लुका 8
8
इसुहेङ साघाइका बेबालाइ
1इङकोन्हुअ्सो इसु परमेस्वरको सारभिको रेम्काबानाल हिम्पाकाताङ पुर पुरता रो देरा देराता हानेहि। वाको दोफा तेन्हे चात्यागेलाइबुङ हिघाखे। 2मासानगेलाइ रो रोगसो एल्का आधेमि बेबालाइ बुङ वासेहेङ पिताइहि। एम्बालाइता न्हिअ् लोङ मासान खोअ्तेङ एल्का मरियम मग्दलिनि बुङ हिघाहि।#मत्ति २७:५५-५६; मर्कुस १५:४०-४१; लुका २३:४९ 3हेरोद राजाको खाजान्चि खुजासको बेअ् योअन्ना, सुसन्ना रो आरोङ बुङ हेन्जाङ बेबालाइ हिघाखे। जाइ इसु रो वाको चात्यागेलाइहेङ टाका काउरि पितेङ साघाइघाखे।
चालाइ बिअ्काको तुलना
(मत्ति १३:१-९; मर्कुस ४:१-९)
4एनि पुर पुरसो हेन्जाङ द्याङगेलाइ इसुकोता लोहि। द्याङगेलाइ लोलिदोतेङ इसु एम्बालाइहेङ इसिका काथा दोअ्हि, 5“एमि द्याङ चालाइबिअ्लि ओल्हेहि। चालाइ बिअ्लाउ आधे चालाइ दामाता बिअ्न्हाहि। वासेहेङ द्याङगेलाइ याङहि कालाउ जिह्याँगेलाइ लोतेङ चापिहि। 6आधे चालाइ उन्ठुइ खिनिङ हिका भोनोता बिअ्न्हाहि। इन्ता योनु ते योहि सेङका बाल्कुसा भोनो हिनासिङ गोताङ सेङहि। 7हेथे चालाइगेलाइ चुइको झालासता बिअ्न्हाहि, इङको दोसा चुइको झालास बुङ धाङगातेङ लोहि रो योका चालाइहेङ बारालि मापिहि। 8आधे चालाइ रेम्का भोनोता परितेङ लादालादापा जेङतेङ बाराहि कालाउ एलोङ एलोङ चालाइसो साइ साइ गुना जेङतेङ सेहि।” इङको दोअ्लि दोअ्तेङ इसु एम्बालाइहेङ दोअ्हि, “जाइको हिङका न्हातोङ हि, वा रेम्फा हिनाको!”
तुलनाको माने
(मत्ति १३:१०-२३; मर्कुस ४:१०-२०)
9इसुको चात्यागेलाइ वासेहेङ इदोइ तुलनाको माने हाइ कुनु दोअ्तेङ हिअ्हि। 10इसु एम्बालाइहेङ दोअ्हि, “नेलाइहेङ सादेलको सारभिको लिअ्ताको काथा गेलि पिकाहि। कालाउ बो द्याङगेलाइ दोफा का काथागेलाइता खिनिङ दोअ्खा। एम्बालाइ खाङनुते खाङखे कालाउ मातिङखे। हिङनुते हिङखे कालाउ मागेखे।”#यसैया ६:९
11इसु आरोङ दोअ्हि, “इदोइ काथाको माने चालाइ दोअ्का परमेस्वरको कथन एइ। 12दामाता हुल्का चालाइ एम्बालाइ जाइ कथन हिङनु ते हिङखे मनता ताअ्लि मादोखे। हाइदोनु खान्धुर पातेङ बान्चेलि मानिनाको दोअ्तेङ दियाबलस लोखे कालाउ एम्बालाइको कथन चुमपुखे। 13उन्ठुइहिका भोनोइता हुल्का चालाइ दोअ्का एम्बालाइ परमेस्वरको कथन हिङतेङ लेङचातेङ र्हुखे। कालाउ इङको कथन मनता ताअ्लि मादोखे। एन्सा जेङलाउ एम्बालाइको खान्धुर एघुरिङको भाअ्सिङ खिनिङ जेङखे कालाउ मुस्किल रो तुता खान्धुर राम्खे। 14चुइको झालासता बिअ्न्हाका चालाइते एम्बालाइ, जाइ परमेस्वरको कथन हिङनुते हिङखे, कालाउ दुनियाको सुर्ता, टाका काउरि रो सुख निङतेङ खान्धुरहेङ बारालि दोङ मापिखे। कालाउ एम्बालाइसो हाइ बुङ फलपाको मासेखे। 15रेम्का भोनोता बिअ्न्हाका चालाइ ते एम्बालाइ जाइ कथन हिङखे रो हुकुमकारि जेङतेङ हिङका कथनहेङ रेम्फा पातेङ मनता ताअ्खे कालाउ बेलाता हेन्जाङ फल सेपाखे।”
