प्रेरीत् 2
2
1ओहाङःसैको येसु सीती च्योक्आक्तीको पचास् दीन् पुत्ओहाङः यहुदी मान्ताकोः पेन्तेकोस् त जवती तोओ छ्यात्कोः दीन् स्याव्आ। ओउःनम् दीन्हाङः येसुकोः कुरा ङ्हाम्ती सायःओ मान्तालम् सबै फेरी यातै थाव्हाङः हुम्लाङ् वाङ्आकाय्। 2हुम्ती वाङ्आक्तीको रोमो तोकोलेः अलवःहाङः ओउःमयःकोः थाराय्सै ताङ्ह्तो मारुःलो लेखा ङुह्र्ती वाङ्ती ओउःमयः च्युङःती मुओ कीम्हाङः जुदालेः पोक्आ। 3पोक्आक्तीको ल्युङ्ओ म्हेःलेः लेलम्लो लेखा थाती ओहाङः हुम्ओ मान्तालम्कःहाङः तालाङ् तालाङ्हाङः न्यास्ती दीह्आ। 4लेलम्पाय् एत थाआक्तीको परमेस्वर्कोः ग्वालामः सबै मान्ताकोः ल्हुङ्हाङः पोक्ती ओउःमयःकायः अरु अरु देस्कोः ङ्हा चीःआक्मालो भासालम् नोःताक्आथास।
5ओहाङःसैको ओउः बेलाहाङः परमेस्वर्कायः झाह्ओ यहुदी जात्कोः मान्तालम् ओउः पेन्तेकोस् त तोओ छ्यात् मानसाकायः यरुसालेम् सहर्ताङ् दाह्ती मुआकाय्। ओउः मान्तालम्पाय् नाःतो देस्लम्सै वाङ्आकाय्। 6ओहाङःसैको अलवःहाङः ओउः ताङ्ह्ओ मारुः ङुह्र्ओ सायःती ओउः यरुसालेम्हाङः मुओ मान्तालम्पाय् ग्याङ्ह्ती ओउः मारुः पोक्ओ कीम्ताङ् योलाङ् वाङ्आकाय्। योलाङ् वाङ्आक्तीको देस् देस्कोः मान्तालम्इ लःलयःकोः भासा नोःओ सायःआकानी। 7एत सायःआक्तीको ओउःमयः आन ग्याङ्ह्ती “इपाय् गत हायःओ ती। इ नोःओ मान्तालम् सबै गालील देस्कोः मान्तालम्लेः खेःतो बा। 8ओउःत खेःया गत हायःती ङीइ सबै लःलयःकोः भासा सायःनाःतय्ह्इसी। 9ङीखेपाय् नाःतो देस्सै वाङ्आतय्ही पार्थीया देस्सै मेदीया देस्सै एलाम् मेसोपोताम्या यहुदीया र कपादोसीया देस्लम्सै वाङ्आतय्ही। पोन्तस् असीया 10फ्रीग्या पाम्फील्या मीस्रा लीबीया र क्युरीनी देस्कोः भासा नोःओ मान्तालम्मा खेःनाःतय्ही। सबै देस्कोः मुनाःतय्ही। रोमी देस्सै वाङ्ओ 11यहुदी जात्कोः मान्तालम्मा यहुदी जात् खेःमालो मान्तालम्मा क्रेते देस्कोःमा अराबी देस्कोः मान्तालम्मा ङी सबै इहाङः वाङ्आक्तीको लःलयःकोः भासालम् ङ्र्याःती नोःओ सायःनाःतय्ह्नी बा। इमयःइपाय् परमेस्वर्इ जाङ्ह्ओ ग्याङ्ह्राय्कोः कुरालेः नोःनै रैस” त दाय्ह्ती योलाङ् हुम्ती वाङ्ओ मान्तालम् आन ग्याङ्ह्ती नोःकाय्आकाय्। 12एत ग्याङ्ह्ती नोःकाय्ती “लौ इ दोह् दोह् कुरालो” त दाय्ह्ती ओउःमयः चीङ्ती योती नोःकाय्आकाय्। 13ओउःमयः ग्याङ्ह्तीलेः सायःआकानी यात्नीस्चाक् सायःओ मान्तालम्इ “खेःल ओउःमयः हान् तुङ्ती ङोती नोःनै” त दाय्ह्ती गाक्ती नोःआकाय्।
