प्रेरीत् 1
1
1-3लौ थीओफीलस्य ओउः ङ्हा लेखओ कीताप्हाङः येसुइ जाङ्ह्ओ कुरामा स्यान्ओ कुरामा ङाइ सबै लेखती गम्आलाङः। ओउःकोः लाङ्काताङ् लनःनम् दीन्च्युक्हाङःलेः येसुइ दोह् दोह् हायःआकान् त लेखती ल्होक्नेःआलाङ्। त्यावःअ लनःधाङ्माखाहाङः येसुपाय् सीती च्योक्आक्तीको चालीस् दीन्च्युक्कायः नाःतो पल्त ओउःकोः लयः छ्युङ्ह्ओ मान्तालम्कःताङ् थाती वाङ्ती “ङापाय् च्योक्ती मुओ येसु लेःआः ङ” त ओउःमयःकायः तय्ह्ताक्सा थेङा लयःलेः छ्यानःआथास। इत छ्यानःतोक्हाङः ओउःइ परमेस्वर्कोः ग्वालामःइ स्यान्ओ कुरापाय् लयःकोः छ्युङ्ह्ओमयःकायः गानाक्ती तोआथास परमेस्वर्कोः राजीकोः कुरामा स्यान्आथास। 4ओहाङःसैको यात्दीन्हाङः येसुमा ओउःकोः छ्युङ्ह्ओमयःमा हुम्ती वाङ्आकाय्। वाङ्आक्तीको “लौ ङाकोः आपाइ ङ्हा तोती गम्ओ ग्वालामः बयःधाङ्माच्युक्कायः इ यरुसालेम् सहर्सै ग्ल्युङ्ह्माःत ल्युङ्ह्ती मुन। इ परमेस्वर्इ तोओ कुरा ङाइ अनम्ह् छ्यानःती तोनेःआलाङ्स। 5ङ्हाहाङःसै युहनाखेइ तीःइ बाप्तीस्मा बयःउतो लोन्ते तेन्कोः ज्याङःधाङ्माखाहाङः नीङ्खे परमेस्वर्कोः ग्वालामःइ बाप्तीस्मा दोःतेःनै” त येसुइ दाय्ह्ती तोआथास।
6ओहाङःसैको ओउःमयः जैथुन्सायः त तोओ बुम्हाङः हुम्तोक् बेलाहाङःमा “लौ प्रभुय नाङ्इ रोमी देस्कोः राजाकायः क्लीमःताक्ती ङी इस्राएलीलम्कोः देस् देङेलेः द्यानःताक्तेःनौया” त दाय्ह्ती येसुकायः व्हत्आथै। 7“ङाकोः परमेस्वर् आपाइ लयः तोती गम्ओ दीन्लम्पाय् ‘गल स्याव्नाः’ त नीङ्इ चीःसा स्याव्ल। 8परमेस्वर्कोः ग्वालामः नीङ्कःताङ् दाह्आक्तीको आले नीङ् ग्वम् दोःतेःजेःनै। परमेस्वर्कोः ग्वालामःइ बयःओ ग्वम् दोःआक्तीको नीङ्इ ङाकोः कुरा थोल्ह्ती तोसा खेःतेःनै बा। इ यरुसालेम्हाङःमा सबै यहुदीया समारीया देस्हाङःमा ल्हाव्ह्दैबाङ्कोः चार् दोवाहाङःमा नीङ्इ ङाकोः कुरा छ्यानःती तोसा खेःतेःनै” त दाय्ह्ती येसुइ ओउःमयःकायः तोआकान्। 9ओउःत तोआक्तीको ओउःमयः योती मुतोक्हाङःपाय् येसुकायः लाङ्काताङ् लनःती आलःओ खेःतो। आलःतोक्हाङः येसु मुस्हाङः पोक्ती झ्यान्ते कामःअहाङः मुओ मान्तालम्इ ओउःकायः च्यवःसा खाय्नीली। 