مرقس 4

بیج رہاوݨ آلے دی مثال

1یسُوع ولا جھیل دے کنارے تعلیم ڈیوݨ لگا۔ تے لوکاں دی ایجھی بِھیڑ لگ گئی جو او جھیل ءچ کھڑی ہِک کشتی اُتے وَنج بیٹھا، تے سبھ لوک جھیل دے کنارے اُتے کھڑے ریہے۔ 2او اُنہاں کُوں مثالاں ءچ بہُوں سارے گالھیں سِکھاوݨ لگا۔ تے اُوں اُنہاں کُوں ایہ تعلیم ڈِتی:

3”سُنڑو، ہِک بیج رہاوݨ آلا بیج رہاوݨ نِکلیا۔ 4تے رہیندے ویلے کُجھ دانڑے راہ دے کنارے ڈھٹھے تے پکھیں آ تے اُنہاں کُوں چُگ گِھدا۔ 5کُجھ پتھریلی زمین اُتے ڈھٹھے جِتھاں مِٹی گھٹ ہئی تے زیادہ مِٹی نہ مِلنڑ دے سببّوں جلدی اُگ پئے۔ 6پر جِیں ویلے سِجھ نِکلیا تاں پودے سڑ گئے تے کیوں جو او جڑھ نہ پکڑ سگے، اِیں واسطے سُک گئے۔ 7کُجھ جھاڑیاں ءچ ڈھٹھے تے جھاڑیاں ودھ تے اُنہاں کُوں دبا گِھدا تے او پھل نہ گِھن آئے۔ 8تے کُجھ چنگی زمین اُتے ڈھٹھے تے رہیج پئے تے ودھ تے پھل گِھن آئے کوئی ترِیح گُنا، کوئی سَٹھ گُنا تے کوئی سو گُنا۔“

9وَل اُوں آکھیا، ”جیندے کولھ سُنڑݨ دے کَن ہووݨ او سُنڑ گِھنے۔“

مثالاں دا مقصد

10جِیں ویلے او کلھا ہا تاں اُوندے بارہاں شاگرداں تے ڈُوجھے ساتھیاں اُوں کنُوں اِنہاں مثالاں دے بارے ءچ پُچھیا۔

11اُوں اُنہاں کُوں آکھیا جو ”تُہاڈے اُتے خُدا دی بادشاہی دا راز ظاہر کیتا گِیا ہے پر باہر آلیاں کیتے سارے گالھیں مثالاں ءچ آکھیاں ویندیاں ہِن تاں جو،

12’او ڈیکھسن تاں سہی پر جاݨ نہ سگسن

تے سُنڑسن تاں سہی پر سمجھ نہ سگسن

اِینویں نہ تھیوے جو او میڈے دو رجُوع گِھن آوݨ

تے معافی پاوݨ#یسعیاہ 6‏:9‏،10۔‘۔“

یسُوع بیج رہاوݨ آلے دی مثال سمجھیندے

13وَل یسُوع اُنہاں کُوں آکھیا، ”کیا تُساں ایہ مثال نئیں سمجھے؟ وَل باقی مثالاں کِینویں سمجھ سو؟ 14رہاوݨ آلا خُدا دا کلام رہیندے۔ 15راہ دے کنارے آلے دانڑے او لوک ہِن جیہڑے کلام سُنڑدے تاں ہِن پر شیطان فوراً کلام کُوں کڈھ تے گِھن ویندے جیہڑا اُنہاں دے دِلاں ءچ رہایا گِیا ہا۔ 16اِینویں ای جیہڑے پتھریلی زمین ءچ رہائے گئے، او لوک ہِن جیہڑے کلام کُوں سُنڑدے ای خوشی نال قبول کر گِھندے ہِن۔ 17پر آپنڑے اندر جڑھ نہ رکھنڑ پارُوں دیر تئیں قائم نئیں راہندے تے جِیں ویلے کلام دے سببّوں مُصیبت یا تنگی آندی ہے تاں فوراً ٹھوکر کھاندے ہِن۔ 18تے جھاڑیاں ءچ ڈھاوݨ آلے بیج او لوک ہِن جیہڑے کلام کُوں سُنڑدے ہِن۔ 19پر دُنیا دی فِکر تے دولت دا فریب تے ڈُوجھیاں چیزاں دا لالچ آ تے کلام کُوں دبا ڈیندے تے اُونکُوں پھل نئیں لگ دا۔ 20تے چنگی زمین ءچ ڈھاوݨ آلے بیج وانگُوں او لوک ہِن جیہڑے کلام کُوں سُنڑدے ہِن تے قبول کریندے ہِن تے پھل گِھن آندے ہِن۔ کوئی ترِیح گُنا، کوئی سَٹھ گُنا، کوئی سو گُنا۔“

تھاں دے تلے ڈیوا

21یسُوع اُنہاں کُوں ایہ وی آکھیا، ”کیا ڈیوا اِیں کیتے گِھن آندے ہِن جو کہیں تھاں یا پلنگ تلے رکھ ڈِتا ونجے؟ کیا اِیں واسطے نئیں جو ڈیواٹ اُتے رکھیا ونجے؟ 22کیوں جو کوئی چیز لُکی ہوئی نئیں جیہڑی ظاہر نہ کیتی ویسی تے کوئی بھید ایجھا نئیں جیہڑا کھولیا نہ ویسی۔ 23جیندے کولھ سُنڑݨ آلے کَن ہووݨ، او سُنڑ گِھنے۔“

