متّی 7
7
ڈُوجھیاں دی عدالت
1”عیب جوئی نہ کرو تُہاڈی وی عیب جوئی نہ کیتی ویسی۔ 2کیوں جو جِینویں تُساں عیب جوئی کریندے ہیوے اُونویں ای تُہاڈی وی عیب جوئی کیتی ویسی، تے جیہڑے تھاں نال تُساں نپیندے ہیوے اُوندے نال ای تُہاڈے کیتے ناپیا ویسی۔ 3تُوں آپنڑے بِھرا دی اکھ ءچ ککھ کیوں ڈیدھیں تے اُوں شتِیر اُتے غور نئیں کریندا جیہڑا تیڈی اکھ ءچ ہے؟ 4تے جِیں ویلے تیڈی آپنڑی اکھ ءچ شتِیر ہے تاں تُوں کیہڑے مُنہ نال آپنڑے بِھرا کُوں آکھ سگدیں جو ’آ مَیں تیڈی اکھ ءچوں ککھ کڈھ ڈیواں؟‘ 5منافق! پہلے آپنڑی اکھ دا شتِیر تاں کڈھ گِھن وَل آپنڑے بِھرا دی اکھ دے ککھ کُوں چنگی طرحاں ڈیکھ تے کڈھ سگسیں۔
6پاک چیز کُتیاں دے اگُوں نہ رکھو تے آپنڑے موتی سُوراں دے اگُوں نہ سٹو۔ اِینویں نہ تھیوے جو او اُنہاں کُوں پیراں تلے لتاڑن تے مُڑ تے تُہاکُوں چِیر پھاڑ سٹنڑ۔
منگو، گولھو، کھڑکاؤ
7منگسو تاں تُہاکُوں ڈِتا ویسی۔ گولھیسو تاں مِلسی۔ دَر کھڑکیسو تاں تُہاڈے کیتے کھولیا ویسی۔ 8کیوں جو جیہڑا منگدے اُونکُوں مِلدے، جیہڑا گولھیندے او پیندے تے جیہڑا کھڑکیندے اُوندے کیتے کھولیا ویندے۔ 9تُہاڈے ءچوں ایجھا کیہڑا بندہ ہے جئیں تُوں اُوندا پوتر روٹی منگے تاں او اُونکُوں پتھر ڈیوے؟ 10یا جے مچھی منگے تاں اُونکُوں نانگ ڈیوے؟ 11جِیں ویلے تُساں بُرے ہووݨ دے باوجود آپنڑے بالاں کُوں چنگیاں چیزاں ڈیوݨ جانڑدے ہیوے تاں تُہاڈا اسمانی باپ، آپنڑے منگنڑ آلیاں کُوں چنگیاں چیزاں کیوں نہ ڈیسی؟
12بس جِینویں تُساں چاہندے ہیوے جو لوک تُہاڈے نال کرݨ تُساں وی اُنہاں نال اُونویں ای کرو، کیوں جو توریت تے نبیاں دی تعلیم اِیہو ہے۔
تنگ دروازہ
13تنگ دروازے کنُوں داخل تھیؤ۔ پر او دروازہ وڈا تے او رستہ کُھلا ہے جیہڑا تباہی آلے پاسے گِھن ویندے تے اُوندے ءچوں داخل تھیوݨ آلے بہُوں ہِن۔ 14کیوں جو او دروازہ تنگ ہے تے او رستہ سُکڑا ہے جیہڑا زندگی آلے پاسے گِھن ویندے تے اُوں تُوں داخل تھیوݨ آلے تھوڑے ہِن۔
درخت تے اُوندا پھل
15کُوڑے نبیاں تُوں خبردار راہو جیہڑے تُہاڈے کولھ بھیڈاں دی شکل ءچ آندے ہِن پر اندرُوں چِیرݨ پھاڑن آلے نہر ہِن۔ 16تُساں اُنہاں دے پھلاں تُوں اُنہاں کُوں سُنجاݨ گِھن سو۔ کیا لوک جھاڑیاں تُوں انگُور یا کنڈیراں تُوں ہنجیر تروڑ سگدن؟ 17اِینویں ای ہر چنگا درخت چنگا پھل تے ہر بُرا درخت بُرا پھل چیندے۔ 18چنگے درخت کُوں بُرا پھل نئیں لگ سگدا تے نہ ای بُرے درخت کُوں چنگا پھل لگ سگدے۔ 19او درخت جیہڑا چنگا پھل نئیں ڈیندا کپ ڈِتا تے بھاہ ءچ سَٹ ڈِتا ویندے۔ 20بس تُساں اُنہاں کُوں اُنہاں دے پھلاں تُوں سُنجاݨ گِھن سو۔
مَیں تُہاکُوں نئیں جانڑدا
21میکُوں ’مالک! مالک!‘ آکھنڑ آلا ہر بندہ اسمان دی بادشاہی ءچ داخل نہ تھیسی، پر اُوہو جیہڑا میڈے اسمانی باپ دی مرضی اُتے ٹُردے۔ 22اُوں ڈینہہ بہُوں سارے میکُوں اکھیسن ’مالک! مالک! کیا اساں تُہاڈے ناں نال تبلیغ نئیں کیتی تے تُہاڈے ناں نال بدرُوحاں نئیں کڈھیاں تے تُہاڈے ناں نال بہُوں سارے معجزے نئیں کیتے؟‘ 23اُوں ویلے مَیں اُنہاں کُوں صاف اکھیساں جو ’میڈی کڈھائیں تُہاڈے نال واقفیت نہ ہئی۔ بدکارو! میڈے سامنڑے تُوں دُور تھی ونجو۔‘
ڈُو گھر بنڑاوݨ آلے
24اِیں واسطے جیہڑا کوئی میڈے ایہ گالھیں سُنڑدے تے اُنہاں اُتے عمل کریندے او اُوں عقلمند بندہ وانگُوں ہوسی جئیں آپنڑاں گھر چٹان اُتے بنڑایا۔ 25تے بارش تھئی تے سیلاب آیا تے اندھاریاں گُھلیاں تے اُوں گھر کُوں ٹکراں ماریاں پر او نہ ڈھٹھا، کیوں جو اُوندی بنیاد چٹان اُتے رکھی گئی ہئی۔
26تے جیہڑا کوئی میڈے ایہ گالھیں سُنڑدے تے اُنہاں اُتے عمل نئیں کریندا او اُوں بیوقُوف بندہ وانگُوں ہوسی جئیں آپنڑاں گھر ریت اُتے بنڑایا۔ 27تے بارش تھئی تے سیلاب آیا تے اندھاریاں گُھلیاں تے اُوں گھر کُوں ٹکراں ماریاں تے او ڈھے پِیا تے اصلُوں برباد تھی گِیا۔“
یسُوع دا اِختیار
28جیہڑے ویلے یسُوع ایہ گالھیں ختم کر چُکیا تاں بِھیڑ اُوندی تعلیم تُوں حیران تھئی، 29کیوں جو او اُنہاں دے شریعت دے عالماں وانگُوں نئیں بلکہ ِ اِختیار نال تعلیم ڈیندا ہا۔
Currently Selected:
متّی 7: SKRV
Highlight
Share
Copy
Want to have your highlights saved across all your devices? Sign up or sign in
Modern Central Saraiki Bible © 2024 Strategic Resource Group
