Yùxanà 21

Yesù yè e yɛrɛ kpadèu e re kàràndzin neè ɲɛ̀ɛ̀nun na min niì

1Àyìwà tà shɔ̀ùn, Yesù yè nà e yɛrɛ kpadè kɔn e re kàràndzin neè ɲɛ̀ɛ̀nun na, Tsiberiyadzì yu blàa dzii ra. È yɛrɛ kpadèu è ra nìi tsuru, tɔ̀ rii siin. 2Shimɔn Piyɛrì tà ko Tomà, tɔ̀ niì kir'là fìrìkàmaa ko Natanayɛlì è bo Kanà wɔ̀ rɔ̀n, Galile mar'la ɲàn, ko Zhebedè raa dzin kpir'leè ko kàràndzin fii kpɛ̀rɛ̀kuru ì twɛy sapɛ na ni esire. 3#Luk 5.5.Shimɔn Piyɛrì yè dzin è ra ci: «Mun bèe ji kunma.» Yè dzin à ra ci: «Ɲe sa nà bè wo ka.» Àwà, yè bo tɔ̀ rii ɲàn, yè bè dɔ̀n konkor'na doùn. Yè tɔ̀ feèn ko e kur'la sapɛ fa yɔ̀ maa rà, è na ji pɛn kun waa. 4Àwà, jià seey naumaà, kàràndzin neè yè Yesù tsìiŋma jà yu blàa dzii ra, ŋà, è pɛn naà à tɔ̀, ci à wò rii waa. 5Yesù yè e vu bo è ra, è dzin è ra tɔ̀un ci: «N dzunwɛynsi ì, jià sɔn kuunma ni ye re o ?» Kàràndzin neè ci: «Ɔ̀ɔɔn.»

6 # Luk 5.6. È dzin è ra tɔ̀un ci: «Ye yɔ̀ɔ̀ maa be konkor'na sirama sijaa rè kèrè, ye nà sɔn tarà mɔn.» Àwà, yè yɔ̀ɔ̀ maa mɔn tɔ̀un. Yɔ̀ɔ̀ maaŋmaà mɔn, yè ji giri kun, fɔ yè bè yɔ̀ɔ̀ sɔ̀ɔ̀n bo gba tsuù yu rɔ̀n. 7Tà doùn, kàràndzin niì goo na dzi Yesù rà, tɔ̀ yeè dzin Piyɛr'là ci: «Piyɛrì, à Tsìfaà rìì !» Shimɔn Piyɛrì dziu à myɛ̀n min niì, ci à Tsìfaà rìì, à na e re mɛ̀yɛɛ bo jiɔ̀ nìi fa è to e ma xɔ ra, à y'à sen ji e ma, è ɲanshì. À tɔ̀ fau min niì, è tsyɛn ji yu rɔ̀n, è dɔ̀n be. 8Kàràndzìn dzyee reè, twɛy yè nà konkor'na ka, yè bà yɔ̀ɔ̀ sɔ̀ɔ̀n naà, tɔ tsyɛɔ̀n jià rà. È ko kpee fia naà gbàn geren waa, à na kòn jaa dzyèètsyeùn tsuru. 9È bou kpee rà min niì, yè sàtsiin ja, ji ni tà tsɛ, yè buru sa tsuuŋma jà. 10Yesù yè dzin è ra ci: «Ye yɛ ji nìì reè kuɔn, ye twɛy swey sen na.»

11Shimɔn Piyɛrì yè bo tɔ̀un yu rɔ̀n, è yɔ̀ɔ̀ sɔ̀ɔ̀n bo ji kpee rà. À na tsyɛɔ̀n ji blà bla caànmoò ko dzyèètsyeùn ko dzin zhììgi rii là. Ji rèè giribee ko e raà sa, yɔ̀ɔ̀ na vyɛ waa. 12Yesù yè dzin è ra ci: «Ye nà ɲwɛɛ̀n ɲɔn.» Kàràndzin neè sɔn yeè bà ni à tey, ci wo tsì rii, è pɛn na dzi tɔ̀ fa waa. È na à tɔ̀, ci à Tsìfaà rìì. 13Yesù yè e kpɛrɛ̀ tɔ̀un, è bur'la sen, à tanan è ra, è tɔ̀ soo fa jià sa ka.

14Yesù sèè kpunaunmaà shɔ̀ùn è bo saàn ɲàn, è yɛrɛ kpadè e re kàràndzin neè rà, tɔ̀ na à jaa zhiigira rii.

