Kɛɛradzin neè faadziɛ 7

Etsiyɛnìn kaangoo niì jiu yè bà na à kuɔn

1Àyìwà, Saaka Jɔundzin blaa y'à tey tɔ̀un ci: «Mòdzian yɛ nìi dèe nèe, à to sààben ni ɔ̀ ?»

2 # Gok 12.1. Etsiyɛnìn yè dzin tɔ̀ rii ɲàn ci: «N fadzin ì ko n fa ì, ye e toro wɔ n ne. È ɲe fàbɔɔ Ibraximà to Mezopotamin jamaan nɔn, tɔ̀ y'a tàrà, à na be Aranìn tà rɔ̀n ŋe waa, nɔɔrɔɔ̀ Tsìfa Ŋaablà yeè e yɛrɛ kpadèu à ra, 3è dzin à ra ci:

"Bo a ta rɔ̀n, e bo a re mòò rèè fi, n naà jàmaàn nìi kpàdè a ra, e bè mɔn."

4 # Gok 11.31; Gok 12.4. Àwà, gàne rìi kir'là, ci Kalide jamaan, Ibraximà sa to yè bo mɔn tɔ rii ɲàn, è bè e tsuù Aranìn tà rɔ̀n. À fàà saunmaà shɔ̀ùn, Ŋaablà y'a bo Aranìn tà rɔ̀n, è nà à ka nèe jàmaàn rèe ɲan, ye yɛ min niì she. 5#Gok 12.7; 13.15; 15.18; 17.8.Àwà, jàmàan rèe doùn, arì gànèèrii, Ŋaablà naà tɔ̀ tsu siɔ̀n Ibraximà nà waa. Ŋà, Ŋaablà y'a làyiri sen à re, ci wò nà jàmaàn rèe ko e kur'la sìn à ra, wò y'a sìn à tsua sa ra à shɔ̀ùn. Tɔ̀ y'a tàrà, tɔ̀ waatsi rɔn, dzin naà ni Ibraximà rè ŋe waa. 6#Gok 15.13,14.Ŋaablà to yè dzin à ra nèe tsuru ci:

"Wo tsua dzin nèè nà e tsuù jàmààn tɔn'nà sɔn ɲan. È nà bà mɔn twɛy mòdzin neè rè jòn, yè è kuun'n kuru ɲaan fa, fɔ jii caànmoò nààlen." 7#Jdk 3.12.Àwà, Ŋaablà to yè dzin kɔn, ci

twɛy nìì reè yè è baɔ̀ e re jòn, wo nà e re kitsia kunun twɛy mòdzin neè tsɛ. Tà shɔ̀ùn, ci Ibraximà tsua dzin nèè yè kòmànà bo mɔn, yè nà wò blàbee mìin.

8 # Gok 17.10-14; Gok 21.2-4; Gok 25.26; Gok 29.31–35.18. Ŋaabla tɔ̀ dèu, è dzyèèsìbe wɔ ko Ibraximà ka, è kpirimɛyn neè shɛɛ̀n bà tɔ̀ dzyèèsìbee tàànmàshɛn. Tɔ̀un, Ibraximà nàu e dzin kpiri Ishakà kere, à kereomaà bwèy ŋaalòn, à y'à shɛn. Ishakà sa yeè nà tà soo fa e dzin kpiri Yàkubà rà. Yàkubà sa yeè tà soo fa e raa dzin kpiri teeŋ fii rèè rà, nìì reè ɲe fàbɔɔ rèè.