14एत तोओ कुरा सायःआक्तीको पत्रुस्पाय् अरु एघार छ्युङ्ह्ओमयःकुस् तोलाङ् चीङ्आकाय् “लौ नीङ् यरुसालेम् सहर् याक्ओलम्मा अरु यहुदीया देस्कोः मान्तालम्मा इ ङाइ तोओ कुरा पेतो ङ्हाम्ती सायःनु दा। 15इ भासालम् नोःओ मान्तालम्पाय् ‘हान् ङोती नोःओलेः’ त नीङ् ताःतेःनै। ओउःत खेःबाय्ल इमयःपाय् गत हायःती ङोचै। इत न्याम् दाह्ओ बेलाहाङः सुमा हान् तुङ्ती ङोइली। 16खेःल इ थे थे भासालम् नोःओकायःपाय् उय्ह्लेहाङः परमेस्वर्कोः कुरा छ्यानःओ मान्ता योवेल् त तोओ ङ्हाहाङःसै दाय्ह्ती लेखआकान्। 17‘ “लौ स्याङ्ह्ससै लोन्दोहाङः ङाकोः ग्वालामः सबै मान्ताकोः जात्लम्कायः बयःनाङःसु” त दाय्ह्ती परमेस्वर्इ तोआकान्। “ओउः बेलाहाङः नाङ्कोः गोय्चोःलम्मा मोमःचोःलम्इमा लोन्ते स्याव्सा कुरा ङ्हाहाङःसै छ्यानःती तोनानी। नीङ्कोः लाव्मयःलम्इमा नीङ्कोः बुधालम्इमा माङःखाहाङः परमेस्वर्कोः कुरा च्यवःनानी। 18माः रैस ओउः बेलाहाङः सबै ङाकोः काम् जाङ्ह्ओ गोय्चोःलम्कायःमा मोमःचोःलम्कायःमा ङाकोः ग्वालामः दोःआक्तीको ओउःमयःइ लोन्ते स्याव्सा कुरा ल्हाक्ती छ्यानःनानी। 19प्रभु फेरी दाह्ती वाङ्नम् दीन्कोः ङ्हासै ल्हाव्ह्दैबाङ् फेल्बाङ्हाङः मान्ता चीःताक्साकायः ङाइ ग्याङ्ह्राय् जाङ्ह्आनाङः। ल्हाव्ह्दैबाङ्हाङः वयःमा आह्र् आह्र् त कुःओ म्हेःमा च्यवःलेःनाः” 20ओहाङःसैको ओउः प्रभुकोः ताङ्ह्ओ काम् जाङ्ह्ओ दीन्कोः ङ्हासै न्हीदीङ्हाङः न्याम्पाय् याह्दीङ्लो लेखा च्याक्तो स्याव्मानाः लाह्पाय् वयःलो लेखा दुताङ् क्वार् त दुतो च्यवःमानाः। 21ओउः बेलाहाङः सुसु प्रभुकोः मय्ङ् पेह्ती परमेस्वर्कः तेचै ओउःकायःलेः परमेस्वर्इ दल्ताक्नाःथै’ त योवेल् त तोआ उय्ह्लेहाङः ग्याङ्ह्राय्कोः कुरा दाय्ह्ती नोःआ।
22लौ नीङ् इस्राएल्कोः मान्तालम्इ पेतो सायःनु दा। नीङ्कोः लयःकोः मीक्हाङःपाय् नासरेत् गाव्सै वाङ्ओ येसुकायःलेः परमेस्वर्इ आन ग्याङ्ह्राय् जाङ्ह्ताक्सा बयःआथै। इ येसु त तोओपाय् ‘परमेस्वर्कःसै वाङ्ओआः’ त नीङ्कायः चीःताक्साकायः परमेस्वर्इ येसुकायः ग्याङ्ह्राय् जाङ्ह्ताक्आथास। ओउःततेः चीःनानी। 23ओहाङःसैको ओउः येसुकायः नीङ्इ अरु परमेस्वर्कायः झाह्मालो मान्तालम्कःताङ् दाक्ती ओउःकायः क्ल्याय्ओ सीङःहाङः सात्तेःताक्तेःआकानी बा। इतलेः नीङ्इ हायःतेःनीतो दोङ्सीलेः इ येसुकायः सात्सा खेःओ कुरा परमेस्वर्इ ङ्हासै चीःतीमा रय्ह्ती गम्आकान्। 24ओहाङःसैको सात्आक्तीको सीती वाय्ओहाङःसै परमेस्वर्इ येसुकायः उह्ती च्योक्ताक्आथै दोह् हायःती दाय्ह्सा येसुपाय् सीती मुसा त्याक्आक्थाल। 