Kɛɛradzin neè faadziɛ 5

Ananiyasì ko Sàfira raa goò

1Àyìwà, kpiri sɔn ko e re tààn sa na ni. Kpirimaa tsoo na ci Ananiyasì, tàànmaa tsoo yè bà ci Sàfira. Dzù sɔn na ni twɛy sa re. Tɔ̀un, è sa yeè bè tɔ̀ dzùà gɔɔ. 2Dzùà gɔrɔun, è mòkun fiɛ̀ yè byɛ̀n à mà, y'à ɲɛɛn sɔn sen yè tɔ̀ mɛnɛn e sijaa re. Ananiyasì yè kòmànà à dzyeè sen, è bè tɔ̀ sìn kɛɛradzin neè rà. 3Piyɛrì yè Ananiyasì tey tɔ̀ rii ɲàn ci: «Ananiyasì, è bà dzùrù wo y'à to Sùtana yè dzi wo dzuun nèe tsuru. Wo Ŋaablà re Dzi Fɛnɛɛ màniin ! Nìi bàu wo re dzùà ɲɛɛn, wo tɔ̀ sɔn mɛnɛn tou a re, wo yè kòmànà à dzyeè sen na sìn. 4N ci dzùà na wo yɛ̀r'la raa rìì, mòo dziun wo y'à gɔɔ kparamà ɔ̀n ? Wo to kɛ̀nsɛɛn ye ba à gɔrɔun, n ci à ɲɛɛn wo rìì laa ? Wo na dzia à bà a sao kɛ ! Fee y'à to, wo yè bè nèe goo kaatsi rèe faa ji a duùn. À na ni, a ci wo mòdzin ì nì màniina dɛ, ŋà, à Ŋaablà rii màniinma.»

5Ananiyasì dziu twɛy gooma reè myɛ̀n min niì, è mɛɛy sɔn, è san. Gè o ge tɔ̀ goò goomaa myɛ̀un, è sapɛ yeè shi, fɔ è bè geren. 6Dzunwɛyn neè swey yè fù tɔ̀un, twɛy yè nà Ananiyasì fùàn sen, yè b'a wɔ. 7À na waatsi bo waa, Ananiyasì rè tààn yè nà tɔ̀ gàne soo ɲàn. Goo rìi y'à re kpir'la tàraɔ̀, à naà sɔn tɔ tɔ̀ ɲan waa. 8Piyɛrì y'à tey ci: «À yɛ ɔ Sàfira, wo ko a re kpir'la yè e re dzùà gɔrɔun nèe ɲɛyn dzii ree rìì là ɔ̀ ?» Sàfira yeè dzin ci: «Taki, ɲe y'à gɔrɔun tɔ̀ dziɛ̀ rìì là.» 9Piyɛrì yè dzin à ra ci: «À bàu dzùrù ye yè byɛ̀n à mà nèe tsuru, ci ye mùn Tsìfa Ŋaablà rè Dzia dzuun boò ? À wa, à yɛ nèe, nìi reè bèu wo re kpir'la fùn wɔ, twɛy yɛ dziɛ̀ rà, è to nà bè wo sa ka rìì.» 10Tɔ̀ nɔ̀nkɔɔrɔn ko e sa, taàn yè mɛɛy, è san to mɔn Piyɛrì sàn dzuun. Dzunwɛyn neè nàu dɔ̀n gbàà doùn min niì, y'à fùàn jà. Tɔ̀un, y'à sa sen, yè bè à wɔ e re kpir'la tɛyn. 11Àwà, twɛy goo nìi reè fau, ɲɛynamoo kur'là sapɛ, ko gè o ge y'à goomaa myɛ̀un, è sapɛ yeè shi fɔ è bè geren.

Kɛɛradzin neè rè kabagoo goo reè swey

12Àwà, kɛɛradzin neè na kabagoo goo giri faa mòdzian fi. Gàne nìi na kir'là Ŋaablà re gbà blàa fɔɔn rè, ci màsà Sɔ̀ɔ̀mɛyn naa fààkɔ̀r'laà, Yesù rè kàràndzin neè sapɛ na bàa e si ladzyee mɔn nì. 13Dzyèèsìbee mòdzìn dzyee reè naà e tsiɛ, yè e ba è tɛ̀y waa. Tà ko e sa ra, mòdzian na è saan, fɔ è bè geren.

14Kpir'leè ko tàan nìì reè ɲɛun Tsìfa Yesù rà, yè e ba à re kàràndzin neè tɛ̀y, twɛy na giribe beè vu rìi mà, è na giribe beè tɔ̀ vuà rìì mà. 15È nà bè wɔ, fɔ mòdzian yè boò ko e re ɲìnìnkɔɔn reè ka ɲìnìnkɔ̀ɔ̀n seen gè re tsɛ, yè bè è ɲɛɛn shi reè tsɛ wɔ̀ɔ̀ doùn. Tà tsuru, Piyɛrì dɔ̀n bokɔɔn ɲɛɛ̀n bàsɔùn dzia dɔ̀n bo twɛy swey tsɛ, yè dzi cɛrɛmabe tàrà. 16Mòdzian na daàn Yerusalɛmùn dziire wɔ rèè min niì sapɛ, yè Yerusalɛmùn màkaà ko e re ɲìnìnkɔɔn reè ka, kweykɔɔn ì sa yeè bà ni è ɲan. È sapɛ to na cɛrɛmabeè.

