Kɛɛradzin neè faadziɛ 8

1Nìi Sɔlì, tɔ̀ sa kpɛ̀ynto yè e tsiiŋ Etsiyɛnìn vua rà.

Byɛnbe niì Yesù rè kàràndzin neè tàrau

È sen tɔ̀ jisee rà, yè byɛnbe xɔù mɛɛy ɲɛynamoo kur'là tsɛ Yerusalɛmùn wɔ̀ɔ̀ min niì sapɛ. Tɔ̀un, è sapɛ yeè vwɛ̀yn jee Yude mar'la, ko Samari mar'la ɲàn. Kɛɛradzin neè bàsɔùn nì yè to. 2Mòdzin ì to yè jà, nìi reè shia Ŋaablà jɔun, twɛy yè Etsiyɛnìn fùàn sen, yè bè à wɔ, y'à shìgoo fa cɛyn.

3 # Kɛf 22.4,5; 26.9-11. Nìi kpɛ̀yn Sɔlì, tɔ̀ na ni à re, wò yeè ɲɛynamoo kur'là dò rìì peu. È dɔ̀n beè gbà rèè doùn, à ye kàràndzin niì jà, à kpir'li ò, à tàan nì o, à y'à kuàn nì fàan nà, è bè à ji kàsoò doùn.

Samarika reè toro kɔ̀u Ŋaablà re goomaa nà min niì

4Nìi reè na jeeŋna, twɛy na e ɲantsyeere beè gàne rèè ɲàn, yè mòdzian toro kɔ̀ beè Kùnàgoo Dziɔ̀ rà. 5È ɲan, nìi tsoo na ci Fìlipù, tɔ̀ yeè bè Samari mar'la wɔ̀ sɔn ɲan, è bè Ŋaablà Jaara Modzìàn goò waajibia fa twɛy wɔ̀ùndzin neè rè. 6Jàmaà na e toro wɔɔ Fìlipù rè cèreoma, kàtsu è jaa na ni à re kabagoo goo fakɔɔn reè rà. 7À na kwey rèè kaa boò kweykɔɔn reè kpɛyn, twɛy yè boò ko gɛyn bo vu blà ka. È mùrùku reè giri, ko sànsɔun nèè giri sa cɛrɛmabe. 8Tà doùn, taamadzibe brìsi na ni tɔ̀ wɔ̀ɔ̀ min niì sapɛ.

9Tɔ̀ y'a tàrà, kpiri sɔn na ni tɔ̀ wɔ̀ɔ̀ doùn, tɔ̀ tsoo yè bà ci Shimɔ̀n. Tɔ̀ kpir'la na goo giri faa twɛ̀y ɲan goo ɲan. À na twɛy goo nìi reè faa, tɔ̀ na Samari mar'la mòdzian sapɛ ɲɛyn seòn. À na e yɛrɛ baɔ̀ mòdzin bla. 10Mòdzian sapɛ, mòdzin kiɲaanin sen ɲɛn mòdzin bla tsɛ, è sapɛ na e jaa tsùuŋnà goo rèè rè fɔ è bè geren. È dziàn ci: «Nèe kpir'lee kpɛ̀yn Ŋaablà raa dzia rìì taki, dzi riì kir'là dzi blaa.» 11È na e shiɔ̀ à ra tà tsuru, kàtsu fɔ waatsi gbaan, Shimɔ̀n na twɛ̀y ɲan goo nìì reè faa, tɔ̀ na jiɔ̀ è sapɛ dzii tsɛ. 12Ŋà, Fìlipù nàu mòdzian toro kɔ̀ Ŋaablà re Màsàbee Kùnàgoo Dziɔ̀ rà, è dzin è ra, ci Yesù rìì Ŋaablà Jaara Modzìàn, è yè ɲɛn à ra. Kpiri ko à tàan sa yeè e tsiì, yè ye jaara foò Ŋaablà re shia goo rèè rà. 13Tɔ̀un, Shimɔ̀n yɛ̀r'la sa yeè ɲɛn à ra, è tsiì y'à jaara foò Ŋaablà re shia goo rèè rà. Shimɔ̀n jaara fòoŋ, à na to bo Fìlipù kpɛyn dɛ. Fìlipù na kabagoo goo niì reè faa, tɔ̀ na jiɔ̀ Shimɔ̀n sa dzii tsɛ fɔ è bè geren.

