A Cakacaka 1
1
A WASE I. —Sa yalata na Yalo Tabu kivei iratou na nona tisaipeli ko Jisu, 1-8. Sa rairai mai vei iratou na agilose e rua, ni sa kau cake ko Jisu ki lomalagi, a rau sa tukuna ni na lako tale mai emuri ko koya, 9-11. Eratou sa soqoni vata ki Jerusalemi ka daumasu, 12-14. Sa digitaki ko Maticeia mei apositolo, mei sosomi kei Juta, 15-26.
1AU a cakava nai vola eliu, Ciofilo, e na ka kecega sa vakatekivu me cakava ka vakatavulica ko Jisu; 2ka yacova na siga sa kau cake kina ko koya, ni sa oti na nona vosa e na Yalo Tabu vei iratou nai apositolo, o iratou ka digitaka ko koya: 3o iratou sa vakatakilai koya talega kina ko koya, ni sa bula, e nai vakatakilakila e vuqa, ni sa oti na nona mate, a sa daurairai vei iratou ka bogi vasagavulu, a sa vosataka na veika ni matanitu ni Kalou. 4Ia, ni sa dausoqoni vata kei iratou, sa vakarota me ratou kakua ni biuti Jerusalemi, me ratou waraka ga na vosa ni yalayala i Tamana, a ya, sa kaya ko koya, dau a rogoca maivei au: 5e dina ka dauveipapitaiso ko Joni e na wai; ia ni sa sega ni oti e vuqa na bogi, dou na papitaisotaki e na Yalo Tabu.
6Ni ratou sa qai soqoni vata tu, eratou sa tarogi koya, ka kaya, Turaga, o na cakavi ira tale na Isireli me ra vakamatanitu e na gauna o qo, se segai? 7A sa kaya vei iratou ko koya, Sa sega ni nomudou me kila na kena gauna, se na kena yabaki, sa veitalia duaduaga kina ko Tamaqu: 8ia dou na rawata na kaukauwa, ni sa lako mai vei kemudou na Yalo Tabu; dou na qai dautukuni au mai Jerusalemi, kei Jutia taucoko, kei Samaria, ka yacova nai yalayala kei vuravura.
9Ia ni sa tukuna oti ko koya na veika o qo, sa qai kau cake, ni ratou sa vakaraica tu; a sa dua na o sa kauti koya tani e matadratou. 10Ia ni ratou sa rai matua ki lomalagi, ni sa lako yani ko koya, raica, e rua na tamata sa tu voleka vei iratou erau vakaisulu vulavula, 11a rau sai kaya, Oi kemudou na kai Kalili, dou sa tu ka rai matua ki lomalagi e na vuku ni cava? o Jisu o qo o koya sa kau tani cake vei kemudou ki lomalagi, ena lako mai vakakina me vaka dou sa raici koya ni sa lako ki lomalagi.
12Eratou sa qai lesu tale ki Jerusalemi mai na ulu-ni-vanua sa vakayaca ki na veiolive, sa voleka ki Jerusalemi me vaka ga na kena yawa ni lakolako e na dua na siga ni vakacecegu. 13Ia ni ratou sa curu ki loma, eratou sa cabe ki nai taba loma ni vale ecake, eratou sa dautiko kina, io, ko Petero, kei Jemesi, kei Joni, kei Adriu, o Filipo, kei Tomasi, o Paricolomiu, kei Maciu, o Jemesi na luve i Alifio, kei Saimoni e dua vei ira sa vakatokai Na gumatua, kei Juta na taci i Jemesi. 14Eratou sa gumatua kecega ko iratou o qo, a ratou sa lomavata e na kerekere kei na daumasu, kei iratou talega na yalewa, kei Meri na tina i Jisu, kei iratou na tacina.
15Ia e na gauna ko ya, sa tu cake kina ko Petero e na kedra maliwa na tisaipeli, (ni sa wili vata na yacadra era sa dua beka na drau ka ruasagavulu,) a sa kaya, 16Oi kemudou na veiwekani, e dodonu me vakayacori na tiki-ni-vola o qo, a ya ka vosataka eliu na Yalo Tabu e na gusu i Tavita, e na vuku i Juta, o koya ka liutaki ira era sa tauri Jisu: 17ni sa wili vata kei keitou ko koya, a sa lesi ki na cakacaka o qo.
[ 18Ia ko koya o qo sa volia e dua na tiki-ni-vanua e nai voli ni valavala ca ko ya; a sa lutu ka saumakidule kira, a sa kacabote na boto ni ketena, a sa kasabura kecega na nona wawa: 19a sa kilai na ka o qo vei ira kecega sa tiko mai Jerusalemi: a sai vakatokai kina na tiki-ni-vanua ko ya e na nodra vosa, Akelitama, o koya ko ya, Na vanua ni dra.]
20Ni sai volai e nai vola ni Veisere, Me lala didi mai na nona vale, ia me kakua na tamata me tiko kina: ia, Me dua tani me taura na nonai tavi. 21O koya sa dodonu kina, maivei ira ua tamata era sai dausoqo vata kei keda e na gauna taucoko sa tiko kina kei keda na Turaga ko Jisu, 22sa vakatekivu mai na papitaiso i Joni, ka yacova na siga sa kau tani cake kina vei keda ko koya, me dua vei ira o qo me lesi me tukuna vata kei kedatou na nona tu cake tale mai.
23A ra sa lesia e lewe rua, o Josefa sa vakatokai ko Parisapa, a yacana talega ko Jusitu, kei Maticeia. 24Era sa qai masu, ka kaya, O iko, Turaga, ko sa kila na yalo ni tamata kecega, mo vakatakila mai se ko cei vei rau o qo ko sa digitaka, 25me nonai tavi na cakacaka vakaiapositolo o qo, sa sivo tani maikina vakaca ko Juta, me lako ki na nona yasana. 26A ra sa qai dui tara na madigi vola e na vukudrau, a sa bale vei Maticeia nai vola; a sa wili vata kina ko koya kei iratou nai apositolo e tinikadua.
Currently Selected:
A Cakacaka 1: FIJ1864
Highlight
Share
Copy
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
