मर्कूस 6
6
येशूला दाक्पोन युल्बेकीराङ मेलेबा खाबाते
(मत्ती १३:५३-५८; लूका ४:१६-३०)
1थे तिरी येशू थे खोरोङ युलनापा गाल्सुङ। चेलातेबाङ थेत्ताङ ङ्योम्बुराङ गाला ओतान। 2थेमे सन्चारी छोमु थेकी थेरू मिटिङ खित्च्येते खाम्बादु लोपाला स्यूसुङ। थेकी लापाते बाततेबा थोनामेई थे युल्बाओन छक्क परे खिनकामा “आबिई, दिकी दि बाततेबा खापेकी लाप्ताका? दोक छ्ये छ्ये बात दिकी चुक खाईन छ्या स्येताका? थेमे थोक अचम्बते कामओन दिकी चुक खाईन खाताका? 3दिनी दुरू स्यिङगी काम खित्कान्ते मिराङनी ईन। दि मरियम फुज्युङ मेनरो? दि याकूब, योसेस, यहूदाताङ शिमोनबे आज्योराङनी ईन। थेमे दिते नुमुतेबाङनी गाङे दुरूराङ ओत,” सिन थेला दिङ सु ईन्देरो सिराच्योक खासुङ। थेबेकी थेला छ्याःङ मान माक्यासुङ। 4थे खोरोङ युल्बाओनगी थोक खाबा थोङगीन थेकी थेबाला “परमेश्वर बात खित्कान्ते मिला ज्येन ठाउँकी मि गाङेकी थे बात ङेन्ला मान खिओ। तर थे खोरोङ युल्बाओन, दाजु भाइ थेमे खाम्बे मिओनगीचेन थेला छ्याःङ मान मिक्किओ,” सिन सिदुक। 5थेकी थेरू अचम्बते काम छ्याःङ खिता माथुप्सुङ। थेकी कोई कोई नाबाते मिला थेबे लाक लाक्पा ज्यागीन ठाक्पा खाईन बिन्सुङ। 6थेत्ताङ परमेश्वर शक्ति ओत सिन थे खोरोङ युल्बाओनगी पत्ते माक्याबा थोङजीन थेला आउदी अचम्ब लासुङ। थोगी थे थे ठाउँ ताङगीन थे फेरो नाङला ओताते ज्येन ज्येन युलला लोप गाल्सुङ।
येशूकी चेला च्युन्ङीला काम खित ताङाते
(मत्ती १०:५-१५; लूका ९:१-६)
7थेमे येशूकी थे खोरोङ चेला च्युन्ङीला दोन्दु काताङसुङ। थेकी थेबाला मेरा ङि ङि खाला मिओनला परमेश्वर बात लोप तोङाला ठीक खासुङ। थेकी थेबा गाङेला मिओनला खोबाते ल्हन्डीक तेन्ला तोङच्येते अधिकार बिन्सुङ। 8थेकी थेबाला “ख्योकोनगी डोजीन लाःक्तु फेर्काज्यीकचेन खेरसीन ओङगो। लामला गोक्यो सिन ग्या जारा, झोला थेमे पैसा छ्याःङ माखेर। 9काचापचेन खोन। फेङगाक ङि माखेर। 10खेराङ लेप्सादु जुन खाम्बे मिकी खेराङला थेबाताङ देत सिन लेमु खिदुक, थेरू देत देतसाक थे खाम्बादुराङ देत। खाम्बा खाम्बा युला स्यासा मादेत। 11खेराङ लेप्सादु मिओनगी ख्योकोनला लेमु माक्यासीन थेमे ख्योकोनगी लापाते बात ङेन्दा सेम माक्यासीन थोक्ते ठाउँलाचेन देतराङ मादेत। थोक्ते ठाउँ ताङला ख्याम्जीन परमेश्वर बात माङेन्देकी थेबेकी तिरी सजाय ङेत्जीन सुङलाङ गाल खिता मेङेदो सिन सिराला खेराङ काम्बाला खोबाते थाला समेदोङ टकटक खाला थेरूकी ख्योम,” सिन साकीन थेरूई ताङसुङ। 12थेरूई थे चेलाओनगी गाङेपा युगीनकामा मिओनला खोपरोङ पापी दुका सिन छ्या स्येला परमेश्वर छ्य्वापा लै खि सिन गा लाङच्येते बात लाप्सुङ। 13थेमे मिओनला खोबाते ल्हन्डीक काल्बेईला मिओन नाङदुकी तेन्गीन ताङसुङ। नाबाते मि काल्बेईला मोर्गु कुकीन बिन्गीन ठाक्पा खासुङ।
बप्तिस्मा तेरकान्ते यूहन्नाला सेताते
