Kejadian 15
15
Allah arye, Abram biti, “Winipnamkine,” nyalilamuk yupu
1Aminyan talak ara, Allah arye, Abram wimabukba, lengdar deice arye, ayupu nyabukba kekebuk. Allah el si Yahweh arye nyapdeibukba, Abram kekebuk yupu ara, ani. “Abramo, an ilil una pia meme. Nara anti, weik deiyoknye ununa anya arye, pia kalikuka dinamkine. An bona pia weik talinanye ulalam ning ara, bona kume, ara natia. An menenga atonun dopropnalam ning ara, na uka.” Allah arye, Abram biti nyabuk. 2Nyabukura, Abram birye tamubuka nyabuk. “Se, na ni Allaho. Anda aning-aning talibuka umince, ‘Wininamne,’ tenelyam touk winipmince, aning nirya deice tam erebuka, Weik Deiyoknye ulyam bukni, narye mi ton kum deiapsa ati na dipnyeura, Damasyik mutukunye, el si ara Elieser birye, na talinun ning nirya dopropnamle. Ati, yata ning arepnutum do, na nie,” nyabuk.
3Nyabukce, ayupu ton nyabuk. “Ance nati, kum meilyamnulum arye, na mapu tonok babye, min kum deipsa ati, na dipnyeura, na aik pil talye melinilinye birye, na talinun ning nirya ara, dobuka talinamle,” nyabuk. 4Nyabukba, Allah arye, Abram biti nyabuk. “Kume. ‘Na ti pil melinanye Elieser birye, na talinun ning dopropnamle,’ nyanmanilamnye birye kum bukni, ance deipnalam mi arye, an ning nirya dobuka talipnamle,” nyabuk.
5Nyabukopura, alukunyanuk, Allah arye, Abram dobuka, aik arye buru tam bobiyukce, nyabuk. “Im deice dipdelyame. Im deice dipdemince, kurya tikmala nirya nukman toura, nukdelyame. Kurya yupa pia weik ulye touk, ance deipminyeba, dadeipdanin binamak mapu babye, atonunuk yupa pia weik upnamake. Nukmanto kum upnamake.” Allah el si Yahweh arye, Abram biti nyabuk. 6Allah el si Yahweh arye nyabukba, Abram birye Allah nyapdeipmok yupu ati, adiparyuk dib tenebuk. Dib tenebuk deice arye, Allah arye Abram biti, el malye ning nirya kilibukce, “Anye bira, pia diksukumnye ulule,” nyapdeibuk.
7Abram biti teleb kipdeibukopura, Allah el si Yahweh arye, ayupu ton dukdongopbuka nyapdeibuk. “Nara, an Weik Deiyoknye ukunune. Sik Kaldea ninye ulamik mutuku arye, Ur-Kasdim#Ur-Kasdim mutuku ara, tonok mutuku bukni, si bitinye nyalamik. Ton si ara, Ur mutuku uk nyalamik. Amutuku ara, Babalonia mutuku noutam uamuk. mutuku noutamak arye dobuka, wini talak ulyam mutuku boyakuknye bira, yuknye kume. Ara, na uka. Wini talak uminye mutuku ara, ‘Amutuku arepneba, talinamle’ tenyamkisa ati, Ur-kasdim mutuku noutamak arye, dobuka amutuku noutamak boyanuka deipkise.” Allah arye, Abram biti nyabuk. 8Nyabuk bukni, Abram birye, Allah el si Yahweh ati nyabuk. “Naie, aning-aning nirya talibuka deice tam erebuka Weik Deiyoknye ulyame. Anda mikip weiknye ulyama anya arye, ance, ‘Wininamne,’ tenelyam touk, aninguk winilyame. Bukni na ni Allah, ‘Narye amutuku nirya dobuka, pia talinamne’ tenen, yata wiribuka pia moubuka kel kiptinirye, kanye teniltona kum upnamnil do?” nyabuk.
