लुका 19
19
इसु रो तिरो ल्होपाका जखायस
1इसु यरिहो पुरको दामा जेङतेङ हानेदोङघाहि। 2इङको पुरता जखायस मिङ हिका एमि धनि द्याङ हिघाखे। जाइ तिरो ल्होपाकालाइको हाकिम हिघाखे। 3वा इसुहेङ खाङलि भोदोङघाखे। कालाउ वा पोतोका हिनासिङ द्याङगेलाइको चेअ्सुमेअ्सुकासो इसुहेङ तिङलि मादोहि। 4इङकोङखातिर वा भेनेङ द्याङगेलाइ खान्तेङ लाम्फा धाअ्तेङ हानिहि रो इसुहेङ खाङलिको भाअ्सिङ एलोङ राब्राको सिङता ताङहि, हाइदोनु इसु इङकोङ दामा पाहा हानेदोङ घाखे। 5इङको थामेता थुकालि लोलाउ वा सिङ र्हुता खाङतेङ जखायसहेङ दोअ्हि, “ओइ जखायस, मार्फा लेता खुतेङ लो! नानि कासेहेङ नाङको साअ्ता बासा हिलि हानेलि गोइका हि।” 6इङको हिङतेङ जखायस मा मार्फा लेता खुअ्हि रो लेङचातेङ इसुहेङ ताइ साअ्ता चुमपुहि। 7इदोइ तिङतेङ झाराङ एसा दोअ्तेङ गानगानाइलि तेङहि, “इदोइ द्याङ ते कुकरमिको साअ्ता कि बासा हिलि हानेखे।” 8कालाउ जखायस प्रभुको आगाता जाअ्तेङ दोअ्हि, “प्रभु, काङकोदोफा हिका ताका काउरिको आधे भाग मान्थुकालाइहेङ बाखाराइ प्याङका। कालाउ हासुदोफा बुङ धाताइतेङ हेन्जा ल्होपाका हिघा पानु का इङकोको द्या गुना घुरिपाप्याङका।” 9इसु वासेहेङ दोअ्हि, “नानि इदोइ साअ्को द्याङगेलाइ छुटकारा निङकाहि। हाइ जखायस बुङ आब्राहामको सन्तान माको कुनु? 10का द्याङको चान राम्कालाइहेङ दोङ भोलि रो बान्चिपालि दोअ्तेङ लोका हिघा।”#मत्ति १८:११
सोनाको टाकाको तुलना
(मत्ति २५:१४-३०)
11इसु यरुसलेम भेर्पाङ थुकालिलोका हिघाहि। कालाउ द्याङगेलाइ सादेलको सारभि एला मार्फा ल्वाङ दोअ्का फोमपातेङ वाको काथा हिङदोङघाहि। एन्सा जेङलाउ वा एलोङ तुलना पितेङ एम्बालाइहेङ सादेलको सारभिको बारेता इसिका काथा दोअ्हि, 12“एमि खानदानि द्याङ हेन्जाङ दुरे भेनेङ मुलुकता हानितेङ ताइको मुलुकको राजा जेङतेङ घुरिलि ठहर पाहि। 13वा हानिका खान्तेङ लाम्फा ताइको तेमि कामत्यागेलाइहेङ काइतेङ झाराङहेङ एलोङ एलोङपा सोनाको टाका पितेङ एम्बालाइहेङ दोअ्हि, ‘का घुरितेङ मालोपाधाउ इदोइ टाकासो पाइकार पातेङ हेन्जा नाफा ल्होपासु।’ 14कालाउ ताइको मुलुकको द्याङगेलाइ वासेहेङ मोन्दा माताघाहि। कालाउ वा हानिकान्हुसो ओबालाइ ‘इदोइ द्याङ केलाइको भाअ्सिङ राजा माज्याको।’ दोअ्तेङ बिनइ पालि द्याङगेलाइ दिङगिल्हि।
15“कालाउ इङको द्याङ राजा जेङतेङ दोङ घुरिहि। कालाउ वा लोतेङसाङ ताइको कामत्यागेलाइहेङ पाइकार पातेङ हेथे कामाइसुन्हा दोअ्तेङ हिअ्लि काइगिल्हि। 16लाङ कामत्या लोतेङ दोअ्हि, ‘मालिक, नाङको पिका एलोङ टाकासो का तेलोङ टाका काम्हाइतेङ चुमाका हिघा।’ 17राजा वासेहेङ दोअ्हि, ‘च्याबास, ना रेम्का कामत्या हिन्हा! ना आतुइका काथाता खान्धुर पानाङसिङ का नासेहेङ ते पुरको हाकिम बान्हायाङका।’ 18भेनेङ कामत्या लोतेङ दोअ्हि, ‘गिर्हि, नाङको पिका एलोङ टाकासो का नालोङ टाका काम्हाइतेङ चुमाका हिघा।’ 