مرقس 5

یسُوع ہِک بدرُوح گرفتہ بندے کُوں شِفا ڈیندے

1وَل او جھیل دے پار گراسینیاں دے علاقے ءچ پُجے۔ 2جِینویں ای یسُوع کشتی ءچوں لتھا، ہِک بندہ جیندے ءچ بدرُوح ہئی، قبرستان ءچوں نِکل تے اُونکُوں مِلیا۔ 3او قبراں ءچ راہندا ہا تے ہُنڑ کوئی اُونکُوں زنجیراں نال وی نہ بَدھ سگدا ہا۔ 4پہلے اُونکُوں اکثر بیڑیاں تے زنجیراں نال بَدھ تے رکھیا ویندا ہا، پر او زنجیراں کُوں تروڑ سٹیندا تے بیڑیاں دے ٹوٹے ٹوٹے کر ڈیندا ہا، تے کوئی اُونکُوں قابو ءچ نہ رکھ سگدا ہا۔ 5او ڈینہہ رات قبراں تے پہاڑاں ءچ پِھردا تے ہر ویلے چیخدا راہندا تے آپنڑے آپ کُوں پتھراں نال زخمی کر گِھندا ہا۔

6او یسُوع کُوں پرے کنُوں ڈیکھ تے بھجیا تے اُونکُوں سجدہ کیتا۔ 7تے زور نال چیخدے ہوئے آکھیا، ”یسُوع، خُدا تعالیٰ دے پوتر! میکُوں تیڈے نال کیا کم؟ تیکُوں خُدا دا واسطہ، میکُوں عذاب ءچ نہ سَٹ۔“ 8کیوں جو یسُوع اُونکُوں آکھیا ہا، ”بدرُوح! اِیں بندے ءچوں باہر نِکل وَنج۔“

9وَل یسُوع اُوں کنُوں پُچھیا، ”تیڈا ناں کیا ہے؟“

اُوں جواب ڈِتا، ”میڈا ناں لشکر ہے کیوں جو اساں بہُوں سارے ہاں۔“ 10وَل اُوں اُوندی بہُوں مِنت کیتی جو ”ساکُوں اِیں علاقے کنُوں باہر نہ بھیج۔“

11اُتھاں پہاڑ اُتے سُؤراں دا ہِک وڈا اِجڑ چردا پِیا ہا۔ 12بدرُوحاں اُوندی مِنت کر تے آکھیا جو ”ساکُوں اُنہاں سُؤراں ءچ بھیج ڈے تاں جو اساں اُنہاں ءچ داخل تھی ونجُوں۔“ 13یسُوع اُنہاں کُوں اِجازت ڈِتی تے بدرُوحاں اُوں بندے ءچوں نِکل تے سُؤراں ءچ داخل تھی گئیاں۔ تے اُوں اِجڑ دے سارے سُؤر، جیہڑے تقریباً ڈُو ہزار ہَن، ریڑھ کنُوں بھجدے ہوئے جھیل ءچ وَنج ڈھٹھے تے بُڈ مرے۔

14سُؤر چراوݨ آلے اُتھوں کنُوں بھج پئے تے شہر تے دیہات ءچ اِیں گالھ دی خبر پُچائی۔ بس لوک ایہ ڈیکھنڑ کیتے نِکل آئے۔ 15او یسُوع دے کولھ آئے، تے اُوں بندے کُوں جیندے ءچ بدرُوحاں دا لشکر ہا، کپڑے پاتے، تے ہوش ءچ بیٹھے ڈِٹھا تاں ڈر گئے۔ 16جِنہاں ایہ واقعہ ڈِٹھا ہا اُنہاں بدرُوح گرفتہ بندے تے سُؤراں دا حال اُنہاں کُوں بیان کیتا۔ 17وَل او یسُوع دی مِنت کرݨ لگے جو ”ساڈے علاقے ءچوں چلیا وَنج۔“

18جِیں ویلے یسُوع کشتی ءچ چڑھن لگا تاں او بندہ جیہڑا پہلے بدرُوحاں ءچ گرفتار ہا، اُوندی مِنت کرݨ لگا جو ”مَیں تُہاڈے نال ویساں۔“

19پر اُوں اُونکُوں اِجازت نہ ڈِتی بلکہ اُونکُوں آکھیا، ”گھر وَنج تے آپنڑے لوکاں کُوں ڈسا جو خُداوند تیڈے کیتے کتنے وڈے کم کیتے تے تیڈے اُتے رحم کیتا۔“

20او چلیا گِیا تے دکُپُلس ءچ اِیں گالھ دا چرچا کرݨ لگا جو یسُوع اُوندے کیتے کیجھے وڈے کم کیتے، تے سارے لوک حیران تھیندے ہَن۔

یائِیر دی دِھی تے ہِک عورت کُوں شِفا

21جِیں ویلے یسُوع کشتی ءچ جھیل دے پار گِیا تاں اُتھاں وڈی بِھیڑ اُوندے کولھ آئی، تے او جھیل دے کنارے اُتے ہا۔ 22وَل مقامی عبادت خانہ دا ہِک سردار جِیندا ناں یائِیر ہا، اُتھاں آیا۔ او یسُوع کُوں ڈیکھ تے اُوندے پیراں ءچ ڈھے پِیا 23تے مِنت کریندے ہوئے آکھنڑ لگا جو ”میڈی نِکی دِھی مرݨ آلی ہے۔ مہربانی کر تے آؤ تے اُوندے اُتے آپنڑے ہتھ رکھو تاں جو او ٹھیک تھی ونجے تے زندہ راہوے۔“

