मर्कूस 2
2
येशूकी कुज्येला ख्याम्बा थुप्च्या जोबाते
(मत्ती ९:१-८; लूका ५:१७-२६)
1थेमे टिक्पी दिन तिरी येशू कफर्नहुमपाराङ ग्युरसुङ। थे थेरू खाम्बादु ख्योलाते बात मिओनगी दाक छ्या स्येसुङ। 2थेमे मि काल्बेई थे ओत्सादु ख्योल्सुङ। थोक ओङगीन थे खाम्बादु फिला नाङला खापाङ देत्च्येते ठाउँ मेतान। थेमे थेकी थेरू वाबाते मिओनला परमेश्वर बात लोपाला स्यूसुङ। 3थे बेलालाराङ मेन्दा स्यी मिकी थेकी ठाक्पा खाला तेरस्यीत सिन ख्याम्बाराङ मुथुप्कानज्यीक कुज्येज्यीक डोलीला खुरगीन येशू ओताते खाम्बादु क्याल्सुङ। 4थेरू मि घुइँचो ओतेकी थेबेकी थेला खाम्बे नाङने येशू दोन्दु केला मुथुप्च्या थोङसुङ। थोगी थेबेकी फिनामेई टापाक लाकने जेकीन च्याकीन खाम्बे छानु टिक्पीस्यिक स्युकीन स्यूक्च्येते ठाउँ जोसुङ। थेमे होथेरूईराङ खाईन मालज्यामताङराङ थेला थे दोन्दु पाप्सुङ। 5थेकी ठाक्पा खिता थुप्क्यो सिन थेबेकी थे खोरोङला थोक विश्वास खाबा थोङगीन थेकी थे कुज्येला “फुज्यो, ङे खुई खाबाते पाप गाङे माफ खाबान,” सिन सिदुक।
6थेरू जम्मा ओङाते मि नाङ कोई कोई धर्मे गुरूङ ओतान। येशूकी थे कुज्येला थोक सिरजीन थे धर्मे गुरूओनगीचेन 7दि मिकी च्यिला दोकतेन्दे बात खिका? मिकी खाबाते पाप माफ खाबान सिरकान च्यि दि परमेश्वर ईनरो? दिकीनी परमेश्वर विरोध खासुङ। मिकी खाबाते पापनी परमेश्वरगीकामा माफ तेरा थुप्क्यो सिन विचार खिताला स्यूसुङ। 8थेबे सेमगी बात दाक छ्या स्येकीन थेकी थेबाला “ख्योकोन च्यिला थोकस्यिक विचार खिते? 9ङे दि मि पाप माफ खाबान सिरजीन ख्योकोनला ङे खेकीकामा दोक साबाच्योक ओङसुङ मेन? ङे दिला लाला च्याला खोन्च्या दिङच्या खुरला ख्याम ज्युताचेन मुथुबो साबाप? 10परमेश्वर ओत्सादुई वाबाते मि ङात्ताङ मिओन पाप माफ खित्च्येते अधिकार ओत सिन था ङा ख्योकोनला कामगीराङ खाला तेन्दामीन,” सिनकामा थेकी थे कुज्येला 11“लो खोक ल्वा थेमे खोरोङ खोन्च्या दिङच्या खुरला खाँपा ग्युक,” सिन सिदुक। 12थेकी थोक सानामेकी गाङेकी थोङच्या खाईन थे कुज्ये खोक लासुङ। थेमे थे खोरोङ खोन्च्या दिङच्या खुरगीन खाम्बापा गाल्सुङ। थोक ओङा थोङनामेई मि गाङेराङ छक्क परे खिन “आबिई, दोक्ते अचम्बते कामनी थातासाक ङुरूङगी नोमुङ थोङा मेतान,” सिन परमेश्वरते जय जय खासुङ।
येशूकी लेवीला थे खोरोङ चेला जोबाते
(मत्ती ९:९-१३; लूका ५:२७-३२)
13थेमे येशू लोईन गालील समुन्द्रे छेउनामा गाल्सुङ। थेमे मि काल्बेई थे ओत्सादु लेप्सुङ। थेकी थेरू वाबाते मिओनला परमेश्वर बात लाप्सुङ। 14थेरूकी ख्याम्नामेकी डुइन डुइन थेकी कर लिन्कान्ते मिज्यीक अफिसदु देता ओता थोङसुङ। थेचेन अल्फयस फुज्युङ लेवी सिराते ओतान। येशूकी थेला ठेत्कीन “लो खो ङे चेला ओङला ङात्ताङ ख्योम,” सिन सिदुक। थोक सानामेई लेवी खोक लाकीन थेत्ताङ ख्याम्सुङ।
