Yùxanà 20

Kàràndzin neè nàu fɔn Yesù fùàn nà min niì kɔ̀ɔ̀ doùn

(Matsiyù 28.1-8; Marikì 16.1-8; Lukì 24.1-12)

1Àyìwà, shikuan jisee jɔnaa gbishɛɛ̀mà mur'lɔùn, Màngàdàràkà taan Mariyamùn yè bè fùnkɔɔ rà. Tɔ̀ y'a tàrà dzɔɔ̀n naà viɔ̀ waa. À wɔumaà mɔn, à y'à jà kpàà brisi rìi na ka fùnkɔɔ tsyeeŋna, tɔ bou dziɛ̀ rà. 2Tɔ̀un, è vwɛ̀yn be, è b'a jaa dè Shimɔn Piyɛr'là, tà ko kàràndzin niì goo na dzi Yesù rà. À ci è ra ci: «È Tsìfaà sen bou fùnkɔɔ doùn, ɲe to na à tɔ̀, y'à jiɔ̀ min niì waa.»

3Piyɛrì ko tɔ̀ kàràndzian tɔ̀ goomaa myɛ̀un min niì, è fiɛ̀ sa yeè bo tɔ̀un, yè dɔ̀n be fùnkɔɔ rà. 4È fiɛ̀ sa na vwɛ̀yn beè esire, ŋà tɔ̀ kàràndzian ɲantabeu Piyɛrì mà, tɔ̀ jɔ̀na yeè wɔ fùnkɔɔ rà. 5À bèu wɔ, è mɛɲɛn è kɔ̀ɔ̀ doùn siin, è kasangee tsùuŋma jà, à na dɔn waa. 6Shimɔn Piyɛrì nìi na gbaɔn à kpɛyn, tɔ̀ sa yeè nà wɔ. À wɔu, è dɔ̀n kɔ̀ɔ̀ doùn. Tɔ̀un, è kasangee tsùuŋma jà. 7Vya nìi na ka Yesù kùngɔɔ̀ miniɔ̀n, è tɔ̀ sa ja, à miniɔ̀n e miniun'n kur'la rà, è bà tsùuŋnà e si, e tsuùma nɔ̀n.

8Tà doùn, kàràndzin niì jɔ̀na wɔu kɔ̀ɔ̀ rà, tɔ̀ sa yeè dɔ̀n, à y'à jà, è ɲɛn à ra. 9È bè wɔ fɔ tɔ̀ waatsia mà, gooma niì na sɛbɛɔ̀n Ŋaablà re Goomaa doùn, ci à wù Yesù yè sèè kpunan bo fùn nèè fi, è akiri naà tɔ̀ jaɔ̀ ŋe waa. 10Tà shɔ̀ùn, kàràndzin fiɛ̀ yè e kpɛyn sèè e re tsii.

11Àwà, Mariyamùn, tɔ̀ na tsìiŋnà kɔ̀ɔ̀ tɛyn da rɔ̀n, è bà gɛɛ. À gɛynkɔɔn tà tsuru, è nà e mɛɲɛn, è siin fa be kɔ̀ɔ̀ doùn. 12Tɔ̀un, è mɛ̀rɛ̀kɛ fii tsùuŋma jà, mɛ̀yɛ̀ fyɛ ni twɛy mà. Yesù fùàn na ɲɛɔ̀n min niì, mɛ̀rɛ̀kɛɛ̀ soo na ni à kùngɔɔ̀ tsùùmaà kpàkèrè, soo yè bà ni à sàn nèè tsùùmaà kpàkèrè. 13Mɛ̀rɛ̀kɛ rèè yè dzin à ra ci: «Tàan, wo gɛɛ feera ?» Mariyamùn yè dzin ci: «È mun Tsìfaà sen bou, mun to na a tɔ̀, y'à jiɔ̀ min niì waa.»

14À ni tɔ̀ dèè rà, è jaa kere e bonè, è Yesù tsìiŋma jà, ŋà, à naà à tɔ̀ ci à wò rii waa. 15Yesù y'à tey ci: «N neema taan, wo gɛɛ feera ? Wo tsì rii gaa ?» Mariyamùn na à siɛ̀n, ci à tɔ̀ gɔ̀ɔ̀ gane lamɔ̀nɔunma wùɔ faagoofabaà nìi fa, è dzin ci: «N neema kpiri, wo rìì ye ba à seòn, e ba beò à ji min niì, à dè n na, min b'a sen.»

16Yesù y'à kiri ci: «Mariyamùn !» Mariyamùn yè e jaa kere à kpàkèrè, è dzin jaa soo Dzyèèsìbee mòdzin neè rè kungoòmàà ɲàn nèe tsuru ci: 'Àràbunìn !' Nìi dzuɔn ci Kàrànfaà.

