SEEMTIRNAK 14
14
Abram In Lot A Run
1Cuih caanah siangpahrang pali: Babilonia siangpahrang Amrafel, Ellasar siangpahrang Ariok, Elam siangpahrang Khedorlaomer le Goiim siangpahrang Tidal pawl in, 2a dang siangpahrang panga: Sodom siangpahrang Bera, Gomorrah siangpahrang Birsha, Admah siangpahrang Shinab, Zeboiim siangpahrang Shemeber le Bela (a si lole Zoar) siangpahrang pawl tla an do. 3Atuih Rili Thi timi Siddim nelrawn ah khin cuih siangpahrang panga cu an kom-aw ih an ṭang tlang. 4Anmah cu kum hleihnih sung Khedorlaomer in a rak uk zo ih a kum hleithumnak ah amah do dingin ral a thotu an si. 5A kum hleilinak ah Khedorlaomer le a ṭanpi pawl cun an ralkap zate thawn an do ciamco ih Ashteroth Karnaim ah Refaim an neh, Ham ah Zuzim an neh, Kiriathaim hmunrawn ah Emim an neh ih, 6vunnel rawn kiangih ummi Elparan tiang, Seirih tlang parah Hor mi pawl tla an neh thluh a si. 7Cun dunglamah an kir ih Kadesh (Kadesh a si lole Enmishpat) an thlen tikah Amalek mi pawl ih ram hmuahhmuah an hun lak phah ih Hazazon Tamar ih ummi Amor mi khal an neh thluh a si.
8Cutikah Sodom, Gomorrah, Admah, Zeboiim le Bela khua ih siangpahrang pawl cun an ralkap neihmi hmuahhmuah an khawm ih, 9Elam siangpahrang Khedorlaomer, Goiim siangpahrang Tidal, Babilonia siangpahrang Amrafel le Ellasar siangpahrang Ariok pawl thawn Siddim nelrawn ah siangpahrang panga le siangpahrang pali an do-aw ciamco. 10Siddim nelrawn cu zinan suahnak khur in a khat ih, Sodom le Gomorrah siangpahrang pawl cu an raldonak in an tlan tikah acuih khur sungah an tla ciamco. A dang pathum pawl cu tlang parah an tlan hlo. 11Siangpahrang pali pawl cun Sodom le Gomorrah khuasungih a ummi thil hmuahhmuah, an ei ding rawl tiangin an lak ih an tlan. 12Sodom khuasungih a ummi Lot khal a neihmi hmuahhmuah thawn an kai ih an hruai.
13Sikhalsehla raltlan pa pakhat cu Hebru mi Abram hnenah a ra ih Lot an kaihnak thu a ra sim. Abram cu Amor mi Mamre ih sasua kung kiangah a um. Mamre ih unau pawl cu Eshkol le Aner an si ih an pathum in Abram ṭantu an si. 14Abram cun a sungkhat pa an kaihnak thu a theih tikah a milai pawl a kokhawm ih pacang hlir zathum le hleiriat an pok ih ral pawl cu Dan tiang an dawi. 15Cutawk hmunah Abram milai pawl cu bu hnih ah an ṭhen-aw ih zanah an ral pawl cu an do ih an neh. An ral pawl cu Damaskas khua saklam ih a ummi Hobah tiang an hun dawi. 16A sungkhat pa Lot le Lot ih neihmi hmuahhmuah le nunau pawl le ral kaihmi dangdang thawn a long thluh ih a kirpi sal thluh.
Melkhizedek In Abram A Thlawsuah
17Abram cu Khedorlaomer le siangpahrang dang pawl a va nehnak ihsin a kir tikah Sodom siangpahrang cun Shaveh phairawn (Siangpahrang Phairawn ti khalih timi) in a rak hmuak. 18Cutikah Salem siangpahrang Melkhizedek khal in sang le sabitti a keng ih Abram cu a hmuak ve. Melkhizedek cu Cungnungbik Pathian ih puithiam khal a si ih Abram cu thluasuahnak hiti in a pek:
19“Cungnungbik Pathian,
Lei le van tuahtu in,
Abram cu thlawsuah hram seh.
20Na ral pawl parih nehnak a lo petu,
Cungnungbik Pathian cu
thangṭhat in um seh,” ti ah a ti.
Cule Abram in ralkut ihsin a lakmi hmuahhmuah sungih ṭhenhra ih ṭhenkhat Melkhizedek hnenah a pek.
21Cule Sodom siangpahrang in Abram hnenah, “Na lakmi thil hmuahhmuah cu nangmah in co aw; asinain minung pawl cu keimah i pe sal hram aw,” ti ah a dil. 22Asinain Abram in, “Van le leilung Tuahtu Cungnungbik Pathian Bawipa ih hmaiah baan phar in thu ka kam-aw: 23Na ta a si mi hmuahhmuah pat-hlum le kedamhri ih thokin ziangthil hman ka la lo ding. Curuangah ‘Abram a liantertu cu keimah ka si,’ na ti thei dah lo ding. 24Ka hrangah cun zianghman ka la lo pei. Ka milai pawl ih an ei an in ciami le, i ṭanpitu pawl ih covo lawnglawng ka saang ding; cule Ener, Eshkol le Mamre khal in an covo an la ve ding,” ti ah Sodom siangpahrang hnenah a ti.
Currently Selected:
SEEMTIRNAK 14: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
