SEEMTIRNAK 13
13
Abram Le Lot An ṭhen Aw
1Cutiin Izipt ram in Abram cu a suak ih saklam ram Negev lamah a nupi le a neihmi hmuahhmuah thawn an feh. A hnenah Lot khal a tel. 2Abram cu milianzet a si ih tuu, me, caw pawl tampi a nei ih sui le ngun khal a nei. 3Negev in a pok ih riahbuk pakhat hnu pakhat a ṭhawn vivo ih, hmaisa bikih riahbuk a saknak Bethel le Ai karlakih ram lamah a feh. 4A hmaisaih biakṭheng a tuahnak hmun a thlen tikah Bawipa ih a hmin a ko.
5Cule Abram thawn a feh ve mi Lot khal in tuu le me le caw pawl tampi a nei ih hnenum tla a nei. 6Abram le Lot cu ṭilva tampi an nei veve ih rannung ei ding hrampi khopkham a um lo ruangah hmunkhat ah an umtlang thei lo. 7Curuangah an ṭilva kiltu pawl karlakah napi ih tawh awknak a suak. Culai ahcun Kanaan mi le Periz mi pawl cuih ramah an um lai hrih a si. 8Cutikah Abram in Lot hnenah, “Sungkhat kan si ih na minung pawl le ka minung pawl hi to-aw rero ding an si lo. 9Kan ṭhen-aw sawn pei. Na duhmi ram hril awla cutawkah feh aw. Kei hmun dangah ka feh pei,” a ti. 10Cutikah Lot cu khua a cuan ih, Bawipa ih hmuan le Izipt ram vek a si mi Jordan tiva kap phairawn cu Zoar tiang tidai tamzet ih ngahmi ramṭha a si kha a hmu. Culai ahcun Sodom le Gomorrah pawl cu Bawipa in a siatter hrih lo. 11Lot cun amah ih hrangah Jordan tiva kap phairawn zatein a hril ih nisuahnak lamah a cer. Cuticun an ṭhen-awta. 12Abram cu Kanaan ramah cun a um ih Lot cu phairawn ih khawpi lakah a um. Sodom khua kiangah buk a sak. 13Sodom khuasung mi cu miṭha lozet an si ih Bawipa hmaiah an sual ngaingai.
Abram Hebron Ah A Cer
14Lot ih a tlansan hnu cun Abram hnenah Bawipa in, “Na umnak hmun ihsin sak le thlang, nisuah le nitlak, khuazakip hi ṭhatein zohhnik. 15Na hmuhmi ram hmuahhmuah hi nangmah le na tesinfa hnenah ka lo pe ding ih kumkhua in nan ram a si ding. 16Tesinfa tampi ka lo pe ding ih leilung parih leidip siar cawk lo an si bangin na tesinfa khal siar cawk lo an si ding. 17Cutiin hi ram hi a tung a vang in haal thluh aw; ziangahtile a zatein ka lo pe thluh ding a si,” ti ah a ti. 18Curuangah Abram cu a riahbuk a ṭhawn ih Hebron khua Mamre sasua kung kiangah hmun a khuar. Cutawkah Bawipa hrangah biakṭheng a don.
Currently Selected:
SEEMTIRNAK 13: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
