Lukì 9

Yesù yè e re kàràndzin neè kau min niì, ci yè bè mòdzian toro kɔ̀ Ŋaablà re Goomaa nà

(Matsiyù 10.5-15; Marikì 6.7-13)

1Twɛy goo rèè sapɛ shɔùn, Yesù yè e re kàràndzin teeŋ fii rèè sapɛ dzyeèmaa kiri. Tɔ̀un, è dzi ko fààn sin è ra, nìi dzia à to yè kwey rèè kaa bo kweykɔɔn reè kpɛyn, yè bà dzia ɲìnìnkɔɔn reè sa cɛrɛmabe. 2Tà shɔ̀ùn à yè è ka, ci yè bè waajibia fa, yè Ŋaablà re Màsàbee Kùnàgoo Dziɔ̀ dè mòdzian nà, yè ɲìnìnkɔɔn reè sa cɛrɛmabe. 3È dzin è ra ci:

«Jìɛ̀ doùn, e maà gèsɔn pɛn sen e suun waa. E maà kɔ̀n sen, e maà bɔ̀tɛ sen, e maà ɲwɛynmage sen, e maà ɲɛyn sen, mɛ̀yɛ̀ dzin fii fii to mà bà ni e soo sookɔɔn pɛn ne waa. 4Àwà ye be, ye be dɔ̀n fɔɔn o fɔɔn re, ye to tɔ̀ fɔɔn rè, fɔ è bè suu e beè dzu. 5#Kɛf 13.51.#Luk 10.4-11.E to ye be gàne rìi ɲàn, twɛy mòdzin neè yè bè e nɔn, ci e fa e jaà ye re, e bokɔɔn è re gàne rɔ̀n, ye e san nà kpankpaàn ban ji to mɔn. Tɔ nà bà shɛɛrɛbe, è kpàdè è ra, ci è ɲaan fau.»

6Àyìwà, kàràndzin neè yè fù, yè shia sen, yè bèe wɔ̀ rèè ɲàn. Yè Kùnàgoo Dziɔ̀ dè beè mòdzian nà, yè ɲìnìnkɔɔn reè cɛrɛmabe bèe min niì sapɛ.

Yesù goojaa màsà kpiri Erodzì cìimà sàun min niì

(Matsiyù 14.1-12; Marikì 6.14-29)

7 # Mat 16.14; Mar 8.28; Luk 9.19. Àyìwà, goo nìi sapɛ ni sààn, màsà kpiri Erodzì yè nà tɔ̀ myɛ̀n. À naà à tɔ̀ wo nà goo nìi soo fa dɛ, kàtsu, mòdzian na gooma giri dèe Yesù tsɛ. Swey dziàn ci à Mòdzìn Jààràfoobaa Yùxanà rìì sèè kpunan nauma. 8Swey ci à kɛɛra Àliì rìì sèè nauma. Swey yè bà dziàn kɔn, ci à Ŋaablà re dan kɛɛra reè sɔn ni sèè kpunan nauma. 9Màsà kpiri Erodzì yè dzin ci: «Mun yɛ̀r'la rìì y'à tou, yè Mòdzìn Jààràfoobaa Yùxanà kùngɔɔ̀ kùnùn. Tsì rii soo to yè bà nèe kpir'lee kɔn, yè bà nèe sapɛ deè tɔ̀ tsɛ ?» À na à gaa tɔ̀un, wò yɛ̀r'la jaadzin yeè ɲɛn Yesù ma.

Yesù ɲwɛɛ̀n sìun jàmaà nà min niì

(Matsiyù 14.13-21; Marikì 6.30-44; Yùxanà 6.1-15)

10Àyìwà, kɛɛradzin neè sèè nau waatsi riì bwèy yè bo jìɛ̀ rà, è goo o goo fau jìɛ̀ doùn, yè nà tɔ̀ sapɛ lakɛ̀ɛ̀y Yesù rà. Tɔ̀un, Yesù yè fù è ka, è bo è ka mòdzian tɛyn, yè bè fɔ wɔ̀ sɔn kpakèrè ci Bɛtsisayidà. 11Mòdzian nàu è bèma tɔ̀ min niì, yè bè è kpɛyn mɔn. Tɔ̀un, è nàu wɔ Yesù tsɛ, à yè è kuun'n kuru wuu fa. È Ŋaablà re màsàbee gooma de è ra. Ɲìnìnkɔɔn niì reè to na à gaa à re, ci è ye cɛrɛmabe, è twɛy sa cɛrɛmabe.

