मर्कूस 5
5
येशूकी मिज्यीकदुकी ल्हन्डीक काल्बेई तेन्गीन ताङाते
(मत्ती ८:२८-३४; लूका ८:२६-३९)
1थेमे येशूताङ थे चेलाओन समुन्द्रे फारकेनपा गिरासिनी सिराते मिओन देत्सापा ख्योल्सुङ। 2थेबा थेपा ख्योल्गीन डुङ्गादुकी फाप्नामेई रो ज्य्वाच्येते फुगी नाङलेकी थेन्गीन मिज्यीक येशूला ठेता खित लिच्युङ। थेला ल्हन्डीक खोबा ओतान। 3थे खालि रो ज्य्वाच्येते फुगी नाङलाकामा देत्कीन ओतान। सुइँदेकी जुम्गीन नेल कोन्गीन ज्याक्सीनोङ थेला ताला लुबा थुपा मेतान। 4पालोताङ पालो थेला जति नेल कोन्गीन लाक्पा काम्बा ठाकीन ज्याक्सीनोङ थेबाङ बाताबेता च्येत्ला क्युरगीन ओतान। थेला ताला लुबा थुप्कान्ते सुङ मि मेतान। 5थे ङीन नुप फुगी नाङला थेमे बोमगी नाङला छेरा खिन युगीन देत्कीन ओतान। थेमे दो थुइन देइन खाईन थेकी थे खोरोङ जीउ खाङ मा तोता ओतान।
6येशू थेपा ओङगीन ओता थेकी आदो थारीलेईराङ थोङा ओतान। थेमे छ्य्वाकीन वाकीन गुर्बु खाला थेला से खिन 7ल्हन्डीक खानापेई थेकी कस्स्ये खाला छेरा खिनकामा “ए येशू, खो गाङे भन्दा छ्येते परमेश्वर फुज्युङ ईन सिन ङाला छ्या ओत। खो ङाला दुक्पा तेराला दुरू च्यिला वाबे? ङाला दुक्पा मातेर ओर्च्ये। दोक मिक्किओ सिन हजूर खो परमेश्वर साक्षी ज्याक्ला ना क्योल,” सिन सिदुक। 8येशूकी “थे मिदुकी थेन्ला ग्युक,” सिन कोतेकीराङ थे ल्हन्डीककी थोक खाईन बिन्ती खाबा ओतान। 9येशूकी थे ल्हन्डीकला “खुई मिन च्यि ईन्दे” सिन ठिजीन थेकी “ङे मिन हूल ईन। च्यिला सासीन ङ्योकोन काल्बेई ओत,” सिन सिदुक। 10थेमे थे ल्हन्डीककी “ङ्योकोनला दि लुङबादुकी तेन्ला मातोङ,” सिन येशूला बिन्ती खासुङ। 11थेङलाराङ बोमगी नाङला फाक्पा काल्बेई चरन खिन ओतान। 12थेमे थे ल्हन्डीककी येशूला “बरू ङ्योकोनला उथे फाक्पाओन नाङ देताला थोङ। ङ्योकोन फाक्पाओन नाङराङ देत ड्वामीन,” सिन सिरजीन 13थेकीङ “लो ग्युक,” सिन सिदुक। थोक सानामेकी थे ल्हन्डीक थे मिला ताङगीन फाक्पाओनला खोबाला गाल्सुङ। थेमे थेरू च्यि ओङसुङा सासीन फाक्पा गाङे ङ्योबा च्योक गाल्गीन बोमगी नाङमा छ्योङगीन डोजीन ठाःकनामा रिल्गीन गाल्गीन समुन्द्रमा स्यूकीन नुप्कीन स्यिसुङ। थोक खाईन स्याप्ते फाक्पा हजार ङिचो ओतान।
14थोक थोक ओङा थोङगीन फाक्पे गोठालाओन ज्यीबेकी छ्य्वाकीन गाल्गीन सारताङ युलगी नाङले मिओनला थे बातबरी लाःप्सुङ। थेमे च्यि ओङाते ईन्दाका सिन थेङले मिओन थेपा तार गाल्सुङ। 15येशू ओत्सादु लेप्ला ताजीन थेबेकी थोक काल्बेई ल्हन्डीक खोबाते मिचेन ठागीन खोलाक खोन्गीन च्याकीन देता ओता थोङसुङ। थे थोक खाईन ठाक्पा ओता थोङनामेईनी तार ओङकान्ते मिओन ज्यीबेकी झन आते खासुङ। 