9 # Gok 37.11; Gok 37.28; Gok 39.2,21. Tà doùn, nìi Yusufù, Yàkubà dzin nèè mòò sɔɔ̀n, tɔ̀ jaaɲininbe yè e tsinà rèè kun, y'à gɔɔ, è bè bà jòn Misiran jamaan nɔn. Ŋà, Ŋaablà bàu ni Yusufù rè. 10#Gok 41.39-41.Tɔ̀ ɲan, à y'à tsi twɛy gooɲaan neè sapɛ ra. Ŋaablà yeè akiriblabe sìn Yusufù rà, à y'à fa à goo yè dzibe Fàràwuna na, nìi Misiran jamaan màsà kpir'là. Tɔ̀ rii y'à to, Fàràwuna yeè Yusufù bà Misiran jamaan sapɛ jɔundzin, ko màsà gbaà sapɛ kuntsiɛ̀. 11#Gok 42.1,2.Tɔ̀un, dzu brìsi yè mɛɛy Misiran jamaan ko Kananin jamaan sapɛ tsɛ. Àwà, mòdzian yè byɛn tɔ̀ waatsia doùn, fɔ è bè geren. Tà doùn, gèsɔn pɛn ɲɔnàma naà ni ɲe fàbɔɔ rèè rè dɛ.

12Yàkubà nàu à myɛ̀n ci shìmaan ni Misiran jamaan nɔn, è dzin kpir'leè ka bè e jaa jɔna ɲan, ɲe fàbɔɔ rèè, ci yè bè sɔn fi na. 13#Gok 45.1; Gok 45.16.Tà shɔ̀ùn, Yusufù tsìnà rèè nàu sèè be e jaa fiira ɲan, Yusufù yè kòmànà bè e yɛrɛ kpadè è ra. Fàràwuna sa yeè kòmànà Yusufù tsu tɔ tɔ̀ rii ɲàn. 14#Gok 45.9,10,17,18; Gok 46.27.Tà shɔ̀ùn, Yusufù y'à to yè bè wo fà Yàkubà ko wò re mòò rèè sapɛ sen na, è giribee yè bà na mòkun muey ko dzin teeŋ nun. 15#Gok 46.1-7; Gok 49.33.Yàkubà sa yeè bè e tsuù Misiran jamaan nɔn, ko e dzin nèè ka, nìì reè ɲe fàbɔɔ rèè. Yè to mɔn, fɔ è bè suu è sa jisee dzu. 16#Gok 23.3-16; 33.19; 50.7-13; Yok 24.32.Kpiri sɔn na ni, ci Amɔrì. Ibraximà na kpankɔɔ sɔn fiɔ̀ dan tɔ̀ kpir'la dzin nèè rè Sishɛmùn wɔ̀ɔ̀ tɛyn, à y'à bà e re fùnwɔma. Yàkubà ko e dzin nèè sa nàu san do, yè bè è wɔ tɔ̀ fùnwɔma nɔ̀n Sishɛmùn.

17 # Jdk 1.7,8. Àwà, Ŋaablà na làyir'lìi seòn Ibraximà rè, tɔ̀ fa waatsia tsyɛnbe naumaà, ɲe tsua dzin nèè, nìi Dzyèèsìbee mòdzin neè, twɛy yè buu ji Misiran jamaan doùn, fɔ è bè geren. 18Tà doùn, Misiran jamaan màsà kpiri giri dɔ̀n bouma shɔ̀ùn, màsà kpìrì ye soo yeè nà tsùù. Tɔ̀ màsà kpìrì yee naà sɔn tɔ Yusufù raa goo rèè ɲàn Misiran jamaan doùn waa. 19#Jdk 1.10,11; Jdk 1.22.Àwà, à na ba làyìrì modzìn waa, è ɲe re mòò rèè kuun'n kuru ɲaan fa. È bè wɔ, fɔ à y'à bà è mà fààn, ci yè e re dzinyɛy kereoma rèè maa, sànko yè san. 20#Jdk 2.2.Tɔ̀ waatsi rɔn nì, Ŋaablà re kɛɛra Musà kereu, à goo na dzi Ŋaablà ra. Y'à dziira gaa e faà rè gbàà doùn, è bè tàrà fɔ kuu zhììgi. 21#Jdk 2.3-10.È nàu à jà mɛnɛn fa à wùbe dɛ, yè bè à sa ji da rɔ̀n. Fàràwuna dzin taan y'à jàu tɔ̀ rii ɲàn, tɔ̀ y'a sen, è bè à lamɔnɔ̀n, a ci e yɛr'la ker'la dzin. 22Musà tou tɔ̀ rii tsuru mɔn, Misiranka reè rè akiri goo reè sapɛ yeè kàràn à ra, à yè è tɔ̀. Baraka na ni à dzugoomaa ko à re goo fakɔɔn reè sapɛ ɲan.