È kɛɛradzin neè kitsiu min niì kɔn

17Tɔ̀un, tà goò jaaɲininbe yè Saaka Jɔundzin blaa ko e kpɛyn dzin neè sapɛ kun, è ci fɔ yè goo bo à ɲan. Twɛy rìì na Sadusiɲɛn rèè raa kur'la mòdzin neè. 18Tà doùn, yè kɛɛradzin neè kun, yè bè è tsyee kàsògba blàa rà. 19Ŋà, fen nɔ̀n, Ŋaablà yeè e re mɛ̀rɛ̀kɛ sɔn baji na, è nà kàsògbaà dzii san, è kɛɛradzin neè bo. À yè è bou, è dzin è ra ci: 20«Y'a wa Ŋaablà re gbà blàa rà, ye bè Ŋaablà re shia Kùnàgoo Dziɔ̀ dè mòdzian nà.»

21Àwà, mɛ̀rɛ̀kɛɛ̀ nìi dèu kɛɛradzin neè rà, yè tɔ̀ fa. Gbishɛɛ̀mà mur'lɔùn, kɛɛradzin neè yè dɔ̀n be Ŋaablà re gbà blàa fɔɔn rè, yè bè e maa yè mòdzian kàr'na. Kɛɛradzin neè ni mɔn, Saaka Jɔundzin blaa ko e kpɛyn dzin neè yè siin, yè kitsi kunun kur'là mòdzian ko Isirayɛlì bɔɔ rèè ladzyeè gàne soo ɲan. Yè e ladzyèeŋ, yè mòdzin ì ka bè, ci twɛy yè bè kɛɛradzin neè bo na kàsògbaà doùn. 22Ŋà, twɛy bèu wɔ mɔn, è na kɛɛradzin neè jà kàsògbaà doùn waa. Tɔ̀un, yè sèè na, yè nà dzin e kabaa rèè rà nèe tsuru ci: 23«Ɲe bèu à jà kàsògbaà dzii tsyeeŋ'n kur'la wù, à kplatsuubaa rèè sa tsìiŋnà à dzii ra, yè bà à kplatsuɔ. Ŋà, ɲe kàsògbaà dzii saun min niì, ɲe na mòò pɛn jà à doùn waa.»

24Ŋaablà re gbà blàa kplatsuubaa rèè jɔundzian, ko Saaka Jɔundzin neè dziu tɔ̀ goomaa myɛ̀n min niì, kɛɛradzin neè rè goò yè è duungoo do fɔ è bè geren. Yè e maa, yè dziàn e si ra, ci nèe goo rèe to yè bà nà nà kun dzùrù sa. 25È ni tɔ̀ goò kɛ̀sɛɛ̀ rà, sɔn yeè nà dzin è ra ci: «Ye mòdzin niì reè jiu kàsoò doùn, è ni Ŋaablà re gbà blàa fɔɔn rè, yè bà mòdzian kàr'na.» 26Tɔ dèu min niì, Ŋaablà re gbà blàa kplatsuubaa rèè jɔundzian ko è re mòò rèè swey yè fù, yè dɔ̀n be kɛɛradzin neè kpɛyn. È bèu wɔ, yè bè è kir'na vununmadzibe ka, kàtsu è na shiɔ̀ jàmaà jɔun, è mà nà ye dzyɛn kpà ì ka waa. 27È bèu è kir'na tɔ̀ tsuru, yè nà dɔ̀n è ka kitsikununma nɔ̀n. Tɔ̀un, Saaka Jɔundzin blaa yè dzin è ra ci: 28#Mat 27.25.«Ɲe to y'à dè màxɔbeu ye ra, ci ye mà gèsɔn dè mòò rà nèe tsoò soo re ka dɛ. À yɛ nèe, ye Yerusalɛmùn wɔ̀ɔ̀ sapɛ tsyɛn jiu ko e re kàr'nà ka, ye sàò to ni à re, ye yè ɲe rìì bà à saàn kùngɔ.»

29Ŋà, Piyɛrì ko kɛɛradzin dzyee reè yè dzin ci: «Sani ɲe yè mòdzian vu kun, à wù ɲe yè Ŋaablà rii vu kun. 30Ye Yesù nìi gbaun gɔɔ̀ rà, y'a vu, ɲe fàbɔɔ rèè rè Ŋaabla tɔ̀ rii sèè kpunan bou saàn ɲàn. 31Ŋaablà y'a sen teyn bèu, è bè à tsùù fɔ e sirama si jaa rè. À y'à bàu mùn kùntsii, à y'à bà mùn Tsibaa, gè riì ni à to Isirayɛlì mòdzin neè yè dzi e re jaamabee fau'n kur'la lakere, è re gooɲaantsiɛ̀ yè mɛɛy bo è vu ra. 32Nìì reè to Ŋaablà vu kuàn, à tɔ̀ Dzi Fɛnɛɛ rìì sìan twɛy rà.»

