; Maruku 10:46-52

35De ipahainoli de o Yesusu de iwinii-niiki yogila-gilali manga dodagioka de yomahitigino o Yeriko ma kotaino. De naga womatengo worafi-rafi womagoo-gogere o ngekomo ma datekoka de womatobagaho-gahoko o tiwi o nyawaino abe iwitotilakuru. 36De una ka de woihene o nyawa yowoe-woe manga hagaaga de waleha o nyawaika abe o kia idadi genangoka. 37De naga iwihingahu abe o Nasarete ma kapongino ma nyawa ai romanga o Yesusu, Una naga woboa ma ngekomino gea. 38Ho worafi-rafi gea womulaenge o duduhunu womagahoko de wopoa-poaka wato, “Yesusu, abe Ngona o Dautu ai Toforauku! Ngohi tomagahoko la ani dora ma hiokoo itagi ngohino naa!” 39De o nyawa abe yotagi-tagi o Yesusu ai himangoka iwitaere unangika ato, “Ufa nogigoro hokogea! Nomarii-riidoka dika!” Masara ka de hokogea de utuohi waamo-amokiye abe imaketero hoka ai demo ihira-hira wato, “O Dautu ai Toforauku, ngohi tomagahoko la ani dora ma hiokoo itagi ngohino naa!”

40De o Yesusu woihene ai demo gea de womatogumukuohi o ngekomoka de wahuloko ai nyawa la una worafi-rafi iwiao Unangino. De iwiao o Yesusino de Una wato, 41“Ngona o kia nomagahoko Ngohino la nato toniduhunu?”

De wipaluhu wato, “Ahi Baluhu, duru toigo la tomahioriki.”

42De o Yesusu wotemo wato, “Naa tonihitogumoka la naa ka idadi nomahioriki! De gea ma titi ani ngongakuino Ngohino hiadono inihitogumoka!” 43Ka de wotemo ibooto de una gea ka idadi womahioriki, de una winii-niiki o Yesusika de wihigogiriiri Ma Jouika. De ona abe yamake gea idadioka, onangoo mata-mataika duru iwihigogiriiri Ma Jouika.

Currently Selected:

Lukasa 18: MJDD

Highlight

Copy