23 # Jdk 2.11-15. Àwà, Musà nàu jii dzyeè tsyɛn waatsi riì bwèy, è dzin ci wò nà bè e tsua mòdzin neè siin, nìi Dzyèèsìbee mòdzin neè. 24À bèu wɔ mɔn, à y'à jà, Misirankaa sɔn goo terenbɛy faa è re mòdzian sɔn na. Musà y'à kuun'n kur'la jàu tɔ̀ tsuru Misiranka kpir'là rè, è kpɛrɛ̀ ci wo nà à kùùn kaa fa. À ci e ye e re mòdzian tsìì bo goo nìi ka, è Misiranka kpir'là vu. 25Musà duungoo ma, wò ye tɔ̀ fa, ye re mòò rèè nà à tɔ̀ tɔ̀ rii tsuru, ci Ŋaabla ni à re, wò yeè wò rii ka è tsi. Ŋà, à re mòò rèè na à jà à re waa. 26Tɔ̀ raa gbey kɔn, Musà nàu bè, ci wo bèe e re mòò rèè siin, è b'a jà, ye re mòò rèè mòkun fii yè e si baan. Musà yè dɔ̀n è fi tɔ̀ rii ɲàn, ci wo nà è sòròn, yè byɛ̀n soo ma. À ci è ra ci: "N neema ì, feera ye yè bà nèe goo terenbɛy ree faa e si ra, n ci ye sa wò soo rii ?" 27Tɔ̀un, nìi na goo terenbɛɛ faa e koòsià rà, tɔ̀ yeè Musà tèn bo mɔn, è dzin à ra ci: "Tsì rii wo tsùuŋ, ci wo yè bà ɲe re kùntsii, wo yè kitsia kùn'na ? 28Wo sào mà bà ni à re, wo yè mun sa vu, a ci wo Misiranka kpir'là vuu nìi tsuru kuru dɛ ?" 29#Jdk 18.3,4.Musà dziu tɔ̀ goomaa myɛ̀n min niì, è fefe bo è bè to Màjàn jamaan nɔn. È dzin kpiri fii tàrà mɔn.

30 # Jdk 3.1-10. Jii dzyeè tà shɔ̀ùn, è Musà to Màjan, sii sɔn see, è nà bè jènjàà kor'nà doùn Sinayirì jèèn tɛyn, Ŋaablà re mɛ̀rɛ̀kɛ sɔn yeè e yɛrɛ kpadè à ra gɔ̀ɔ̀kùìrii tsuunma sɔn ɲan, sàà yè bà ni à ra. 31Tɔ̀ goò jàumaà Musà rè, tɔ̀ y'a duungoo do, fɔ è bè geren. À kpɛ̀rɛ̀ bekɔɔn ci wo nà à lafyɛu'n kuru wube, mùn Tsìfa Ŋaablà yeè gooma à ka ci:

32"Mun wo fàbɔɔ rèè rè Ŋaablàa rìì: Ibraximà rè Ŋaablà, ko Ishakà rè Ŋaablà, ko Yàkubà rè Ŋaablà." Musà shiumaà, à mà sɔ̀ɔ̀nkɔɔn, à naà kuà à ɲan è kungɔɔ̀ tsu rii ɲansen è siin fa waa. 33Mùn Tsìfa Ŋaablà yeè dzin à ra tɔ̀un ci:

"Seereyn neè bo a san nà, kàtsu wo yɛ gàne rìi ɲàn, à gàne fɛnɛ rii. 34È mun ne mòò rèè kuun'n kuru ɲaan faɔ̀ nìi tsuru Misiran jamaan nɔn, mun tɔ̀ jàu. Mun yè è ŋmunan vuà myɛ̀un. Mun naɔ̀ nì, mun yè nà è tsi bo tɔ̀ byɛnbee ɲàn. Àwà, nà dòònuùn, m'a ka bè Misiran jamaan nɔn."»