Yesù Shimɔn Piyɛrì teroun min niì fɔ jaa zhììgi, è ba wò kɛ̀niɔ̀n

15Àyìwà, è nàu ɲwɛɛ̀n ɲɔn dò waatsi riì bwèy, Yesù yè Shimɔn Piyɛrì tey ci: «Yùxanà dzin kpiri Shimɔ̀n, nèe rèè mun kɛ̀niɔ̀n nìi tsuru, wo mun kɛ̀niɔ̀n è geren tɔ̀ tsɛ ɔ ?» Piyɛrì yè dzin à ra ci: «Ɔ̀ɔn kɛ̀ Tsìfaà, wo yɛ̀r'la y'à tɔ̀, ci wo goò dzi mun na.» Yesù yè dzin à ra ci: «Tà doùn, n ne sààdzin neè kɔ̀ ɲwɛyn.»

16Yesù y'à tey e jaa fiira ɲan kɔn ci: «Yùxanà dzin kpiri Shimɔ̀n, wo mun kɛ̀niunà ɔ̀n ?» Piyɛrì yè dzin à ra ci: «Kɔsɔbɛ kɛ Tsìfaà, w'a tɔ̀ ci wo goò dzi mun na.» Yesù yè dzin à ra ci: «Tà doùn, bà n ne sàà rèè kààwɔbaa.»

17Yesù y'à tey e jaa zhiigira ɲan kɔn ci: «Yùxanà dzin kpiri Shimɔ̀n, mun goò dzi wo ra ɔ ?» Tɔ̀ goò yè Piyɛrì taama ŋununbe, kàtsu, tɔ̀ na à jaa zhiigiraa rìì, Yesù y'à teè ci: «Mun goò dzi wo ra ɔ ?» Piyɛrì yè dzin à ra ci: «Tsìfaà, wo y'à sapɛ jaa tɔ̀. Wo y'à tɔ̀ cɔ, ci wo goò dzi mun na.» Yesù yè dzin à ra ci: «Tà doùn, n ne sàà rèè kɔ̀ ɲwɛyn. 18Sààben fyan, mun nì ci a ra, wo dzunwɛynkɔɔn nà, wo na a re ɲànshìàgee shìa a yɛrɛ, min niì ye wo dzibe, wo yè bè mɔn. Ŋà, wo ye na bɔɔ, wo nà a si rèè ɲansen, mòò kpɛrɛ yè wo re ɲànshìàgee shì wo re, è bè wo ka gàne ɲan, wo sàò na ni wo yè bè min niì waa.»

19Piyɛrì na nà san saun'n kur'liì rà, tɔ̀ yeè blàbe ɲɛn Ŋaablà tsɛ, Yesù nèe gooma ree dèu, è ɲɛn tɔ̀ rii tsɛ. Tɔ̀ dèumaà shɔ̀ùn Yesù rè, è dzin Piyɛr'là ci: «A gban n kpɛyn !»

20 # Yux 13.25. À yè è to tɔ̀ goomaa nà, Yesù kàràndzin niì kɛ̀niɔ̀n, Piyɛrì yè e jaa kere, è tɔ̀ nàkɔɔn ja è kpɛyn. Tɔ̀ kàràndzian nì na e kanman beò Yesù ɲìɛ̀ kpàkèrè ɲwɛyn ɲɔnma nɔ̀n, à y'à tey ci: «Tsìfaà, tsì rii wo jàànfabaà ?»

21Àwà, Piyɛrì y'à jàu tɔ̀un, è Yesù tey ci: «Tsìfaà, nèe do, fee nà tɔ̀ tàrà ?»

22Yesù yè dzin à ra ci: «Min ba n'a re è to tsùù, è bè suu fɔ mun sèè naà dzu, wo re fee ni tɔ̀ ɲan ? Nìi kpɛ̀yn wo, a gban n kpɛyn.»

23Tɔ̀ goomaa nì kamà, kàràndzin neè yè dziàn e si ra ci tɔ̀ kàràndzian fa san waa. Tà to y'à tàrà, Yesù naà dziɔn Piyɛr'là ci tɔ̀ kàràndzian fa san dɛ, ŋà, à dziun ni ci: «Min ba n'a re è to tsùù, è bè suu fɔ mun sèè naà dzu, wo re fee ni tɔ̀ ɲan ?» 24Tɔ̀ kàràndzin soo rìì twɛy goo rèè shɛɛrɛbe faa, wò rii to yè sɛbɛɔ̀n. Ɲe sa y'a tɔ̀, ci à re shɛɛrɛbee sààben.

25Yesù goo giri kpɛ̀rɛ̀kuru ì sa fau. À sapɛ ye ba na lakɛɛ soo soo, sɛbɛn niì na nà fa à tsɛ, mun jaa ra, à fa dɔ̀n dziɲaan doùn waa.

Currently Selected:

Yùxanà 21: BDZU

Highlight

Copy