Lukì 10

Yesù kàràndzin muey ko tsyeùn kau min niì

(Matsiyù 9.37-38; 10.5-14)

1Tà shɔ̀ùn, Tsìfa Yesù yè kàràndzin muey ko tsyeùn bo. Twɛy boumaà shɔ̀ùn, à yɛ̀r'la nà wɔ wɔ̀ o wɔ ɲàn, à to nà wɔ gàne o gàne rìì ɲàn, à yè twɛy kàràndzin neè dzyèè dzyèè be fii fii, è ka bè e jɔun twɛy gàne rèè sapɛ ɲan.

2 # Mat 9.37,38. Tɔ̀un, è dzin è ra ci: «Shìmaan gaaramaà giri, ŋà faagoo fa reè dzyɛ̀n. Ye dzùtsià màfyɛ̀n, è faagoo fa reè tɛ̀y gaa be dzù rɔ̀n, y'à re shìmaan gaa. 3#Mat 10.16.Àyìwà, dòònuùn y'a wa, mun ye ka bèe, a ci sààdzìniin ì bèuma dɔ̀n kparan ì fi. 4E maà ɲɛyn jia gè sen, e maà bɔ̀tɛ sen, e maà seereyn kpɛrɛkuru ì sen, e to mà e tsiì ye mòò pɛn tswà shia rè.

5Jìɛ̀ doùn, ye be dɔ̀n fɔɔn o fɔɔn re, ye dzwɛ ji twɛy fɔɔn re dzin neè rà ŋe, ci Ŋaa re jaancin yè bà ni è tsɛ. 6Jaancin modzìn ye ba ni tà fɔɔn doùn, tà bwèy, ye re dzwɛɛ̀ na kun tà tsìfa mà. Tà tsuru mòdzin to ma ba ni mɔn, ye re dzwɛ rèe nà sèè ye mà e shɔùn. 7#Kor1 9.14; Tsim1 5.18.Fɔɔn re dzin niì reè ye e tsiì ye jaà ye re, ye to tà fɔɔn doùn. È ye ɲwɛyn nìi sìn e ra, ye tɔ̀ ɲɔn. Yè yu rìi sìn e ra, ye tɔ̀ mìn, kàtsu, faagoofadzian wù e sar'là ka. E maà e tɔɔnsi tsiɛ lakere kere beè waa.

8Ye dɔn wɔ̀ o wɔ doùn, tɔ̀ wɔ̀ dòùn dzin neè ye e tsiì, ye e jaà ye re, è ye ɲwɛyn gè o ge sìn e ra, ye tɔ̀ ɲɔn. 9Ɲìnìnkɔɔn niì reè ni tɔ̀ wɔ̀ɔ̀ doùn, ye twɛy cɛrɛmabe. Tà shɔ̀ùn, ye dzin à wɔ̀ dòùn dzin neè rà, ci Ŋaablà re Màsàbee waatsi tsyɛnbe naɔ è ra. 10#Kɛf 13.51.E to ye be dɔ̀n wɔ̀ o wɔ ɲàn, tɔ̀ wɔ̀ dòùn dzin neè yè e nɔn, ci e fa e jaà yè re, ye bo, ye bè e tsiì shia tsɛ, ye dzin è ra ci: 11#Mat 10.7-14; Mar 6.8-11; Luk 9.3-5."Arì, ye re wɔ̀ɔ̀ kpankpan nìi taki dzwɛ̀u ɲe sàn nà, tɔ̀ sa ban ji touma yɛ e re. Nèe faumaà ko e sa, ye e taa to à re, ci Ŋaablà re Màsàbee waatsi tsyɛnbe naɔ ye ra."»

12 # Gok 19.24-28; Mat 11.24; Mat 10.15. Tà shɔ̀ùn, Yesù yè dzin è ra kɔn ci: «Xàà ! Mun nì ci e ra, gooɲaan kaatsi rìi Sodomùn wɔ̀ɔ̀ tàrau jɔ̀na jɔ̀na, tsìɛ̀ sii sèè, tɔ̀ sa nà fyanbe tɔ̀ wɔ̀ɔ̀ raà mà.»

