Jěnisis 6
6
1E diyakindi kwěi, o bato ba yalakidě o vuha o boho bwa he, na babajo ba jakwě o bâ‐ba jadi,
2Ka bana ba Anyambě ba yěně babajo ba bana ba bato na na ba ndi belanga, ka bâ‐ba nângâ bâ o iba nyang‘ ’abu e pânâkidi yěhěpi.
3Ka Jěhova a vâ, na, Ilina jamě ja sâje na moto egombe yěhěpi, ikabojana a tepě mehoni: ndi hwi jaju i ka diyandi kama ya mepuma pâkâ na mabo mabale.
4Bevengambangwe be diyakindi o he o hwi tedině; na, egombe tombango, o bana ba Anyambě ba ngakiyedi na babajo ba bana ba bato, ka bâ‐ba ja bâ bana, bâ ndi ba diyakidi ba bě bato ba ngudi ba vyo, bamo ba kuma.
5¶ Ka Anyambě a yěně na bobe bwa moto bo diyaki boněně o he, na na ipikiliya ja ebumulem‘ ’aju jěhěpi i diyaki kabo bobe egombe yěhěpi.
6Ka yâ‐ya ’ludě Jěhova na na a velaki moto o he, ka yâ‐ya panga Mâ ulema‐mehiyo.
7Ka Jěhova a vâ, na, Mbi ka jilidi moto uwamě a velakidi oviya o boho bwa he; běhěpi, moto, na tito, na elombo e landakě, na lonâni la oba; ikabojana e ’ludi ’mba ulema eamě e velaki bâ.
8Ndi Noa a duwakindi ehekwě o mihâ ma Jěhova.
9¶ Ekadi ndi mbamba ja Noa: Noa a diyakindi moto uyamu wa hanjabiyěngo o igona jaju; Noa a tamwaki na Anyambě.
10Ka Noa a ja babamo balalo, Shěm, Ham, na Jafěth.
11He tepě e diyakindi ya beva o boho bwa Anyambě; na he e diyakindi ya londa na sâwě.
12Ka Anyambě a ’mbuwa o he, na, umbwakiya, ya bě bevango; ikabojana mehoni meěhěpi me bevakiděndi nje‘ ’aju o he.
13Ka Anyambě a vâ na Noa, na, Ihuku ja mehoni meěhěpi i pândi o boho bwamě; ikabojana he e ndi londango na sâwě na bâ: umbwakiyate, Mbi ka jilidi bâ oviya o he.
14¶ Nd‘ âvě, haka ark ya ele ya gofěr; o ka haka lolika o ark, na nâvě o ka yangakiya yâ na vitwa o utema na o bwebwe.
15Kakana ndi ka âvě‐o ka hayě yâ: Bwaba bwa ark bo diyake kama ja hamba‐’nâ ilalo, njanjo ’aju mabo ma hamba‐’nâ matano, udomba muaju mabo ma hamba‐’nâ malalo.
16O ka haka jâmbě ihalě o ark, o ka hânjâbâkidě jâ hamba‐’nâ oba; na nâvě‐o ka tubaka jâmbě iněně o pěpěkě ya ark; o ka haka yâ nděki ya he, na y‘ ibale, na y‘ ilalo.
17N‘ Umba, umbwakiyate, Mbi ka pâděndi ujambě mua miba o he, ka jilidě mehoni meěhěpi oviya ibomaka ja oba, me jadi na pudi ya ’měnâ; na belombo beěhěpi be jadi o he be ka wandi.
18Ndi Mbi ka yâdidi pang‘ ’amě na nâvě; o ka ngakiya o ark, âvě, na bana bâvě, na mwad‘ ’âvě, na bajo ba bana bâvě.
19Na belombo beěhěpi be diyakě bea mehoni meěhěpi, bea jângâ jâkâ bebale, o ka vanaka o ark, o ka tataka beâ mihâ: be ka diyaka mwadi na momi.
20Lonâni la mangâ mangâ, na bembe bea mangâ mangâ, na belombo be landakě o he beěhěpi bea mangâ mangâ; be ka viyandi o âvě‐o jadi jângâ jâkâ bebale, ka tatwě mihâ.
21Na nâvě‐o ka nângâkâ beja beěhěpi be jakwě, na nâvě‐o ka yolakě beâ o âvě‐o jadi; be ka diyandi beja o âvě‐o jadi na o bâ‐ba jadi.
22Ka Noa a ha nonaně: hohonganěngo na beěhěpi bea Anyambě be langwakiyi mâ, nonaně nd‘ o mâ‐a hakidi.
Currently Selected:
Jěnisis 6: BNG1895
Highlight
Share
Compare
Copy
Want to have your highlights saved across all your devices? Sign up or sign in
Published by the American Bible Society in 1895, 1926.
