यूहन्ना 2
2
येशूकी छ्युला अंगूर छ्याङ जोबाते
1थेमे ङीमा सुमगी छोमु गालील अञ्चल काना सारदु फाङमाज्यीक ओङा ओतान। थेरू येशू आमाङ ओतान। 2येशूताङ थे चेलाओनलाङ निम्तो खाबा ओतेकी थेबाङ फाङमाला गाला ओतान। 3थेरू अंगूर छ्याङ होत्ता सिन्दा थोङनामेई आमातेकी येशूला “छ्याङनी थाल्लाराङ सिन्दुक,” सिन सिदुक। 4थेमे थेकी आमातेला “आमा, दि बात ङाला मासासीनोङ ओङगो। ङे काम खित्च्येते समय थोरूमोङ लेपा मेत,” सिन सिदुक। 5येशू आमेकीचेन थेरू काम खित्कान्ते मिओनला “दिकी च्यि च्यि खि सिका ख्योकोनगी थे थेराङ खि,” सिन सिदुक। 6थेरू फाम खाल रेरेजो छ्यु डोच्येते दो कोरगीन जोबाते गरी ठुक ओतान। साप सा भन्दा गोमा चोके खिताला लाक्पा काम्बा ठुत्च्येते छ्यु ज्य्वाबाला यहूदीओनगी दोक्ते गरी ज्य्वाकीन ओतान। 7थेमे येशूकी थेरू काम खित्कान्ते मिओनला “दि गरीओनला छ्यु खोङते,” सिन सिदुक। साबा च्योकराङ खाईन थेबेकीङ गरी खासाकराङ लेप्च्या खाईन गाङेला छ्यु टाम टाम काङसुङ। 8थोक खाईन सिन्नामेकी थेकी “लो था थे गरीदुई टिक्पीस्यिक योला च्याला भोज ठीकठाक खित्कान्ते छ्येते मिला खेरला बिन,” सिन सिदुक। थेमे थेबेकीङ थोकराङ खासुङ। 9थे छ्येते मिकी थुला ताजीन थे छ्युचेन अंगूर छ्याङ गाला ओतान। थे छ्याङ खापेकी खुलाबाते ईन्दे सिन थेला छ्याःङ छ्या मेतान। थोक ईन्सीनोङ थेरू काम खित्कान्ते थे छ्यु च्याला खेरकान्ते मिओनलाचेन च्यि च्यि ओङाते ईन्दे सिन गाङे बात छ्या ओतान। 10थेमे थे छ्येते मिकी बेउलाला काताङगीन “मिकीनी फाङमा सार वाबाते मिओनला थोङला स्यीम्बुते छ्याङ बिन्ला थेबेकी आदोराङ थुनामेई लन्देते छ्याङका तेरग्यो। च्यिन्दे खुईनी थोरूमसाकोङ दोक स्यीम्बुते छ्याङका ज्याक्पा ओताक्वा,” सिन सासुङ।
11येशूकी खाबाते अचम्बते कामओन नाङ गाङे भन्दा गोमा खाबाते अचम्बते दि कामचेन गालील अञ्चल काना सारदु खाबा ओतान। थेरू थोक खाईन थेकी थे खोरोङताङ छ्येज्यीक शक्ति ओत सिन तेन्सुङ। थेमे थे चेलाओनगी थेला परमेश्वरगीराङ ताङाते दुका सिन विश्वास खिताला स्यूसुङ।
12थोक थोक ओङनामेकी तिरी आमातेताङ न्वातेबा थेमे चेलातेबाताङ कफर्नहुममा गाल्गीन येशू टिक्पी दिन थेरूराङ देत्सुङ।
येशूकी परमेश्वर मन्दिरदु खाबाते काम
(मत्ती २१:१२-१३; मर्कूस ११:१५-१७; लूका १९:४५-४६)