13 # Ekk 23.1-18; Ezk 26.1–28.26; Ywk 4.4-8; Akk 1.9,10; Jkk 9.2-4. Tà shɔ̀ùn, Yesù yè dzin kɔn ci: «Ye Korazɛnka reè, byɛnbe ye nìn ! Bɛtsisayidaka reè, byɛnbe ye nìn ! Byɛnbe ye nìn, kàtsu kabagoo goo niì reè fau ye re wɔ̀ rèè doùn, twɛy ye ba na fau Tsiirì wɔ̀ɔ̀, ko Sidɔ̀n wɔ̀ rèè rìì doùn, twɛy wɔ̀ùndzin neè na bɔ̀tɛ sen jiu e ma nòn, yè e tsuù shi rɔ̀n, y'à kpàdè, ci ye yè e re jaamabee fau'n kur'la lakereò. 14Tɔ̀ kamà, tsìɛ̀ sii sèè, Tsiirika reè, ko Sidɔnka reè raa goo rèè nà fyanbe, è geren nèe wɔ̀ fii rèe raà tsɛ. 15#Ekk 14.13-15.Wo Kapɛrinaxumùn wɔ̀ɔ̀, wo yè bà à siɛ̀n ci wo ɲan nà sen fɔ jìrànxɔɔ̀ rà rìì gbɛ ? Fyeu ! Wo ma nà jàà rii fɔ jààndamaan doùn !»

16 # Mat 10.40; Mar 9.37; Luk 9.48; Yux 13.20. Tà shɔ̀ùn, Yesù yè dzin e re kàràndzin neè rà kɔn ci: «Mòò riì ye e toro wɔ ye re, tɔ̀ yeè e toro wɔu mun nì nè. Mòò riì ye ye maa, tɔ mun nì maaŋ. Mòò riì to ye mun maa, tɔ mun kabaà rìì maaŋ.»

Kàràndzin neè yè e kpɛyn sèè nau Yesù kpa min niì

17Tɔ̀un, kàràndzin muey ko tsyeòn yè dɔ̀n be jìɛ̀ rà. È nàu bè waatsi fa mɔn, è taama dzibeuma blà yeè e kpɛyn sèè na. È nàu wɔ, yè dzin Yesù rà ci: «Tsìfaà, wo tsoò baraka rɔ̀n, arì kwey rèè sa shiu ɲe jɔun. Ɲe ye ba na nìi jiu è jɔun, è na tɔ̀ rii faa.»

18Yesù yè dzin è ra ci: «Taki ! Mun na Sùtana bokɔɔn jaà jìran nɔ̀n, è nà mɛɛ̀ a ci ŋaà myɛ̀ɛn nìi tsuru. 19#Zab 91.13.À sààben, mun kpɛ̀yn dzi siun ye ra, nìi dzia à to, ye yè jìì myɛn reè, ko ɲaaloun neè tsɛ. Sùtan'nìi mùn ɲaàn, ye yè e san ɲinan tɔ̀ raa dzia tsɛ. Àwà, goo terenbɛy pɛn fa dzi ye tàrà waa. 20Ye re fààn ɲinaunmaà ko e sa kwey rèè mà, e maà tɔ̀ bà e taama dzibee goo waa. Ye tsoo rìi sɛbɛunma ni arìjinɛɛ̀ doùn Ŋaablà re, ye e taama dzibe tɔ̀ rii là.»

Yesù taama dzibeu min niì

(Matsiyù 11.25-27; 13.16-17)

21Tà waatsi soo ɲàn, Ŋaablà re Dzi Fɛnɛɛ yè Yesù taama dzibe cɛyn. È dzin tɔ̀un ci: «Mun Fà Ŋaablà, ŋaablaxɔɔ̀ ko dzɔ̀nxɔɔ̀ sa Tsifaà, mun tsoo dzi ɲɛɛn wo tsɛ, kàtsu wo nèe goo rèe rèè mɛnɛun mòdzin akiribla reè ko akiridzi reè mà, wo y'à kpàdè dziinkòòmɛ̀yn neè rà. Ɔ̀ɔn mun Fàà, kàtsu, tɔ̀ rii dzibeu wo ra.»

