लुका 11
11
इसुको धिरपाका पुकार
(मत्ति ६:९-१३; ७:७-११)
1एखे हिदिङ एथामेता प्रभु इसु पुकार पातेङ हिघाहि। पुकार पालिदोकान्हुअ्सो वाको एलोङ चात्या दोअ्हि, “प्रभु, युहन्ना ताइको चात्यागेलाइहेङ पुकार पालि धिरपाकाभाइपाङ केलाइहेङ बुङ धिरपा।” 2इसु एम्बालाइहेङ दोअ्हि, “नेलाइ एसापा पुकार पासु:
ओइ परमेस्वर आबा,
नाङको मिङ पुनित ज्याको,
नाङको सारभि ल्वाको,
3दिनाङ गोइका चाकाआनेमाने केलाइहेङ दिनाङ पि।
4केलाइको पाका कुकरम माफ पापि
हाइदोनु केलाइको खिलापता कुकरम पाका झाराङहेङ केलाइ बुङ छमा पान्हाखे।
कालाउ दुरजनसो केलाइहेङ बान्चेपा।”
5कालाउ इसु चात्यागेलाइहेङ आरोङ दोअ्हि, “एमि द्याङको एमि सानाइति हिघाहि। वा आधा न्हिसिङता सानाइतिकोता हानितेङ दोअ्तावा, ‘ओइ सानाइति, कासेहेङ सुम्लोङ तोले खिल्लि पि। 6हाइदोनु काङको साअ्ता दुरेसो एमि बान्सालाइ लोका हि। कालाउ वासेहेङ चापालि भाअ्सिङ काङकोदोफा हाइदोङ मान्थु।’ 7कालाउ वाको सानाइति साअ् लिअ्तासो दोअ्हि, ‘कासेहेङ तु: मापि, फिनु गिअ्तेङ जामालाइदोफा जिम्लिदोहोइका। एला का ल्होतेङ नासेहेङ हाइदोङ पिलि माद्वाङका।’” 8इदोइ दोअ्लिदोतेङ इसु एम्बालाइहेङ दोअ्हि, “वा सानाइति दोअ्तेङ मापिलाउ बुङ वा र्हेका र्हेकाङ पानु वा ल्होकावा रो र्हेका झोको गोताङ वासेहेङ प्यावा।
9“एन्साङ का नेलाइहेङ दोअ्खा, र्हेसु कालाउ नेलाइ निङस्वाना। भोसु कालाउ नेलाइ निङस्वाना। चालापासु कालाउ नेलाइको भाअ्सिङ फिनु हेनावा। 10हाइदोनु जाइ र्हेकावा वा निनावा। कालाउ जाइ भोकावा वा निनावा। जाइ चालापावा वाको भाअ्सिङ फिनु हेनावा। 11नेलाइता हासु इसिका आबा बुङ हि वाला, जाइको चान हाया र्हेनु पुय्हाँ प्यावा? 12कालाउ तुइ र्हेनु बिच्छि प्यावा? 13नेलाइ कुकरमि हिलाउ बुङ ताइको चान चामिन्दिहेङ रेम्का सामान पिलि गेसुन्हा पानु सादेलता हिका आबा र्हेकालाइहेङ झन हेन्जा पुनित हाङसा माप्यावा कुनु?”
