YouVersion Logo
Search Icon

A Cakacaka 2

2
Sa soli na Yalo Tabu vei ira nai vavakoso lewe ni soro, 1-13. Sa vunau ko Petero, 14-36. Era sa veivutuni e so, ka papitaisotaki, 37-40. A sa veilomani sara ko ira kecega sa vakabauta, 41-47.
1IA ni sa yaco sara na siga ni solevu ni kalimasagavulu ni bogi, era sa tiko lomavata ko ira kecega e na tikina e dua. 2Sa qai lako vakasauri mai lomalagi e dua na rorogo, e vaka na cagi vakacevaruru kaukauwa, a sa vakasinaita na vale taucoko era sa tiko kina. 3A sa rairai vei ira na ka e vaka na vei-yameyame ni buka waqa sa dui veisebayaki, a sa tiko yadua vei ira vakaaduaga. 4A ra sa vakasinaiti kecega e na Yalo Tabu, a ra sa vakatekivu me vosataka na vosa tani e so, me vaka sa solia vei ira na Yalo me ra cavuta.
5A sa tiko mai Jerusalemi na kai Jutia e so, a tamata lotu, mai na veivanua kecega e ruku i lomalagi. 6Ia ni sa rogovaki yani na ka o qo, era sa soqoni vata na lewe vuqa, a ra sa kidacala ni ra sa dui rogoci ira ko na tamata yadua ni ra sa vosataka na nona vosa. 7A ra sa kidacala kecega ka kurabui, ka kaya vakai ira, Raica, era sa sega li ni kai Kalili ko ira kecega o qo era sa vosa? 8ia ka vakaevei o qo ni da sa rogoca koi keda kecega, e na noda vosa eda a sucu kaya? [ 9ko ira na kai Paricia, kei Mitia, kei Ilama, kei ira sa tiko mai Mesopotemia, kei Jutia, kei Kapatosia, mai Ponito, kei Esia, 10mai Firijia, kei Pamifilia, mai Ijipita, kei na yasayasa vaka-Lipia, c voleka ki Kirini, kei ira na vulagi mai Roma, ko ira na kai Jutia kei ira na tamata lotu vakai ira, 11ko ira na kai Kiri ti kei Arepea,] eda sa rogoci ira ni ra sa tukuna e na noda vosa na nona cakacaka e veivakidacalataki na Kalou. 12A ra sa kidacala kecega, ka taqaya, ka sa veikainaki vakai ira, A cava nai balebale ni ka o qo? 13A sa vakalialia ko ira e so tani, ka kaya, Era sa vakasinaiti e na waini vou.
14Sa qai tu cake ko Petero, kei iratou na tinikadua, ka tabalaka cake na domona, ka tukuna vei ira, Oi kemudou na kai Jutia, kei kemudou kecega sa tiko e Jerusalemi, dou kila na ka o qo, ka rogoca na noqu vosa: 15ni ra sa sega ni mateni ko ira o qo, me vaka na ka dou sa vakananuma; ni sa kenai katolu ga ni tiki-ni-siga. 16Ia sai koya ga o qo sa tukuna na parofita ko Joeli: 17Sa kaya na Kalou, Ena yaco e na gauna emuri, kaʼu na sovaraka na Yaloqu kivei ira na tamata kecega: a ra na parofisai kina ko ira na nomudou gonetagane kei ira na nomudou gonealewa, ia ena raica na raivotu e so ko ira na nomudou cauravou, ia ena tadrataka na tadra e so ko ira na nomudou qase: 18vei ira talega na noqu tamata kei na noqu vada kaʼu na sovaraka na Yaloqu e na gauna ko ya, a ra na parofisai kina: 19ia kaʼu na vakatakila na ka e veivakidacalataki e so c lomalagi ecake, kei nai vakatakilakila e so e vuravura era; a dra, kei na buka waqa, kei na o kubou: 20ena matalia na mata-ni-siga me butobuto, kei na vula me dra, ena qai yaco mai emuri na siga i Jiova, a ya sa levu ka rogo tiko: 21ia ena yaco, o koya yadua ena masuta na yaca i Jiova, ena bula.