22 # Yux 3.35; Yux 10.15. Yesù yè dzin kɔn ci: «Mun Fàà gè sapɛ wɔu mun suun. Àwà Fàà soo boshɔ̀ùn, mòò pɛn na à tɔ̀ Dzin Kpirimaa mòò riì waa. Mòò pɛn tsu to na Fàà tɔ̀ à mòò riì waa, Dzin Kpirimaa soo boshɔ̀ùn, ko Dzin Kpirimaa sào ni, à y'à kpàdè mòò riì rà.»

23Tà shɔ̀ùn, Yesù yè e jaa kere e re kàràndzin neè rà, è dzin twɛy rà e si, ci: «Ye jaa ni nìi rà, mòò o moò ye tɔ̀ jà, tɔ̀ tsìfa raa wùbeu. 24Àwà mun nì ci e ra, ye nìi jàa, Ŋaablà re kɛɛra giri ko màsa giri sàò na ni à re, ye yè tɔ̀ jà, è to na à jà waa. Ye to nìi myɛ̀ɛn, è sàò na ni à re, ye yè tɔ̀ myɛ̀n, è to na à myɛ̀n waa.»

Tsì rii a modzìnsia

25 # Mat 22.35-40; Mar 12.28-34. Twɛy goo rèè sapɛ shɔùn, Sàrìyà Kaamoo reè mòò sɔn yè nà goomaa sen, è Yesù tey. À na ni à re, wò yeè Yesù dzuun bo rìì tà goomaa ka. À ci tɔ̀un ci: «Kàrànfaà, mun wù, mun yè fee rìì fa, min dzi jaamabe dziù dòbɛɛ tàrà shɛn ?»

26Yesù yè dzin à ra ci: «Fee rìì sɛbɛɔ̀n Ŋaablà re sàrìyaa kìtaabuà doùn. Wo y'à kàr'na w'a myɛ̀ɛn dzùrù.»

27 # Sdk 6.5; Sak 19.18. È dzin Yesù rà ci: «Àwà, sàrìyaa doùn, à sɛbɛɔ̀n nèe tsuru ci:

"À wù, e mùn Tsìfa Ŋaablà kɛn,

kɛ̀n'n kur'la sapɛ ra.

A to, à goò yè bà ni à vunun tsɛ,

è bà ni a xɔɔn tsɛ.

A goò kun a faan sapɛ ka,

a kɛsɛmàà sapɛ yeè bà ni à tsɛ.

Tà shɔ̀ùn, a moò sia kɛ̀n jàci a yɛr'la."»

28 # Sak 18.5. À tà dè dòu min nìi, Yesù yè dzin à ra ci: «Wo nìi dèu, tɔ sààben. Wo ye tɔ̀ shi jiì, wo nà tsi.»

29Tà dèumaà ko e sa ra, kpir'la naà n'a re, è tsiì Yesù rè goomaa nà waa. È Yesù tey ci: «Tsì rii soo to mun mòdzìnsia ?»

30Tɔ̀un, Yesù y'à re goomaa latsi ko gooma bɔɔ soo ka nèe tsuru ci: «Kpiri sɔn ni na boò Yerusalɛmùn wɔ̀ɔ̀ doùn, è bà jàà beè Yerikò wɔ̀ rɔ̀n. À bèkɔɔnà shia rè, gookoronfabaa rèè swey yè bè e mɛɛy à tsɛ. Y'à suun ge reè sapɛ tsi à ra, y'à ban, fɔ yè b'a mɛ̀ɲɛ̀n. Yè e bon wɔ à ra, y'à maa jiumaà to mɔn fùn tsuru. 31Saakagoojaabobaa sɔn nàu bà nàa tɔ̀ shia rè, tɔ̀ yeè nà bo kpir'la mɛ̀ɲɛ̀unmaà tsɛ. Tɔ nàu à jà tɔ̀ tsuru min niì, è bonbo à ra, è geren. 32Tɔ̀ fau'n kuru soo rà, kpiri sɔn yeè nà tɔ̀ shi soo sen kɔn, tɔ̀ na Ŋaablà re gbà blàa doùn faagoofabaà sɔn. À sa yeè siin, è bonbo à ra, è geren. 33#Mbk2 28.15.Twɛy kpiri fiɛ̀ dɔ̀n boumaà shɔ̀ùn, Samarika kpiri sɔn sa bekɔɔn wɔ̀ùn, tɔ̀ sa na nàa tɔ̀ shi sɔɔ̀n tsɛ. À nàu wɔ à gàne rɔ̀n, è kpir'la jà. À dziu kpir'la jà tà tsuru min niì, à màtsuru y'a kun fɔ è bè geren. 34Tɔ̀un, è kpɛrɛ̀ à ra. È kpɛrɛu à ra, à y'à mà ɲuun neè fòò jan ka, è ɲinin wɔ è ra, è shì. Tà shɔ̀ùn, à y'à sen tsuù e re shùkwɛ̀ɛn bòùn, è b'à ka tɔnɔn jaa gba sɔn doùn, è b'a ji mɔn. À bèu à ji mɔn, è to à tɛyn, à lamɔnɔ̀ùn'n kuru wuu fa. 35Jià nàu seey, è gbà sar'la bo sìn gbàtsià rà, è dzin à ra, ci è taa tou'n kuru wube kpir'lee re, fɔ wò yeè bè sèè na. È dzin, ci ɲɛyn goo ge o ge ye na jà à ɲan wò shɔ̀ùn, wò ye na sèè na, wò nà tɔ̀ sìn à ra.»