25इलो लेखा कुरा दावुद् राजाइ इतलेः तोती छ्यानःआकान्। ‘ “परमेस्वर्पाय् ङाकुस् गलमा मुओ” त च्यवःआलाङः ओउःइ ङाकायः गलमा ओम्पायःती झ्यान्ते ङा ल्हुङ् क्रोङ्तोलेः मुनाङः बा। 26ओउःत झ्यान्ते ङा ल्हुङ्हाङः आन म्रोती चोङाय्तीलेः मुनाङः। 27ङा सीआक्तीको नाङ्इ ङाकायः रीःदोलीहाङः फेतेःचीली। नाङ्कोः जय्कुमःओ मान्ता सीआक्तीको ओउःकायः नाङ्इ सय्ङ्ती ल्ह्योतेःताक्तेःउलु। 28जीङः दोःताक्सा ल्याम्लम् नाङ्इ छ्यानःतेःआची ओउःत झ्यान्ते नाङ्कुस् आन छ्युप्तीलेः मुनाङः’ त दाय्ह्ती दावुद् राजाइ प्रभु येसुकोः कुरा नोःआ।
29लौ पुःलम् हौलम्य ङीकोः उय्ह्लेकोः दावुद् राजाकोः कुरा फुती तोनेःनाङ्स बा। दावुद् राजापाय् सीती पाम्ह्आक्तीको तेन्छ्याङ् ओउःकोः तेस् ङीकःहाङःलेः मुबाय्नाः। 30दावुद्कायः परमेस्वर्इ लोन्ह्ते स्याव्सा कुरा छ्यानःती ‘लौ लोन्दोहाङः नाङ्कोः प्लोमःदानेहाङः यात्चाक् ख्रीस् त तोओ स्याव्ती नाङ् दावुद् राजाकोः काम् भेःत्याक्ती जाङ्ह्नौ’ त दाय्ह्ती परमेस्वर्इ कीरीया जेःती दावुद्कायः तोआथै। 31ओउःत झ्यान्ते दावुद्इ इ लोन्ह्तेकोः कुरा चीःती ‘नाङ्इ ङाकायः रीःदोलीहाङः फेतेःचीली। नाङ्कोः जय्कुमःओ मान्ताकोः म्हाङ् नाङ्इ सय्ङ्ती ल्ह्योतेःताक्तेःउलु’ त दाय्ह्ती ओउः ख्रीस्कायःलेः उह्ताक्ओ कुरा तोती नोःआ ओउःपाय् लयःकोः उह्ताक्ओ कुरा खेःल। 32ओउः परमेस्वर्इ उह्ती च्योक्ताक्ओ मान्ता येसु लेःआः बा। फेरी इ येसु च्योक्आक्तीको सेलः मुओ ङीइ सबै च्यवःआलाङःसु। 33ओहाङःसैको द्याह् येसुपाय् परमेस्वर्कोः ङोय्दोहाङः मुओ सबैसै व्हाय्ओ गुल्ह्दाङ् स्याव्नाः। ओउःपाय् एत ताङ्ह्तोलेः स्याव्ओआः ओहाङःसैको परमेस्वर्इ ङ्हा तोओलो लेखा येसुइ परमेस्वर्कोः ग्वालामः दोःती ओउः ग्वालामःपाय् मान्तालम्कायः ल्होक्आकान्। इ मान्तालम्कःताङ् ल्होक्आक्तीको नीङ्इ मेस्खा च्यवःओ मेस्खा सायःओ ग्याङ्ह्सीःओ काम् स्याव्आ। 34-35दावुद् राजाखे लाङ्काताङ् लयः लन्ह्ल ओउःत झ्यान्ते ओउःइ ङ्हा छ्यानःती तोओ कुरा लयःकायः तोओ खेःल ख्रीस्कायः तोओआः। फेरी इमा ख्रीस्कायः तोआ कुरालेः ‘ “लौ नाङ्कोः दुस्मान्कायः ङाइ क्लीमःताक्माच्युक्हाङः ङाकोः ङोय्दोसै गुल्ह्दाङ्कोः च्युङःसा थाव्हाङः मुअ” त दाय्ह्ती ङाकोः प्रभुकायः परमेस्वर्इ तोआकान्’ त दाय्ह्ती दावुद् राजाइ प्रभु येसुकायःलेः नोःती लेखआकान्। 36ओउःत झ्यान्ते नीङ्इ क्ल्याय्ओ सीङःहाङः सात्ताक्ओ येसुकायः द्याह् परमेस्वर्इ प्रभु ख्रीस् त तोती जाङ्ह्ती गम्आकान्। लौ इ कुरा नीङ् इस्राएल्कोः मान्तालम्इ पेतोलेः चीःतेःपानी” त दाय्ह्ती ओउः हुम्ती सायःलाङ् वाङ्ओ मान्तालम्कायः पत्रुस्इ छ्यानःती तोआथास।