33Kitsi kunun kur'là mòdzin neè dziu tɔ̀ goomaa myɛ̀n min niì, è vunun yè ta cèè fɔ è bè geren. È sào na ni à re, ye yè kɛɛradzin neè vu. 34Ŋà, Faridziɲɛn sɔn na ni è kur'la ɲàn, tɔ̀ tsoo yè bà ci Gamaliyɛlì. À na Sàrìyà Kaamoo, mòdzian sapɛ yeè bà à blàbee. Àwà, Gamaliyɛlì yè fù tɔ̀un, à y'à gaa kitsi kunun kur'là mòdzìn dzyee reè rè, ci y'à to kɛɛradzin nèe yè bo da rɔ̀n ŋe, ci gooma ni wò re. 35Kɛɛradzin neè bou tɔ̀un, è dzin ci: «Ye Isirayɛlì mòdzin neè, ye yɛ nà nìi fa mòdzin neè ree rà nèe, ye e yɛrɛ kun à ra dɛ. 36À waatsi na ciɔ̀n waa, mùn kpiri sɔn jàu mìin, nìi tsoo ci Tedasì. Tɔ̀ kpir'la fùu mìin, è yɛrɛ ba mòdzin bla, fɔ mòkun caànmoò nààlen tsuru sa yeè bè e gban à kpɛyn. Ŋà, tɔ vuu, à kpɛyn dzin neè sapɛ yeè jee. Mòò na tɔ̀ gooma myɛn tà shɔ̀ùn dɛ. 37Tà shɔ̀ùn, Galileka kpiri sɔn yeè nà fù kɔn, tɔ̀ tsoo yè bà na ci Yudà. Jàmaàn mòdzian tsoò sɛbɛun jii riì rà, sànko è dzii yè tɔ̀, tɔ̀ raà fau tɔ̀ jiɛ rìì là. Tɔ̀ sa y'a fau mòò giri yè e gban à kpɛyn. Ŋà, tɔ̀ sa to vuu, à kpɛyn dzin neè sapɛ yeè jee.

38Tɔ̀ doùn, nìi ni mun ne, mun y'à dè ye ra, tɔ̀ rii siin nèe: E maà sɔ̀ɔ̀n nèe mòdzin neè ree rè goò kpɛyn dɛ, y'a to y'à waa. Nèe goo rèe ni goo fii rìì ɲàn: È kɛ̀sɛmàà ko è re goo fakɔɔn ye ba boo mòdzin ì nì ɲàn, à nà nà e dzii wɔ e yɛrɛ ma sii sɔn see. 39À to ye ba boo Ŋaablà rii ɲàn taki, ye fa dzi à bara dɛ. E ye dzin ci e maà bà Ŋaablà kaasi, ye e yɛrɛ kun dɛ !» Àwà, kitsi kunun kur'là mòdzin neè yè e tsiì Gamaliyɛlì rè goomaa nà. 40È byɛ̀un tɔ̀ mà, yè kɛɛradzin neè sèè kiri dɔ̀n e shɔùn. È nàu wɔ, yè è dɔrɔ sɛɛn ka, yè dzin è ra, ci ye mà à myɛ̀n, ci è goomau Yesù tsoo ka dɛ. Tà shɔ̀ùn, yè kòmànà è bàji, ci yè bèe. 41Kɛɛradzin neè taama dzibeuma brìsi yè bo kitsi kunun kur'là mòdzin neè tɛyn, kàtsu y'à jàu, ci à dzibeu Ŋaablà ra rìì, yè ye byɛn, yè ye seey Yesù tsoò kamà. 42Àwà, kɛɛradzin neè yè geren e re kàr'nà rè. Sii sa see, è na bèe Ŋaablà re gbà blàa rà ko fɔɔn reè rè, yè mòdzian kàràn beè, yè è toro kɔ̀ɔ Kùnàgoo Dziɔ̀ rà, ci Yesù rìì Ŋaablà Jaara Modzìàn.

Currently Selected:

Kɛɛradzin neè faadziɛ 5: BDZU

Highlight

Copy

Want to have your highlights saved across all your devices? Sign up or sign in

Learn More About Bible Dzùùngoo Unicode

Popular Bible Verses from
Kɛɛradzin neè faadziɛ 5

Video for Kɛɛradzin neè faadziɛ 5

Acts 1-12

The Bible Project

Kɛɛradzin neè faadziɛ 5

Popular Bible Verses from
Kɛɛradzin neè faadziɛ 5

Video for Kɛɛradzin neè faadziɛ 5

Acts 1-12

Bible:

Dzùùngoo

Version: Bible Dzùùngoo Unicode - BDZU