19गिर्हि इङकोहेङ दोअ्हि, ‘ना बुङ ना पुरर्हुता खाबारा निनाना।’ 20कालाउ भेनेङ कामत्या दोअ्हि, ‘मालिक, नाङको पिका टाका हाइदोङ मापासिङ का जाबिता म्होअ्तेङ जतनसो ताअ्का हिघाखा; को इदि इता हि। 21का नाङको दोफा थिघा हाइदोनु नाङको मन उन्ठुइ भाइपा थाङका हि। ना ते ताइमिको लागानि मापाका थामेसो बुङ नाफा भोखेना रो ताइमिको मालागाइका बालि बुङ चेतेङ चुमपुखेना।’ 22राजा वासेहेङ दोअ्हि, ‘ओइ बादमास कामत्या, नाङकोङ नुइको जोबानसो का नासेहेङ निसाफ पाङका। काङको मन उन्ठुइ भाइपा थाङका हि; ताइमिङको लागानि मापाका थामेसो नाफा भोका रो ताइमिको मालागाइका बालि चेतेङ चुमपुका दोअ्तेङ ना गेदोङ घाखेना। 23एन्सा जेङनु ना काङको टाका हाइपालि ब्याजता मालागाइपिन्हा कुनु? इङको टाका ब्याजता लागाइपिका हिनु का घुरितेङ लोलाउ हाइदोङ माकोलाउ बुङ ब्याज थिकापा ते निङधाङका।’ 24कालाउ वा इन्ता जाअ्तेङ हिकालाइहेङ दोअ्हि, ‘एला वाकोसो इङको टाका घिङतेङ तेलोङ टाका हिकाहेङ पिसु।’ 25एम्बालाइ दोअ्हि, ‘मालिक, वाकोदोफा ते तेलोङ टाका हिदोङहि!’ 26राजा दोअ्हि, ‘का नेलाइहेङ दोअ्ताङका, जाइदोफा हि; वासेहेङ आरोङ प्यावा। कालाउ जाइदोफा मान्थु; वाकोसो आतुइसा हिका बुङ घिनावा।#मत्ति १३:१२; मर्कुस ४:२५; लुका ८:१८ 27एला का राजा जेङका मोन्दामाताका काङको दुस्मनगेलाइहेङ इता चुमातेङ एम्बालाइहेङ काङकोङ आगाता सेअ्सु!’”#मत्ति २५:१४-३०
इसुहेङ यरुसलेमता स्वागत पाका
(मत्ति २१:१-११; मर्कुस ११:१-११; युहन्ना १२:१२-१९)
28इदोइ तुलना दोअ्लिदोकान्हुअ्सो इसु चात्यागेलाइको आगाआगा यरुसलेम भारि हानिहि। 29कालाउ बेथफागे रो बेथानियाको देरा भेर्पाको जैतुन दोअ्का आरदाङता थुकालाउ इसु न्हेमि चात्याहेङ एसा दोअ्तेङ दिङगिल्हि, 30“ओदोइ भेर्पाको देराता हानेसु रो इन्ता नेलाइ हासु बुङ माधोल्का एलोङ गाधाको चान धेउतेङ ताअ्का तिङस्वाना। वासेहेङ खाइतेङ इता चुमासु। 31कालाउ हासुबुङ ‘यासेहेङ हाइपालि खाइसुखेना?’ दोअ्तेङ हिअ्नु ते, ‘प्रभुहेङ गोइकाहि’ दोअ्सु।”
32कालाउ इङको न्हेमि चात्या हानेलाउ इसुको दोअ्का भाइपाङ गाधा धेउतेङ ताअ्का निङहि। 33वासेहेङ खाइलि तोम्लाउ वाको धनिलोतेङ हिअ्हि, “नेलाइ हाइपालि यासेहेङ खाइसुखेना?” 34एम्बालाइ जावाफ पितेङ दोअ्हि, “इदोइ प्रभुहेङ गोइकाहि।” 35कालाउ चात्यागेलाइ इङकोको गाधाहेङ चुमातेङ वाको गान्धिता ताइको धाबा दाअ्पितेङ इसुहेङ इङको र्हुता योम्पाहि। 36इसु हानेकाताङ पालाउ द्याङगेलाइ ताइको धाबागेलाइ दामाता दाअ्तेङ वासेहेङ स्वागत पाहि।
37जेलाउ इसु यरुसलेम भेर्पाङ जैतुन आरदाङको लेता थुकालिलोहि। इङको पहर इसुको पाका भारभुसाइका कामगेलाइ तिङतेङ झाराङ द्याङगेलाइ लेङचातेङ बारा गाला पातेङ परमेस्वरको परसङसा पालि तेङहि:
38“प्रभु परमेस्वरको मिङता लोका राजा हेथे सहसाम्पा निङका हि!