12Tɔ̀un, bwèè dò naà waatsi riì bwèy, Yesù rè kàràndzin teeŋ fiɛ̀ yè e kpɛrɛ̀ à ra, yè dzin à ra ci: «Ɲe yɛ gàne rìi ɲàn mìin, à jènjàà kor'nì. À to mòdzian yè bè mùn dziire wɔ rèè, ko ten dzii reè rà, yè bè ɲwɛyn gaa ɲɔn, yè ɲɛnma goo jaa bo !»

13Yesù yè dzin è ra tɔ̀un ci: «Ye yɛ̀r'leè yè è kɔ̀ ɲwɛyn y'à ɲɔn !»

Yè dzin Yesù rà ci: «Ɲwɛyn nìi ni ɲe re, à na gereon buru kunun nun ko ji dzin fii bàsɔùn tsɛ waa. Fɔ wo ye ba ni à re, mùn yeè bè ɲwɛyn nì fì na sìn nèe jàma brìsi rèe sapɛ ra boshɔ̀ùn.»

14Àwà, jàma nìi na ni mɔn, è na kpiri gbaa nùn boò. Yesù yè dzin e re kàràndzin neè rà ci: «Y'a to yè e tsuù tsùù bè mòkun dzyeè tsye tsyeùn tsuru.»

15Àwà, kàràndzin neè yè Yesù rè goomaa bo e shi tsɛ, y'à fa mòdzian sapɛ yeè e tsuù tà tsuru. 16Yesù yè twɛy buru kunun nun nèè, ko ji dzin fiɛ̀ sen. À yè è seun, è jaà ɲansen jìran nɔ̀n, è baraka sìn Ŋaablà ra twɛy ɲwɛyn nèè goò rà. Tà shɔ̀ùn, à yè è tara tara, à yè è wɔ e re kàràndzin neè suun, ci y'à tanan jàmaà nà. 17Tɔ̀un, è sapɛ y'a ɲɔn, yè cɛn kpan. À dzyee kùnkwììn touma rèè, tɔ̀ tsɛumaà, yè sèè teeŋ fii tsyɛn.

Piyɛrì ci Yesù Ŋaablà Jaa ra Modzìn

(Matsiyù 16.13-20; Marikì 8.27-29)

18Sii sɔn see, Yesù na Ŋaablà mafyɛ̀ɛn gàne sɔn ɲan e soone. À nàu dò waatsi riì bwèy, à re kàràndzin neè yè e kpɛrɛ̀ à ra. À yè è tey ci: «Mòdzian ye ba goomaa mun tsɛ, è dziàn ci mun tsì rii ?» 19#Mat 14.1,2; Mar 6.14,15; Luk 9.7,8.Twɛy yè dzin à ra ci: «Swey ci wo Mòdzìn Jààràfoobaa Yùxanà. Swey ci wo kɛɛra Àliì. Swey yè bà ci wo Ŋaablà re dan kɛɛraa sɔn ni sèè kpunan nauma.» 20#Yux 6.68,69.Yesù yè è tey kɔn ci: «Ye do, ye ci mun tsì rii ?» Piyɛrì yè dzin à ra ci: «Ŋaabla Jaara Mòdzìn nìi goo dèu, à wo rìì !»

21Tɔ̀ ɲan, Yesù y'à dè màxɔbe è ra, ci è mà à goomaa dè mòò pɛn jaa ra waa. 22È dzin è ra kɔn ci fɔ Adamà dziàn yè byɛn cɛyn. Bɔɔ rèè, ko Saaka Jɔundzin neè, ko Sàrìyà Kaamoo reè yè e nɔn à re, è vu. À saunmaà bwèy zhììgìraa sii sèè, è sèè kpunan bo saàn ɲàn.