16येशूकी थे मिदुकी ल्हन्डीक तेन्गीन ठाक्पा खाबाते थोङकान्ते मिओनगीचेन थेकी चुक खाईन थेला ठाक्पा खासुङा थेमे फाक्पाओन चुक खाईन स्यिसुङा सिन थेरू वाबाते मिओनला गाङे सासुङ। 17दि गाङे बात थोनामेई थे मिओनगी येशूला “हजूर खो ओर्च्ये दुरू मादेत, दुरूकी ग्युक,” सिन सासुङ। 18थेमे येशू डुङ्गाला जेकीन थेरूकी ड्वाप्ला ठीक खासुङ। थे थोक खाला डोजीन थेकी ल्हन्डीक तेन्गीन ठाक्पा खाबाते मिकीचेन थेला “ङालाङ खोत्ताङराङ ख्याम्च्ये सेम ओत, ङालाङ खेर,” सिन सिदुक। 19ईन्सीनोङ थेकी थेला “खो ङात्ताङ ड्वा माफाबो। बरू खाम्बापा ग्युक। थेमे प्रभु परमेश्वरगी खोल्ला चुक खाईन ठाक्पा खासुङा। थेकी खोल्ला चुक छ्येज्यीक दया खासुङा सिन खोरोङ मि गाङेला सि,” सिन थेरूकी ताङसुङ। 20थेमे थे मिकीङ डेकापोलिस सिराते सार च्युताम्बे नाङपा गाल्गीन येशूकी थेला चुक खाईन ठाक्पा खासुङा सिन मि गाङेला लाःप्सुङ। थे बात थोकान्ते मि गाङेराङ छक्क परे खासुङ।
येशूकी स्याप्ते फेम्मे फिजाला सोम्बो लोक्पाते
(मत्ती ९:१८-२६; लूका ८:४०-५६)
21येशू थेरूकी समुन्द्रे छुरकेनपा लेप्सुङ। थे थेरू लेप्नामेकी आउदी काल्बेई मि थे फेरो खाङ रूप्सुङ। येशू थोरूमोङ समुन्द्रे छेउदुराङ ओतान। 22थेमे मिटिङ खित्च्येते खाम्बेते छ्येते मिओन नाङ याइरस सिराते मिङ थेरू लेप्सुङ। वाकीन येशूला काम्बाला से खाईन 23थेकी “गुरू, ङे फुमु स्यिमेसोमे गाल्गीन खाला बाक देता ओत। ओर्च्ये रकस्यिक गाल्ला खुई लाक्पा थे लाक ज्याक्ला नाङ। दोक खानामेई थे ठाक्ला सोन्ग्यो,” सिन सासुङ। 24थेमे येशू थेत्ताङ ख्याम्सुङ।
थोक खाला थेपा डोजीन ज्येन मिङ आउदी काल्बेई थेत्ताङ च्येपा च्येप खिन ख्याम्बा ओतान। 25थेबे नाङ लो च्युन्ङी थोङलामेकी ठाक ऊरच्येते बेथेकी नाबाते फेम्मे मिज्यीगोङ ओतान। 26ठाक्स्यीत सिन डाक्टरला मेन खित ज्युत्जीन थेकी दुक्पाकामा ङेता ओतान। थेते ओताते जति गाङे मेन खित्जीनराङ सिन्दा ओतान। ईन्सीनोङ थातासाक थे बेथा सुङगीङ ठाक्पा खिता थुपा मेतान। बरू बेथा ङ्येकीन झन सारो गाला ओतान। 27येशूकी खिन ओताते कामताङ बात थेकीङ थोबा ओतान। थेमे थेकी थे मि नाङ येशू दोन्दु ख्योल्गीन थे खोलाकला ल्हाकनापेई छुस्स दोसुङ। 28ङे येशू खोलाककामा द्वा ङेत्सीनोङ ङेते दि बेथा ठाइओ सिन थेकी थोक खाबा ओतान। 29येशू खोलाक द्वापज्यीकताङराङ थेते ठाक ऊरच्येते बेथा दाक ठाक्सुङ। थेकी थे मोरोङ ठाक्सुङ सिन होक छ्या स्येसुङ। 30थे खोरोङताङ ओताते ठाक्पा खित्च्येते शक्ति थेन्गीन गालाते दाक छ्या स्येकीन येशूकी ख्युर ग्युरगीन मिओनला “ख्योकोन नाङ सुई ङे खोलाकला दोबे?” सिन ठिसुङ। 