(मत्ती १४:१-१२; लूका ९:७-९)
14थेमे गेल्बो हेरोदकीङ येशूकी खाबाते अचम्बते कामगी बात गाङे थोसुङ। च्यिला सासीन गाङेपे मिकी येशू बातकामा खिन ओतान। थेबे नाङ कोईकी “थे येशू सिरातेनी बप्तिस्मा तेरकान्ते यूहन्नाराङ सोम्बो लोगीन वाबाते दुका। थेमेका थेकी थोक अचम्बते कामओन खित्च्येते ईन्दासीन,” सिन बात खिन ओतान। 15कोईकीचेन परमेश्वर बात खित्कान्ते एलिया लोईन वादुक सिन ओतान। लोक्ला ज्येन ज्येनगीचेन दिङ थाङबो परमेश्वर बात खित्कान्ते मिओन च्योक्तेराङ ईन सिन ओतान। 16दि गाङे बात थोनामेई हेरोदकीचेन “दि मिनी यूहन्नाराङ ईन। ङे थेते गोः तुप्कीन सेत च्युता ओतान। थे सोम्बो लोगीन वादुक,” सिन सिदुक। 17बात च्यि ओङा ओताने सासीन हेरोदकी यूहन्नाला जुम्गीन नेल कोन्गीन जेलदु लु च्युता ओतान। च्यिला सासीन हेरोदकी थे खोरोङ न्वाते फिलिप फेम्मे हेरोदियास खुलाबा ओतान। 18थेकी नामाते खुलाबेकी यूहन्नेकी थेला “खुई खोरोङ नामाला च्यिला खुलाबे? दोक खिता मेङगो सिन खोल्ला छ्याराङ ओत,” सिन साबा ओतान। 19यूहन्नेकी थोक साबेकी हेरोदियासला स्येदाङ लाकीन थेला सेता चाला ओतान। ईन्सीनोङ थेकी खिता चालाच्योक खिता ङेता मेतान। 20च्यिला सासीन यूहन्ना परमेश्वरगी खि साबा साबा च्योकराङ खित्कान्ते लेमु मि ईन सिन हेरोदला छ्या ओतान। थोगी थेला मेलेबा खिता मेङगो सिन ज्यीबेकी यूहन्नाला सुङगीङ छ्याःङ मेलेबा खिता मुथुप्स्यीत सिन लेमु खाईन ज्याक्पा ओतान। बेला बेलाला यूहन्ने बात ङेन्जीन हेरोदला लेमु लाबा ओतान। थे खोरोङगी खाबाते मेलेबाते काम सम्झे खित्जीन यूहन्ने बात ङेन्नामेकी जहिलेङ थेला सेमला चुक ईन चुक ईन लाङगीन ओतान।
21तर ङीमाई हेरोदियासकी यूहन्नाला स्येदाङ सेत्च्ये मौका ङेत्सुङ। चुक खाईन सासीन थे खोरोङ केबाते दिनगी छोमु गेल्बो हेरोदकी छ्येज्यीक भोज लै खाबा ओतान। थे भोजला थेकी थे खोरोङ छ्ये छ्ये मि, मिल्टेरी छ्ये छ्ये मि थेमे गालील अञ्चलते ज्येनोङ छ्ये छ्ये मि गाङेला काताङा ओतान। 22भोज सासादु वाकीन हेरोदियास फुमुकी बाक चेसुङ। थेकी बाक चेबाते गेल्बो हेरोदला थेमे थेरू भोज सार वाबाते गाङेला आउदी लेमु लासुङ। थेमे खुशी ओङगीन गेल्बोकी थेला “खुई जे नाङ खासीनोङ ङा तेरग्यो, खो च्यि नाङ सिते? 23खुई नाङ साबाते ङा जेङ तेरग्यो। ङेते राज्यराङ फेस्याक नाङ सासीनोङ ङा खोल्ला तेरग्यो,” सिन ना क्याल्सुङ। 24थेमे थेकी आमाते ओत्सादु गाल्गीन “ङे च्यि नाङ सिसे,” सिन ठिनामेई हेरोदियासकी “बप्तिस्मा तेरकान्ते यूहन्ने गोः नाङ सि,” सिन लाप्कीन ताङसुङ। 25आमातेकी थोक सिराईताङ गेल्बो दोन्दु गाल्गीन थेकी “ङाला थाल्लाराङ बप्तिस्मा तेरकान्ते यूहन्ने गोः तुप्ला देर्माला लुक्ला नाङ,” सिन सासुङ। 