गेसाको फाइसालामका
(मर्कुस ४:२१-२५)
16“हासुबुङ गिसा जोलाइतेङ पाथिहोइ माथुम्खे। ना ते थारान्चालिअ्ता म्होतेङ ताअ्खे। बरु साअ्लिता लोकालाइहेङ फाइसालामाको दोअ्तेङ झाउका थामेता ताअ्न्हाखे।#मत्ति ५:१५; लुका ११:३३ 17एसाङ पातेङ म्होअ्तेङ ताअ्का काथा जेथे हि इङको गोताङ रेम्फा ग्यावा। कालाउ गेलि मादोका काथा जेथे हि, इङको गोताङ हेतेङ झाराङ ग्यावा।#मत्ति १०:२६; लुका १२:२ 18एन्सा जेङलाउ नेलाइको हिङका काथाहेङ रेम्फा फोम पासु हाइदोनु जाइदोफा हि, वासेहेङ आरोङ प्यावा। जाइदोफा मान्थु, वाकोदोफा हिका बुङ घिनावा।”#मत्ति २५:२९; लुका १९:२६
इसुको आमाइ रो ओनेगेलाइ
(मत्ति १२:४६-५०; मर्कुस ३:३१-३५)
19एनि इसुको ओनेगेलाइ रो वाको आमाइ वासेहेङ दुसुलि लोहि। कुलाउ द्याङगेलाइको चेअ्सुमेअ्सुका एम्बालाइ वासेहेङ दुसुलि मादोहि। 20एमि द्याङ इसुहेङ दोअ्हि, “नाङको आमाइ रो ओनेगेलाइ नासेहेङ भेटिलि बाहार र्हुम्तेङ हि।” 21इसु एम्बालाइहेङ दोअ्हि, “परमेस्वरको काथा हिङका रो मानेकालाइ दोङ काङको आमाइ रो काङको ओनेगेलाइ।”
इसु दुमभेर्माहेङ गाम्पाका
(मत्ति ८:२३-२७; मर्कुस ४:३५-४१)
22एनि इसु चात्यागेलाइदोसा नाउता धोल्तेङ ओबालाइहेङ दोअ्हि, “केलाइ चावान्दिको ओदोइपार हानाइने।” कालाउ ओबालाइ हानिहि। 23हानेकाताङ पालाउ इसु नाउताङ जिम्हि। कालाउ चावान्दिता बारा दुम्भेर्मा लोलि तेङहि रो नाउता चि पोङघालि तोम्लाउ एम्बालाइ बारा आपतता परिहि। 24एन्सा जेङलाउ चात्यागेलाइ लोतेङ इसुहेङ ल्होपातेङ दोअ्लि तेङहि, “मास्टर, मास्टर, केलाइ ते सिलि तोमन्हाहोइ।” इङको हिङतेङ इसु ल्होहि रो दुमभेर्मा हेङ हाकाराइहि। ओदोङघरि दुम्भेर्मा गोतातेङ चिको लहर बुङ गाङहि। 25इसु चात्यागेलाइहेङ दोअ्हि, “खोइ नेलाइको खान्धुर?” वाको सरबङ तिङतेङ एम्बालाइ भारभुसाइहि रो थिहि। कालाउ ताताइमिताङ काथा पालि तेङहि, “या हासु? वा हाकाराइलाउ ते लहर रो दुम्भेर्मा बुङ वाको हुकुमहेङ मानेखे।”
मासान खोअ्का द्याङ एल्का
(मत्ति ८:२८-३४; मर्कुस ५:१-२०)