14Kɛɛradzin neè yè to Yerusalɛmùn, y'à myɛ̀n, ci Samarika reè yè e tsiiŋnà Ŋaablà re goomaa nà. Àwà, y'à myɛ̀un tɔ̀ tsuru, yè Piyɛrì ko Yùxanà ka bè è re. 15Piyɛrì ko Yùxanà bèu wɔ Samari, nìì reè baɔ̀ mɔn Yesù rè kàràndzin, yè Ŋaablà mafyɛ̀n twɛy rè, sànko Ŋaablà re Dzi Fɛnɛɛ yè jàà è tsɛ. 16Twɛy kàràndzin ye reè kpɛ̀yn jaara na fòoŋnà Tsìfa Yesù tsoò ka Ŋaablà re shia goo rèè rà, ŋà, Ŋaablà re Dzia naà jàaŋnà è pɛn tsɛ ŋe waa. 17Piyɛrì ko Yùxanà yè e si rèè tsùù tsùù be è tsɛ tɔ̀ rii ɲàn, Ŋaablà re Dzi Fɛnɛɛ yè jàà è tsɛ. 18Piyɛrì ko Yùxanà yè e si rèè tsùù tsùù bè nìi fau kàràndzin neè tsɛ, twɛy yè Ŋaablà re Dzia tàrà, Shimɔ̀n dziu tɔ̀ jà, è ɲɛyn bo, ci wo nà à sìn Piyɛrì ko Yùxanà na. 19À ci: «Dzi riì yɛ ye ɲan, y'a sɔn sin n sa ra, sànko n sa ye n sià tsùù mòò riì tsɛ, Ŋaablà re Dzi Fɛnɛɛ yè jàà à tsìfa tsɛ.» 20Ŋà, Piyɛrì yè dzin à ra ci: «Wo ko a re ɲɛɛn, e fiɛ̀ sa yeè bara, kàtsu, wo y'à jàtsi kuun, ci Ŋaabla gè niì sìan maana, tɔ dzia fì ɲɛyn ka. 21Wo nìn na ni nèe goo rèe ɲan, wo re shi to na ni à ɲan, kàtsu wo na tereòn Ŋaablà jaa ra waa. 22Duungoo ɲaan niì yɛ wo duùn, sèè bo à kpɛyn, e Tsìfaà màfyɛ̀n, ci wo duungoo ɲaan nee ji niì fau a duùn, è ba dzia e yɛrɛ to a re tɔ̀ ra. 23Mun jaà ni à ra, ci wo duɔ̀n tsyɛɔ̀n jaaɲininbeè ko gooɲaan nà, fɔ wo yè bè bà tsùù gooɲaan rè jòn.»

24Shimɔ̀n dziu twɛy gooma reè myɛ̀n min niì, è dzin tɔ̀un ci: «Ye yɛ̀r'leè yè Tsìfaà màfyɛ̀n mun kɔ̀, sànko ye yɛ nìi deò nèe, tɔ̀ sɔn mà mun tàrà waa.» 25Tɔ̀un, Piyɛrì ko Yùxanà na nìi tɔ̀ Yesù rè goò ɲàn, yè tɔ̀ dè mòdzian nà. Yè è toro kɔ̀ Ŋaablà re goomaa nà, yè kòmànà e kpɛyn sèè Yerusalɛmùn. È sèèkɔɔn, yè e tsiì Samari mar'la wɛ̀ɛ̀rìì reè giri ɲan, yè mòdzian toro kɔ̀ Kùnàgoo Dziɔ̀ rà.

Fìlipù ko Etsiyopika kpir'là rè goò

26Àyìwà, nìi Fìlipù, Ŋaablà re Mɛ̀rɛ̀kɛ sɔn yeè e yɛrɛ kpadè à ra, è dzin à ra ci: «Fù, a wa wòròdùù tɔɔn kpàkèrè. Shi riì ni mɔn, è bo Yerusalɛmùn, è bè Gaazà wɔ̀ rɔ̀n, bè tɔ̀ shia sen nìi dɔɔ̀n jènjàà kor'nà doùn.»

