Jěnisis 8
8
1Ka Anyambě a yongidě Noa, na belombo be di mihâ beěhěpi, na bembe beěhěpi be diyaki na ju o ark: ka Anyambě a panga upupě u vungaka o he, ka miba ma hěkuwě.
2Na tongo tepě ja ndiba na mambě ma oba na dibakwě, ka mbwiya ya himbama oviya oba.
3Ka miba ma timbiya botimbakiya na botimbakiya o he: ka miba ma hěkuwě o ihuku ja koma pâkâ na mabo ma hwi matano.
4O ngândě ya hěmbwědi, ka ark ya hika, o buhwa bwa jomu ja hwi na hwi hěmbwědi bwa ngândě tě, o ukodi mua Ararat.
5Ka miba ma hubiya bohubakiya na bohubakiya kwanga na ’la jomu ja ngândě: o ngândě ya jomu, o buhwa bwa ngândě bwa bohoboho, ndi bwa kâkâ ja mekodi bo yěněněkidi.
6¶ E diyakindi o ihuku ja mabo ma hwi manai, ka Noa a dubuwa jâmbě ihâlě ja ark ijaju i hakidi:
7Ka mâ‐a loma yungu, e ma kěkě bobetaka na bohubaka, kwanga na ’la miba ma yahakid‘ oviya o he.
8Ka mâ‐a loma pě ibembe, ka yěně na ipě miba ma hěkuwendi oviya o boho bwa he.
9Ndi, ibembe j‘ u pahakiya iyâjâ o itědě ja beko beaju, ka jâ‐ja timba o mâ‐a jadi o ark; ikabojana miba ma diyakindi o boho bwa he yěhěpi. Ka mâ‐a hambidě enâ ’aju, ka mâ‐a nângâ jâ, ka mâ‐a dula jâ o mâ‐a jadi o ark.
10Ka mâ‐a diya pě hwi ’pâkwě hěmbwědi, ka mâ‐a loma pě ibembe oviya o ark.
11Ka ibembe ja viya o mâ‐a jadi na kolo, ndi, umbwakiya, ekai ya olive o udumbu muaju pâkângo: ka Noa a yowě na miba ma hěkuwendi o he.
12Ka mâ‐a diya pě hwi ’pâkwě hěmbwědi, ka mâ‐a loma ibembe tě, na jâ j‘ u tembaka pě o mâ‐a jadi.
13¶ E diyakindi o kama utoba na upuma mua bohoboho, o ngândě ya bohoboho, o buhwa bwa ngândě tě bwa bohoboho, ka miba ma banja o he: ka Noa a věngidě unyuwa mua ark, ka mâ‐a ’umbuwa, ka mâ‐a yěně boho bwa he bwa yaha.
14O mabo ma hwi mabale na hwi hěmbwědi ma nyândě y‘ ibale, ndi ja he i banjakidi.
15¶ Ka Anyambě a vâ na Noa, na,
16Pumaka o ark, âvě, na mwad‘ ’âvě, na bana bâvě, na bajo ba bana bâvě.
17O ka pumanaka belombo be diyakě be di na nâvě beěhěpi bea mehoni meěhěpi, mea lonâni, na bembe, na belombo beěhěpi be landakě o he; ovaně nd‘ o beâ‐be ka vuhě o he, na beâ‐be ka janaka, na beâ‐be ka vuhaka o he.
18Ka Noa a puma, na bana baju, na mwad‘ ’aju, na bajo ba bana baju:
19Tito jěhěpi, na belombo be landakě beěhěpi, na lonâni lěhěpi, na e kulakě o he yěhěpi, bea mangâ mabu, be pumakind‘ o ark.
20¶ Ka Noa a longiya Jěhova âltar; ka mâ‐a nângâ tito yěhěpi e di bwamu na embe eyamu e věvěkě yěhěpi, ka mâ‐a tumba mwambo o âltar.
21Ka Jěhova a nâvidě unâvi uyamu; ka Jěhova a vâ n‘ ulema muaju, na, Mba hâke pě he o pělě ya moto; ikabojana ipikiliya ja ebumubema ya moto i ndi bobe oviya nděmbě: n‘ Umba, Mba bweye pě elombo yěhěpi e di mihâ, pani‐k‘ Umba‐Mbi di hango.
22Ukila mua he u ka diyě, egombe ya iliya na ya juma, na ivěvu na yomu, na bokâ na vyonda, na mwehe na bulu bea dâye.
Currently Selected:
Jěnisis 8: BNG1895
Highlight
Share
Compare
Copy
Want to have your highlights saved across all your devices? Sign up or sign in
Published by the American Bible Society in 1895, 1926.
