Joni 15

Sa vakatautauvatataki koya ko Jisu kei na vaini, kei iratou na nona tisaipeli kei na veitaba ni vaini, 1-11. Sa vakaroti iratou me ratou veilomani, 12-17. Sa tukuna ni na vakacacani iratou ko vuravura e na vukuna, 18-25. Sa yalataka vei iratou na Yalo Tabu me Dauveivakacegui, 26, 27.

1OI au na vaini dina, ka sai vakatau-ni-were ko Tamaqu. 2A tabaqu kecega sa sega ni vua, sa kauta laivi yani ko koya: ia ko ira kecega sa vua, sa samaka ko koya, me ra vua vakalevu sara. 3Dou sa qai samaki e na vuku ni vosa kaʼu a vosataka vei kemudou. 4Dou tu vei au, kaʼu na tu vei kemudou. Me vaka sa sega ni vua rawa na tabana vakai koya, kevaka sa sega ni tu kei na vaini; ena vaka talega kina koi kemudou, kevaka dou sa sega ni tu vei au. 5Oi au na vaini, oi kemudou na veitabana: o koya sa tu vei au, koi au talega vei koya, sa vua vakalevu ko koya: ke dou sa tawase tani vei au, dou sa sega ni rawata e dua na ka. 6Kevaka sa sega ni tu vei au e dua, sa biu laivi me vaka na taba ni vaini, a sa malai mai; a ra sa tomiki, ka biu ki na buka waqa, ka visa. 7Kevaka dou sa tu vei au, a sa tu vei kemudou na noqu vosa, dou ua kerea na ka dou sa vinakata, ia ena yaco vei kemudou. 8A ka o qo sa vakarokorokotaki kina ko Tamaqu, ni dou sa vua vakalevu: ka dou na noqu tisaipeli.

9Me vaka sa lomani au ko Tamaqu, au sa lomani kemudou vaka talega kina: dou tiko gi e na noqu loloma. 10Kevaka dou sa talairawarawa ki na noqu vunau, dou na tiko ga e na noqu loloma; me vaka kaʼu sa talairawarawa ki na vunau nei Tamaqu, ka tiko gi e na nona loloma. 11Au sa vosataka na veika o qo vei kemudou, meʼu sa marau tikoga e na vukumudou; ka me sinai na nomudou marau.

12Sa noqu vunau o qo, Mo dou veilomani, me vaka kaʼu sa lomani kemudou. 13Sa sega ni uasivi cake e na ka o qo na loloma ni tamata e dua; me virino na nona bula e na vukudra na wekana. 14Dou sa wekaqu, kevaka dou sa kitaka na ka kecega kaʼu sa vakarota vei kemudou. 15Au sa sega ni vakatokai kemudou tale mei talatala: ni sa sega ni kila nai talatala na ka sa kitaka na nona turaga; ia kaʼu sa vakatokai kemudou me wekaqu; niʼu sa vakatakila vei kemudou na ka kecega kaʼu a rogoca maivei Tamaqu. 16Dou sa sega ni digitaki au, ia kaʼu sa digitaki kemudou, ka lesi kemudou, mo dou lako ka vua mai, me tiko talega na vuamudou; me solia kina vei kemudou ko Tamaqu na ka kecega dou na kerea vua e na yacaqu. 17A veika o qo kaʼu sa vakarota vei kemudou, mo dou veilomani.

18Kevaka sa cati kemudou ko vuravura, dou sa kila ni kaʼu sa cati eliu koi au, koi kemudou emuri. 19Kevaka dou sa vakavuravura, ena lomana na kai nona ko vuravura; ia e na vuku ni dou sa sega ni vakavuravura, ia kaʼu sa digitaki kemudou mai vuravura, sai koya o qo sa cati kemudou kina ko vuravura. 20Dou nanuma na vosa kaʼu a vosataka vei kemudou, Sa sega ni levu nai talatala ka lailai na nona turaga. Kevaka era a vakacacani au, era na vakacacani kemudou talega; kevaka era sa talairawarawa ki na noqu vosa, era na talairawarawa talega ki na nomudou vosa. 21Ia na ka kecega o qo era na kitaka vei kemudou e na vuku ni yacaqu, e na vuku ni ra sa sega ni kilai koya ka talai au mai. 22Kevaka kaʼu a sega ni lako mai ka vosa vei ira, sa sega na nodrai valavala ca: a sa qai sega na nodra ulubale e na nodrai valavala ca. 23O koya sa cati au, sa cati Tamaqu talega. 24Kevaka kaʼu a sega ni kitaka vei ira na cakacaka sa sega ni kitaka e dua na tamata tani, sa sega na nodrai valavala ca: ia era sa qai raica, ka cati au kei Tamaqu talega; 25me vakayacori kina na vosa ka volai e na nodra vunau, Era sa cati au walega.

26Ia ni sa lako mai na Dauveivakacegui, o koya kaʼu na tala vei kemudou maivei Tamaqu, a Yalo sa vu ni ka dina, o koya sa lako maivei Tamaqu, ena tukuni au ko koya. 27Ia ena dautukutuku koi kemudou talega, e na vuku ni dou sa tiko kei au mai nai vakatekivu.

Currently Selected:

Joni 15: FIJ1864

Highlight

Copy