27Àwà, Fìlipù yè fù suu, è shia kun. À bèkɔɔn nà shia rè, è kpiri sɔn ja, tɔ tsùntsì jamaan sɔn modzin nìi kir'là, ci Etsiyopi. Etsiyopi jamaan raa màsà taàn tsoo na ci Kandasì. Tɔ̀ kpir'la na tɔ̀ raa fàànma blaa sɔn ni. Wò rii na tsùuŋnà tàan rèe re nàfor'la sapɛ tsɛ. Àwà, tɔ̀ kpir'la na naɔ̀ Yerusalɛmùn, è nà Ŋaablà blabe. 28À na e kpɛyn nì sèè beè tsii sa. Tà doùn, à na tsùuŋnà e re shù wotor'la doùn, è bà Ŋaablà re kɛɛra Esayì rè kìtaabuà kàjaa sɔn kar'na. 29Ŋaablà re Dzia yè dzin Fìlipù rà tɔ̀un ci: «A kpɛrɛ̀ be wòtòr'lee ra.» 30Fìlipù yè vwɛ̀yn, è kpɛrɛ̀ wòtòr'la rà tɔ̀ rii ɲàn, à y'à jà Etsiyopika kpir'là kɛɛra Esayì rè kìtaabuà kàjaa sɔn kar'na. Àwà, Fìlipù y'à tey ci: «Wo yɛ kàjaa riì kàr'na, wo y'à fàànmuna ɔn ?» 31Kpir'la yè dzin ci: «Mòò ma à jaa dèù'n kuru wube mun na, mun nà dzi à fàànmun dzùrù ?» Tɔ̀un, à y'à gaa Fìlipù rè, ci è tèyn, è tsuù wò tɛyn. 32#Ekk 53.7,8.À na kàjaa riì kàr'na tɔ̀ rii siin:

Y'à kuun, yè bè à ka,

a ci moo sàà kuàn, è bè à ka e vuma nɔ̀n nìi tsuru.

À na gooma waa,

a ci sààdzìniin niì ni e suɔ̀ yɛbaa rèè suun,

à na gɛyn boò waa.

33Y'à ɲanfyɛnbeu, yè sàrìyaa kùnùn,

è to na à dzià sìn à ra waa.

À re jaamabee kùnùn boumaà shɔ̀ùn dzɔ̀nxɔɔ̀ tsɛ,

tsì rii nà à tsua dzin neè gooma de ?

34Tà doùn, Etsiyopika kpir'là yè dzin Fìlipù rà ci: «Mun wo màfyɛ̀ɛn nì, a dè n na, kɛɛraa mòò riì gooma deè nèe tsur'li. À y'à yɛ̀r'la rìì làà, tàà à mòò kpɛr'lì ?»

35Àyìwà, Fìlipù yè goomaa sen tɔ̀un, à y'à dzii kun tɔ̀ goomaa kàjaa tsɛ, è kpir'la toro kɔ̀ Yesù rè goomaa Kùnàgoo Dziɔ̀ rà. 36Tɔ̀un, yè geren e re jìɛ̀ rè yè bè wɔ gàne sɔn ɲan, yu ni mɔn. Etsiyopika kpir'là yè dzin jaa soo ci: «Yuà yɛ nèe, fee y'à toò mun jaara mà fòò Ŋaablà re shia goo rèè rà ?» 37[Fìlipù yè dzin à ra ci: «Wo ye ba ɲɛɔ̀n Ŋaablà ra duungoo soo ka, wo jaara dzia fòò.» Etsiyopika kpir'là yè dzin ci: «Ɔ̀ɔn, mun ɲɛɔ̀n à ra, ci Yesù rìì Ŋaablà Dzin Kpir'la.»]

38À tà dèu min niì, yè wòtòr'la tsìì. Wòtòr'la tsìiŋ, Fìlipù ko Etsiyopika kpir'là sa yeè jàà bo à doùn, yè jàà yu rɔ̀n. Fìlipù y'à jaara foò Ŋaablà re shia goo rèè rà. 39È bou min niì, Ŋaablà re Dzia yè Fìlipù sen dɔn bè, Etsiyopika kpir'là jaà yè fɔn à ra. Àwà tɔ̀un, à taama dzibeuma blà yeè e re shia sen, è dɔ̀n be. 40Nìi Fìlipù, tɔ̀ yeè bè e yɛrɛ ja wɔ̀ sɔn ɲan, ci Ayɔtsì. È bo mɔn, è dɔ̀n beè wɔ̀ rèè ɲàn, è mòdzian toro kɔ̀ beè Kùnàgoo Dziɔ̀ rà, è bèe, fɔ è bè wɔ wɔ̀ sɔn ɲan, ci Sezare.

Currently Selected:

Kɛɛradzin neè faadziɛ 8: BDZU

Highlight

Copy

Want to have your highlights saved across all your devices? Sign up or sign in

Learn More About Bible Dzùùngoo Unicode

Popular Bible Verses from
Kɛɛradzin neè faadziɛ 8

Video for Kɛɛradzin neè faadziɛ 8

Acts 1-12

The Bible Project

Kɛɛradzin neè faadziɛ 8

Popular Bible Verses from
Kɛɛradzin neè faadziɛ 8

Video for Kɛɛradzin neè faadziɛ 8

Acts 1-12

Bible:

Dzùùngoo

Version: Bible Dzùùngoo Unicode - BDZU