35 # Jdk 2.14. Àwà, Etsiyɛnìn yè geren goomaa ka kɔn ci: «Nìi tɔ̀ Musà, Dzyèèsìbee mòdzin neè yè e nɔun à re, yè dzin à ra nèe tsuru ci: "Tsì rii wo tsùuŋ ci wo yè bà ɲe kùntsii, wo yè ɲe re kitsia kùn'na ?" Àwà, Ŋaabla nàu tɔ̀ Musa tsoo soo rìì ka bè Misiran jamaan nɔn, è bè bà Dzyèèsìbee mòdzin neè kùntsii, è tsi mɛ̀rɛ̀kɛɛ̀ baraka rɔ̀n, nìi goomau à ka gɔ̀ɔ̀kùìrii tsuunmaà ɲàn. 36#Jdk 7.3; Jdk 14.21; Dɛk 14.33.Wò rii to kabagoo goo ì, ko goo blà bla ì fau Misiran jamaan doùn, è Dzyèèsìbee mòdzin neè bo. È tà soo fa kòòyu xeo fuumà nɔ̀n, ko è re tsyeeree fama nɔ̀n jènjàà kor'nà doùn, è bè tàrà fɔ jii dzyeè. 37#Sdk 18.15,18.Tɔ̀ Musa tsoo soo rìì dziun kɔn Dzyèèsìbee mòdzin neè rà nèe tsuru ci: "Ŋaablà nà mun tsuru kɛɛra baji na ye re, è bo ye re mòdzìnbè saan ɲàn."

38 # Jdk 19.1–20.17; Sdk 5.1-33. Dzyèèsìbee mòdzin neè na e ladzyèeŋnà waatsi riì bwèy jènjàà kor'nà doùn, Musà rìì na ni è ka mɔn. Mɛ̀rɛ̀kɛɛ̀ na goomaa wò rii ka Sinayirì jèèn tsɛ, è bà tɔ̀ gooma reè dzia ɲe fàbɔɔ rèè tsɛ. Musà na Ŋaablà re sàrìyà shi rèè goomaa tàr'la tɔ̀ rii tsuru, è nà è dzia mùn tsɛ. 39Ŋà, ɲe fàbɔɔ rèè na e tsiì, y'à dzugoomaa kun e si fii ka waa. Yè e nɔun à re, è akiri yè bà na ni à tsɛ, ye yè sèè Misiran jamaan goo rèè kpɛyn. 40#Jdk 32.1.È ci Arunà nà ci:

"Ɲɔ̀n ì lamɔnɔ̀n mùn kɔ̀, nìi reè nà dzi ba mùn jaadzin, yè shia kpàdè mùn na, kàtsu nèe Musa tsoo riì ɲe bou Misiran jamaan doùn, ɲe na à tɔ̀, tɔ̀ bàu gè niì dɛ !"

41 # Jdk 32.2-6. Yè nììdzìniin lamɔnɔ̀n tɔ̀ rii ɲàn, yè tɔ̀ bà e re ɲɔ̀n. Yè tɔ̀ kɔ̀, yè jaaravi fa e yɛr'la si ka gè lamɔnɔunmaà kamà. 42#Akk 5.25-27.Tɔ̀un, Ŋaablà sa yeè e bon wɔ è ra, à yè è to yè ɲɔ̀n rèè kɔ̀ɔ, yè bwèè, ko kuɔ̀ ko swɛyn nèè blàbee, a ci Ŋaablà re kɛɛra sɔn y'a deò nìi tsuru Ŋaablà re Goomaa doùn, kɛɛra reè raa Kìtaabuà doùn ci:

"Dzyèèsìbee mòdzin neè, ye dzwɛkà nìi reè bàu saaka,

tà ko ye saaka dzyee niì reè sapɛ bou jènjàà kor'nà doùn,

è bè tàrà fɔ jii dzyeè,

ye mà bà à siɛ̀n ci ye twɛy bou mun nì nè kɛ̀ !