सादेलता सुबिस्ता ज्याको!
परमेस्वरहेङ प्रताप ज्याको!”#ले ११८:२६
39कालाउ इन्ता द्याङगेलाइको माझासो फरिसिगेलाइता एमि न्हेमि इसुहेङ दोअ्हि, “मास्टर, नाङको चात्यागेलाइहेङ सिकापा हिलि दोअ्।” 40इसु एम्बालाइहेङ दोअ्हि, “का नेलाइहेङ दोअ्खा, एबालाइ सिकापा हिनु ते इताको उन्ठुइगेलाइ बुङ र्हिकाइलि तेनावा।”
इसु यरुसलेमको भाअ्सिङ खारहि
41जेलाउ इसु यरुसलेम भेर्पा थुकालिलोलाउ इङको पुरहेङ तिङतेङ वा खारहि रो दोअ्हि, 42“सुबिस्ता हिदोइ काथासो चुमाखे दोअ्तेङ ना नानि बुङ गेका हिनु जेन्धाङ! कालाउ एला नाङको नजरसो इङको म्होअ्न्हाका हि। 43एला ते इसिका पहर लावा, जेलाउ नाङको दुस्मनगेलाइ चारपाहाङसो गोर्हाइतेङ नासेहेङ चारपाहाङसो घेर्यावा। 44कालाउ नेलाइको जामालाइहेङ बुङ सेअ्तावा। कालाउ एम्बालाइ एलोङ उन्ठुइ बुङ मालाअ्ध्यावा। हाइदोनु परमेस्वर नेलाइहेङ सिन्हुपालि लोलाउ बुङ नेलाइ वासेहेङ मामा नाल्सुन्हा।”
इसु थानता हानिका
(मत्ति २१:१२-१७; मर्कुस ११:१५-१९; युहन्ना २:१३-२२)
45इङकोन्हुअ्सो इसु थानता हानिहि कालाउ इङको थामेता पाइकार पातेङ हिकालाइहेङ तिङतेङ एसा दोअ्तेङ गिल्गिल्हि, 46“धरम किताबता इसिका लेखेका हि: ‘काङको साअ् पुकार पाका साअ् जेङलि गोयाङ।’ कालाउ नेलाइ ते यासिहेङ खुकालाइको आडा बान्हाइका हिसुन्हा।”#यसैया ५६:७; यर्मिया ७:११
47इङकोन्हुअ्सो इसु दिनाङ भाइपा थानता धिरपाघाहि कालाउ मुल धामिगेलाइ, धरम मास्टरगेलाइ रो बो हाकिमगेलाइ मिलितेङ वासेहेङ सेअ्लि खाङघाखे।#लुका २१:३७ 48कुलाउ एम्बालाइ इसुहेङ फतुर लागाइका थामे हाइदोङ मानिङहि, हाइदोनु झाराङ द्याङगेलाइ वाको बिद्या हिङलि मोन्दा ताघाखे।
Currently Selected:
लुका 19: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
