Jěnisis 15
15
1Belombo těkabe tombango, ka ndaga ya Jěhova ya pumiya o Ebream a jadi o ndâtâ, na, Ebream, o bangake: Umba ndi nguba ’vě na mahomano mâvě maněně mětě.
2Ka Ebream a vâ, na, A! Jěhova Anyambě, e lě nde eâvě e ka věyě ’mba, yěněkěte, mbi ’bě na mwana, na a ka diyě uduwi mua ndabo ’amě ndi Eliezar tě ya Damaskâs ekae?
3Ka Ebream a vâ, na, Umbwakiyate, o ’bě ’mba věngo ibângâ; na, umbwakiyate, umbâkâ a di jawěngo o ndabo ’amě ndi ujigi ’mevamě.
4Ka ndaga ya Jěhova ya viya o mâ‐a jadi, na, Momo těkaně à diye ujigi muâvě; ndi kabo a ka jawě oviya ihuhu jâvě mâ ndi a ka diyě ujigi muâvě.
5Ka Mâ‐a vana mâ o bwebwe, na, Umbwakiyate oba, wa languwa nyětěti, ipě o te o yâlâkě o langa jâ. Ka Mâ‐a vâ na mâ, na, Nonaně tepě k‘ ibângâ jâvě i ka diyě.
6Ka mâ‐a kamidě Jěhova; ka Mâ‐a langa mâ yâ o bwamu.
7Ka Mâ‐a vâ na mâ, na, Umba ndi Jěhova a věngěkid‘ âvě o Ur ya Kaldi, ka vě âvě ehiki těkae na jigaka yâ.
8Ka mâ‐a vâ, na, A! Jěhova Anyambě, mbi ka yowě lě na mbi ka jigi yâ na nde?
9Ka Mâ‐a vâ na mâ, na, Nângâkâ ’Mba nyati ya mwadi ya mepuma melalo, na mwadi mua tomba mua mepuma melalo, na udâmbě mua momi mua mepuma melalo, n‘ ibembe, na mwana‐mbenga.
10Ka mâ‐a nângâ ekabe beěhěpi, ka mâ‐a pěhě beâ na hanganě, ka mâ‐a nangidě bepěhi baka baka; ndi au pěhěkě lonâni.
11Nd‘ o lonâni lo bweyakě bebwebě lo pâkidi o bekengo be jadi, ka Ebream a duma lâ.
12O joba i diyakidi i kěkě ka kweiya, ka viyâ via ibihi via bweya Ebream; ka mahihi ma ivitit‘ iněně ma kwa o mâ‐a jadi.
13Ka Mâ‐a vâ na Ebream, na, Mbambayě, yowakě na ibângâ jâvě i ka diyi bangi o ehe e ha ibě eabu, na bâ‐ba ka hayi bâ; na bâ‐ba ka tuki bâ kama ja mepuma inai.
14Na yâ etomba tě eabu e ka hayě ndi eâmě e ka yěkidě; yeně tombango, vâkâna ba ka pumandi na ngumba eněně.
15Ndi, âvě, o ka ’landi o bahângwě bâvě ba jadi, na jonga; o ka tongwěndi o igona iyamu utodu.
16Nd‘ o mbamb‘ inai, vâkâna ba pwi pě okava; ikabojana bobe bwa ba Amor bo ha londětě.
17E diyakindi, o joba i kweyakiyedi, ja bě ivititi, umbwakiyate, ebeke y‘ itutu, na ungonyi mua mwanyo u yodaka u tombwaka o hanganě ya bepěhi těkabe.
18O buhwa tě te bwa Jěhova bo panganakidě Ebream panga, na, O ibângâ jâvě nd‘ ijamě i di věngo ehe těkae, oviya viho via Ijipt na ’la o viho viněně Ufretis,
19Na ba‐Kěn, na ba‐Kěniz, na ba‐Kadmon,
20Na ba‐Hit, na ba‐Pěrez, na ba‐Rěfaim,
21Na ba‐Amâr, na ba‐Kenean, na ba‐Gěrgesh, na ba‐Jěbus.
Currently Selected:
Jěnisis 15: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
