मर्कूस 3
3
येशूकी सन्चारी छोमुराङ मिज्यीकला ठाक्पा खाबाते
(मत्ती १२:९-१४; लूका ६:६-११)
1ङीमाई याङराङ येशू मिटिङ खित्च्येते खाम्बादु गाल्सुङ। थेरू लाक्पाज्यीक काम्गीन थे लाक्पा चलेराङ खिता मुथुप्च्या गालाते मिज्यीगोङ ओतान। 2थेरू वाबाते कोई कोई मिचेन येशूकी चुक खिका, च्यि खिका सिन च्याङबो खाला तेइनराङ ओतान। थेबाचेन सन्चारी छोमु छ्याःङ काम खिता मेङच्येते दिन ईन सिन परमेश्वर नियमला टिबाते बात दिला छ्याराङ ओत, था दिकी थे लाक्पा काम्बाते मिला ठाक्पा खासीन थेकी नियम ङ्ये च्युत्सुङ सिन थे गल्ती तेन्दाप सिन विचार खाईन देता ओतान। 3थेमे येशूकी थे लाक्पा काम्बाते मिला “खो खोक लाला च्याला दुरू स्योक्ते,” सिन काताङसुङ। 4थे मि लाकीन थेरू गाल्नामेकी येशूकी थे खोरोङ गल्ती तेन्दाप सिन देताते मिओनला “लो ख्योकोन सिते, सन्चारी छोमु लेमु काम खिता डिगीताना मेलेबा काम खिता डिगीते? मिला सोन ज्युता लेमु ईन्दाना स्यिर ज्युता लेमु ईन्दे? परमेश्वर नियमताङ डिक्च्येते काम खाङ ईन्दे?” सिन सिरजीन सुङगीङ खाला ङोरो मातेन्सुङ। 5थेबा थोक खाईन छ्याःङ मिसिरा खाईन देता थोङजीन थेला स्येदाङ लासुङ। थेमे थेबाला रकस्यिक ताकीन देत्सुङ। थेला सेमला दुक्पाङ लासुङ। च्यिला सासीन दया माया सिराते थेबे सेमला छ्याःङ मेतान, परमेश्वर बात ङेन्च्ये सेमोङ मेतान। थेमे थेकी थे लाक्पा काम्बाते मिला “खुईते लाक्पा स्योङते,” सिन सिदुक। थे मिकीङ लाक्पा स्योङजीन लेमु खाला चले खिता थुप्च्या गाल्सुङ। 6थेकी थे मि लाक्पा ठाक्पा खानामेकी थे फरिसी पाटी मिओन मिटिङ खित्च्येते खाम्बादुकी गाल्सुङ। थेमे हेरोद गेल्बोताङ डिक्कान्ते मिओनताङ ठेता खाईन येशूला सेता फाप्क्यो सिन ठो खिताला स्यूसुङ।
मि काल्बेई येशू ओत्सादु वाबाते
7थेमे येशूचेन चेलातेबाताङ गालील समुन्द्रे छेउनामा गाल्सुङ। थे तिरी तिरी गालील अञ्चलदुकी ङोला ङ्वा मुथुप्च्या मि तिङ ङ्याकीन गाल्सुङ। 8ज्येन ज्येन ठाउँनापेकीङ आउदी काल्बेई मि थे ओत्सादु वाबा ओतान। थेबाचेन कोई यहूदिये अञ्चलपेकी, कोई यरूशलेम सारनापेकी थेमे कोई इदुमिआ सिरसे नाङपेकी वाबा ओतान। थोकराङ खाईन कोईचेन यर्दन चाङबो फारकेनपा ओताते ठाउँकी नाङपेकी थेमे सीदोनताङ टायर सिराते सारगी नाङपेकी वाबा ओतान। येशूकी खाबाते अचम्बते कामओन बात थोकीन थे मिओन थोक खाईन थेला ठेताला वाबा ओतान। 