24بس یسُوع اُوندے نال روانہ تھیّا تے وڈی بِھیڑ اُوندے پِچُھوں تھی پئی تے اُوندے اُتے ڈھاندی پئی ہئی۔

25بِھیڑ ءچ ہِک تریمت ہئی جِیندا بارہاں سالہاں کنُوں خون جاری ہا۔ 26او بہُوں حکیماں کنُوں علاج کروا کروا تے ڈُکھ جَھلی کھڑی ہئی، تے آپنڑی ساری جمع پُونجی خرچ کر تے وی اُونکُوں کُجھ فائدہ نہ تھیّا ہا بلکہ زیادہ بیمار تھی گئی ہئی۔ 27او یسُوع دے بارے ءچ سُنڑ تے بِھیڑ ءچ اُوندے پِچُھوں کنُوں آئی تے اُوندی پُشاک کُوں ہتھ لا یا، 28کیوں جو او آدھی ہئی جو ”جے مَیں اُوندی پُشاک کُوں ای ہتھ لا گِھنساں تاں ٹھیک تھی ویساں۔“

29تے فوراً اُوندا خون واہنڑ بند تھی گِیا، تے اُونکُوں آپنڑے بدن ءچ محسوس تھیّا جو مَیں آپنڑی اِیں بیماری کنُوں شِفا پا گِھدی ہے۔ 30یسُوع فوراً جاݨ گِھدا جو اُوندے ءچوں قوت نِکلی ہے۔ او بِھیڑ ءچ پِچُھوں مُڑ تے پُچھنڑ لگا، ”کئیں میڈی پُشاک کُوں ہتھ لائے؟“

31شاگرداں اُونکُوں آکھیا، ”تُساں ڈیدھے پئے ہیوے جو لوک تُہاڈے اُتے ڈھاندے پئے ہِن، تے وَل وی تُساں پُچھدے ہیوے جو ’کئیں میکُوں ہتھ لائے‘؟“

32اُوں چودھارُوں نِگاہ ماری تاں جو اُونکُوں ڈیکھے جئیں اِینویں کیتے؟ 33او عورت ایہ جاݨ تے جو اُوندے اندر کیا تھئے ڈردی تے کمبدی ہوئی آئی تے اُوندے اگُوں ڈھے تے اُونکُوں ساری حقیقت ڈسائی۔ 34یسُوع اُونکُوں آکھیا، ”دِھی تیڈے اِیمان تیکُوں چنگا کر ڈِتے۔ خیر نال وَنج تے آپنڑی بیماری کنُوں بچی رہ۔“

35او ایہ آدھا ای پِیا ہا جو عبادت خانہ دے سردار دے گھر تُوں کُجھ لوک آ تے آکھنڑ لگے جو ”تُہاڈی دِھی مر گئی ہے۔ ہُنڑ اُستاد کُوں تکلیف کیوں ڈیندے ہیوے؟“

36یسُوع اُنہاں دی گالھ اُتے توجہ نہ ڈِتی تے عبادت خانہ دے سردار کُوں آکھیا، ”اصلُوں نہ ڈر، صرف اِیمان رکھ۔“ 37وَل اُوں پطرس، یعقُوب تے یعقُوب دے بِھرا یُوحنّا دے علاوہ کہیں بئے کُوں آپنڑے نال آوݨ دی اِجازت نہ ڈِتی۔ 38جِیں ویلے او عبادت خانہ دے سردار دے گھر پُجے تاں اُوں ڈِٹھا جو اُتھاں لوک بہُوں شورشرابہ تے ماتم کریندے پئے ہِن۔ 39اُوں اندر وَنج تے اُنہاں کُوں آکھیا، ”تُساں کیوں اِتنا شور مچیندے تے روندے ہیوے؟ چُھوہیر موئی نئیں بلکہ سُتی پئی ہے۔“

40او اُوندے اُتے کِھلنڑ لگے۔ پر اُوں اُنہاں ساریاں کُوں اُتھوں باہر کڈھ ڈِتا تے چُھوہیر دے ماء پِیُو تے آپنڑے شاگرداں کُوں گِھن تے چھوہیر دے کولھ گِیا۔ 41وَل چھوہیر دا ہتھ پکڑ تے اُونکُوں آکھیا، ”تلیتا قُومی!“ جِیندا مطلب ہے ”چھوہیر مَیں تیکُوں آدھا ہاں، اُٹھی۔“

42چُھوہیر فوراً اُٹھی تے ٹُرݨ پِھرݨ لگ پئی۔ او بارہاں سال دی ہئی۔ ایہ ڈیکھ تے لوک بہُوں ای حیران تھئے۔ 43وَل اُوں اُنہاں کُوں چِتا تے آکھیا جو ”اِیں گالھ دا کہیں کُوں پتہ نہ چلے۔“ تے آکھیا جو ”چھوہیر کُوں کُجھ کھاوݨ کیتے ڈِتا ونجے۔“

Currently Selected:

مرقس 5: SKRV

Highlight

Copy