22Oi kemudou na tamata na Isireli, rogoca na vosa o qo; O Jisu na kai Nasareci, a tamata sa tukuna votu vei kemudou ko na Kalou e na caka-mana, kei na ka e veivakidacalataki e so, kei nai vakatakilakila e so, o koya sa lavaka ko na Kalou vei koya me cakava e na kemudou maliwa, me vaka dou sa kila; 23o koya, ni sa soli oti yani vei kemudou, me vaka ka nakita dina ko na Kalou ka lewa eliu, dou sa taura ka vakota ki na kauveilatai ka vakamatea c na ligadra na tamata ca: 24o koya sa vakatura cake ko na Kalou, ni sa sereka nai vau ni mate; ni sa sega ni rawa mo vauci tikoga kina ko koya. 25Ni sa vosataki koya ko Tavita, Au a raici Jiova tikoga ni sa tu e mataqu, ni sa tu ko koya e na ligaqu i matau, meʼu sega kina ni yavavala: 26o koya sa reki kina na yaloqu, a sa marau kina na yamequ; ena vakacegu talega na lewequ e nai nuinui: 27ni ko na sega ni biuta na yaloqu mai etesi, se biuta na nomu Le dua yalosavasava me vuca mai: 28o sa vakatakila mai vei au na sala ni bula; o na vakasinaiti au e na marau mai na matamu. 29Oi kemudou na veiwekani, dou vosota meʼu doudou niʼu sa tukuni Tavita na qaso vei kemudou, ni sa mate ko koya ka bulu, a sa tu ga vei keda na nonai bulubulu ka yacova na siga o qo. 30Ia ni sa parofita ko koya, a sa kila ni ka bubului vua ko na Kalou e na vosa bubului, ni na sucu vua ko ira ena vakatubura maikina ko koya na Karisito, e vaka na lewena, me tiko e na nonai tikotiko vakaturaga; 31o na nona kila eliu, sa tukuna na tu cake tale i Karisito, ni na sega ni biu na yalo i koya mai etesi, se na vuca mai na lewe i koya. 32O Jisu o qo sa vakatura cake ko na Kalou, a sai vakadinadina e na ka o qo koi keitou kecega. 33Ia ni sa kauta cake oti ko na kaukauwa ni Kalou, ka rawata ko koya maivei Tamana na Yalo Tabu ka yalataki, sa qai sovaraka mai na ka o qo, dou sa qai raica ka rogoca. 34Ni sa sega ni lako cake ki lomalagi ko Tavita; a sa kaya, Sa kaya ko Jiova vua na noqu Turaga, Mo tiko o na ligaqu i matau, 35ka malua meʼu na kitaki ira oti mada na nomu meca mei tutu-ni-yavamu. 36O koya o qo, mo kila sara kina na mataqali taucoko nei Isireli, ni ko Jisu o qo, o koya dou a vakota ki na kauveilatai, sa lesia ko na Kalou mo Turaga ka Karisito talega.
37Ia ni ra sa rogoca, sa laucoka na yalodra, a ra sa kaya vei Petero kei iratou nai apositolo sa vo, Oi kemudou na veiwekani, a cava me keimami kitaka?
38Sa qai kaya vei ira ko Petero, Dou veivutuni, ka papitaisotaki, oi kemudou yadua, e na yaca i Jisu Karisito, me bokoci nai valavala ca, ka dou na rawata na Yalo Tabu mei solisoli. 39Ni sa caka vei kemudou na vosa ni yalayala, vei ira talega na nomudou gone, kei ira vakaaduaga era sa vakayawa, io, vei ira vakaaduaga ena kacivi ira ko na Turaga na noda Kalou. 40Ia sa vuqa tale na vosa sa tukuna ko koya ka vakarota, ka kaya, Dou vakabulai kemudou mai nai tabatamata takelo o qo.
41Ia ko ira sa vinakata mo vakabauta na nona vosa, ora sa papitaisotaki: a sai kuri e na siga ko ya e lewe tolu beka na udolu na tamata.
42A ra sa qarava matua na nodratoui vakavuvuli nai apositolo kei na veilomani, kei na dovi madrai, kei na masumasu. 43A sa yaco na rere kivei ira kecega; a sa vuqa na ka e veivakidacalataki kei nai vakatakilakila eratou sa kitaka ko iratou nai apositolo. 44Ia ko ira kecega sa vakabauta era sa tiko vata, a sa solia na nonai yau yadua me ra taukena vata; 45a ra sa volitaka na nodra vanua kei na nodrai yau, a ra sa vota kivei ira yadua, me vaka na nodra dui dravudravua. 46A ra sa gumatua sara e na lako ki na vale ni soro e na veisiga, a ra sa lomavata, a ra sa dovi madrai e na veivale, a ra sa kania na kedra e na marau kei na yalo dina, 47ni ra sa vakavinavinaka tiko vua na Kalou, a sa vinakati ira ko ira na tamata vakaaduaga. A sa vakaikuritaki ira ko na Turaga era sa vakabulai tiko kivei ira nai vavakoso lewe ni soro, e na veisiga.

Currently Selected:

A Cakacaka 2: FIJ1864

Highlight

Share

Copy

None

Want to have your highlights saved across all your devices? Sign up or sign in

Video for A Cakacaka 2