9Abram birye, nyabuka ati ara, Allah el si Yahweh arye, nyabuk. “Ance dobuka boyanunilam ning ara, nyapnukine. Kil sapi ap, kil kambing ap, yim kambing ap, anirya keting tamun winilye arye nebik ning ara boyanilyame. Tonda, yalma atonun maka ap, mitik merpati maka ap, tonok-tonok dobuka arepnunilyame,” nyabuk. 10Allah arye nyapmok touk, Abram birye, kam ulye ning nirya dobukabukce, obuka noutam tikuka, sik nong dana-dana tam lelepdeipmok. Winipmok bukni, sik maka ara, sik nong noutamak kum kalibuk.
11Abram birye, Allah nyapdeipmok ning obuka, Allah el arena ati, laka deipmokbuk, maka tup dilye maka eibikce, yanuka aning nong deice amubikba, Abram birye, “Busaie,” abukce, yakukba, lakuka bindobik. 12Abram birye, aning nirya deipmokce, aunmoka ani, aminyan talak keting kumupnuyuk talak ara, Abram wi weik talibukba, mabuk. Mapmokba, kanye bona pia kum ubukba, weik kuna dakna atonun ap, weik ilil una ap ubuk.
13Winibukopura, Allah el si Yahweh arye, Abram biti nyabuk. Ance deipminyeba, dadeipdanin banamak mapu ara, sik mutuku koproba kum unamak bukni, yuk mutuku nang, mikip arye doprobikirye, tapu koubuka, sik nong deice ikin pil weik delinamake. Ance deipminyeba, dadeipdanin banamak mapu bukni, amutuku noutam ara, ninye asik nang atonun ubikiba, keting tamun yupa weik 400 tahun arye, ikin asa weik unamake.
14Yuk mutuku nang arye, an mapu ikin ning weik, sik nong deice delilamica ani, aminyan talak ara, narye aninye ati weik arye, wenepnirye, an mapu ara, lopdeipniba, amutuku batakuka bindopnamake. Ara, talye ati kume. Bona pia weik arepneba, aning-aning nirya dobuka talilyanamake.
15Abram anda, yuk mutuku ninye arye, dobuka tapu kum kounamkiyake. Teleb kanye uk deibuka, telebuk daulaminya ani, dipminyopura, an apu yapu dam bobinamkine. Ara, tilila kum bukni, telebuk daulaminya ani, wisi damince, dipnalame, nyapkine. 16Sik Amori ninye arye, malye pia weik wininyak bukni, sikti lo areamse talak ara, aning min kum upmala ati, tonap tuba malyeuk wininamake. keting tamun yupa weik, 400 tahun akunum uplyopura, ance deipminyeba, dadeipdanin banamak mapu ara, wini talak aunmalam mutuku tamubuka yakirye unamake. Allah arye, Abram biti nyalin yupu nyabuk.
17Ura, asum aryuk bukni, keting akunum kum ubukce, inibukopura, Abram birye, lengdar deice eibuk ning ton panabuk. Urasin ara, mek yulamak makau atonun noutamakuk dinmokce, tulum welepmok ning ap, uku buk dinmok ning ap ara, abisik arye welenmokce, asum arye Abram birye, kam ning obuka kalibukce dana-dana deipmok ning noutamak binmok. 18Atulum welenmok makau ap, uku buk ap noutam bisik biyukce, asum aryuk Allah el si Yahweh arye, Abram biti, “Dipkoprop winipnamkine,” nyabuka nyalin yupu nyapdeibuk. Allah el si Yahweh arye, nyalin yupu nyabuk ning ara, ani. “Abramo, ance deipminba, dadeipdanin binamak mapu, an mapu nirya ara, aunmalam mutuku nirya arepnamsine. Ara, Mesir mutuku noutamak weik balamle mek arye, dukdongopbuka, pera otam weik balamle mek el si ara, Efrat mek ap, danoutam mutuku nirya ati nyapkine.
19-21Ara sik si, Keni ninye ap, Kenas mutuku ninye ap, Kadmon ninye ap, Het ninye ap, Feris ninye ap, Refaim ninye ap, Amori ninye ap, Kanaan ninye ap, Girgasi ninye ap, Yebus ninye ap, ara, aninye-aninye nirya sik unyak mutuku nirya, Abram an mapu ati arepnamne. Sikce pia talinamake.” Allah arye, Abram biti nyabuk.
Currently Selected:
Kejadian 15: EIPA
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