26थोक सिरजीन था यूहन्नाला चुक खाला सेत्च्ये सिन गेल्बोला आउदी पीर लासुङ। तर जे नाङ खासीनोङ तेरग्यो सिन गोमाका गाङे ङोन्दु जमान खाईन ना क्याला ओतेकी थेकी यूहन्ने गोःचेन तेरा मुथुबो सिन सिरा माथुप्सुङ। 27थोगी थेकी यूहन्ने गोः तुप्ला खोरच्योक सिन मिल्टेरीज्यीकला जेलदु दाक ताङसुङ। थेकी गाल्गीन यूहन्ने गोः तुप्कीन 28देर्माला लुगीन थे फेम्मे फिजाला बिन्नामेकी थेकीचेन थे गोः आमातेला खेरगीन बिन्सुङ। 29यूहन्नाला सेताते बात थे चेलाओनगी थोनामेकी थेबेकी वाकीन थे रो खेरगीन दिसुङ।
येशूकी हजार ङा मिला साप बिन्दाते
(मत्ती १४:१३-२१; लूका ९:१०-१७; यूहन्ना ६:१-१३)
30येशू ख्रीष्टकी खटे खाबाते चेलाओन युल युललेकी ग्युरगीन वाकीन खोपरोङगी खाबाते कामताङ बात गाङे थेला लाःप्सुङ। 31मि काल्बेई थेरू ओङगीन डुइन खिन ओतेकी थेबेकी साप साच्ये लोङोङ ङेता मेतान। थेमे थेकी चेलातेबाला “लो था ङुरूङकामा देताला खइँसाला पाङला डुइ। थेमे ख्योकोनोङ टिक्पी ङा सो,” सिन सिदुक। 32थोगी थेबा खोपरोङकामा देताप सिन थे मिओनताङ ठाल्गीन डुङ्गाला जेकीन थेरूई गाल्सुङ। 33थेबा डुङ्गाला जेकीन गालाते कोई कोईकी थोङसुङ। थे थेरूकी गालाते बात छ्या स्येनामेई ठाउँ ठाउँकी मिओनचेन समुन्द्रे छेउताङ छेउ ख्याम्गीन थेला तिङ ङ्योगीन गाल्सुङ। थेमे थेत्ताङ थे चेलाओन ड्वा चालाते ठाउँदु थे मिओनका गोमाका लेप्सुङ। 34थेबा थेपा लेप्ला डुङ्गादुकी फाप्जीन येशूकी होथे ङोला ङ्वा मुथुप्च्या मिला थोङसुङ। थे मिओन गोठाला मेताते लुई बगाल च्योकराङ ओता थोङजीन थेला आउदी ङिङज्ये लासुङ। थेमे थेकी थेबाला परमेश्वर बात काल्बेई लाप्कीन बिन्सुङ।
35थोक थोक खित्केलाराङ नामोङ स्योबा खाबा ओतान। थेमे चेलातेबेकी दोन्दु वाकीन “गुरू, था नाम स्योबा खासुङ। दि छ्याःङ मेङेत्च्येते ठाउँ ईन। 36थोगी दि मिओनला खइँसाला युल युलला गाल्ला साप थुङा ङ्योला सो सिन थोङ,” सिन सिरजीन 37थेकी “मेन मेन, दिबाला ख्योकोनगीराङ साप थुङा बिन,” सिन सिदुक। थोक सिरजीन थेबेकी “गुरू, च्यि दि मिओनला ङ्योकोनगी साप ङ्योला खुलाला तेरा फाप्क्यो साबाप? दिबालानी चाँदी डबल सय ङिचो साप गोच्या दुक,” सिन सिदुक। 38थेमे थेकी “ख्योकोनताङ स्योबेन थोई दुका तोते,” सिन सिदुक। ताकीन वाकीन थेबेकी “स्योबेन ङाताङ ङ्या ङि ओताक्वा,” सिन सिदुक। 39थेमे थेकी थेबाला “लो दि मिओनला हूल हूल जोला लेमु खाला साला देत छ्युत,” सिन कोत्सुङ। थे पाङ खाङ आउदी काल्बेई सो केबा ओतान। 40थेमे थेबेकीङ साबा च्योकराङ खाईन मिओनला देत च्युत्सुङ। मिओनचेन कोई हूलला मेरा सय रेरे, कोईला खाल ङिताङ च्युताम्बा खाईन देत्सुङ। 41थेमे येशूकी थे स्योबेन ङाताङ ङ्या ङि लाःक्तु लाकीन नामने ताकीन थे सापकी लाईदु परमेश्वरला धन्यवाद बिन्सुङ। थेमे थेकी थे स्योबेन च्य्वाकीन गाङेला गोला बिन सिन चेलातेबाला तेरगीन खानामेई थेबेकीङ साबा च्योकराङ खाईन गोकीन बिन्सुङ। थोकराङ खाईन ङ्याङ थेकी मि गाङेला गोकीन बिन्सुङ। 42थेमे मि गाङेकी डाडासाक सोसुङ। 43थेबेकी सोकीनोङ चेलातेबेकी थेरू लूबाते स्योबेनताङ ङ्ये टुक्राटुक्रीकी तोलुम च्युन्ङी काङसुङ। 44थेरू थोक खाला साप साकान्ते मि ङोजीन हजार ङानी ख्योओ मिकामा ओतान।