17Yesù yè dzin à ra ci: «Maà n kun tsìì to waa, kàtsu mun na teyn be Fà Ŋaablà kpakèrè ŋe waa. Bè neema karàndzin neè rìì kpɛyn, e bè dzin è ra, ci mun ci mun tèyn beè n Faà rè, è bà ye sa Fa. Ɔ̀ɔn, ci mun tèyn beè n ne Ŋaablà re, ye sa re Ŋaablà.»

18Tɔ̀un, Màngàdàràkà taan Mariyamùn sa yeè bè dzin kàràndzin neè rà ci wo Tsìfaà jàu. Yesù nìi dèu à ra, è tɔ̀ jaa dè kàràndzin neè rà.

Yesù yè e yɛrɛ kpadèu e re kàràndzin neè rà min niì

(Matsiyù 28.16-20; Marikì 16.14-18; Lukì 24.36-49)

19Àwà, tɔ̀ shikuan jisee jɔna soo yɛ̀r'la ɲɛ̀rɛɛ̀ rɔ̀n, kàràndzin neè na e ladzyèeŋnà gbà sɔn doùn. È na tɔ̀ gbàà dzii rèè sapɛ sooŋnà e ma, Dzyèèsìbee mòdzin neè jɔundzin neè jɔun shiɲaanbeè kamà. Tɔ̀un, Yesù yè nà bàràma bo è fi. À tsìiŋmaà, è dzin è ra ci: «Ŋaa yè xɛɛrɛ fa e re.»

20Tɔ̀ dèumaà shɔ̀ùn Yesù rè, è si rèè ko e gaakaa kpàdè è ra. Yesù jàumaà kàràndzin neè rè, tɔ̀ yeè è taama dzibe, fɔ è bè geren. 21Àwà, Yesù yè dzin è ra e shɔùn ci: «Ŋaa yè xɛɛrɛ fa e re. Mun Fà Ŋaabla mun ka nau nìi tsuru, mun sa ye kaà tà tsuru.»

22À tɔ̀ dèu min niì, è dzu ŋɔ̀ɔ̀n fyɛ ji è tsɛ, è dzin è ra ci: «Ŋaablà re Dzi Fɛnɛɛ yè to e re. 23#Mat 16.19; 18.18.Ye ye mòò o moò raa gooɲaantsii mɛɛy bo tɔ̀ vu ra, tɔ mɛɛy bou taki rii. Ye to ma mòò o moò raa mɛɛy bo tɔ̀ vu ra, à ni tsuù à vu ra.»

24Kàràndzin teeŋ fiɛ̀ ɲàn, nìi tsoo ci Tomà, yè bà à kir'là sa, ci fìrìkàmaa, Yesù nà bwey rɔ̀n gbàà doùn, tɔ̀ naà ni ko è ka waa. 25Kàràndzìn dzyee reè yè nà dzin à ra tɔ̀un ci: «Ɲe Tsìfaà jàu.»

Ŋà, Tomà yè dzin è ra ci: «Myɛ̀ɛ̀n nìì reè ka à gbaun, mun ma tɔ̀ fyɛ̀ɛ̀ jà à sitaa rèè doùn, min siiniɛn wɔ è fyɛ̀ɛ̀ shɔ̀ùn, mun to mà n sià wɔ à gaakaa vɔ̀ tsɔ̀maà rè fyeu, mun fa ɲɛn à ra waa.»

26Àwà, shikun soo tà shɔ̀ùn, kàràndzin neè na e ladzyèeŋnà kɔn yeu gbàà doùn, Tomà sa yeè bà ni è ka tɔ̀un. Gbàà dzii rèè sòoŋmaà, Yesù yè nà, è nà e tsiì è fi, è dzin è ra ci: «Ŋaa yè xɛɛrɛ fa e re.»

27Tà shɔ̀ùn, è dzin Tomà nà ci: «Tomà, nà a siiniɛn ka, e nà à wɔ n sià kɔ̀ɔ̀ rè a siin. Nà a sià ka, e nà à wɔ n gaakaa rè. Maà bà mòdzin, nìi na ɲɛɔ̀n Ŋaablà ra waa, to e bà ɲɛɔ̀n à ra.»

28Tomà yè dzin à ra ci: «Mun Tsìfaà, mun ne Ŋaablà.»

29Yesù yè dzin à ra ci: «Wo mun jàu nìi fa, tɔ̀ rii wo ɲɛun mun na. Nìì reè na mun jaɔ̀ waa, è to ɲɛun mun na, twɛy raa wùbeu.»

30Àwà, Yesù tàànmàshɛn kabagooma giri kpɛ̀rɛ̀kuru ì fau e re kàràndzin neè jaa ra, nìì reè gooma na deò nèe kìtaabu rèe doùn waa. 31Ŋà, nìì reè gooma deò, twɛy sɛbɛɔ̀n rìì, sànko ye ɲɛn à ra, ci Yesù rìì Ŋaablà Jaara Modzìàn, Ŋaablà Dzin Kpir'la. A to ye ɲɛn à ra, wo jaamabe dziɔ̀ tàrau à tsoò baraka rɔ̀n.

Currently Selected:

Yùxanà 20: BDZU

Highlight

Copy