इसु रो बालजिबुल
(मत्ति १२:२२-३०,४३-४५; मर्कुस ३:२०-२७)
14एमि द्याङहेङ मासान लाटा बान्हाइका हिघाहि। कालाउ इसु वाकोलिअ्ता हिका मासान ओल्हेपापिकान्हुअ्सो इङको द्याङ नुइधुइलि तेङहि। इदोइ तिङतेङ द्याङगेलाइ भारभुसाइहि। 15एम्बालाइता आधिमि दोअ्हि, “याते मासानको राजा बालजिबुलको सरबङसो मासानगेलाइ ओल्हेपाखे।”#मत्ति ९:३४; १०:२५ 16आधिमि वाको जाच पालि भाअ्सिङ दोअ्हि, “इदोइ काम परमेस्वरको सरबङसो पाका नु ते केलाइहेङ सादेलसो एलोङ भारभुसाइका काम तिम्पापि।”#मत्ति १२:३८; १६:१; मर्कुस ८:११ 17एम्बालाइको मन गेतेङ इसु दोअ्हि, “हिदोइ बुङ सारभिता मिलाप मान्थुनु इङको ताइमिङ मुअ्न्हाखे। ताइमिङलिअ्ता मिलाप मान्थुका साअ् बुङ मुअ्न्हाखे। 18कालाउ दियाबलस ताइको बिरोध ताइमिङ पानु ते वाको सारभि हेसापा टिकिलि द्वावा? नेलाइ कासेहेङ मासानको राजा बालजिबुलको सरबङहोइ मासान ओल्हेपाखे दोअ्सुखेना। 19एन्सानु नेलाइको ताइको चात्यागेलाइ हासुको सरबङहोइ ओल्हेपाखे कुनु? नेलाइको ताइको चात्यागेलाइ दोङ नेलाइको पाका गल्ति काथा तिम्पाप्यावा। 20का परमेस्वरको सरबङसो मासान ओल्हेपाखा पानु सादेलको सारभि नेलाइको माझाता लोहोइ। 21एमि बोल्याका द्याङ काति भिरितेङ वाको साअ् खाङपिनु ते वाको आनेमाने मारामावा। 22कालाउ वा खान्तेङ बोल्याका द्याङ लोनु ते वासेहेङ जित्यावा। वाको भर पाका हातियारगेलाइ रो आनेमानेगेलाइ बुङ घिङतेङ चुमप्वावा। कालाउ आनेमाने बुङ घिङतेङ चुमपुतेङ ताइको सनाइतिगेलाइ दोफा बाखारायावा। 23काङको दोफा मालागिका द्याङ काङको बिरोधि जेङखे। कासेहेङ जोम्पालि मासाघाइका द्याङ जोम्पाका बुङ राइन्हा पापिखे।#मर्कुस ९:४०
24“हिदोइ बुङ द्याङसो मासान ओल्हेतेङ वा उदादाङका थामेभारि हानितेङ हिलिको भाअ्सिङ रेम्का थामे भोगिल्खे। रेम्का थामे हिसो बुङ मानिङनु ‘लाम्फाको द्याङकोता दोङ हानाङका’ दोअ्तेङ घुरितेङ लोखे। 25इन्ता थुकालिलोलाउ मासान लाम्फाको साअ् साफा सुघ्घर जेङका तिङखे। 26इदोइ तिङतेङ वा बो न्हिअ्लोङ ताइमिखान्तेङ बुङ झन हेन्जाङ मारेम्का मासानगेलाइहेङ काइतेङ चुमाखे। कालाउ एम्बालाइ झाराङ लिअ्ता दुल्तेङ बासा ह्यावा। इङकोन्हुअ्सो इङको द्याङको न्हुअ्सोको आवास्ता लाम्फाको खान्तेङ झन मारेम्का ज्यावा।”
जातिङको सुख
27इसु काथा पाकाताङ पालाउ द्याङको हुलसो एमि बेबाल र्हिकाइतेङ दोअ्हि, “नासेहेङ जोल्माइका रो दुदु आम्पाका आमाइ हेथे आसिस निङका हि।” 28इदोइ हिङतेङ इसु दोअ्हि, “इन्सिका माको भुरुङ परमेस्वरको बिद्या हिङतेङ मानेकालाइ हेथे आसिस निङका जेनावा।”