13यहूदीओनते निस्तार चाड लेपा खाबा ओतान। थेमे थे बेलाला येशूबाङ यरूशलेमने गाल्सुङ। 14थेने लेप्नामेकी थेकी परमेश्वर मन्दिर स्याङके नाङला देत्ला लाङतेबा, लुक थेमे गन्दीमा छोङकान्ते थेमे पैसा ज्येला तेरकान्ते मि काल्बेईला थोङसुङ। 15थोक थोङनामेई थेकी थाक्पाज्यीक रील्गीन थे थाक्पाराङ युकीन थेरूकी लुकतेबा, लाङतेबा गाङेला उरगीन तेन्गीन ताङसुङ। थेमे पैसा ज्येकान्तेबेतेङ टेबलतेबा तेगीन क्युरगीन पैसातेबाङ छ्येलोङ मेलोङ थोरगीन क्युरसुङ। 16गन्दीमा छोङकान्तेबालाङ थेकी “दिबा दुरूकी छिटो थेन्ला खेर। ङे आबाला माने खित्च्येते खाम्बाला बेपार खित्च्ये ठाउँ ज्वा मेङगो,” सिन सासुङ। 17थेकी थोक खाबा थोङजीन थे चेलातेबाला परमेश्वर बातला दोक सिन टिबा ओताते बात ठेम्बा लासुङ। थेरूचेन “खोल्ला माने खित्च्येते खाम्बादु सुइँदेकी खइँदा मेलेबा काम खाबा थोङसीन ङाला स्येदाङगी मे बारगीदुक,” सिन टिबा ओत।#भजन ६९:९
18येशूकी थोक खानामेई यहूदीओनते छ्ये छ्ये मिकी वाकीन “खुईते दुरू दोक खित्च्येते खइँदा अधिकार ओत्सीन ङ्योकोनला खइँदा अचम्बते कामज्यीक खाला तेन्ते,” सिन सिदुक। 19थोक सिरजीन थेकी “लो दि मन्दिर बराङ बुरूङ रोम। थेमे ङा ङीमा सुमलाराङ लोक्ला जस्तो तस्तो जोइओ,” सिन सिदुक। 20थेकी थोक सिरजीन छक्क परे खिन थेबेकी “चुकलो चुकलो? दि मन्दिरनी लो खाल ङिताङ ठुकलाका जोकीन सिन्दाते ईन। च्यि खो दि मन्दिर ङीमा सुमलाराङ जोइओत्लो?” सिन सिदुक। 21येशूकी खाबाते मन्दिर बातचेन थे खोरोङ जीउकी बात ओतान। 22थे स्यिसादुकी सोम्बो लोक्नामेकीका चेलातेबाला थोङला थेकी परमेश्वर मन्दिर रोम थेमे थे मन्दिर ङीमा सुमलाराङ जोइओ साबाते बात ठेम्बा लासुङ। थेमे थेबेकी थेला चुक चुक ओङगीते सिन परमेश्वर बातला टिबाते बातताङ येशूकी साबाते बाततेबा गाङे ईन्दातेराङ दुका सिन पत्ते खासुङ।
येशूकी मि गाङे सेमगी बात छ्या स्येक्यो
23निस्तार चाडगी बेलाला यरूशलेमदु ओत्जीन येशूकी अचम्बतेन्दे काम खाबा थोङगीन परमेश्वरगी थेला शक्ति बिन्दा ओताक्वा सिन मि काल्बेईकी थेला विश्वास खासुङ। 24ईन्सीनोङ मि चुक ओङगीते सिन थेला लेमु खाला छ्या ओतेकी थेबेकी थे खोरोङला पक्काराङ खाईन विश्वास खाबाते ईन सिन थेकी पत्ते माक्यासुङ। 25सु मि चुक्ते ईन्दे सिन थेला सुङगीङ लाःपा फाप्च्या मेतान। च्यिला सासीन मि सेम चुक ओङगीते सिन गाङे थेला लेमु खाला छ्या ओतान।
Currently Selected:
यूहन्ना 2: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
