Jěnisis 7
7
1Ka Jěhova a vâ na Noa, na, Vaka ’vě na ndabo ’âvě yěhěpi o ark; ikabojana âvě nd‘ uwamě a yěni bwamu o boho bwamě o igona těkadi.
2Tito iyamu jěhěpi nd‘ ijâvě i ka nângě hěmbwědi hěmbwědi, momi na mwadi muaju.
3Na lonâni la oba tepě hěmbwědi hěmbwědi, momi na mwadi; itata ja ibângâ mihâ o boho bwa he yěhěpi.
4Kabojana o hwi hěmbwědi, vâkâna mbi pangindi mbwiya e nâkâ o he mabo ma myehe manai na mabo ma mebulu tepě manai; elombo yěhěpi e diyakě eamě e valakidi nd‘ eamě e ka jilidi oviya o boho bwa he.
5Ka Noa a ha hohonganěngo na nyanga ya Jěhova e sombiyakidě mâ yěhěpi.
6Noa a diyakindi kama ja mepuma utoba utodu o ujambě mua miba u pâkidi o he.
7¶ Ka Noa a ngiya o ark, na bana baju, na mwad‘ ’aju, na bajo ba bana baju, o pělě ya miba ma ujambě.
8Na tito iyamu, na tito i ha ’bě bwamu, na lonâni, na belombo beěhěpi be landakě o he,
9Be ngakiyendi o Noa a jadi o ark bebale bebale, momi na mwadi, panika Anyambě a sombiyakidě Noa.
10E diyakindi o hwi hěmbwědi tombango, ka miba ma ujambě ma pâ o he.
11¶ O upuma mua kama utoba mua ’měnâ ya Noa, o ngândě y‘ ibale, o jomu ja hwi na hwi hěmbwědi ja ngândě tě, buhwa tě te bwa tongo iněně ja ndiba jěhěpi bo bumwanakiyedi, ka mambě ma oba ma dubuwě.
12Ka mbwiya ya nâ o he mabo ma myehe manai na mabo ma mebulu manai.
13Bwâ buhwa těboně ndi bwa Noa bo ngakiyedi o ark, na Shěm, na Ham, na Jafěth, bana ba Noa, na mwad‘ ’a Noa, na bajo ba bana baju balalo.
14Bâ, na tito yěhěpi ya ijaju jângâ, na bembe beěhěpi imabu mângâ, na elombo e landakě o he yěhěpi ijaju jângâ, na inâni k‘ inâni ijaju jângâ, inâni via jângâ te jângâ.
15Ka beâ‐bea ngiya o Noa a jadi o ark, bebale bebale bea mehoni meěhěpi me jadi na pudi ya ’měnâ.
16Be ngakiyedi, be ngakiyendi mwadi na momi bea mehoni meěhěpi, panika Anyambě a sombiyakidě mâ: ka Jěhova a diba mâ omě.
17Ujambě u diyakindi mabo ma hwi manai o he; ka miba ma vuha, ka mâ‐ma bapě ark, ka yâ‐ya hěhěniyě oba ya he.
18Ka miba ma yambiya, ka mâ‐ma vuha na‐ngudi o he; na ark na kěkě o boho bwa miba.
19Ka miba ma yambiya na ngudi o he; ka mekodi mea udomba meěhěpi, me diyakidi o ibomako ja oba yěhěpi, mea nyângâ.
20Ka miba ma beta oba jomu ja hamba‐’nâ na hamba‐’nâ itano; ka mekodi mea nyângâ.
21Ka mehoni meěhěpi mea wa, me ninganakě o he, na lonâni lěhěpi, na bembe, na tito, na belombo be landakě o he beěhěpi, na moto wěhěpi.
22Beěhěpi be diyakidi na pudi ya ’měnâ o mepemba meabu, na be diyakidi o he ya yaheyahe beěhěpi, be wakindi.
23Ka belombo be diyakid‘ o boho bwa he yěhěpi bea jiludwě, bato, na bembe, na belombo be landakě, na lonâni la oba; be jilakudwěndi oviya o he: kabo Noa dipâ nd‘ a dikanakidi, na ba diyaki na mâ o ark.
24Miba ma yambakiyi he kama pâkâ na mabo ma hwi matano.
Currently Selected:
Jěnisis 7: BNG1895
Highlight
Share
Compare
Copy
Want to have your highlights saved across all your devices? Sign up or sign in
Published by the American Bible Society in 1895, 1926.