10ओहाङःसैको ओउःमयःइ त्याव्ती योतोक्हाङः ओउःमयःकःताङ् नीस्चाक् आन भाम्ओ नाय् लावओलम् चीङ्ती थाआकाच। 11थाआक्तीको “लौ नीङ् गालील देस्सै वाङ्ओमयः दोह् हायःतीतेः इतलेः त्यावःताङ् योती मुतेःनै। ओउः नाङ्कःसै मेस् लाङ्काताङ् ज्याल्ओ येसुपाय् एत ताङ्ह्तो हायःतीलेः लोन्ह्ते फेरी द्यान्ह्ती वाङ्आनाः” त दाय्ह्ती ओउः नीस्चाक् नोःआकाच।
12एत नोःआक्तीको येसुकोः छ्युङ्ह्ओमयः जैथुन्सायः बुम्सै ग्ल्युङ्ह्ती यरुसालेम्ताङ् पाय्ह्आकाय्। ओउः जैथुन्सायः त तोओ बुम्पाय् यरुसालेम् सहर्कुस् द्याङ्काय्तो खेःतो माहा लोक्ल। 13ओहाङःसैको यरुसालेम्ताङ् दाह्ती वाङ्आक्तीको लयः याक्ओ कीम्कोः त्यावःअ कोथाहाङः पाय्ह्ती पोक्आकाय्। ओहाङः पत्रुस् युहना याकुब् अन्द्रीयस् त तोओलम्मा याक्ती मुओ खेःतो। ओहाङःमा फीलीप् थोमा बर्थोलोमा मत्ती आल्फीयस्कोः गोय्चोः याकुब् “जेलोत्” त हाल् मय्ङ्ओ सीमोन्मा याकुब्कोः गोय्चोः यहुदा त तोओलम्मा सबै ओहाङः याक्ओ खेःतो। 14ओउः कोथाहाङः ओउःमयः सबै हुम्ती येसुकोः आमाचोङ्कुस्मा अरु मोमःचोःलम्कुस्मा परमेस्वर्कायः आन तेती तोती मुआकाय्।
15ओउःतोक् बेलाहाङःमा यात् दीन्हाङः यात् सै बीस्च्युक् येसुकायः ङ्हाम्ओ मान्तालम् ओहाङः हुम्ती वाङ्आकाय्। हुम्ती वाङ्आक्तीको पत्रुस्पाय् चीङ्ती 16-20“लौ पुःचोङ् हौचोङ्य परमेस्वर्कोः ग्वालामःइ दावुद् राजाकायः ङ्हा छ्यानःओ कुरा ङीकोः आखरःहाङः लेखती मुनाः। ओउः आखरःहाङःपाय् येसुकायः दुस्मान्कःताङ् दाक्ओ यहुदस्कोः कुरालेः दावुद्इ आन ज्याङःतोहाङः लेखउतो द्याह् ओउः कुरा ताप्सा खेःतो। ‘लौ ओउःकोः याक्ओ बेलाङ् याक्गार्सीःमालो स्याव्पाः। ओहाङः मान्तालम् सुमा याक्लाम्’ त दाय्ह्ती दावुद्कोः कुरा लेखती मुनाः। ओउः यहुदस् त तोओलेः ङीलो लेखा येसुइ छ्युङ्ह्थातो ओउःकुस् काम् जाङ्ह्उतो लोन्ते ओउःइ येसुकायः दुस्मान्कःताङ् पानःताक्साकायः दाक्आथै। येसुकायः दाक्आक्तीको ओउःकोः दाक्झ्याङ्कोः पैसा बयःआकानी। एत पेमालो हायःझ्याङ्कोः पैसा त्याक्ती यहुदस्इ राङ् लेःआकान्। राङ् लेःआक्तीको यहुदस्पाय् ओहाङः आल्ती तोन्ती तुक् पक्ती सीआ। सीआक्तीको ‘ओउः राङ्हाङः येसु