Nai Vakatekivu 26
26
Sa tiko ko Aisake mai Kirari e na dausiga, 1-5. Sa cakitaki watina ko Aisake, 6-11. Sa tubu me tamata levu ko Aisake, 12-25. Sa laʼki veiyalayalati kaya ko Apimeleki, 26-33. Sa tauwati ko Iso, 34, 35.
1A SA dausiga na vanua, ka dua tani na matai ni dausiga ka yaco e na gauna i Eparaama. A sa lako ko Aisake kivei Apimeleki na tui ni kai Filisitia, ki Kirari.
2A sa rairai vua ko Jiova, ka kaya, Mo kakua ni lako sobu ki Ijipita; mo tikotiko ga e na vanua kaʼu a vosa kina vei iko: 3mo tiko vulagi ga e na vanua o qo, ia kaʼu na tiko kei iko, ka vakalougatataki iko: niʼu na solia vei iko, kei ira na nomu kawa, na veivanua kecega o qo; ia kaʼu na vakataudeitaka na vosa vavakini kaʼu a kitaka vei Eparaama na tamamu; 4ia kaʼu na vakalevutaka na nomu kawa me ra vaka na kalokalo kei lomalagi, ka solia talega na veivanua kecega o qo vei ira na nomu kawa; ena kalougata talega na veimatanitu kecega e vuravura e na nomu kawa; 5e na vuku ni sa vakarorogo ki domoqu ko Eparaama, ka vakabauta na ka kaʼu a lesia, na noqu vunau, na noqui lesi-lesi, kei na noqui vakaro.
6A sa tiko ga mai Kirari ko Aisake: 7ia ko ira na tamata e na yasana ko ya, era taroga e na vuku ni watina: a sa kaya ko koya, A ganequ ko koya; ni sa rere ni kaya, A watiqu; ni sa kaya, De ra vakamatei au na tamata e na yasana ko ya e na vuku i Repeka, ni sa vinaka na kenai rairai. 8A sa yaco ni sa tiko vakadede maikea ko koya, sa iro yani e na katuba ko Apimeleki na tui ni kai Filisitia, a sa kunea, ka raica, sa qitori Repeka na watina ko Aisake. 9A sa kacivi Aisake ko Apimeleki, ka kaya, Raica, sa dina ni sa watimu: ia na cava ko a kaya kina, A ganequ ko koya? A sa kaya vua ko Aisake, E na vuku niʼu a kaya, Deʼu mate e na vukuna. 10A sa kaya ko Apimeleki, A cava mada na ka o qo ko sa mai kitaka vei keimami? e rawarawa me koto loa kei na watimu e dua vei ira na tamata, ia ko na sa qai vakayacora vei keimami nai valavala ca. 11A sa vakaroti ira kecega na tamata ko Apimeleki, ka vaka, O koya sa tara na tamata o qo, se na watina, ena mate vakaidina.
12A sa kaburaka e na vanua ko ya ko Aisake, ka kumuna e na yabaki ko ya na kena vakadrau: ka sa vakalougatataki koya ko Jiova: 13a sa tubu me yaco na tamata ko ya, a sa lako cake ka tubu tiko me yaco sara: 14ni sa taukena na qele ni sipi, ka taukena na qele ni karavau, a sa vuqa na nona tamata. A ra sa vuvutaki koya na kai Filisitia. 15Ia nai keli-wai kecega ka ra kelia na nona tamata ko tamana, e na gauna i Eparaama na tamana, era sa sogota na kai Filisitia, ka vakaso-soga e na qele. 16A sa kaya vei Aisake ko Apimeleki, Mo lako tani vei keimami; ni ko sa kaukauwa sara, a sa malumalumu ko keimami.
17A sa lako tani maikea ko Aisake, ka birika na nona vale gatu e na buca mai Kirari, a sa tiko maikea. 18A sa kelia tale ko Aisake na veikeli ni wai, ka sa keli eliu e na gauna i Eparaama na tamana; ni ra sa vakasosogana kai Filisitia ni sa mate ko Eparaama: a sa vakayacana e na yaca ka vakatoka kina eliu ko tamana.
19A ra sa keli e na buca na tamata i Aisake, ka kunea maikina e dua nai keli ni wai vure. 20A sa veileti ko ira nai vakatawa ni manumanu mai Kirari kei ira nai vakatawa ni manumanu i Aisake, a ra sa kaya, Sa neitou na wai: a sa vakatoka ko koya na yaca ni keli-wai ko Eseki [Veileti]; e na vuku ni ra sa veileti kaya. 21A ra sa kelia e dua tale nai keli-wai, a ra sa veileti e na vukuna talega; a sa vakayacana ko koya ko Sitina [Veicati]. 22A sa toki maikea, ka kelia e dua tale nai keli-wai; a ra sa sega ni veileti e na vukuna: a sa kaciva ko koya na yacana ko Reopoci [Lalaga]; ni sa kaya, Sa qai vakalalaga-taki keda ko Jiova, ia eda na qai luvea e na vanua o qo.
23A sa lako cake maikea ki Pieri-sepa. 24A sa rairai vua ko Jiova e na bogi ko ya, a sa kaya, Oi au na Kalou i Eparaama na tamamu; kakua ni rere, niʼu sa tiko vata kei iko, ia kaʼu na vakalougatataki iko, ka vakalevutaka na nomu kawa, e na vuku i Eparaama na noqui tamata. 25A sa cakava maikea e dua nai cabocabo-ni-soro, ka masuta na yaca i Jiova, a sa birika maikea na nona vale gatu: a ra sa kelia maikea e dua nai keli-wai na tamata i Aisake.
26A sa lako vua ko Apimeleki mai Kirari, kei Ahusaci e dua na nonai tokani, kei Fikoli na turaga ni nonai valu. 27A sa kava vei iratou ko Aisake, A cava dou sa lako mai kina vei au, ni dou sa cati au, ka talai au tani vei kemudou? 28A ratou a kaya, Keitou a kunea vakaidina ni sa tiko kei iko ko Jiova: ia keitou a kaya, Me dua mada na vosa vavakini vei kedatou, io vei keitou kei iko, me keitou ia talega na veiyalayalati kei iko; 29ka mo kakua ni kitaki keitou vakaca, me vaka ni keitou sa tawa sagavi iko, ni keitou sa tawa cakava vei iko e dua na ka, na ka vinaka ga, ka talai iko vakacegu yani ga: ia ko iko, ko sa qai kalougata vei Jiova. 30A sa caka magiti vei iratou ko koya, a ratou sa kana ka gunu. 31A ratou sa sou e na sabogibogi, ka ia na vosa vavakini vakai iratou: a sa talai iratou yani ko Aisake, a ratou sa lako vakacegu tani vua.
32A sa yaco e na siga ko ya, era sa lako mai na tamata i Aisake, ka tukutuku vua e na vuku ni keli-wai era sa kelia, ka vaka vua, Keitou sa kunea na wai. 33A sa vakayacana ko koya ko Sipa [Vavakini]: o koya sa vakatokai kina na yaca ni koro ko ya ko Pieri-sepa [Nai keli-wai ni vavakini] ka yacova na gauna o qo.
34A sa vasagavulu na yabaki i Iso, a sa laʼki tauri Jutici me watina, o koya na luve i Pieri vei ira na luve i Eci, kei Pasemaci na luve i Eloni vei ira na luve i Eci: 35ia sa vakararawataka na loma i Aisake kei Repeka koi rau.
Currently Selected:
Nai Vakatekivu 26: FIJ1864
Highlight
Share
Copy
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