31थेमे चेलातेबेकीचेन “गुरू, मि दोक च्येपा च्येप खाईन ख्याम्सादुङ खोल्ला थोईकी दो, थोईकी मादो। थोगी खो च्यिला सुई ङे खोलाकला दोबे? सिन ठिइते?” सिन सिदुक। 32ईन्सीनोङ थेचेन थे खोरोङ खोलाक दोकान्ते मि खाङ ईन्ताका सिन तेइनराङ देत्सुङ। 33येशू खोलाक दोनामेई थे मोरोङ ठाक्पाते बात था बोङा मुथुप्च्याक्वा सिन थे फेम्मे मिकी छ्या स्येसुङ। थेमे ज्यीबा खिन दारगीनकामा वाकीन थेकी येशू काम्बाला से खाईन थे मोरोङ चुकस्यिक बेथेकी नाबा ओताने थेमे चुक खाईन ठाक्सुङा सिन थेला गाङे बात लाःप्सुङ। 34थेमे थेकी “फुमो, खुई ङाला विश्वास खाबेकी खित्सादु खो ठाक्पाते ईन। लो था खोले खोले ग्युक। थेमे लेमु खाला देत। खुई बेथेकी था खोल्ला नोमुङ दुक्पा मेतेरो,” सिन सिदुक।
35थोक खाला येशू बात खिन खिनलाराङ थे मिटिङ खित्च्येते खाम्बे छ्येते मि याइरस खाम्बापेकी मिओन थेरू लेप्कीन “हजूर, खुईते फुमु स्यिसुङ। था गुरूला च्यिला दुक्पा तेरच्ये,” सिन सिदुक। 36थे मिओनगी साबाते बात थोसीनोङ येशूकी थे मिटिङ खित्च्येते खाम्बे छ्येते मिला “पीर माकेत, ङाला विश्वासकामा खि। खुई फुमु सोन्ग्यो,” सिन थेपा गाल्सुङ। 37थेपा डोजीन येशूकी खालि पत्रुस थेमे याकूबताङ थे न्वा यूहन्नालाकामा ङ्योम्बु खेरसुङ। 38थेमे थेबा गाङेराङ थे छ्येते मि खाम्बादु लेप्सुङ। थेबा थेरू लेप्जीन थेरू ओताते मि गाङेराङ थे फुमु फिजा स्यिसुङ सिन झ्याउँरा खाला ङुइन थेमे दुङाल खिन ओतान। 39खाम्बे नाङने स्यूकीन येशूकी थे मिओनला “ख्योकोन च्यिला दोक खाला झ्याउँरा खाला ङुइन दुङाल खिते? थे फिजा स्या मेत। थेनी ङिक गालातेकामा ईन,” सिन सिदुक। 40थेकी थोक सिरजीन दिकी च्यि लेम्बे बात खिका सिन थे मिओनगी थेला खिस्यी खासुङ। थेकी थेबा गाङेला फिनामा तेन्गीन ताङगीन थे फिजे आबाताङ आमाते थेमे थे खोरोङ चेला सुमबोलाकामा टीकीन थे स्याप्ते फिजा ओताते कोठादु गाल्सुङ। 41थेमे थे फिजे लाक्पाला जुम्गीन “तालिता कूमी,” सिन सिदुक। दोक साबाते ए फुमो, ङा खोल्ला ल्वा सिन सिओ साबाते ईन। 42थेकी थोक सिरासात्तु थे फेम्मे फिजा लाकीन ख्याम्बाला स्यूसुङ। थे लो च्युन्ङीते ओतान। थे फिजा सोम्बो लोक्पा थोङगीन थे कोठादु ओताते मिओनला मिलाम खाबाते च्योक लासुङ। दोक च्यि अचम्ब ओङसुङा सिन थेबा गाङेराङ छक्क परे खासुङ। 43येशूकीचेन थेबाला “ङे दोक खासुङ सिन ख्योकोनगी दि बात सुङलाङ मासेर याङ। लो था दि फिजाला खइँदा साप थुङा बिन,” सिन सिदुक।
Currently Selected:
मर्कूस 5: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