द्याङगेलाइ भारभुसाइका चिनो खाङलि भोका
(मत्ति १२:३८-४२)
29इन्ता द्याङगेलाइको चेअ्सु पोङघातेङ हानेलाउ इसु दोअ्हि, “इदोइ खाल आसाति खाल एइ। एबालाइ चिन्हो खाङलि भोखे, कुलाउ योनाको चिन्होबिना एबालाइ बो हिदिङ चिन्हो तिङलि मानिनावा।#मत्ति १६:४; मर्कुस ८:१२ 30योना जेसापा निनबे पुरको द्याङगेलाइको भाअ्सिङ चिनो जेङकाभाइपा आन्जि नानिको द्याङगेलाइको भाअ्सिङ का द्याङको चान दोङ चिनो ज्याङका।#योना ३:४ 31न्यायको दिनाता माहेँको सेबा मुलुकको रानि जाअ्तेङ आन्जि नानिको द्याङगेलाइहेङ फतुर लागायावा हाइदोनु सोलोमन राजाको आकिलको काथा हिङलि वा हेन्जाङ दुरेसो धावाइतेङ लोहि। कुलाउ खाङ, राजा सोलोमन खान्तेङ बुङ बाराका एमि इता हि।#१ राजा १०:१-१०; २ इतिहास ९:१-१२ 32न्यायको दिनाता निनबे पुरको द्याङगेलाइ जाअ्तेङ एलाको द्याङगेलाइहेङ फतुर लागायावा, हाइदोनु योना परमेस्वरको बिद्या पारचार पालाउ एम्बालाइ ताताइको कुकरमहेङ मानेतेङ लाअ्हि। कुलाउ खाङ, योनाखान्तेङ बुङ बाराका एमि इता हि।”#योना ३:५
जिउको गेसा
(मत्ति ५:१५; ६:२२-२३)
33“गिसा जोलाइतेङ हासुबुङ पाथिहोइ माथुम्खे कालाउ म्होअ्तेङ बुङ माताअ्खे। भुरुङ लिअ्ता लोका द्याङहेङ फाइसालामताको दोअ्तेङ झाउका थामेता ताअ्पिखे।#मत्ति ५:१५; मर्कुस ४:२१; लुका ८:१६ 34नाङको मिको दोङ नाङको जिउको गिसा। नाङको मिको रेम्फा तिङनु ते गोताङ जिउ दोङ फाइसालामावा। कालाउ नाङको मिको बिगिर्का हिनु ते नाङको गोताङ जिउ दोङ कितिकितितावा। 35इङकोखातिर होसियार जेङसु, नेलाइको मनको गेसा हेअ्लाउ मास्याको। 36नाङको जिउको हिदि बुङ भाग कितिकितिकाता माहिसिङ फाइसालामका हिनु ते इङको गोताङ फाइसालामतावा। जेसापा गिसाको फाइसालामका नाङकोर्हुता जोलावा।”
फरिसि रो धरम मास्टरगेलाइहेङ इसुको चेतानि
(मत्ति २३:१-३६; मर्कुस १२:३८-४०)
37इसु इदोइ काथा दोअ्लिदोतेङ एमि फरिसि द्याङ वासेहेङ वाको साअ्ता उम चालि काइहि। कालाउ इसु वाको साअ्ता हानेतेङ चालि योम्हि। 38इसु ताइको खुर माझासिङ चालि योम्का तिङतेङ वासेहेङ चालि काइका फरिसि बुङ भारभुसाइहि। 39कालाउ इसु इङको फरिसि द्याङहेङ दोअ्हि, “नेलाइ फरिसिगेलाइ थालि रो बाति बाहार खिनिङ झासुखेना। कालाउ नेलाइको मन लोभ रो मारेम्का थोकहोइ पोङघाका हिसुन्हा। 40ओइ पुन्धुइ मान्थुका द्याङगेलाइ, हाइ नेलाइ मागेसुखेना? जाइ बाहारको भाग बान्हाइहि वादोङ लिअ्ताको भागबुङ बान्हाइका माको कुनु? 41नेलाइदोफा हिका थोकगेलाइ हाइदोङ मान्थुकालाइहेङ पिसु। कालाउ नेलाइको भाअ्सिङ गोताङ थोक सुचि जेनावा।
