लुका 10
10
इसु सुम्कुरितेन्हे चात्याहेङ दिङगिल्का
1इङकोन्हुअ्सो इसु प्रभु बो सुमकुरिते न्हेमि#१०:१पुर्ना बाइबलता सुम्कुरितेमिँ चात्यागेलाइ दोअ्तेङ बुङ लेखेका हि। द्याङगेलाइहेङ साल्हि। एम्बालाइहेङ न्हेमि न्हेमि पातेङ ताइमि हानेलि तोम्का देरा रो पुरभारि ताइमि खान्तेङ लाम्फा दिङगिलतेङ दोअ्हि, 2“तोल्हेलिगोइका बालि ते हेन्जाङ हि, कालाउ बालि सान्तेका जनगेलाइ आतुइसा खिनिङ हि। एला बालिको मालिकदोफा पुकार पासु वा ताइको बालिता खेतालागेलाइ दिङगिलप्याको। #मत्ति ९:३७-३८ 3एला नेलाइ हानेसु, हाइदोनु भेडागेलाइहेङ स्याइलेगेलाइको माझाता दिङगिल्का भाइपाङ का नेलाइहेङ द्याङगेलाइको माझाता दिङगिल्दोङखा।#मत्ति १०:१६ 4नेलाइ हानेलाउ टाका, झोला, जुता हाइदोङ माचुम्सु। कालाउ दामाता द्याङगेलाइ दोफा माआवाइसु।
5“नेलाइ जेदोङ साअ्ता दुलस्वाना झाराङ खान्तेङ लाम्फा ‘इदोइ साअ्ता सुबिस्ता ज्याको’ दोअ्तेङ आसिस पिसु। 6इङको साअ्ता सुबिस्ता निङलि योग्यको द्याङ हिनु ते नेलाइको सुबिस्ता इन्ताङ ह्यावा। कालाउ इन्सिका द्याङ मान्थुनु ते नेलाइको सुबिस्ता नेलाइ दोफाङ घुरितेङ ल्वावा। 7नेलाइ इङको साअ्ता हिसु कालाउ एम्बालाइ हाइ चालि पिखे इङको चासु। हाइदोनु जनगेलाइ जेला निङलि दोङ गोयाङ। साअ् साअ् बासा हितेङ माहिगिल्सु।#१ कोरिन्थि ९:१४; १ तिमोथि ५:१८
8“एसाङ पातेङ पुरगेलाइता हानेलाउ बुङ इन्ताको द्याङगेलाइ नेलाइहेङ सेउपातेङ चालि पिका आनेमाने चासु। 9कालाउ इन्ता हिका रोगाइकालाइहेङ एल्पासु रो एम्बालाइहेङ ‘सादेलको सारभि नेलाइ भेर्पा लोलि तोम्का हि’ दोअ्तेङ पारचार पासु। 10कालाउ जेदोङ पुरता नेलाइ हानेस्वाना इन्ताको द्याङगेलाइ नेलाइहेङ स्वागत मापानु इङको दामागेलाइता ओल्हेतेङ#साल्तेङ दिङगिल्का १३:५१ 11‘केलाइ नेलाइको पुरको धुलासुदाङ नेलाइको खिलापता केलाइको खोकोइसो थिदोङन्हाखे। कालाउ नेलाइ गेसु, सादेलको सारभि लोलि तोम्का हि’ दोअ्तेङ इङको द्याङगेलाइहेङ हिम्पासु।#मत्ति १०:७-१४; मर्कुस ६:८-११; लुका ९:३-५ 12का नेलाइहेङ दोअ्ताङका, परमेस्वरको न्यायको दिनाता इङको पुरको द्याङगेलाइको पिरखान्तेङ भुरु कुकरमसो पोङघाका सदोम पुरको द्याङगेलाइको हालत सहिलि दोअ्का जेनावा।#सिरजाइ १९:२४-२८; मत्ति १०:१२; ११:२४
खान्धुर मापाका पुरको द्याङगेलाइ
(मत्ति ११:२०-२७; १३:१६-१७)
13“खोराजिन रो बेथसेदाको द्याङगेलाइ, नेलाइहेङ धिकार! नेलाइको माझाता पाका भारभुसाइका कामगेलाइ टुरोस रो सिदोन पुरता पाका हिनुते इन्ताको द्याङगेलाइ हेन्जाङ लाम्फा दोङ बोराको धाबा लागाइतेङ बुअ्सुरि लाइधावा रो ताताइको कुकरम मानेतेङ परमेस्वरपाहा घुरिधावा।#यसैया २३:१-१८; इजकिएल २६:१; २८:२६; योएल ३:४-८; आमोस १:९-१०; जकरिया ९:२-४ 14न्यायको दिनाता नेलाइको तु: खान्तेङ टुरोस रो सिदोनको द्याङगेलाइको तु: थामेलि दोअ्का ज्यावा। 15ओइ कफर्नहुमको द्याङगेलाइ, हाइ नेलाइ सादेलता थुकाङका दोअ्सुखेना? नेलाइ ते दियाबलस हिका पातेलता दोङ थुकास्वाना।”#यसैया १४:१३-१५