23 # Mat 10.38; Luk 14.27. Tà shɔ̀ùn, è dzin è sapɛ ra ci: «Mòò riì ye ba ni à re è gban mun kpɛyn, fɔ è ɲɛyn bo e yɛrɛ tsɛ. Màan ji o ji seroun, è gbaàn gɔɔ̀ sen, è kòmànà e gban mun kpɛyn. 24#Mat 10.39; Luk 17.33; Yux 12.25.Àwà, mòò riì y'à gaa ci wò yeè e xɔɔn tsi, tɔ nà fɔn à ɲan. Ŋà Mòò o moò nà fɔn e xɔn nɔn mun kamà, tɔ nà à tsi. 25Àwà à fèe wùbee mòò mà è dziɲaan sapɛ tarà bà e raa, è fɔn e xɔn nɔn, tàmafa à raa yè bara ? 26Tɔ̀ rii kamà, wo mòò riì ci wo seè, mun ko n ne gooma reè kamà, Adamà dziàn sa ye na nà e nɔɔrɔɔ̀ doùn sii rìi sèè, è nà e fa Ŋaablà nɔɔrɔɔ̀ doùn ko mɛ̀rɛ̀kɛ̀ fɛnɛ reè raà doùn, à tsu fa e tsiì è tɔ̀ tsìfa tɔ̀ tɔ sii sèè waa. 27Sààben na, mun nì ci e ra, nìì reè tsìiŋnà mìin, swey fa san fyeu, ni è na Ŋaablà re Màsàbee jà.»

Yesù lakereu min niì jèèn tsɛ

(Matsiyù 17.1-8; Marikì 9.2-8)

28Àyìwà, twɛy gooma reè dèumaà bwèy ŋaalòn tsuru, Yesù yè Piyɛrì, ko Yùxanà, ko Yàkubà kiri gban e ra. Tɔ̀un, yè bè jèn sɔn tsɛ, Yesù yè bè Ŋaablà mafyɛ̀n. 29È Yesù to Ŋaablà mafyɛ̀ɛ̀n nà, Yesù jaakɔrɔɔ̀n yè e lakere. À mà vya reè yè siin, twɛy yè fyɛ tɛrɛ, tɛrɛ, tɛrɛ fɔ yè bè den deèn. 30Tà nɔ̀nkɔɔrɔn, kpiri fii yè jà Yesù tɛyn, twɛy yè e maa yè goomaa à ka. Twɛy kpiri fiɛ̀ na kɛɛra Musà, ko Àliì. 31Twɛy ci e ye nà bo, vyevyee brìsi na è laguruɔ̀ nìi boo Ŋaablà ɲan. Yesù na nà e na kuan bo e shi tsɛ nìi tsuru, fɔ è nà bè wɔ è san Yerusalɛmùn wɔ̀ɔ̀ doùn, è na tɔ rii gooma deè à ka.

32Twɛy goo rèè faa waatsi riì bwèy, tɔ̀ y'a tàrà Piyɛrì, ko e koòsi rèè na cìi gbànmaɔ̀n nòn. È nàu kpunan, yè Yesù nɔɔrɔɔ̀ jà, ko nèe kpiri fii rèe, yè bà tsìiŋnà à ka. 33Twɛy kpiri fii rèè ci e ye bo Yesù tɛyn waatsi riì bwèy, yè bè, Piyɛrì yè dzin Yesù rà ci: «Kàrànfaà, mìn bà ni mìin tɔ wù dɛ. Mùn nà bùù gba vyama zhiigi kun, wo raa soo, Musà raa soo, ko Àliì raa soo.» Piyɛrì kpɛ̀yn na goomaa nì, ŋà, à naà à tɔ̀, wo nìi dèe waa. 34È Piyɛrì to goomaa nà tà tsuru, ŋaamunun sɔn yeè dan jìran nɔ̀n tɔ̀ nɔ̀nkɔɔrɔn, tɔ̀ yeè nà è tsyee, ciàn yè bà ni è tsɛ. Piyɛrì ko e koòsi rèè y'à jàu min niì ci tɔ̀ ŋaamun'na nàu ye tsyee, yè shi. 35#Ekk 42.1; Mat 3.17; 12.18; Mar 1.11; Luk 3.22.#Piy2 1.17,18.Tɔ̀un, vu sɔn yeè bo ŋaamun'na ɲàn mɔn, tɔ̀ yeè dzin ci: «Nèe mun Dzin Kpir'la rìì yɛ nèe. Mun wò rii boo n jaa ra. Ye e toro wɔ à re !»

