मर्कूस 4
4
सोन देप्कान्ते मि कथा
(मत्ती १३:१-९; लूका ८:४-८)
1थेमे लोईन येशू गालील समुन्द्रे छेउदु गाल्गीन मिओनला परमेश्वर बात लोपाला स्यूसुङ। थेरू बात ङेन्दाला जम्मा ओङाते मि आउदी काल्बेई ओङेकी थेबेकी थे बात लेमु खाला थोस्यीत सिन थेचेन डुङ्गाज्यीकला जेकीन देत्सुङ। थे डुङ्गा छ्युई छेउदुराङ ओतान। थेमे ज्येन मिओनचेन गाङेराङ समुन्द्रे छेउला पाङलाराङ देत्सुङ। 2मिओनला परमेश्वर बात लोप्जीन थेकी काल्बा च्योक कथा लाःप्कीन ओतान।
थेकी थेबाला दोक सिन लोपाला स्यूसुङ। 3चुक सासीन “लो ख्योकोनगी दि कथा ङेन। बाजिई मिज्यीक सोन देपाला गाल्दुक्लो। 4सोन देप्जीन कोई सोन लामदु फाप्तुक्लो। थेमे थे सोनचेन छ्योज्युङमेकी वाकीन गाङे सोदुक्लो। 5याङराङ कोई सोनचेन टिक्पी टिक्पीकामा सबी थेमे दो काल्बेई ओत्साला फाप्तुक्लो। तीङला माफापेकी थे क्यापनी होत्ता केदुक्लो। 6तर चाप्रेन तीङला क्योङा माथुपेकी ङीमा खित्जीन गाङे काम्गीन स्यिदुक्लो। 7थोकराङ खाईन कोई सोनचेन चाङगी बुटे नाङला फाप्तुक्लो। थेमे केनामेकी चाङगी बुटेकीराङ सोदुक्लो। थोगी थेला छ्याःङ मागोन्दुक्लो। 8सबी लेमु ओत्साला फापाते सोनचेन लेमु खाईन केकीन लेदुक्लो। ङिमा तुला मुरला ताजीन कोईला गेडा खालज्यीकताङ च्युताम्बा, कोईला गेडा खाल सुम थेमे कोईलाचेन गेडा सयज्यीक स्यूबा ओता थेप्तुक्लो,” सिन सिदुक। 9दि कथा सानामेई थेकी थेबा गाङेला “ङेन्दा सेम ओत्कान्ते मिकी दि बातओन लेमु खाला ङेन,” सिन सिदुक।
येशूकी च्यिला कथा लाःप्ला लोप्कीन ओताने
(मत्ती १३:१०-१७; लूका ८:९-१०)
10येशू थे मिओनताङ ठाल्नामेकी थेत्ताङ थे खोरोङ चेला च्युन्ङी थेमे सधैँ थेत्ताङ ख्याम्कान्ते ज्येन कोई कोई मिकामा ओतान। थेजीनराङ थेबेकी “गुरू, खो ज्येन ज्येन मिला परमेश्वर बात लोप्जीनचेन च्यिला कथा लाःप्ला लोप्कीते?” सिन ठिसुङ। 11थोक सिरजीन थेकी “परमेश्वर राज्य सिराते च्यि ईन्दे थेमे परमेश्वरगी चुक खाला मि नाङ राज्य खिते सिरच्येते बात ख्योकोनलानी परमेश्वरगी खो च्युता ओत। तर ज्येनला परमेश्वर राज्य बात लोप्जीनचेन ङा कथालाकामा लोप्क्यो, कथे अर्थचेन मालाःबो। 12ङे दोक खित्च्येतेचेन
‘थेबेकी परमेश्वरगी खिन ओताते काम जति थोङसीनोङ च्यि खिता चालाते ईन्ताका सिन छ्याःङ छ्या मेस्येस्यीत
थेमे परमेश्वर बात जति थोसीनोङ च्यि साबाते ईन्दे सिन छ्याःङ मोखोस्यीत सिन ईन।
थेबेकी बात खोबा ईन्सीन थेमे ङेन्दा ईन्सीन थेबा परमेश्वर छ्य्वापा लै खित्च्या ओतान थेमे थेकी थेबाला पापदुकी टाल्ला माफ तेरच्या ओतान,’ ” सिन सिदुक।#यशैया ६:९-१०
सोन देप्कान्ते मि कथे अर्थ च्यिन्दे
(मत्ती १३:१८-२३; लूका ८:११-१५)
