Kejadian 14
14
Yu nang arye, Abram el mi Lot biti tomobuka bobiyik buk, Abram birye, lyeprobuk yupu
1Abram bira, Hebron mutuku binuka ulamuk talak ara, ton tam deiyok nang arye, yuk tam nang deiyok nang ati, yu ubukba olalamik. Sik ninye deiyok nang si ara, ani. Ara, Sinar mutuku taleamuknye, Amrafel ap, Elasar mutuku taleamuknye, Ariok ap, Elam mutuku taleamuknye, Kedolamer ap, Goyim mutuku taleamuknye, Tideal ap, sik nirya neika bulubukabikce, yuk mutuku nang ati olbiyik. 2Sik olbiyik mutuku nang si ara, ani. Ara, Sodom mutuku taleamuknye, Bera ap, Gomora mutuku taleamuknye, Birsya ap, Adma mutuku taleamuknye, Sinab ap, Zeboim mutuku taleamuknye, Semeber ap, Bela mutuku (tonda el si Soar mutuku) taleamuknye ap ati, olbiyik.
3Ura sik Bera ap, Birsya ap, Sinab ap, Semeber ap, Bela mutuku taleamuknye ap, sik nirya arye, ‘Yuk tam taleamik deiyok nang ati, neika olbinamap’ tenen, Sidim lyu mutuku bulubik. (Sidim lyu mutuku, el si ton, ‘Ua Laut Mekwen mutuku,’ ton nyalamik.) 4Asi sipmasin nang deiyok nang nirya ara, Elam mutuku taleamuk deiyoknye, Kedolamer el amu tamuk ulamika ani, keting tamun ara, obarye (12) akunum ubukura, keting tamun 13 ning ara, el yupu batakuka yanibikce, ‘Opnuyap’ tenen, olbiyik.
5-6Keting tamun tiga belas (13) ning noutamak arye, Kedolamer ap, el tam kiprobuk nang ap, Asterot-Karnaim mutuku neika bulubukabikce, anyaka uk, sik Erefaim nang ati, obuka sirya dakik. Tonda, Ham mutuku noutamak arye, sik Susit nang ak, obuka sirya dakik. Tonda, Syawe-Kiryataim mutuku noutamak arye, sik Emit nang ton obisibikce, sirya dakik. Aning atonun, sik Harit ninye babye, obuka sirya dakik. Ara, mutuku kon uamuk mutuku, Seir mutuku arye, deiyok koubuka, opnin banmeka ani, mok pia kum mutuku, el si ara, El-Paran mutuku obikce, sirya dakik. 7Obuka sirya dakikura, tamubukabikce, En-Mispat mutuku noutamak, (ton el si ara, Kades mutuku) biyikce, sik Amalek nang obuka, sirya dakik. Amalek ninye taleamuk mutuku-mutuku tam nirya, alabuka doprobik. Aning atonun, Hazeson-Tamar mutuku ulamik nang, Amori nang babye, obuka sirya dakik.
8Ura, Kedolamer ap, el tam kiprobik nang ap, sik nirya arye, winibikopura, sik yuk mutuku taleamik deiyok nang arye, ‘Kedolamer ap, el mapu silip ap, obuka sirya daknamap’ tenen, Sidim lyu mutuku biyik. Ura, sik ninye deiyok nang, Sodom mutuku nang ap, Gomora mutuku nang ap, Adma mutuku nang ap, Zeboim mutuku nang ap, Bela mutuku nang ap (ara, Soar mutuku ton nyalamik) sik nirya arye, ‘Kedolamer ap, el tam kiprobuk nang ap, obuka sirya daknamap’ tenen, memebuka kintinibik.
9Kedolamer el tam kiprobik nang deiyok nang ap ara, ani. Ara, Goyim mutuku taleamuknye, Tidal ap, Sinar mutuku taleamuknye, Amerapel ap, Elasar mutuku taleamuknye, Ariok ap ati, ‘Obuka sirya daknuyap’ tenen, kintinibik. Ara, ninye deiyok nang pamubarye arye, yuk ninye deiyok nang pamubarye ati, ‘Obuka sirya daknuyap’ tenen, kintinibik. 10Ura, Sidim mutuku noutamak ara, pia palilamsil tuku, mirin bentalak weik uamuka anya arye, olanmek bukni, sik Sodom mutuku nang ap, Gomora mutuku nang ap, ‘Anang arye, opnusiyak’ tenen, ilil ubukba, bikbik abuka banmeka ani, ton nang ara, mirin tuku palilamsil ning noutamak sakik. Ton nang ara, bikbik abuka banmeka ani, mutuku kon uamuk mutuku dungnul biyik.
11Aning ara, sik yupa tonok keba koklom dikin nang deiyok nang arye, Sodom mutuku ap, Gomora mutuku ap ulamik nang nirya taleamik bona nirya ap, sik kintinibuka deiamik din ning nirya ap dobukabikce, bobiyik. Aning nirya dobuka, amutuku batakuka yukak bindobik. 12Tonda, anang aryuk, Abram el mi Lot ap, Lot taleamuk ning nirya ap, dalubuka dobukabikce, bobiyik. Ara, Lot ara, Sodom mutuku noutamak ulamuka anya arye, el ning babye dobuka bobiyik.