9थेरू थोक काल्बेई मि वाबा थोङगीन थेकी चेलातेबाला “ख्योकोनगी डुङ्गाज्यीक खोरच्योक। दि मिओन च्येपा च्येप खाला ङे दोन्दु मेङस्यीत सिन ङा डुङ्गादु जेला देता थुप्क्यो,” सिन सिदुक। 10थेकी मि काल्बेईला ठाक्पा खाबेकी थेरू वाबाते नाबाते मिओनचेन थेला द्वाप सिन फुलरीङ फुलरीङ खाला थे दोन्दु ड्वा छोल्गीन ओतान। 11थे मि हूलगी नाङ ओताते ल्हन्डीक खोबाते मिओनगी येशूला थोङनामेई गुर्बु खाला से खिन “हजूर, खो परमेश्वर फुज्युङ ईन,” सिन छेरा खिन ओतान। 12तर थेकी ल्हन्डीकओनला “खाराक्पा देत। ङा सु ईन्दे सिन ख्योकोनगी सिरा माफाबो,” सिन ङारसुङ।
येशूकी छाने खाबाते मेरा च्युन्ङी चेलाओन
(मत्ती १०:१-४; लूका ६:१२-१६)
13थे तिरी येशू बोमज्यीकने गाल्सुङ। थेमे थे खोरोङ चेला ज्वा चालाते मिओनला थे खोरोङ दोन्दु काताङनामेई थेबा थे ओत्सादु गाल्सुङ। 14थेमे थेकी थेबा मेन्दा च्युन्ङीला “ख्योकोनबरीचेन ङे खटे खाबाते मि ईन,” सिन सिदुक। थेकी थेबाचेन थे खोरोङताङ देताला थेमे तिरी गाङेपा गाल्ला मिओनला गा लाङच्येते बात लोपाला छाने खाबा ओतान। 15तिरी परमेश्वर बात लोप डोजीन थेकी थेबाला ल्हन्डीक खोबाते मिओनदुकी ल्हन्डीक तेन्ला तोङच्येते शक्ति बिन्दा ओतान। 16थोक खाईन छाने खाबाते मेन्दा च्युन्ङी नाङ दोक्पोई शिमोन ओतान। थेला येशूकी पत्रुस सिन मिन ज्याक्पा ओतान। 17थोकराङ खाईन थेबे नाङ जब्दी फुज्युङ याकूबताङ यूहन्नाङ ओतान। थेबा पुन ङिबोलाचेन येशूकी बोअनर्गेश सिन मिन्तोक ताबा ओतान। बोअनर्गेश साबाते नाम गुरूङ खाबा च्योकराङ थर्के खित्च्या खाला बात खित्कान्ते मिओन साबाते ईन। 18थेमे ज्येनतेबाचेन अन्द्रियास, फिलिप, बारथोलोमाइ, मत्ती, थोमा, अल्फयस फुज्युङ याकूब, थेदियस, देशभक्त सिराते पाटी मि शिमोन 19थेमे तिरी थे खोरोङला धोका तेरकान्ते यहूदा इस्करियोत ओतान।
येशूकी शैतानताङ डिक्ला काम खित्च्येते मेन
(मत्ती १२:२२-३२; लूका ११:१४-२३)
20थेमे येशू खाम्बाज्यीक्तु गाल्सुङ। थेरूङ लोक्ला मि काल्बेई जम्मा ओङसुङ। दोक ओङनामेई थेत्ताङ थे चेलाओनगी सापकी लोङोङ माङेत्सुङ। 21थे जहाँदु गाल्सीनोङ थोक खाला मि जम्मा ओङगीदुक्लो थेमे थेकी सेन साच्ये लोङोङ ङेता मिन्दुक्लो सिरा थोनामेई येशू ङ्योबा ईन्दा च्यिन्दा सिन थे खोरोङ खाम्बे मिओन थेला खाँपा जुम्ला खेराप सिन खाम्बादुई ख्याम्सुङ।