36Yesù twɛy gooma reè dè dou min niì, è kpir'la tey ci: «Wo re o, nèe kpiri zhiigi ree ɲan, tsì rii bàu kpiri mɛɲɛunmaà mòdzìnsia ?»

37Tɔ̀un, Sàrìyà Kaamoo yè dzin Yesù rà ci: «Nìi wùbeu à mà, tɔ̀ rii y'à mòdzìnsia.»

Yesù sa yeè dzin à ra ci: «Cɔ, à wù wo sa yeè tɔ̀ soo rìì fa.»

Yesù bèu Mariyamùn ko Maritsì kpà min niì

38 # Yux 11.1. Àyìwà, twɛy gooma reè shɔùn, è Yesù ko e re kàràndzin neè to Yerusalɛmùn wɔ̀ùn shià tsɛ, yè bè wɔ wɔ̀ sɔn ɲan. Tàan sɔn na ni ta wɔ̀ɔ̀ doùn, nìi kir'là ci Maritsì. Maritsì yè bè Yesù ko e re kàràndzin neè tɔɔnsibema bo e re. 39Maritsì tseyn taan sɔn na ni, nìi kir'là ci Mariyamùn. Tɔ̀un, Mariyamùn yè bè e tsuù Tsìfa Yesù tɛyn, à re gooma reè lamyɛɛ̀n. 40Tɔ̀ to y'a tàrà, Maritsì soo jaàn taɔ faagoò rà gbàà doùn. È nà e kpɛrɛ̀ Tsìfa Yesù rà, è dzin à ra ci: «Mùn Tsìfaà, mun tseyn taan yè mun soo pe to faagoò rà nèe tsuru, wo re, tɔ wù ɔ̀ ? À dè à ra, ci è nà wɔ n na.»

41Tɔ̀un, Tsìfa Yesù yè dzin à ra ci: «Maritsì, Maritsì, wo vyɛ̀ɛ, wo y'à yɛrɛ jaàn taa goo giri ka. 42Mòò nàfa to ni goo soo den ni ɲàn, è geren dzyee rè sapɛ tsɛ. Mariyamùn wùɔ rìì seòn e jaa ra, mòò fa dzi nìi tsi à ra waa.»

Currently Selected:

Lukì 10: BDZU

Highlight

Copy

Want to have your highlights saved across all your devices? Sign up or sign in

Learn More About Bible Dzùùngoo Unicode

Popular Bible Verses from
Lukì 10

Videos for Lukì 10

Luke 10-24

The Bible Project

Parable of the Good Samaritan

Jesus Film Project

Lukì 10

Popular Bible Verses from
Lukì 10

Videos for Lukì 10

Luke 10-24

Parable of the Good Samaritan

Bible:

Dzùùngoo

Version: Bible Dzùùngoo Unicode - BDZU

Lukì 10

Lukì 10

Popular Bible Verses from Lukì 10

Videos for Lukì 10

Luke 10-24

Parable of the Good Samaritan

Bible:

Dzùùngoo

Version: Bible Dzùùngoo Unicode - BDZU

Lukì 10

Popular Bible Verses from
Lukì 10