24وَل اُوں اُنہاں کُوں آکھیا، ”جیہڑا کُجھ تُساں سُنڑدے ہیوے غور نال سُنڑو۔ جیہڑے تھاں نال تُساں نپیندے ہیوے اُوندے نال ای تُہاڈے کیتے ناپیا ویسی بلکہ تُہاکُوں زیادہ ڈِتا ویسی#4‏:24 یسُوع دے شاگرداں کُوں اُوندی تعلیم کُوں غور نال سُنڑ تے، تے سمجھ تے ڈُوجھیاں تئیں پُچاونڑا ہئی، اِیندے بعد خُدا اِیں تعلیم کُوں سمجھنڑ دی مزید توفیق ڈیسی۔۔ 25کیوں جو جیندے کولھ ہے اُونکُوں تاں ڈِتا ویسی پر جیندے کولھ کُجھ نئیں، اُوندے کنُوں او وی گِھن گِھدا ویسی جیہڑا اُوندے کولھ ہے۔“

اُگنڑ تے ودھنڑ آلے بیج دی مثال

26وَل یسُوع آکھیا، ”خُدا دی بادشاہی اِینویں ہے، جِینویں کوئی بندہ زمین ءچ بیج سٹیندے۔ 27ایہ بیج ڈینہہ رات اُگدا تے ودھدا راہندے، بھانویں رہاوݨ آلا سَم ونجے یا جاگدا راہوے۔ اُونکُوں اِیندا پتہ نئیں لگدا جو ایہ کِینویں تھیندے۔ 28زمین آپنڑے آپ پھل گِھن آندی ہے، پہلے پتر نِکلدے ہِن، ولا سِٹے تے ولا دانڑے بھریج ویندے ہِن۔ 29وَل جیہڑے ویلے دانڑے پک ویندے ہِن تاں او فوراً ڈاتری گِھن آندے کیوں جو رَڑھ کپنڑ دا ویلا آ گِیا ہے۔“

رائی دے دانڑے دی مثال

30وَل یسُوع آکھیا، ”اساں خُدا دی بادشاہی کُوں کیندے نال تشبیہ ڈیؤں تے کیہڑی مثال نال اُونکُوں بیان کرُوں؟ 31او رائی دے دانڑے وانگُوں ہے جو جِیں ویلے رہایا ویندے تاں زمین دے سبھ بِیجاں کنُوں چھوٹا ہوندے 32پر جِیں ویلے رَہا یا گِیا تاں اُگ تے ساریاں بُوٹیاں کنُوں وڈا تھی ویندے تے اُوندیاں لڑیاں اِتی وڈیاں تھی ویندیاں ہِن جو ہوا دے پکھی اُوندی چھاں ءچ رہ سگدے ہِن۔“

33یسُوع اُنہاں کُوں اِیں طرحاں دیاں بہُوں ساریاں مثالاں نال اُنہاں دی سمجھ دے مطابق کلام سُنڑیندا ہا 34تے بغیر مثال دے اُنہاں کُوں کُجھ نہ آدھا ہا۔ پر کلھیپے ءچ آپنڑے شاگرداں کُوں سبھ کُجھ سمجھا ڈیندا ہا۔

یسُوع طوفان کُوں ہٹک ڈیندے

35اُونہی ڈینہہ جِیں ویلے شام تھئی تاں اُوں شاگرداں کُوں آکھیا، ”آؤ جھیل دے پار جُلوں۔“ 36تے او بِھیڑ کُوں چھوڑ تے اُونکُوں جیہڑے حال ءچ او کشتی ءچ ہا، نال گِھن تے روانہ تھئے۔ کُجھ بئیاں کشتیاں وی اُنہاں دے نال ہَن۔ 37تے وڈی اندھاری گُھلی تے پانڑی دیاں چھلاں کشتی نال زور نال ٹکراوݨ لگ گئیاں تے اُوندے ءچ پانڑی بھریجنڑ لگا۔ 38پر یسُوع کشتی دے پِچھلے حصے ءچ ہِک گدّی اُتے سُتا پِیا ہا۔ بس اُنہاں اُونکُوں جگایا تے آکھیا، ”اُستاد! کیا تُہاکُوں پرواہ نئیں جو اساں ہلاک تھیندے پئے ہیں؟“

39اُوں جاگ تے ہوا کُوں دَڑکا ڈِتا تے جھیل کُوں آکھیا، ”خاموش تھی! رُک وَنج!“ بس ہوا رُک گئی تے بالکل سکون تھی گِیا۔ 40وَل اُنہاں کُوں آکھیا، ”تُساں کیوں ڈر دے ہیوے؟ ہُنڑ تئیں اِیمان نئیں رکھیندے؟“

41او حد کنُوں زیادہ ڈر گئے تے ہِک بئے کُوں آکھنڑ لگے، ”ایہ کوݨ ہے جِیندا حُکم ہوا تے پانڑی وی منیندے ہِن؟“

Currently Selected:

مرقس 4: SKRV

Highlight

Copy