13येशूकी याङराङ थेबाला “ख्योकोनगी ङे आनाङका लाःपाते कथे अर्थ माखोसुङ? थोक ईन्सीन ख्योकोनगी ज्येन कथाओननी च्यि खोओङा? 14सोन देप्कान्ते मि कथे अर्थ च्यि ईन्दे सासीन सोन देप्कान्ते मिकी सोन देपाच्योक खाला लोप्कान्ते मिकी परमेश्वर बात लोप्क्यो। 15सोन देप्जीन कोई सोन लामला फाप्क्यो। लामला फाप्कीन छ्योज्युङमेकी तुकीन सोबाते सोन साबातेचेन परमेश्वर बात थोकान्तेबे नाङ थरीज्यीक मिला साबाते ईन। थोक्ते मिओनतेचेन परमेश्वर बात ङेन्च्येते सेमराङ मेतेकी थे बात थोसीनोङ थोबासात्तु शैतानगी थेबेकी थोबाते बात होत्ता टोक ज्येत ज्युत्क्यो। 16टिक्पी टिक्पीकामा सबी थेमे दो काल्बेई ओत्साला फापाते सोन साबातेचेन ज्येन थरीज्यीक मिला साबाते ईन। थोक्ते मिओनगी परमेश्वर बात थोबासात्तु आउदी गा खिन ङेन्ग्यो। 17ईन्सीनोङ थे बात लेमु खाला सेमगी नाङ मोज्योओ। थोगी परमेश्वर बात ङेन्देकी खित्सादु तिरी खइँदा दुक्पा ङेत्जीन, ज्येनगी खेदापानी खित्जीन थेबेकी थे बात ङेन्दा दाक तोङगो। 18लोक्ला चाङगी बुटे नाङला फाप्कीन केकीनोङ चाङगी बुटेकीराङ सोबाते सोन साबातेचेन थोरूमोङ ज्येन थरीज्यीक मिला साबाते ईन। थोक्ते मिओनगी परमेश्वर बातनी ङेन्ग्यो। 19ईन्सीनोङ साच्या थुङच्याताङ खोन्च्ये पीर, सम्पत्ति लोभ थेमे दाक्पोन खुशी खिता चालेकी खित्सादु थेबेकी थोबाते बात दाक टोक ज्येत्ला छ्याःङ काम लै मिक्किओ। 20कोईकीचेन परमेश्वर बात थोनामेई लेमु खाला ङेन्ला थेरू खि साबा साबा च्योकराङ खिओ। थोगी सबी लेमु ओत्साला फापाते सोन साबातेचेन होथोक्ते मिओनला साबाते ईन। थे सोनगी नाङ कोईला गेडाज्यीक्ते गेडा खालज्यीकताङ च्युताम्बा, कोईला गेडा खाल सुम थेमे कोईला गेडा सयज्यीक स्यूकीन लेबा च्योकराङ खाला परमेश्वर बात लेमु खाला ङेन्कान्ते मिओनगीङ होथोकराङ लेमु काम खिओ,” सिन सिदुक।
परमेश्वर बात लेमु खाला ङेन्दा फाप्क्यो
(लूका ८:१६-१८)
21येशूकी थेबाला बात खिन “थोरूमोङ ज्येन बात च्यि सासीन च्यि सुइँदेकी बत्ती पारला च्याला फामगी उप्ला ज्य्वाक्यो? ना खाटकी चावादु बोङगीते? बरू गाङेकी नाम्दाक थोङस्यीत सिन खइँसाला थोम्बोला ज्य्वाक्यो, मेन? 22बात च्यि सासीन थोरूमसाक ख्योकोनला छ्या स्ये माच्युताते बातबरी थाचेन परमेश्वरगी छ्या स्ये ज्युत्क्यो। थेमे थोरूमसाक माखोबाते बाततेबाङ खो ज्युत्क्यो। 23ङेन्दा सेम ओत्कान्ते मिकी दि बातओन लेमु खाला ङेन,” सिन सिदुक। 24थोरूमोङ बात खिन थेकी “ङे लोप्च्येते बात लेमु खाला ङेन्ला च्यि साबाते ईन्ताका सिन छ्या स्येबा खि। ख्योकोनगी परमेश्वर बात चुक खाला ङेन्गीका थे ताला परमेश्वरगी काम खिओ। थे बात लेमु खाला ङेन्कान्ते मिकी थे बात खोकीन डुइओ। परमेश्वरगी थोक्ते मिला थे खोरोङ बात झन लेमु खाला खो ज्युत्क्यो। 25बातचेन दिराङ ईन। च्यि सासीन परमेश्वर बात ङेन्ला लेमु खाला खोबा छोल्कानला दोक्ते बात झन काल्बेई छ्या स्येस्यीत सिन लाप्ला तेरग्यो। थे बात थोलाङ खोबा मोछोल्कान्ते मिलाचेन टिक्पी टिक्पी छ्या स्येबा ओताते बादोङ टोक ज्येत ज्युत्क्यो,” सिन सिदुक।
सोन ताप्नामेई थाराङ केला छारग्यो