15थे तिरी येशू लेवी खाम्बादु साप सेइन ओतान। थेरू येशू छ्य्वापा लै खाईन थेत्ताङ ख्याम्कान्ते मिङ काल्बेई ओतान। थेबाचेन कर लिन्कान्तेबा थेमे ज्येनगी पापी साबाते मिओन ओतान। थेबा गाङेराङ थेरू येशू थेमे थे चेलाओनताङ ङ्योम्बुराङ देत्ला साप सेइन ओतान। 16थेमे कोई कोई फरिसी पाटी नाङ धर्मे गुरूकी येशू थोक्ते मिओनताङ देत्ला साप सेइन ओता थोङसुङ। थोक थोङगीन थेबेकी येशू चेलाओनला “ए ख्योकोन गुरू च्यिला दि कर लिन्कान्तेबा थेमे ज्येन पापीओनताङ ङ्योम्बुराङ देत्ला साप सेइका?” सिन सिराला स्यूसुङ। 17थेबेकी थोक सिरजीन येशूकी थेबाला “नाबाते मिओनलाका डाक्टर गोक्यो, सन्चाराङ ओत्कानलाका च्यि डाक्टर गोकीतेरो? थोगी ङाङ पापीओनला परमेश्वर छ्य्वापा लै खि सिराला वाबाते ईन। धर्मतीते मिओनला दोक खि सिराला वाबाते मेन,” सिन सिदुक।
येशूकी लोप्च्येतेताङ फरिसी पाटी मिओन बात मिडिगो
(मत्ती ९:१४-१७; लूका ५:३३-३९)
18यूहन्ने चेलाओनताङ फरिसी पाटी मि चेलाओन बेला बेलाला बर्त देत्कीन ओतान। थेमे कोई कोई मिकी येशू ओत्सादु वाकीन “यूहन्ने चेलाओनताङ फरिसी पाटी मि चेलाओन बेला बेलाला बर्त देत्कीदुक। खुई चेलाओनचेन च्यिला बर्त मेदेत्का?” सिन ठिसुङ। 19थोक सिरजीन थेकी “बेउला खोपरोङ दोन्दु ओत्कीन ओत्कीन फाङमाला वाबाते मि सु साप मास्साबा खाला देत्कीतेरो? बेउला खोपरोङताङ ङ्योम्बु ओत ओतसाकनी थेबा तुक्पा देतराङ मेदेदो। 20था मिओनगी वाला बेउलाला जबरजस्ती फाङमादुकी जुम्ला खेरग्यो। थोक खानामेईचेन फाङमा सार वाबाते मिओन पीरगी खित्सादु तुक्पाराङ देत्क्यो।
21ख्योकोनगी दि बादोङ ङेन। च्यि सासीन ङिङबाते खोलाकला साम्बाते टालो ताप्सुङ सासीन तिरी ठुत्जीन टालो खुम्च्ये खाला थे खोलाक झन मेलेबा खाला राल्ग्यो। 22थेमे सुङगीङ गोमाका छ्याङ ङ्याल्गीन ङिङबा गाल्गीन सिन्दाते कोक्तेन गीउला छ्याङ मोङ्योलो, मेन ओना? थोक खासीन छ्याङ ङाकीन मासिन्दालाराङ गीउ बोङ फोङला छ्याङ छ्याङ नाश डुइओ, गीउ गीउ ङ्येक्यो। थोगी भर्खर लाबाते छ्याङचेन साम्बाते कोक्तेन गीउला लुक्ला ज्य्वाक्यो,” सिन सिदुक।
सन्चारी छोमु च्यि च्यि काम खिता ओङगीते
(मत्ती १२:१-८; लूका ६:१-५)
23ङीमाई येशूताङ चेलातेबा लामला डुइन ओतान। थे लामगी फारताङ छुरला ठे स्यीङ ओतान। थेमे चेलातेबाचेन ठे ङिमा ज्युरला मुरला सेइन ख्याम्सुङ। थे छोमु सन्चारी ओतान। 24थोक खिता थोङगीन फरिसी पाटी मिओनगी येशूला “लो तो, खुई चेलाओनगी थरिङ सन्चारी छोमु च्यिला ठे ङिमा ज्युरगीका? परमेश्वर नियमलानी सन्चारी छोमु छ्याःङ काम खिता मेङगो सिन साबा ओत मेन?” सिन ङारसुङ। 25थेबेकी थोक सिरजीन थेकी “दाऊद गेल्बोकी चुक खाबा ओताने सिन ख्योकोनगी पढे खाबा मेतरो? फ्रोबा फापे बेलाला थेत्ताङ थे मिओनगी खापाङ छ्याःङ साच्येते मेङेत्जीन 26पालोई थेकी परमेश्वरला माने खित्च्येते खाम्बादु स्यूकीन थेरू चढे खाबाते स्योबेनराङ पूजारीला नाङ खाईन सोबा ओतान। थेमे थे खोरोङ मिओनलाङ थे स्योबेनराङ गोकीन बिन्दा ओतान। थेजीन अबियाथार सिराते मि छ्येते पूजारी ओतान। तर परमेश्वर नियमलाचेन थे स्योबेन पूजारीओनगीकामा सा ओङगो सिन टिबा ओत मेन?” सिन सिदुक। 27थोक साकीन च्याकीन थेकी थेबाला “मिओनला लेमु ओङस्यीत सिन परमेश्वरगी सन्चारी छोमु छुट्टी माने खि सिन साबाते ईन। दि खि, थे माकेत सिन दुक्पा तेराला छुट्टी माने खि सिन साबाते मेन। 28थोगी परमेश्वर ओत्सादुई वाबाते मि ङात्ताङचेन सन्चारी छोमुङ दि खिता ओङगो थे खिता मेङगो सिन सिरच्येते अधिकार ओत,” सिन सिदुक।
Currently Selected:
मर्कूस 2: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