येशू छ्युई लाकताङ लाक ख्याम्बाते
(मत्ती १४:२२-३३; यूहन्ना ६:१६-२१)
45मिओनला थोक खाईन साप बिन्गीन सिन्नामेई येशूकी चेलातेबाला “ङाचेन था टिक्पी तिरी ओङामीन, ख्योकोन डुङ्गाला जेला समुन्द्रे फारकेनपा बेथसेदापा ग्युक,” सिन थेरूई ताङसुङ। थेरू ओताते मिओनलाङ थेकी थेरूई ताङसुङ। 46थोक खाईन गाङेला ताङनामेकी थे खोरोङचेन परमेश्वरताङ प्रार्थना खिताला बोमज्यीकने गाल्सुङ। 47थेमे नाम स्योजीन थे च्यिकराङ बोमनेराङ ओतान। चेलातेबाचेन डुङ्गाला समुन्द्रे किलसाक ख्योल्गीन सिन्दा ओतान। 48तर डुङ्गा खेरा फाप्से छ्य्वापेई आउदी कस्स्ये खाईन ल्हाबा खाईन समुन्द्रदु छाल लाबेकी डुङ्गा चले खिताला थेबाला आउदी दुक्पा ओङा ओतान। थेबाला थोक दुक्पा ओङाते थेकी थोङसुङ। थेमे ङोमु पाखाला थे छ्युई लाकताङ लाक ख्याम्ला चेलातेबा ओत्सापा ओङगीन ओतान। थे थेबाला क्योक्ला ड्वा खाबा ओतान। 49थोक खाला थे छ्युई लाकताङ लाक ख्याम्ला ओङजीन थेला ङो मास्येकीन ल्हन्डीक लिच्युङ सिन चेलातेबा छेरा खासुङ। 50थे थोक खाला ओङगीन ओता थोङजीन चेलातेबा गाङेराङ आउदी खाईन ज्यीबा खाबा ओतान। थेबा ज्यीबा खाबाते छ्या स्येकीन थेकी “ज्यीबा माकेत, ङाका ईन। छ्याःङ ज्यीबा खिता माफाबो,” सिन बात खासुङ। 51थेमे थेङ थे डुङ्गाला जेसुङ। थे जेनामेकी ल्हाबा चले खिता ताङसुङ। थोक ओङनामेई चेलातेबा झन छकदाङ परे खासुङ। 52थेकी थोक काल्बेई मिला थोक अचम्ब खाईन साप बिन्सीनोङ थेत्ताङ चुक छ्येज्यीक शक्ति ओते सिन चेलातेबेकी छ्याःङ छ्या मास्येसुङ। च्यिला सासीन थेबेकी खोबा सेम माक्यासुङ।
येशूकी गनेसरेतदु मिओनला ठाक्पा खाबाते
(मत्ती १४:३४-३६)
53थेमे येशूताङ चेलातेबा गाङेराङ फारकेनपा गनेसरेत सिरसापा लेप्कीन डुङ्गा समुन्द्रे छेउदु ताकीन ज्याक्सुङ। 54थेबा डुङ्गादुकी थेन्नामेई थे ठाउँकी मिओनगी येशूला दाक छ्या स्येसुङ। 55थेमे थे मिओन थेङला फार छुर युलगी नाङपा गाङेपा छ्य्वाकीन गाल्सुङ। थेमे थे जहाँ दुक सिन थोकीदुक नाबाते मिओनला मालज्यामताङराङ डोलो खाला खुरला थे ओत्सादु केलाला स्यूसुङ। 56युलला ईन्स्यीत, सारला ईन्स्यीत थे जहाँ जहाँ डुइदुक थे डोसे लामगी छेउ छेउला मिओनगी नाबाते मिओन खुलाला ज्य्वाकीन ओतान। थेमे थेबेकी “हजूर, खुई खोन्दाते खोलाक छेउलाकामा ईन्सीनोङ दिबाला द्वाप बिन,” सिन बिन्ती खित्जीन थेकीङ थोकराङ खित च्युत्सुङ। थेमे थे खोलाकला दोकान जति गाङेराङ ठाक्सुङ।
Currently Selected:
मर्कूस 6: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
