SEEMTIRNAK 12

Pathian In Abram A Ko

1Pathian in Abram hnenah, “Na ram, na miphun le na pa ih inn taanta awla ka lo hmuh dingmi ramah feh aw. 2Tefa tampi ka lo pe ding ih miphun tumpi-ah an cang ding. Ka lo thlawsuah ding ih na hmin ka thanter ding; cutiin thlawsuah mi na si ding.

3A lo thluasuahtu cu

ka thlawsuah ve ding,

Asinain siat a lo camtu cu

ka camsia ve ding;

Nangmah ka lo thlawsuah vekin,

Leitlun mi hmuahhmuah in

thlawsuah in dil ding,”#12.3 Nangmah … thlawsuah in dil ding: timi hi, Nangmah ruangah leitlun mi hmuahhmuah ka thlawsuah hai ding ti tla a si thei. ti ah a ti.

4Abram cu kum sawmsarih le kum nga a ti tikah, Bawipa ih a fial vekin, Haran khua cun a suak. Lot khal in a thlun ve. 5Abram cu a nupi Sarai le a nau ih fapa Lot le Haran khua ih an neihmi sal pawl le an thil neih hmuahhmuah thawn Kanaan ramah cun an feh. Kanaan ram an thlen tikah,

6Abram cu a feh vivo ih hmun thianghlim Shekhem khua Moreh hmunih sasua kung ah a va thleng. Cuih caanah Kanaan mi pawl acuih ramah an um lai. 7Bawipa cu Abram hnenah a lang ih, “Na tesinfa hnenih ka pek dingmi ram cu hi ram hi a si,” ti ah a ti. Cule cutawkah Abram in a hnenih a langmi Bawipa hrangah biakṭheng a don. 8Cuih hnuah Abram cu thlanglam ah, Bethel khua ihsin nisuahnak lam tlangpar ram ah a ṭhawn ih nitlaknak lamah Bethel, nisuahnak lamah Ai khua, cuih karlakah riahbuk a sak. Cutawk khalah cun biakṭheng a don ih Bawipa cu a biak. 9Cun thlanglam Negev ram lamah riahbuk pakhat hnu pakhat sak in a ṭhawn vivo.

Abram Izipt Ram A Thleng

10A cuih ramah nasazetin paam a tlung ih rawl ei ding a um lo ruangah Abram cu Izipt ramah caan tawite sung um dingin a vung feh. 11Izipt ramri a thlen zik tikah a nupi Sarai hnenah, “Nang hi nunau hmelṭha na si. 12Izipt mi pawl ih an lo hmuh tikah Abram nupi a si, an ti ding ih nangmah co duh ah keimah riangri in that pang ding. 13An lo sut asile a farnu ka si na ti pei. Cuticun nangmah ih ruangah ka luat ding ih in zohṭha ding a si,” a ti. 14Izipt ramsung an vung lut tikah Izipt mi pawl cun, “Sarai cu mimawi a si,” an ti ngaingai. 15Bawi pawl in an hmuh ve tikah a mawizia cu an siangpahrang hnenah an va sim ih siangpahrang inn ah an fehpi. 16Sarai ruangah Izipt siangpahrang in Abram cu ṭhazet in a zoh ih tuu le me pawl, caw le laak le kalauk pawl a ruun a ruun in a ṭhen ih sal tampi tiangin a pek.

17Sikhalsehla Sarai cu siangpahrang ih inn a thlen ruangah Bawipa in siangpahrang le a innsungih a ummi hmuahhmuah parah ṭihnungza natnak a tlunter. 18Cutikah Faro siangpahrang in Abram cu a ko ih, “Ziang hrangah hi bangtuk in i tuah? Ziangah so ka nupi a si, ti ah fiangtein i sim lo? 19Ziangruangah ka farnu a si ti ah na ti? Ka farnu a si na ti ruangah a si nupi ih ka lak. Atu zamrangin na nupi hi lak awla suak uh,” ti ah a ti. 20Faro in a kuthnuai mi hnenah thu a pek ih Abram cu a nupi Sarai le an neihmi hmuahhmuah tla thawn Izipt ram ihsin an dawi.

Currently Selected:

SEEMTIRNAK 12: FCL

Highlight

Copy