Nai Vakatekivu 37
37
Sa lomani Josefa ko Jekope, a ra sa vuvutaki koya na tuakana, 3, 4. Sa tadra ko Josefa, a sa cati kina, 5-11. Sa talai ko Josefa cei ira na tuakana, 12-17. Era sa bukia na kena vere, ka tarovi ira ko Rupeni, 18-22. Era biuta ki nai keli, ka qai volitaka: ka taqaya ko Rupeni ni sa yali, 23-30. Sa kau nai sulu vei tamana, 31-35. Sa volitaki, 36.
1A sa tiko ko Jekope e na vanua ka tiko vulagi kina ko tamana, e na vanua ko Kenani.
2O qo nai tukutuku kei Jekope:
Sa tinikavitu na yabaki i Josefa, ka sa vakania na sipi kei ira na tuakana; a sa dautiko lako na gone kei rau na luve i Pila, kei rau na luve i Silipa, a watina lalai nei tamana: a sa daukauta mai kivei tamana ko Josefa na kedratoui rogorogo ca. 3A sa levu na loloma i Isireli vei Josefa, ka lailai vei ira kecega na luvena, ni sa luvena ni sa qase: a sa cakava vei koya e dua nai sulu veivolavolai. 4Ia ni ra sa raica na tuakana ni sa levu na loloma i tamadra vei koya, ka lailai vei ira kece na tuakana, era sa cati koya, a ra sega ni vosa vinaka rawa vua.
5A sa tadrataka na tadra ko Josefa, ka tukuna vei ira na tuakana: a ra sa qai cati koya vakalevu. 6A sa kaya vei ira ko koya, Dou rogoca mada na tadra o qo kaʼu sa tadrataka: 7raica, eda a vau sila tiko mai na were, ka, raica, sa tu cake na noqui vau, ka wavu tu; ka, raica, sa tu vakavolivolita na nomudoui vau, ka rokova na noqui vau. 8A ra sa kaya vua na tuakana, O na lewa dina beka vei keitou? se ko na veitalia dina beka vei keitou? A ra sa cati koya vakalevu e na vuku ni nona tadra, kei na nona vosa. 9A sa tadrataka e dua tale na tadra ko koya, ka tukuna vei ira na tuakana, a sa kaya, Raica, kaʼu sa tadrataka e dua tale na tadra; ka, raica, sa rokovi au na siga, kei na vula, kei na kalokalo e tinikadua. 10A sa tukuna vei tamana, vei ira talega na tuakana: a sa vunauca ko tamana, ka kaya vua, A tadra cava o qo ko sa tadrataka? ena lako dina beka mai koi au kei tinamu kei ira na tuakamu, ka cuva ki na soso kivei iko? 11A sa vuvutaki koya ko ira na tuakana; a sa nanuma tiko na vosa ko tamana.
12A ra sa lako na tuakana me vakania na sipi i tamadra mai Sikemi. 13A sa kaya vei Josefa ko Isireli, Era vakania na sipi mai Sikemi na tuakamu, ne? lako mai meʼu talai iko vei ira. A sa kaya ko koya, Raica, koi au. 14A sa kaya vua ko koya, Mo lako mada, mo raica na tiko vinaka ni tuakamu, kei na tiko vinaka ni sipi; ka kauta tale mai vei au nai tukutuku. A sa talai koya mai na buca mai Hepironi, a sa lako mai ko koya ki Sikemi. 15A sa kunei koya e dua na tamata, ka, raica, sa lako sese voli mai na veikau: a sa tarogi koya na tamata, ka vaka, A cava ko sa vakasaqara voli? 16A sa kaya, Au sa vakasaqarai ira na tuakaqu: mo tukuna mada vei au na yasana era vakania kina na sipi. 17A sa kaya na tamata, Era sa lako tani eke: niʼu sa rogoci ira ni ra sa kaya, Tou lakani ki Tocani. A sa muri ira na tuakana ko Josefa, ka kunei ira mai Tocani.
18A ra sa kunei koya ni sa vakayawa, ni sa bera ni voleka vei ira, a ra sa bukia na kena vere me vakamatea. 19A ra sa veikayaki vakai ira, Raica, sa lako mai na dautadra o qori: 20tou ia, tou vakamatea, ka biuta ki na dua nai keli: eda na qai tukuna vakane, Sa dua na manumanu ca sa kania: eda na qai raica se na yaco vakacava na nona tadra. 21A sa rogoca ko Rupeni, ka vakabulai koya mai: na ligadra; ni sa kaya, Tou kakua ni yavita me mate. 22Sa kaya vei ira talega ko Rupeni, Dou kakua ni vakadave dra, dou biuti koya ga ki nai keli o qo e na lekutu, mo dou kakua ni vuetaka; ka me vakabulai koya mai na ligadra, ka vakasuka tale vei tamana.
23A sa yaco ni sa tadu ko Josefa, vei ira na tuakana, era sa luvati Josefa e nonai sulu, nai sulu veivolavolai sa vakaisulu kina ko koya; 24a ra sa kauta, ka biuta ki nai keli: a sa di nai keli, sa sega kina na wai. 25A ra sa tiko sobu me kania na kakana: a ra sa ta cake e na matadra, ka rai yani, ka raica, sa dua nai vavakoso vei ira na luve i Isimeeli era sa lako mai Kiliati, kei na nodra kameli era sa kauta na ka boi vinaka, kei na pami, kei na mura, era laʼki kauta sobu ki Ijipita. 26A sa kaya ko Juta vei ira na veitacini, A cava na kena yaga, kevaka eda vakamatea na tacida, ka vunia na kena dra? 27tou ia, tou volitaki koya kivei ira na luve i Isimeeli, ia me da kakua ni vuetaka, ni sa tacida, na leweda. A ra sa vinakata ga na veitacini. 28A sa lako voli yani e so na kai Mitiani, na tamata dauveivoli; a ra sa yavia ka laveti Josefa mai nai keli, ka ra volitaki Josefa vei ira na luve i Isimeeli, a sa ruasagavulu na siliva na kenai voli; a ra sa kauti Josefa ki Ijipita. 29A sa lesu ki nai keli ko Rupeni; ka, raica, sa sega ni tiko e nai keli ko Josefa; sa qai dresu-laka na nonai sulu, 30ka lesu vei ira na veitacini, a sa kaya, Sa yali na gone; ia koi au, kaʼu na lako kivei?
31A ra sa kauta nai sulu i Josefa, ka vakamatea a luve ni koti, ka lomoca nai sulu e na dra; 32a ra sa vakasuka nai sulu veivolavolai, ka kauta vei tamadra, a ra sa kaya, O qori keitou sa kunea: mo kila mada se nai sulu i luvemu, se segai. 33A sa kila ko koya, ka kaya, Ai sulu ni luvequ; sa kani koya e dua na manumanu ca; sa dresulaki vakaidina ko Josefa. 34A sa dresulaka nonai sulu ko Jekope, ka vauca nai sulu taqarotu ki na tolona, ka tagicaka na luvena ka bogi vuqa. 35A ratou sa tu cake na luvena tagane kecega kei na luvena alewa kecega, me vakalecataki koya; a sa bese ni vakalecataki; a sa kaya, Au na lako sobu ki etesi ki na luvequ ka tagi lako. A sa tagi tiko e na vukuna ko tamana.
36A ra sa volitaki koya na kai Mitiani ki Ijipita, kivei Potifari, na matanivanua i Fero, ka turaga ni valui vakatawa.
Currently Selected:
Nai Vakatekivu 37: FIJ1864
Highlight
Share
Compare
Copy
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