43E na è bo mun ne dɛ !

Ŋà, ye ɲɔ̀n nìi kir'là ci Mɔ̀lɔkì,

ye tɔ̀ re bùù gba vyamaa nì seun,

tà ko ye ɲɔ̀n swɛ̀ynma niì kir'là ci Èrefàn,

ye gè lamɔnɔun twɛy rìì jaa ka, ye yè è blàbe.

Tɔ̀ kamà, mun nà à to ye yè kun bè,

fɔ Babilɔnìn jamaàn bònè bònè jònbee rà."»

44 # Jdk 25.9,40. Etsiyɛnìn yè geren goomaa ka ŋe kɔn ci: «Ɲe fàbɔɔ rèè na ni jènjàà kor'nà doùn waatsi riì bwèy, bùù gba vyama na ni è re, tɔ̀ yeè bà è ko Ŋaablà fi dzyèèsìbee shɛɛrɛ ge. Musà na tɔ̀ bùù gba vyamaa lamɔnɔɔ̀n làmɔ̀nɔ̀ùn'n kur'la, a ci Ŋaablà y'a jaa kpàdèu à ra nìi tsuru. 45#Yok 3.14-17.Àwà, ɲe fàbɔɔ rèè shɔ̀ùn, nìi reè gbaun twɛy kpɛyn, bùù gba vyama ree yè wɔ twɛy sa suun. Tɔ̀ bwèy Yosuwè rìì na è jɔundzin. Tɔ̀un, yè dzyèèsìbee bùù gba vyamaa sen yè bè à ka jàmaan sɔn ɲan, Ŋaablà yeè dzi sin è ra, yè tɔ̀ jàmaàn mòdzin neè kaa bo e re jàmaàn doùn, à y'à sìn è ra. Dzyèèsìbee bùù gba vyamaa yè to è re mɔn, è bè suu fɔ màsà kpiri Dawudà raa waatsia rà. 46#Sak2 7.1-16; Mbk1 17.1-14.Dawudà goo yè dzibe Ŋaablà ra. À y'à gaa Ŋaablà re, ci è gàne kpàdè wò ra, wo nà dzi gbà ji Yàkubà rè Ŋaablà re min niì. 47#Mak1 6.1-38; Mbk2 3.1-17.Ŋà, Dawudà raa dzin kpiri màsa Sɔ̀ɔ̀mɛyn ni nàu bà tɔ̀ gbàà jibaà. 48Tà doùn, Jìran nɔ̀n Ŋaablàa na e tsuɔ gba ì doùn, mòdzin ì nìì reè jiɔ̀ e si ka waa, a ci kɛɛra sɔn na à deò nèe tsuru ci:

49 # Ekk 66.1,2. "Ŋaablà ci: Ŋaablaxɔɔ̀ rìì mun ne màsà gbaaniɛn,

dzɔ̀nxɔɔ̀ yè bà mun sàntsuumaà.

Ye nà dzi gbà kaatsi kɛ̀ɛn nì ji mun ne ?

Gàne kɛ̀n ni to nà dzi ba mun tsùùma ?

50Mun nì na tɔ̀ sapɛ ɲɛn gbɛ ?"»