16इसु चात्यागेलाइहेङ दोअ्हि, “नेलाइको काथा हिङकालाइ काङकोङ काथा हिनावा। नेलाइहेङ मामानेकालाइ कासेहेङ दोङ मामान्यावा। कालाउ कासेहेङ मामानेकालाइ कासेहेङ दिङगिल्का परमेस्वरहेङ दोङ मामान्यावा।”#मत्ति १०:४०; मर्कुस ९:३७; लुका ९:४८; युहन्ना १३:२०
सुम्कुरितेन्हे चात्यागेलाइ घुरितेङ लोका
17जेलाउ इसुको दिङगिल्का सुम्कुरितेन्हेमि चात्यागेलाइ घुरितेङ लोहि कालाउ लेङचातेङ वासेहेङ दोअ्हि, “मास्टर, नाङको मिङको खाबराहोइ मासानगेलाइ बुङ केलाइको बसता लोहि।” 18इसु एम्बालाइहेङ दोअ्हि, “का मासानको मालिक दियाबलसहेङ बिजुलि जोल्का भाइपाङ आदेलसो हुल्का तिङघा। 19हिङसु, का नेलाइहेङ पुय्हाँ रो बिच्छिहेङ याङतेङ हिगिल्का सरबङ कालाउ दुस्मनको गोताङ सरबङहेङ जितिका खाबरा पिका हिघा। हिदोइ बुङ काथाहोइ नेलाइहेङ नोक्सान मापावा।#ले ९१:१३ 20कालाउ मासानगेलाइ केलाइको बसता लोकाहि दोअ्तेङ नेलाइ मालेङचासु। भुरुङ ताइको मिङ सादेलता लेखेन्हाका हि दोअ्तेङ लेङचासु।”
21इङ कोङ घरि पुनित हाङसासो पोङघातेङ इसु दोअ्हि, “परमेस्वर आबा, सादेल रो सुमिङको मालिक, का नासेहेङ च्याबास प्याङका। हाइदोनु बुद्धिहिका रो आकिलहिकालाइसो म्होअ्तेङ ताअ्का काथा ना हाइदोङ मागेकालाइहेङ धिरपान्हा! आबा, एसाङ पालि नाङको लाल्सा हिघाहि!
22“काङको आबा कासेहेङ गोताङ थोक जिम्मा पिकाहि। आबाबिना का चानहेङ हासुङ मानाल्खे। एन्साङ चान रो वाको नाल्पाका द्याङगेलाइ बिना बो हासुबुङ आबाहेङ मानाल्खे।”#युहन्ना ३:३५; १०:१५
23इङकोन्हुअ्सो इसु चात्यागेलाइभारि घुरितेङ एम्बालाइहेङ सिकापा दोअ्हि, “इदोइ गोताङ थोक तिङलि निङका नेलाइ हेथे आसिस निङका हिसुन्हा! 24का नेलाइहेङ दोअ्खा, हेन्जाङ आगाधुइका रो राजागेलाइ नेलाइको तिङका इदोइ थोकगेलाइ खाङलि रो हिङलि बाराका लाल्सा पाका हिघाहि। कालाउ एम्बालाइ खाङलि रो हिङलि बुङ मानिङहि।”
रेम्का सामरि
(मत्ति २२:३४-४०; मर्कुस १२:२८-३१)
25एनि एमि धरम मास्टर लोतेङ इसुहेङ आल्पातेङ दोअ्हि, “मास्टर, असिम ज्यान निङलि हाइपालि गोयाङ?”#मत्ति २२:३५-४०; मर्कुस १२:२८-३४ 26इसु वासेहेङ दोअ्हि, “याको बारेता नियम हाइ दोअ्खे? इन्ता ना हाइ पर्हिका हिन्हा?” 27धरममास्टर दोअ्हि, “ना परमप्रभु ताइको परमेस्वरहेङ ताइको गोताङ कोन्धाङ, गोताङ हाङसा, गोताङ सरबङ रो गोताङ मनसो माया पा कालाउ ताइ भेर्पाकोहेङ ताइमिहेङ भाइपाङ माया पा।”#नियम ६:५; लेबि १९:१८ 28इसु दोअ्हि, “ना ठिकदोङ दोअ्न्हा। एन्साङ पा कालाउ ना बानच्याना।”#लेबि १८:५ 29इङको धरम मास्टर ताइमिहेङ धरम तिम्पालि भाअ्सिङ इसुहेङ दोअ्हि, “एन्सानु काङको साअ् भेर्पाको द्याङ हासु कुनु?”