सात्लाङ् दाक्ओ मान्तापाय् तोन्ती सीओआः’ त सबै यरुसालेम् सहर्कोः मान्तालम्इ चीःती ओउः राङ्कायः ‘आकेल्दामा’ त मय्ङ्आकानी। आकेल्दामा त तोओकोः माने ‘वयःराङ्लेः’ ओउःलो लेखा राङ्कायः दावुद् राजाइ तोओ याक्गार्सीःमालो राङ् लेःआः बा। फेरी ‘ओउःकोः काम् अरुइ भेःत्याक्ती जाङ्ह्पौ’ तमा दावुद्इ लेखमाआकान् 21-22ओउःत झ्यान्ते यात्चाक् यहुदस्कोः भेःत्याक्साकायः द्याह् छ्युङ्ह्सा खेःतो। ओउः मान्ताइलेः येसु सीआक्तीको उह्ती च्योक्ओ कुरा ङीकुस् अरुलम्कायः छ्यानःती थोल्ह्ती तोसा खेःतो। लौ द्याह्पाय् सुलो ङीकुस् साधे वाह्ओ मान्ता लेःआः सुलो येसुकोः बाप्तीस्मा त्याक्ओहाङःसै ओउःकोः लाङ्काताङ् आलःतोक्हाङः ङीकुस् वाह्ओ खेःतो ओउः मान्तापाय् ङीकुस्इ येसुकोः उह्ती च्योक्ओ कुरा ल्हाक्ती छ्यानःती यहुदस्कोः काम् भेःत्याक्साकायः छ्युङ्ह्पाः” त दाय्ह्ती पत्रुस्इ सबैकायः तोआथास।
23एत तोआक्तीको ओउः हुम्ओ मान्तालम्कःसै येसुइ जाङ्ह्ओ काम्पाय् लयःकोः मीक्इ च्यवःओ नीस्चाक्कायः चीङ्ताक्आथाच। यात्चाक्खे साबास् त तोओकोः चोः युसेफ् खेःतो। ओउःकोः हाल् मय्ङ् जुस्तस् खेःतो। युसेफ्मा यात्चाक् मथीयस् त तोओमा इ नीस्चाक्कायः ओउः अरु हुम्ओ मान्तालम्इ चीङ्ताक्आथास। 24ओहाङःसैको परमेस्वर्कोः ल्हुङ् चीःसाकायः ओउः हुम्ओ मान्तालम्इ परमेस्वर्कायः तेती तोआथै “अ परमेस्वर्य नाङ्इ सबै मान्ताकोः ल्हुङ्तुक् योती चीःतेःनौ बा। 25ङ्हासै छ्युङ्ह्ओ यहुदस्इ रेव्तो जाङ्ह्आक्तीको द्याह् सीती ज्याल्आ। ओउःत झ्यान्ते यहुदस्कोः भेःत्याक्साकायः इ नीस्चाक्हाङः सुखेलो नाङ्इ झाक्ती छ्युङ्ह्तेःआकान् ओउःलेः ङीकायः छीङ्ह्ती दोक्ती छ्यानःताङी दा” त दाय्ह्ती ओउःमयः परमेस्वर्कायः तोआकानी। 26परमेस्वर्कायः तोआक्तीको ओउःमयःइ कागत् कागत्हाङः ओउः नीस्चाक्कोः मय्ङ् लेखआकानी। लेखआक्तीको ओउः नीस् कागत् ल्यय्ती काआक्तीको यातैज्योः चल्ती योआकानी ती ओउःपाय् मथीयस् त तोओकोः कागत् खेःतो। ओउःत खेःओ मथीयस्कायः “यात्चाक् येसुकोः छ्युङ्ह्ओमयःलेः” त तोओ खेःतो।
Currently Selected:
प्रेरीत् 1: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