51 # Ekk 63.10. Twɛy gooma reè shɔ̀ùn, Etsiyɛnìn yè dzin è ra ci: «Mòdzin tantaama xɔ ì, Ŋaabla tɔ bɛy ree reè, ye e toro bo tsùù Ŋaablà ɲan. Kudɛyn, ye rìì Ŋaablà re Dzi Fɛnɛɛ sɔ̀swɛɛ̀ ! Ye ko e fabɔɔ rèè sa bàu soo. 52Tɔ̀ kɛɛra bàu ni ye fàbɔɔ rèè na byɛnbe ɲɛn dɔn nìi tsɛ ɔ ? Mòò sɔn nìi tereòn Ŋaablà re, kɛɛra niì reè tɔ̀ nà goòmàà dèu, ye fàbɔɔ rèè twɛy sapɛ vuu. Àwà dòònuùn, ye sa yɛ tɔ̀ mòò sɔn tereonmaà nì jàànfaɔ, y'a vu. 53Nìi Ŋaablà re sàrìyaa, Ŋaabla tɔ̀ sìun e re mɛ̀rɛ̀kɛ rèè rà, twɛy yè nà à sìn ye ra, ŋà, tà ko e sa ra, ye na à shi jiì jà kuraa !»

È Etsiyɛnìn vuu min niì

54Kitsi kunun kur'là mòdzin neè dziu twɛy gooma reè myɛ̀n Etsiyɛnìn dzu min niì, à bàu a ci fà ni ji è ɲan. È vunun tau, fɔ yè bè e ɲiun taa Etsiyɛnìn kpɛyn. 55Nìi Etsiyɛnìn, tɔ̀ ɲantsyɛunmaà Ŋaablà re Dzi Fɛnɛɛ rà, è kuùn sen, è siin fa jìran nɔ̀n. Tɔ̀un, è Ŋaablà nɔɔrɔɔ̀ jà, tà ko Yesù, tɔ̀ yeè bà tsìiŋnà Ŋaablà sirama si jaa rè. 56Etsiyɛnìn yè dzin ci: «À siin, mun jaà ni ŋaablaxɔɔ̀ dzii saunmaà nà, Adamà dziàn yè bà tsìiŋnà Ŋaablà sirama si jaa rè.»

57Etsiyɛnìn dziu twɛy gooma reè dè min niì, yè gɛyn vu blà bo, è sa yeè e tor'lèè tsyee. Yè keren tsyee à tsɛ tɔ̀un, 58y'à kun, y'à sɔ̀ɔ̀n bo wɔ̀ɔ̀ bònè, yè bè e maa y'à dzyɛɛn ko kpàà rèè ka. À dzyɛnbaa rèè na e re mɛ̀yɛ reè boo, yè è sìn tsùù dzunwɛyn sɔn na, tɔ̀ tsoo yè bà ci Sɔlì. 59È Etsiyɛnìn dzyɛɛn ko kpàà reè ka waatsi riì bwèy, Etsiyɛnìn na Ŋaablà mafyɛ̀ɛn nèe tsuru ci: «Tsìfa Yesù, min xɔɔn sèe a ma.» 60Tà shɔ̀ùn, è gban e kun'nèè tsɛ, è sɛ̀ɛ̀y fààn na ci: «Tsìfaà, nèe gooɲaan nee tsìɛ̀ mɛɛy bo è mà.» Etsiyɛnìn tɔ̀ dèu min niì, è xɔn bo.

Currently Selected:

Kɛɛradzin neè faadziɛ 7: BDZU

Highlight

Copy

Want to have your highlights saved across all your devices? Sign up or sign in

Learn More About Bible Dzùùngoo Unicode

Popular Bible Verses from
Kɛɛradzin neè faadziɛ 7

Video for Kɛɛradzin neè faadziɛ 7

Acts 1-12

The Bible Project

Kɛɛradzin neè faadziɛ 7

Popular Bible Verses from
Kɛɛradzin neè faadziɛ 7

Video for Kɛɛradzin neè faadziɛ 7

Acts 1-12

Bible:

Dzùùngoo

Version: Bible Dzùùngoo Unicode - BDZU