13Ura, aning nirya winibikba, bin tonoknye ton ‘Tomopnuyap’ tenen, pirinmekbuk, duknubuka bindobuknye birye, aning nirya eibukce bikmoka anya arye, Ibrani yalanye Abram, el dam yanuka laka nyalyayuk. Abram ulamukak ara, Amorinye el si ara, Mamre arye taleamukba, weik tikamuk yo uamukak ulamuk. Mamre, ara Eskol ap, Akner ap sik weit koproba ulamuk. Sik nirya ara, Abram el tam akunum kiprobikce, Abram biti, ‘Nun ni ulule,’ tenelamik.
14Duknubuka biyuknye birye, Abram biti, “An mi tomobikce, bobiyik atia,” nyabuka laka nyabukba, Abram kekebukce, elce peteryamuk nang, yupa weik 318 nang, el mapu silip ak, yukubuk. Ara, ‘Na mi Lot lyebuka dopropnuyap’ tenen, bisik banmeka ani, mutuku si Dan mutuku biyik. 15Bisik banmeka ani, alukunyan noutamak ara, Abram birye, nyapdeibukba, el ap olbanmek nang arye, sik noutamak bokukabikce, “Sik dumbarye nang deiyok nang ap, sik mapu silip ap ati, dana-dana tam arye, oplulume,” nyapdeibukba, olbiyik. Olbanmekce banmeka ani, Damasyik mutuku deice tam, mutuku si Hoba mutuku biyik.
16Binuka, obuka sirya daknin banmekce, sik dumbarye weik nang, ninye deiyok nang arye, ubula doprobik ning nirya, Abram ap, el mapu silip ap arye, tuba tamubuka doprobik. Tonda, el mi Lot ap, Lot el ning nirya ap, yu nang arye, ubula dopropmek kilapu ap, yuk nang ap, aning nirya Abram birye, tuba tamubuka doprobukce, el dam tamubuka dopdeibuk.
17Abram birye, yu weiknye Kedolamer ap, el tam kiprobik ninye deiyok nang ap nirya, akunum obuka sirya dakukce, el dam tamubuka bisik banmok talak ara, Syabe lyu mutuku noutamak bayukba, Sodom mutuku taleamuk deiyoknye yayukce, sik neika eipdarik. (Syabe lyu mutuku ara, el si ton Ninye Deiyok nang banyak mutuku ton nyalamik.) 18Aminyan ara, Salem mutuku taleamuk ninye deiyoknye, el si ara Melkisedek birye, din ning el si ara roti ap, anggur mek ninye kanye wangalamak mek ap dobuka ‘Abram arepnun’ tenen, boyayuk. Melkisedek bira, Allah dana tam, ninye dana tam noutamak ansinilina deiyoknye ulamuk. Aning-aning deice tam ulamukce, malye winilamik ning, nun ni Allah ati pil dolamuk.
19Melkisedek birye, Abram biti, ‘Teleb kideipnamne’ tenen, teleb yupu nyabukce, ayupu ton nyapdeibuk. “Aning-aning deice tam ulirye, mikip weik ubuka ululnye ara, nun ni Allah, elce aning-aning ap, im deice ap, tukwak mutuku nirya ap kwepdeibuk. Nun ni Allah arye, an Abram ati, pia teleb kipdeipnamkile. 20Nun ni koproba Allah, aning-aning nirya deice tam ulinye birye meliamkukba, ance yu ninye deiyok nang nirya, akunum obuka malye kiamlume. El mikip deice arye, anang obuka sirya daklume.” Melkisedek birye, Abram biti nyabuk. Nyabukura, Abram birye, tuba tamubuka, dobuka boyanmok ning nirya noutamak bokukabukce, Melkisedek ati, 10 persen#14:20 Sepuluh persen (10%) nyalamik ning ara, mitik anun arye bokuka arinyaka ati, nyanyake. Sepuluh ribu auplyopura, seribu arinyake. Seratus ribu auplyopura, sepuluh ribu arinyake. Ara, ‘Allah arye aning nirya aresulula ati, el si erenamap’ tenen, aning bobuka arinyake. talye arebuk.
21Arebukura, Sodom mutuku taleamuka deiyoknye birye, Abram biti nyabuk. “Ance tamubuka boyanmalam ning noutamak bokuka, nati aninye nirya arepnilyame. Bona ara, ance anirya dopropnulyame,” nyabuk. 22Nyabuk bukni, Abram birye, Sodom mutuku taleamuk deiyoknye biti, tamubuka nyabuk. “Kume. Na ni koproba Allah, aning-aning deice tam ulirye, mikip weik ubuka ululnye ara, nun ni Allah, im deice ap, mutuku ap nirya, Kwelina Deiyoknye biti nyapse.
23Sodom mutuku talilinye, el ning tamubuka boyanyopura, el ning tonok ning babye, kum dopropnamne. Ara elce, ‘Narye arepse ning deice arye, Abram ara, bona talinanye ulule,’ nyabuka, ‘Kanye erebuka nyaplyak’ tenen, mitik ning babye, pia kum dopropnamne. Ara, baju win tapu do, yan ongona el si ara, sandal keten tapu do, tonok mitik ning babye, pia kum dopropnamne. Sodom mutuku ning dopropnyopura, Allah ance malye kipdeipniminyake,” nyapdeipse. 24Narye, Allah ati nyapsa ati ara, an ning noutamak arye, bokuka pia kum dopropnamne. Na melin nang arye, dipmek ning ap, ance, ‘Abram el yin talibuka, melin nang ati arepnun ning ara, ani,’ tenepmalam ning ap, aninguk arepniminyeba, na melin nang sik si ara, Akil ap, Eskol ap, Mamre ap, arepnamne. Sik dolona ara, teleb bukni, yuk ning ara, pia kume.
Currently Selected:
Kejadian 14: EIPA
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
