Nai Vakatekivu 38
38
A luve i Juta, 1-5. Sai valavala ca ko Eri kei Onani, ka mate kina, 6-11. Sa ia na dauyalewa ko Juta, 12-26. Sa sucu vua na drua, 27-30.
1IA e na gauna ko ya sa lako sobu yani vei ira na veitacini ko Juta, ka laʼki tiko kei na dua na kai Etulama, a yacana ko Ira. 2A sa kunea maikea ko Juta na luvena alewa e dua na kai Kenani, a yacana ko Sua; a sa kauta ko koya, ka laʼki curu vua. 3A sa kunekune ko koya, ka vakasucuma e dua na luvena tagane; ia na tagane sa vakatoka na yacana ko Eri. 4A sa kunekune tale ko koya, ka vakasucuma na luvena tagane; ia na alewa sa vakatoka na yacana ko Onani. 5A sa kuria tale, ka vakasucuma na luvena tagane; ia na alewa sa vakatoka na yacana ko Sela: ia, ni sa vakasucumi koya, sa tiko na tagane mai Kisipi.
6A sa kauta ko Juta e dua, na yacana ko Tamari, me wati i Eri na nona ulumatua. 7A sa tamata ca e na mata i Jiova ko Eri na ulumatua i Juta; a sa vakamatea ko Jiova. 8A sa kaya ko Juta vei Onani, Mo curu vua na wati i tuakamu, ka veiwatini kaya, ka vakatubura na kawa vua na tuakamu. 9A sa kila ko Onani ni na sega ni nona na kawa: a sa yaco ni sa curu vua na wati i tuakana, sa qai livia ki na qele, de solia na kawa vua na tuakana. 10Ia na ka sa cakava ko koya sa ca e na mata i Jiova: a sa qai vakamatei koya talega. 11A sa kaya ko Juta vei Tamari na vugona, Mo tiko dawai ga e na vale i tamamu, ka me tubu mada ko Sela na luvequ: ni sa kaya ko koya, De mate ko koya talega, me vakai rau na tuakana. A sa lako ko Tamari ka tiko e na vale i tamana.
12Ia ni sa oti na gauna levu sa mate na luvena alewa ko Sua, o koya na wati i Juta; a sa vakalecataki ko Juta, a sa lako cake ki Timinaci vei ira na tamata era kotiva na nona sipi, ko koya kei na nonai tau ko Ira na kai Etulama. 13A sa tukuni vei Tamari, ka vaka, Raica, sa lako cake ki Timinaci na vugomu me kotiva na nona sipi. 14A sa luvata tani na nonai sulu vakadawai, ka puloutaki koya e nai sulu ni mata, ka vakaisulutaki koya, ka laʼki tiko e na yasana vakarairai, a ya mai na bati ni sala sa lako ki Timinaci; ni sa raica ko koya ni sa levu ko Sela, a sa sega ni musu vua me watina. 15A sa kunea ko Juta, ka nanumi koya me alewa dauyatagane; e na vuku ni ka puloutaka na matana ko koya. 16A sa lako vakatiki-tiki tani vua e na sala, ka kaya, Meʼu curu mada vei iko, ne; (ni sa tawa kila ni sa vugona). A sa kaya ko koya, A cava ko na solia vei au, mo curu mai vei au? 17A sa kaya, Au na vakauta vei iko e dua na luve ni koti mai na qele ni koti. A sa kaya ko koya, O na solia beka na kenai vakadinadina, mo qai tala mai? 18A sa kaya, A cava na ka me kenai vakadinadina meʼu solia vei iko? A sa kaya ko koya, A nomu mama, kei na nomu wa, kei nai titoko sa tiko e ligamu. A sa solia vua ko koya, a sa laʼki curu vua, a sa kunekune vua ko koya. 19A sa tu cake ko koya, ka lako yani, a sa luvata tani vua na nona pulou, ka suluma na nonai sulu vakadawai. 20A sa tala na nonai tau na kai Etulama ko Juta me kauta na luve ni koti, me kau mai kina nai vakadinadina mai vua na alewa: ka sa sega ni kunei koya. 21A sa tarogi ira na lewe ni koro ni alewa ko ya, ka kaya, Sa evei na alewa dauyatagane ka tiko vakarairai e na bati ni sala? A ra sa kaya; Sa sega na alewa dauyatagane eke. 22A sa lesu vei Juta, ka kaya, Au sa sega ni kunei koya; a ra kaya talega na tamata e na yasana ko ya, Sa sega na alewa dauyatagane eke. 23A sa kaya ko Juta, Me kauta mada ko koya, de da madua: raica, kaʼu a vakauta na luve ni koti o qo, ia ko sa tawa kunei koya.
24A sa yaco ni sa oti na vula e tolu, sa qai tukuni vei Juta, ka vaka, Ko Tamari na vugomu sa ia na dauyatagane; ka, raica, sa bukete talega ko koya e na dauyatagane. A sa kaya ko Juta, Dou kauti koya mada mai kitautuba, me mai vaka-mai. 25Ia ni sa kauti mai kitautuba, sa talaki vua na vugona, ka kaya, Au sa bukete vua na tamata sa nona o qo: a sa kaya ko koya, Mo kila mada se sa nei cei na ka o qo, na mama, kei na wa, kei nai titoko. 26A sa kila ko Juta, ka kaya, Sa dodonu vei keirau ko koya; e na vuku niʼu a sega ni soli koya vei Sela na luvequ. A sa tawa kilai koya tale.
27A sa yaco e na siga sa vakasucu kina, raica, sa drua e ketena. 28Ia ni sa vakasucu tiko, sa dodoka yani na ligana e lewe dua: a sa taura na tina-ni-gone, ka viviraka na liga ko ya e na vulovulo damudamu, ka kaya, 0qo sa lako mai eliu. 29Ia ni sa kauta tale na ligana kiloma, raica, sa lako mai na tacina: a sa kaya na tina-ni-gone, O sa basuka vakaevei? ena nomu na basubasu: o koya sa vakatokai kina na yacana ko Feresi [A basubasu]. 30A sa oti, sa qai lako mai na tuakana, o koya ka vivi na ligana e na vulovulo damudamu: a sa vakatokai na yacana ko Sera.
Currently Selected:
Nai Vakatekivu 38: FIJ1864
Highlight
Copy
Compare
Share
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