37एत तोआक्तीको ओउः सायःओ मान्तालम् ल्हुङ् क्लय्ह्तो स्याव्आकाय्। ल्हुङ् क्लय्ह्तो स्याव्ती “लौ ङीइ दोह् हायःचाङःसु” त पत्रुस् साथीचोङ्कायः ओउः सायःओ मान्तालम्इ व्हत्आथास। 38“लौ लःलयःकोः रेव्ओ काम् फेती परमेस्वर्कःताङ् द्यान्ह्ती ओउः पेओ काम् ग्यान। ओहाङःसैको नीङ्कः परमेस्वर्कोः ल्हुङ् मल्ह्ओ ल्हुङ्पाय् स्याक्आनाः। फेरी नीङ्इ एत हायःओ त छ्यानःसाकायः येसु ख्रीस्कोः मय्ङ् पेह्ती तीःहाङः बाप्तीस्मा त्याक्नु दा। ओउःत हायःआक्तीको नीङ्कायःमा परमेस्वर्कोः ग्वालामः दोःतेःनै। 39इ परमेस्वर्इ तोती गम्ओ कुरापाय् नीङ्कायःमा नीङ्कोः प्लोमःदानेकायःमा लोक्तो मुओ मान्तालम्कायःमा स्याव्नाः। सुसुकायः प्रभु परमेस्वर्इ गोत्तेःनै ओउःकायःलेः इ रेव्ओ काम् क्युम्ह्ओमा परमेस्वर्कोः ग्वालामः दोःओ कुरामा स्याव्नाः बा” त पत्रुस् दाय्ह्ती त्याङ्आ। 40“लौ तेन्छ्याङ्कोः ङ्हाम्मालो मान्तालम्इ रेव्तो हायःओ काम् नीङ्खेइ फेती येसुकोः पेओ कुरा ङ्हाम्ती दल्ताक्तेःनीङ्इसी” त दाय्ह्ती तोतीमा पत्रुस्इ हुम्ओ मान्तालम्कायः नाःतो अरु कुरा गानाक्तीलेः तोआथास। 41एत तोआक्तीको सुसुइ पत्रुस्इ तोओ कुरा ङ्हाम्ती सायःनीतो ती ओउःमयःकायः बाप्तीस्मा बयःआकानी। ओउः दीन्हाङः सुम् हजार्च्युक् मान्तालम् येसुकोः ङ्हाम्ओ मान्तालम्कःहाङः पाःआकाय्। 42ओउःमयः तोहा ङ्हाम्ओ मान्तालम्इ येसुकोः छ्युङ्ह्ओमयःकुस् वाह्ती लाङ् फन्ह्ती जेःती परमेस्वर्कायः तेती तोतीमा मुआकाय् येसुकोः छ्युङ्ह्ओमयःइ स्यान्ओ कुरा सायःतीमा मुआकाय्।
43ओहाङःसैको येसुकोः छ्युङ्ह्ओमयःइ नाःतो ग्याङ्ह्राय् जाङ्ह्ती झ्यान्ते ओउःमयःकुस् मुओलम् परमेस्वर्कः आन ग्याङ्ह्तीलेः एङःआकाय्। 44फेरी ओउः येसुकोः कुरा ङ्हाम्ओ मान्तालम् आन हुम्ती ब्राङ्ती वाह्आकाय्। मान्ता मान्ताकोः माल्ताल् चीस्लम् सबैकायः स्याव्ओ खेःतो। 45अरु वीनःओ चीस्कोः मोल् पैसामा सबैकायः वेःती बयःआकानी। सुसु राह्ओ खेःइतो ओउःकायःलेः वेःती बयःआथास। 46-47ओहाङःसैको दीन्का दीन् ओउःमयः ब्राङ्ती परमेस्वर्कोः मन्दीर्ताङ् आल्इतो लःलयःकोः कीम्लम्हाङः हुम्ती लाङ् फन्ह्ती म्रोती जेःनीतो परमेस्वर्कायः लुङ्ती तोती मुओ खेःइतो। ओउःमयःइ तोओ कुरा नाःतो मान्तालम्इ म्रोती सायःनीतो दीन्का दीन् प्रभुइ अरु ङ्हाम्ओ मान्तालम् दल्ताक्ती ओउःमयःकःताङ् पाःती त्योम्ताक्आकान्।
Currently Selected:
प्रेरीत् 2: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
