Joni 14

Sa tukuna vei iratou na nona tisaipeli ko Jisu nai balebale ni nona lako yani vei Tamana; a sa yalayala me solia na ka kecega eratou na kerea e na yacana, 1-14. Sa yalata ko Jisu na Yalo Tabu me vakalecataki iratou ka vakatavulici iratou, 15-26. Sa vakalecataki iratou na nona tisaipeli ko Jisu, ni sa voleka ni lako yani vei Tamana, 27-31.

1ME kakua ni rarawa na lomamudou: dou sa vakabauta na Kalou; dou vakabauti au talega. 2Sa vuqa na tikina e na vale nei Tamaqu: kevaka sa sega, au sa tukuna vei kemudou. Au sa lako meʼu vakarautaka na tikina me nomudou. 3Ia kevaka kaʼu sa lako ka vakarautaka na tikina me nomudou, au na lako tale mai, ka kauti kemudou vei au; mo dou tiko talega kina e na vanua kaʼu sa tiko kina. 4Ia dou sa kila na yasana kaʼu sa lako kina, dou sa kila talega na kena sala.

5Sa kaya vua ko Tomasi, Turaga, keitou sa sega ni kila se ko sa lako kivei; ia keitou kila rawa vakaevei na sala? 6Sa kaya vua ko Jisu, Oi au na sala, kei na vu-ni-dina, kei na vu-ni-bula; sa sega ni torovi Tamaqu e dua na tamata, a ya e na vukuqu ga. 7Kevaka dou sa kilai au, dou sa kilai Tamaqu talega; ia mai na siga o qo dou sa kilai koya, ka raici koya.

8Sa kaya vua ko Filipo, Turaga, vakatakilai Tamamu vei keitou; keitou na qai cegu. 9Sa kaya vua ko Jisu, Niʼu sa tiko dede vakaoqo kei kemudou, o sa sega li ni kilai au, Filipo? o koya sa raici au, sa raici Tamaqu; ia ko sa kaya vakacava, Vakatakilai Tamamu vei keitou? 10O sa sega li ni vakadinata niʼu sa dua vata kei Tamaqu, a sa dua vata kei au ko Tamaqu? a vosa kaʼu sa vosataka vei kemudou, kaʼu sa sega ni vosataka vakai au ga; ia ko Tamaqu keirau sa dua vata kaya, sa kitaka na cakacaka. 11Dou vakadinati au niʼu sa dua vata kei Tamaqu, a sa dua vata kei au ko Tamaqu; se vakadinati au e na vuku ni cakacaka ga. 12E dina, e dina, au sa kaya vei kemudou, O koya sa vakabauti au, ena kitaka talega na cakacaka kaʼu sa kitaka, ia ena kitaka na cakacaka e uasivi cake e na ka o qo; e na vuku niʼu sa lako vei Tamaqu. 13Ia na ka kecega dou na kerea e na yacaqu, au na kitaka, me vakarokorokotaki na Tamaqu e na vuku ni Luvena. 14A ka kecega dou na kerea e na yacaqu, au na kitaka.

15Kevaka dou sa lomani au, dou talairawarawa ki na noqu vunau. 16Ia kaʼu na masuti Tamaqu, ena qai solia vei kemudou e dua tale na Dauveivakacegui, me tiko ga kei kemudou ka tawa mudu; 17a Yalo sa vu ni ka dina, o koya era sa sega ni vakabauta rawa na kai vuravura, e na vuku ni ra sa sega ni raici koya se kilai koya: ia sai kemudou ga sa kilai koya: ni sa tiko vata kei kemudou ko koya, ka na curumi kemudou. 18Au na sega ni laivi kemudou me luveniyali: au na lako mai vei kemudou. 19Malua vakalailai mada, era na qai sega ni raici au tale na kai vuravura: ia dou sa raici au: e na vuku niʼu sa bula, dou na bula talega. 20E na siga ko ya dou na kila niʼu sa dua vata kei Tamaqu, ka dou sa dua vata kei au, kaʼu sa dua vata kei kemudou. 21O koya sa nanuma na noqu vunau ka talairawarawa kina, sai koya o qo sa lomani au; ia ko koya sa lomani au ena lomani koya ko Tamaqu, ia kaʼu na lomani koya, ka vakatakilai au vua.

22Sa kaya vua ko Juta, (e dua tani ko Isikarioti,) Turaga, o na vakatakilai iko vei keitou e na vuku ni cava, ka sega vei ira na kai vuravura?

23Sa vosa ko Jisu, ka kaya vua, Kevaka e dua sa lomani au, ena talairawarawa ki na noqu vosa; ena qai lomani koya ko Tamaqu, ia keirau na lako mai vei koya, ka tiko ga vua. 24O koya sa sega ni lomani au, sa sega ni talairawarawa ki na noqu vosa: ia na vosa dou sa rogoca, sa sega ni noqu walega, a ya sa nei Tamaqu sa talai au mai.

25Au sa vosataka na veika o qo vei kemudou, niʼu sa tiko vata kei kemudou. 26Ia na Dauveivakacegui, a Yalo Tabu, o koya ena tala mai ko Tamaqu e na yacaqu, ena vakavulici kemudou e na ka kecega, ka va-kasa tale na lomamudou mo dou nanuma na ka kecega kaʼu a vosataka vei kemudou.

27Au sa yalata vei kemudou na vakacegu, au sa solia vei kemudou na noqu vakacegu; au sa sega ni solia vei kemudou, me vaka sa solia ko vuravura. Me kakua ni rarawa na yalomudou, se rere. 28Dou a rogoca niʼu a kaya vei kemudou, Au sa lako yani, ka lako mai vei kemudou. Kevaka dou sa lomani au, dou na reki e na vuku niʼu sa kaya, Au sa lako vei Tamaqu: ni sa uasivi cake vei au ko Tamaqu. 29Au sa qai tukuna eliu vei kemudou ni sa bera ni yaco mai, mo dou vakadinata e na gauna sa yaco kina. 30E ua siga maimuri kaʼu na sega ni veivosaki vakalevu kei kemudou: ni sa lako mai na turaga ni vuravura o qo, a sa sega ni kunea e dua na ka vei au. 31Me kila ga ko ira na kai vuravura niʼu sa lomani Tamaqu; ia me vaka sa vosa vei au ko Tamaqu, au sa kitaka vakakina. Tu cake, tou lako vuni.

Currently Selected:

Joni 14: FIJ1864

Highlight

Copy