36Tɔ̀ goomaa dè dòumaà shɔ̀ùn vu rèe re, Yesù soo boshɔ̀ùn, Piyɛrì ko e koòsi rèè na mòò kpɛrɛ jà dɛ. Twɛy sa yeè e mɛnshɛ̀n tà goò tsɛ. È na dzin mòò rà tɔ̀ waatsi rɔn, ci ye nèe ko nèe rìì jàu waa.

Yesù kpiri sɔn ne dziin kweykɔɔn cɛrɛmabeu min niì

(Matsiyù 17.14-18; Marikì 9.14-27)

37Tɔ̀ raa gbee, yè jàà bo jèèn tsɛ. È jàaŋ waatsi riì bwèy, jàma brìsi yè nà Yesù kùùntsi. 38Tɔ̀un, kpiri sɔn yeè to jàmaà ɲàn mɔn, è nèe gooma ree dèe fààn na ci: «Mùn kàrànfaà, mun wo màfyɛ̀ɛn nì, a yɛrɛ to e n dzin kpir'la siin n ne. À soo pe rii ni mun ne. 39Kwey sɔn ni ni à kpɛyn. Tɔ̀ y'a kun nìi tsuru, è maa è gɛɛ boò. Kwey rèe y'à toò è soron sor'nà, dzweeyuà yè kànkan boò à dzu. À na à bàjia tabe waa. È na à bàji waatsi riì bwèy, à mɛ̀ɲɛunma maa ji toò mɔn nì. 40Mun wo re kàràndzin neè màfyɛ̀un, ci yè kwey rèe kaa bo à kpɛyn, ŋà è na dzi waa.»

41Yesù yè dzin tɔ̀un ci: «Ye she mòdzìn ɲan ree reè, e na ɲɛɔ̀n Ŋaablà ra ! Mun nà to ye ka min ye re goo rèè ku n ɲan fɔ waatsi kɛn ?» Tà shɔ̀ùn, è dzin kpir'la rà ci: «Nà ko a dzin kpir'la ka mìin.»

42È bèkɔɔn dziɛ̀n ka, è ci e ye bè tsyɛnbe Yesù rà, kwey rèe yè dziɛ̀n sen mɛɛy dzɔn nɔ̀n, à y'à to è soron sor'nà. Tɔ̀un, Yesù yè e cerè kweè tsɛ, ci è bo dziɛ̀n kpɛyn. Kweè yè bo dziɛ̀n kpɛyn, è cɛrɛmabe. Tɔ̀un, Yesù y'à wɔ e faà suun. 43Nìì reè na ni mɔn, à goò yè ji è sapɛ dzii tsɛ. È sa ci Ŋaabla dzia taki.

Yesù rè goo fakɔɔn reè na mòdzian sa ɲɛyn seòn, è bà è duungoo doò. È dzin e re kàràndzin neè rà tɔ̀un ci: 44«Ye e toro wɔ, ye nèe gooma ree myɛ̀ùn'n kuru wube: Mòo nà Adamà dziàn wɔ mòdzian suun.» 45Yesù tà gooma niì dèu, kàràndzin neè naà tɔ̀ dzin seòn waa. Tɔ̀ gooma ree sa to na deò rìì, à dzuɔn yè mɛnɛn è mà, sànko, è mà dzi à dzin sen waa. È sa to yè shi, è na Yesù tey à dzuɔn mà waa.

46 # Luk 22.24. Àyìwà, sɔ̀swɛy sɔn yeè nà fù kàràndzin neè ko e si fi. Tɔ̀ sɔ̀swɛɛ̀ doùn, è na n'a re y'a tɔ̀ mòò riì blà dzyee rèè mà ye ɲan. 47Yesù yè è duùn naà tɔ̀ nìi fa, è dziin sɔn kun na, è tɔ̀ tsìì e tɛyn. 48#Mat 10.40; Luk 10.16; Yux 13.20.Tɔ̀un, è dzin kàràndzin neè rà ci: «Mòò o moò nèe dziin nèe tsuru kuun'n kuru wubee mun kamà, tɔ mun nì kuun'n kuru wubeu. Mòò o moò to mun kuun'n kuru wubee, tɔ mun kabaà rìì kuun'n kuru wubeu. Àwà, ye sapɛ ɲan, mòò riì ci wò dzyɛ̀n, tɔ̀ rii ni ye jɔun.»