26इसु वाको चात्यागेलाइहेङ चुमपुतेङ गालिल चावान्दिको उदोइपार गेरासेनसको माउजाता थुकाहि। 27जेलाउ इसु नाउसो खुअ्हि कालाउ इङकोङ पुरसो मासान खोअ्का एमि द्याङ वासेहेङ दुसुलि लोहि। इङको द्याङ हेन्जाङ दिनासो धाबा बुङ मालागाइघाहि। कालाउ वा ताइको साअ्ता बुङ माहिसिङ तोमगेलाइता खिनिङ हिघाहि। 28इसुहेङ तिङतेङ वा हापाङ र्हिकाइतेङ, वाको आगाता पोम्भेलेतेङ दोअ्हि, “इसु, बारा परमेस्वरको चान, ना कासेहेङ हाइपालि खाङखेना? बिनइ हि, कासेहेङ तु: मापि।” 29इसु मासानहेङ ओल्हेलि हुकुम पिनाङसिङ इङको द्याङ एसा दोअ्हि। हेन्जाङ खेप इङको मासान वासेहेङ रिम्का हिघाहि। वाको खुर खोकोइ झिन्झिरिहोइ धेउतेङ ताअ्लाउ बुङ वा मासानको सरबङसो झिन्जिरि धोअ्पातेङ उदादाङका थामेभारि खाअ्घाहि।
30इसु वासेहेङ हिअ्हि, “नाङको मिङ हाइ?” वा दोअ्हि, “फाउज”, हाइदोनु इङको द्याङता हेन्जाङ मासानगेलाइ दुल्का हिघाहि। 31कालाउ मासानगेलाइ इसुदोफा बिनइ पातेङ दोअ्हि, “केलाइहेङ ओल्हेलि मादोका चिलवाङवाङका खाराता हानिका हुकुम मापि।” 32इङको आरदाङको चाउरता एजेर पाया चारिघाखे। कालाउ मासानगेलाइ इसुदोफा इङको पायाको जेरता दुल्लि हुकुम र्हेहि। इसु एम्बालाइहेङ दोअ्हि, “हानेसु।” 33इदोइ मासानगेलाइ इङको द्याङसो ओल्हेतेङ पायागेलाइ लिअ्ता दुल्हि। कालाउ इङको पायाको जेर धाअ्तेङ हानेलाउ आरदाङसो लेता चावान्दिता हुल्तेङ दुबितेङ सिहि।
34इसिका घाटाना जेङका तिङतेङ पाया घोकालाइ धाअ्पुतेङ इङको काथा देरा रो पुरभारि फाइलाइहि। 35इङकोन्हुअ्सो हेन्जाङ द्याङगेलाइ हाइ जेङहि दोअ्तेङ इसुकोता खाङलि लोहि। कालाउ लाम्फा मासान सान्ताइका द्याङहेङ एल्तेङ एला धाबा लागाइतेङ इसुको खोकोइ भेर्पा योम्तेङहिका एम्बालाइ तिङहि। इङको तिङतेङ एम्बालाइ झाराङ थिहि। 36कालाउ मासान खोअ्का द्याङहेङ एल्का तिङकालाइ हेसापा एल्हि दोअ्तेङ इन्ता लोका झाराङ द्याङगेलाइहेङ दोअ्पिहि। 37इङकोन्हुअ्सो इङको गेरासेनस माउजाको झाराङ द्याङगेलाइ इसुहेङ इतासो हाने दोअ्तेङ बिनइ पाहि। हाइदोनु एम्बालाइ हेन्जाङ थिका हिघाखे। एन्सा जेङलाउ इसु घुरितेङ हानेलि नाउता ताङहि। 38एन्सालाउ मासान ओल्हेन्हाका इङको द्याङ इसुहेङ बिनइ पाहि, “प्रभु, कासेहेङ बुङ नाङकोङ दोफा चुमपु।” कालाउ इसु वासेहेङ दोअ्हि, 39“ना ताइको सिता हाने; परमेस्वर नाङको भाअ्सिङ हाइ पाहि? इङको काथा बोमिहेङ बुङ हिङपा।” इसु वाको भाअ्सिङ पापिका कामको बारेता इङको द्याङ गोताङ पुरभारि हिम्पागिल्हि।
याइरसको चामिन्दि रो एमि अल्पायु बेबाल एल्का
(मत्ति ९:१८-२६; मर्कुस ५:२१-४३)