30इसु वासेहेङ दोअ्हि, “एमि द्याङ यरुसलेमसो लेता यरिहो दोअ्का पुरभारि हानेदोङघाहि। दामाता वासेहेङ खुकालाइ रिम्तेङ नाङगाङ पातेङ आधामारापाङ दान्हाइतेङ लाअ्धिहि। 31आसा न्हुअ्सो एमि धामि इङकोङ पाहा लोहि। कालाउ इङको घाइते द्याङहेङ तिङतेङ वा दुरेसोङ भेन्चाकाइतेङ हानिहि। 32एसाङ पातेङ लेबि खालको एमि धामि बुङ इङकोङ पाहा लोहि। वा बुङ इङको घाइते द्याङहेङ तिङतेङ दुरेसोङ भेन्चाकाइतेङ हानिहि। 33एमि सामरि बुङ इङकोङपाहा लोहि। इङको घाइते द्याङहेङ तिङलाउ वाको मन दायासो पोङघातेङ लोहि।#२ इतिहास २८:१५ 34कालाउ वा भेर्पा हानेतेङ वाको पेचाराता जैतुनको चुइति रो अङगुरको निघार लागाइ पितेङ चेन्थ्राहोइ जिङपिहि। इङकोन्हुअ्सो वा घाइत्या द्याङहेङ ताइको गाधाता धोल्पातेङ एलोङ आतुइका बासाहिका थामेता चुमपुहि। कालाउ झेङपाङ ताइमिङ वासेहेङ सामर्हाइहि। 35जुम्नि र्हिमाङ हानिका पहरता सामरि बासाहिका थामेको मालिकहेङ रुपाको न्हे टाका पितेङ दोअ्हि, ‘एला का हानाङका, यासिहेङ रेम्फा खाङपि। यासिहेङ ख्याल पालाउ हेथे खार्चा जेङखे का घुरितेङ लोलाउ नासेहेङ प्याङका’।”
36इदोइ तुलनाको काथा दोअ्कान्हुअ्सो इसु धरममास्टरहेङ हिअ्हि, “इदोइ सुमिता हासुचाहिँ खुकाको खुरता परिका द्याङहेङ भेर्पाको भाइपाङ कामकाज पाहि वाला?” 37धरम मास्टर दोअ्हि, “दाया पाका द्याङ!” इसु दोअ्हि, “हाने, ना बुङ एङसाङ पा।”
मार्था रो मरियमदोफा इसु दुसुका
38एनि इसु रो वाको चात्यागेलाइ हानेकाताङ पालाउ एलोङ देराता थुकाहि। इन्ता मार्था मिङ हिका बेबाल ओबालाइहेङ ताइको साअ्ता स्वागत सत्कार पाहि।#युहन्ना ११:१ 39वाको मरियम मिङ हिका एमि ओने हिघाहि। वा प्रभु इसुको खोकोइभेर्पा योम्तेङ वाको बिद्या हिङलि तेङहि। 40कालाउ मार्था साअ्को गोताङ काम ताइमि खिनिङ पालि गोइनाङ वा इसुकोता लोतेङ दोअ्हि, “मास्टर, साअ्को गोताङ कामगेलाइ का खिनिङ पालिगोइखा। कालाउ काङको ओने मरियम हाइदोङ मापाखे। हाइ ना मातिङखेना? वासेहेङ लोतेङ कासेहेङ काम पालि साघाइलि दोअ्पि।” 41प्रभु इसु वासेहेङ दोअ्हि, “ओइ मार्था, ना हेन्जाङ काथाको सुर्ता रो फिक्रि पाखेना। 42कालाउ गोइका थोक एलोङ खिनिङ हि; इङको दोङ मरियम साल्काहि। इङको वाकोसो माघिन्हावा।”
Currently Selected:
लुका 10: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