49Yùxanà yè goomaa sen tɔ̀un, è dzin ci: «Kàrànfaà, ɲe kpiri sɔn jau, à kwey rèè kaa boò mòdzian kpɛyn wo tsoò baraka rɔ̀n. Ɲe na ni à re, ɲe y'à kaa tɔ̀ faa tsɛ, kàtsu, à na e gbaɔn wo kpɛyn ɲe ka waa.» 50Yesù yè dzin à ra tɔ̀un ci: «E maà à kaa tɔ̀ tsɛ waa ! Mòò riì ma ba ye ɲan, tɔ̀ ye wùù rii.»

51Àyìwà, Yesù nà bo dziɲantsiɛ doùn waatsi riì bwèy, è bè Ŋaablà re, tɔ̀ waatsi na wɔ naɔ nìi fa, Yesù y'à ji e duùn, ci à kɛ̀nsɛɛn ye ba dzii o dzii, fɔ wò yeè bè Yerusalɛmùn. 52Àwà, à ci e ye shia kun, è kɛɛra ì ka bè e jɔun ŋe. Twɛy yè bè, yè bè wɔ Samari mar'la wɔ̀ sɔn ɲan. È bèu wɔ mɔn, yè dɔ̀n tɔ̀ wɔ̀ rɔ̀n, ci ye nà tɔɔnsibema goo jaa bo tsùù Yesù rè. 53Tɔ̀un, tɔ̀ wɔ̀ dòùn dzin neè yè bè e nɔn, ci Yesù fa e jaà ye re waa, kàtsu à bèe Yerusalɛmùn kèr'lì. 54#Mak2 1.9-16.Kɛɛra reè nàu sèè na Yesù kpà waatsi riì bwèy, y'à jaa dè à ra. Tɔ̀un, tɔ̀ goò yè dɔ̀n kàràndzin Yàkubà ko Yùxanà kpɛyn fɔ è bè geren. Yè dzin Yesù rà ci: «Mùn Tsìfaà, a fa à to, mùn y'a fa sàà yè bo jìrànxɔ rɔ̀n, è nà è dzu, è ko shià sa ba soo kɛ ɔ ?» 55È tɔ̀ goomaa dèu min niì, Yesù yè e jaa kere è kpɛyn, è gooma ɲaan de è ra cɛyn. 56Tà shɔ̀ùn, yè dɔ̀n be wɔ̀ kpɛrɛ ɲan.

Mòò yè e gbaàn Yesù kpɛyn nìi tsuru

(Matsiyù 8.19-22)

57Àwà, è bèkɔɔn to Yerusalɛmùn shia tsɛ, sɔn yeè dzin Yesù rà ci: «Wo ye be min o min, mun nà n gban wo kpɛyn.» 58Yesù yè dzin à ra ci: «Kɔ̀ɔ̀ rìì ni tsɛ̀ kùn kpar'nèè rè, è dɔ̀ɔn min niì. Jìran nɔ̀n kɛ̀yn neè, tàn yè bà ni twɛy rè, yè e ɲɛɛn min niì. Ŋà Adamà dziàn, gàne na ni tɔ̀ tsoo ra, à nà e kungɔ wɔ min niì waa.»

59Tà shɔ̀ùn, Yesù yè dzin kpɛr'la ci: «Wo nìi yɛ nèe, a gban n na.» Tɔ̀ yeè dzin ci: «Tsìfaà, à to min bè n faà fùn wɔ ŋe.» 60Yesù sa yeè dzin à ra ci: «À to fùn nèè yè e re fùn nèè wɔ. Nìi wo, bè mòdzian toro kɔ̀ Ŋaablà re Màsàbee Kùnàgoo rà.»

61 # Mak1 19.20. Mòò kpɛrɛkuru yeè dzin Yesù rà kɔn ci: «Mùn Tsìfaà, mun kpɛ̀yn nà n gban wo ra, ŋà, à to min bè n beè dè n ne tsii dzin neè rà ŋe.» 62Yesù yè dzin à ra ci: «Nìì fɛɛfabaa rìi yè e jaa ker'la e bonè, è siin fa, mòò riì ni tɔ̀ tsuru, tɔ̀ tsìfa fa dzi Ŋaablà re Màsàbee faagoò wùbe waa.»

Currently Selected:

Lukì 9: BDZU

Highlight

Copy