40इसु चावान्दिको इदोइपार थुकालि लोलाउ हेन्जाङ द्याङगेलाइ वासेहेङ र्हुमतेङ हिघाहि। कालाउ एम्बालाइ वासेहेङ स्वागत पाहि। 41एघुरिङन्हुअ्सो कचहरिसाअ्को हाकिम याइरस लोतेङ इसुहेङ सेउपातेङ काङको साअ्ता लोपि दोअ्तेङ पुकार पाहि। 42हाइदोनु वाको एलोङ खिनिङ तेन्हे बाअ्सारको चामिन्दि सिलि तोम्का हिघाहि। वाको बिनइ हिङतेङ इसु वाकोङदोफा हानेलि तेङहि। इसु हानिका तिङतेङ द्याङगेलाइ चारबितिङसो चेअ्सुमेअ्सुपा लोलि तेङहि।
43इङकोङ हुलता तेन्हे बाअ्सारसो अल्पायु बेथासो तु: निन्चाका एमि बेबाल बुङ हिघाहि। वा ताइमि दोफा हिका टाका काउरि ओस्रे पाइतिता दोपालाउ बुङ हासुङ वासेहेङ एल्पालि दोनाङ मान्थुघाहि। 44वा द्याङगेलाइको चेअ्सुमेसुकाता न्हुअ्पाहासो लोतेङ इसुको धाबाको फेन्चा साइहि। वाको धाबा साइतेङसाङ वाको अल्पायु बेथा एल्हि। 45इङको दोङ पहर इसु हिअ्हि, “कासेहेङ हासु साइहि?” कालाउ झाराङ, “काते साइनाङ मान्थुघा” दोअ्हि। कालाउ झाराङ “का ते साइनाङ मान्थुघा” दोअ्हि। कालाउ पत्रुस दोअ्हि, “मास्टर, नासेहेङ ते द्याङगेलाइको चेअ्सुमेअ्सु दोङ ठेलिदोङखे।” 46कालाउ इसु दोअ्हि, “माको, हासुबिङ कासेहेङ साइहि। हाइदोनु काङकोसो सरबङ ओल्हेतेङ हानिका कासेहेङ था जेङहि।” 47एला म्होतेङहिलि माज्याङ दोअ्का गेतेङ इङको बेबाल थितेङ फिरतेङ लोहि रो वाको खोकोइता तुघुरहि। कालाउ वा इसुहेङ साइका रो साइतेङसाङ एल्का काथा झाराङको आगाता दोअ्हि। 48इसु वासेहेङ दोअ्हि, “चामिन्दि, नाङको खान्धुरसो ना एलन्हा, एला सुबिस्तासो हाने।”
49इसु एसा दोअ्काताङ पालाउ याइरसको साअ्सो एमि द्याङ लोतेङ याइरसहेङ दोअ्हि, “नाङको चामिन्दि सिलिदोहोइ, एला मास्टरहेङ तु: मापि।” 50इङको काथा हिङतेङ इसु याइरसहेङ दोअ्हि, “हारेस माचा, खान्धुर खिनिङ पा, नाङको चामिन्दि बानच्यावा।” 51इसु याइरसको साअ्ता थुकातेङ पत्रुस, याकुब, युहन्ना रो बेजानको आमाइ आबाहेङ खिनिङ बो हासुहेङ बुङ लिअ्ता दुल्लि मापिहि। 52इङको बेजान सिनाङसिङ इन्ता जोम्का झाराङ खारतेङ नेतेङ हिघाहि। इसु एम्बालाइहेङ दोअ्हि, “माखारसु, वा जिम्तेङ खिनिङ हि, सिनाङ मान्थु।” 53एम्बालाइ इसुको काथा हिङतेङ झाराङ खिस्सिपातेङ लेङपिहि। हाइदोनु एम्बालाइ वा सिहोइ दोअ्तेङ गेका हिघाहि। 54कालाउ इसु बेजानको खुर चुमतेङ दोअ्हि, “ओइ आबाउ, ल्हो!” 55इङको पहर बेजानको आत्मा आरोङ घुरितेङ लोहि। वा इघुरिताङ ल्होलाउ इसु एम्बालाइहेङ दोअ्हि, “या बेजानहेङ चाका सामान पिसु।” 56इदोइ तिङतेङ बेजानको आमाइ आबा भारभुसाइहि। कालाउ इसु एम्बालाइहेङ “इदोइ काथा हासुहेङ बुङ मादोअ्सु!” दोअ्तेङ हुकुम पिहि।
Currently Selected:
लुका 8: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