26याङराङ येशूकी थेबाला “परमेश्वर राज्य बातचेन सुइँदा स्यीङगी धनीकी तापाते सोनगी बात च्योक ईन। थेकी स्यीङदु सोन देप्क्यो। 27सोन ताप्नामेकी था नाम केइताका, चुक ओङगीताका सिन थे थेरूराङ गुला मेदेदो। थे खाँपा गाल्ला सधैँ च्योकराङ ङ्याल्ग्यो, लाङगो थेमे ज्येनोङ काम खिओ। सोनचेन केलाङ छारग्यो। ईन्सीनोङ दि चुक खाला केला छारगीते सिरच्येते बात थे मिला छ्याःङ छ्या मेङगो। 28ताप्नामेकी थे सोन थाराङ केला छारग्यो। थेमे तिरी ङिमा थेन्ला गेडा स्यूइओ। 29थेमे बाली छोकीन थोक्पा गाल्नामेई स्यीङगी धनीकी थोइओ,” सिन सिदुक।
स्यीम्मीज्यीक सोनगी बात
(मत्ती १३:३१-३२; लूका १३:१८-१९)
30थोरूमोङ येशूकी थेबाला “परमेश्वर राज्य चुक खाला जोदा डुइते सिन ङा ख्योकोनला सिरामीन। थे राज्य जोदा डोच्येतेचेन दि बात च्योकराङ ईन। 31च्यि सासीन सुइँदा मिकी थे खोरोङ स्यीङदु तोरी सोन देप्क्यो। दि तोरी सोन च्योक स्यीम्मीनी ज्येन छ्याःङगीङ सोन मेङगो। 32दोक स्यीम्मी ओत्सीनोङ ताप्कीन केनामेई दि हाँगाविँगा थेन्ला दोङबो छेतराङ डुइओ। छोमा सा ओङच्येते नाङ दिते छेत जोदा झाङ ज्येन छ्याःङगीतेङ मेङगो। दि झाङलाचेन छ्योज्युङमेकी छाङोङ ज्वा थुप्क्यो,” सिन सिदुक।
33चुक्ते कथा लाःप्जीन मिओनगी लेमु खाला खोकीका होथोक थोक्ते कथा काल्बेई लाःप्ला येशूकी परमेश्वर बात लोप्कीन ओतान। 34कथा मिसिरा खालाचेन थेकी बातज्यीगोङ लोप्कीन मेतान। चेलातेबाताङकामा ओत्जीनचेन थेकी चेलातेबाला कथे अर्थ लाःप्ला तेरगीन ओतान।
येशूकी ल्हाबाताङ समुन्द्रे छाल तोर च्युताते
(मत्ती ८:२३-२७; लूका ८:२२-२५)
35थेमे थे छोमु नाम स्योनामेकी येशूकी चेलातेबाला “लो ङुरूङ समुन्द्रे फारकेनपा डुइ,” सिन सिदुक। 36थेचेन डुङ्गे नाङदुराङ ओतान। थेमे चेलातेबाङ मि हूलदुकी ठाल्गीन डुङ्गाला जेसुङ। दोक खाईन थेबा फारकेनपाला ड्वाप्ला स्यूसुङ। ज्येन ज्येन डुङ्गाङ थेपा डुइन ओतान। 37थेमे थेरू चुक ओङसुङा सासीन आउदी छ्येज्यीक ल्हाबा चले खाईन समुन्द्रदु छाल लाकीन छ्यु स्यूकीन डुङ्गा नुपा नुपा खाईन सिन्दा ओतान। 38येशूचेन डुङ्गे छेउदु ङास्यिङ ज्यागीन ङिक गाला ओतान। डुङ्गा नुपा खाबेकी आते खिन चेलातेबेकी थेला ङिक चेत्कीनकामा “ए गुरू, लो तो, डुङ्गा नुपा खाईन सिन्सुङ। ङ्योकोन स्यिसीनोङ माताच्याना च्यिन्दे?” सिन छेरा खासुङ। 39थेमे खोक लाकीन येशूकी ल्हाबाताङ समुन्द्रे छालला “गोगे देत,” सिन सिदुक। थेकी थोक सानामेई ल्हाबा चले खिता ताङसुङ, समुन्द्रे छालोङ तोरसुङ। 40थेमे थेकी चेलातेबाला “ख्योकोन च्यिला दोक ज्यीबा खिन आते खाबे? ङे ख्योकोनला जोए खिता थुप्क्यो सिन ख्योकोनगी ङाला विश्वास खाबाते खोइ?” सिन सिदुक। 41थेकी थोक खाबा थोङगीन आउदी खाला आते खिन चेलातेबेकी “आबिई, दि मि चुक अचम्बज्यीक ईन्दाका। दिकी कोतातेनी ल्हाबाताङ समुन्द्रे छालगी समेदोङ ङेन्गीदुक,” सिन सासुङ।
Currently Selected:
मर्कूस 4: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