42“कालाउ नेलाइ फरिसिगेलाइहेङ धिकार! पुदिना, आरुद, रो बो ओसेरेपाइतिको उब्जिकासो ते बाखाराको ए बाखारा परमेस्वरहेङ पिसुखेना। कालाउ परमेस्वरहेङ माया मापासुखेना रो आरुहेङ रेम्फा पातेङ निया मापापिसुखेना। इङको बो काथाको दोसादोसाङ नेलाइ न्याय रो माया पाका कामबुङ पासु।#लेबि २७:३०
43“नेलाइ फरिसिगेलाइहेङ धिकार! हाइपानु नेलाइ कचहरिसाअ्ता मुलमुल थामेता रो हातेगेलाइता द्याङगेलाइ सेउपाको दोअ्तेङ मन पासुखेना। 44नेलाइहेङ धिकार! नेलाइ ते नाल्लि मादोका तोम भाइका हिसुन्हा। इन्सिका मातिङका तोमर्हुता ते द्याङगेलाइ मागेसिङ हिगिल्खे।”
45एमि धरम मास्टर इसुहेङ दोअ्हि, “मास्टर, एसा दोअ्तेङ ना ते केलाइको दोङ बेजत पाखेना।” 46इसु वासेहेङ दोअ्हि, “ना धरम मास्टरगेलाइहेङ बुङ धिकार! नेलाइ द्याङगेलाइहेङ धरम करमको फुलि मादोपाङ ल्हिका बोकाना फुपासुखेना। कालाउ नेलाइ ताइमिङचाहिँ एलोङ आङगुलिहोइ बुङ इङको बोकानागेलाइ मासाइसुखेना।
47“नेलाइहेङ धिकार! नेलाइ ताइकोङ पिता पुर्खाको सेअ्का आगाधुइकालाइको भाअ्सिङ रे रेम्का तोमगेलाइ बान्हाइसुखेना। 48एसापा नेलाइ नेलाइको ताइको पिता पुर्खा इसिका काम पाका हि दोअ्तेङ माने सुखेना। एम्बालाइ आगाधुइकालाइहेङ सेअ्हि कालाउ नेलाइ चाहिँ एम्बालाइको तोम बान्हाइसुखेना। 49इङकोखातिर गोताङ काथा गेका परमेस्वर लाम्फासो दोङ दोअ्का हिघाहि, ‘का नेलाइकोता आगाधुइकालाइ रो साल्तेङ दिङगिल्कालाइहेङ दिङगिलाङका। कालाउ एम्बालाइता हेथेहेङ सान्तायावा रो हेथेहेङ सेअ्तावा।’ 50एन्साङ दुनियाको लाम्फासो एलाथिकिपा सेअ्का आगाधुइकालाइको हितिको हिसाब इदोङ पुस्ताको द्याङगेलाइ दोङ पिलिगोयाङ। 51का दोअ्ताङका, हाबिलहेङ सेअ्का पहरसो थान रो थामेको माझाता सेअ्का जकरिया थिकापाको हितिको फतुर गोताङ इदोइ पुस्ताको द्याङगेलाइहेङ पर्यावा।#सिरजाइ ४:८; २ इतिहास २४:२०-२१
52“नेलाइ धरम मास्टरगेलाइहेङ धिकार! नेलाइदोफा आकिल रो बुद्धिको फिनु हेका चाभि हि। कालाउ नेलाइ ताइमि बुङ लिअ्ता दुल्नाङ मान्थुसुन्हा। कालाउ बोमिहेङ बुङ दुल्लि पिनाङ मान्थुसुन्हा।”
53इसु इन्तासो हानेतेङ धरम मास्टरगेलाइ रो फरिसिगेलाइ वासेहेङ मारेम्फाङ बिरोध पालि तेङहि कालाउ वाकोदोफा हेन्जाङ काथागेलाइ हिअ्लि तेङहि। 54वा काथा बिराइपानु एम्बालाइ वासेहेङ रिम्लि गोयाङ दोअ्तेङ दाउ खान्तेङ हिघाहि।
Currently Selected:
लुका 11: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