22यरूशलेमनेकी कोई कोई धर्मे गुरूङ थेरू वाबा ओतान। थेबेकीचेन “दिला ल्हन्डीक गेल्बो बालजिबुल खोदुक। होथेत्ताङ डिक्लाका दिकी थे शक्तिकीराङ ल्हन्डीक तेन्ला तोङच्येते ईन,” सिन सासुङ। 23थेबेकी थोक सिरजीन येशूकी थेबाला थे खोरोङ दोन्दु काताङगीन दोक सिन बात खिताला स्यूसुङ। थेकी च्यि सिका सासीन “ल्हन्डीक गेल्बो शैतानगीराङ चुक खाला मिदुकी ल्हन्डीकला तेन्ला तोङगीते? दोक खासीन थेबा चुक खाला डिक्पा थुप्कीतेरो? 24लुङबाज्यीगी मि माडिगीन खुदुक खुदुक पाटी ओङगीन जीसुङ सासीन थे लुङबा तोरला डुइओ। 25थेमे खाम्बाज्यीगी मिओनोङ खोपरोङ खोपरोङ नाङ थोम्मु खासीन थेबाङ ठाल्ला याङराङ नोमुङ डिकराङ मिडिगो। 26थोकराङ खाला ल्हन्डीक गेल्बो शैतानोङ ल्हन्डीकओनताङ माडिक्सीन चुक खाला थे राज्य खिनराङ देता थुप्कीते? थेकी दोक खिन देताराङ मुथुबो। 27दि बात छ्या स्येबा खि। च्यि सासीन सुइँदा ङार्माते मि खाम्बा क्वा चाल्सुङ सासीन गोमा थेला जुम्ला ठाक्पा फाप्क्यो। थेला ठाकीन रिल्नामेईकामा थे खाम्बा क्वा थुप्क्यो।
28थेमे दि बादोङ ङेन। मिओनगी जे पाप खासीनोङ थेमे परमेश्वर विरोध खाईन जे सासीनोङ थे माफ ङेता थुप्क्यो। 29तर ईन्दा मेन्दा साला परमेश्वर आत्मे विरोध खित्कान्ते मिकीचेन नोमुङ माफ मेङेदो। थोक्ते मिला परमेश्वरगी दि जुनीलाङ तिरी जुनीलाङ नोमुङ माफ मेतेरो,” सिन सिदुक। 30धर्मे गुरूओनगी थेत्ताङ परमेश्वर आत्मा मेत, थेलानी ल्हन्डीकका खोबाते ईन साबेकीराङ येशूकी दि बात साबा ओतान।
येशूकी चुक्तेला थे खोरोङ मि ईन सिते
(मत्ती १२:४६-५०; लूका ८:१९-२१)
31थेमे आमातेताङ न्वातेबा येशू ओत्से खाम्बादु ख्योल्सुङ। फिनामाराङ देत्कीन थेबेकी थेला फिनामा स्योक सि सिन कोई कोई मिला कातोङ ताङसुङ। 32थे फेरो खाङ मि काल्बेई देता ओतान। थेमे कातोङ डोकान्तेबेकी थेला “गुरू, फिनामा खोरोङ आमाताङ न्वाओन खोल्ला ठेता खित्च्या सिन गुकीन देत्ला दुक,” सिन लाःप्सुङ। 33थोक सिरजीन थेकी “ङे आमाताङ न्वाओन सु ईन्दे सिन ङा ख्योकोनला लाःपामीन,” साकीन 34थे खोरोङ फेरोला देता ओताते मिओनला तेइनकामा “ङेते आमाताङ न्वाओन उदिबाराङ ईन। 35परमेश्वरगी खि साबा साबाच्योक खित्कान्ते मिओनराङ ङे आमाताङ न्वा नुमुबा ईन,” सिन सिदुक।
Currently Selected:
मर्कूस 3: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
